ᐅᖃᓚᐅᑎᓯᐅᑏᑦ

You are here

ᓄᓇᓖᑦ ᑲᑎᑦᑐᑦ ᒪᑭᑉᐸᓪᓕᐊᑎᑦᓯᒍᑎᒃᓴᒥᓄᑦ ᓄᓇᕗᒻᒥ ᓯᓚᒧᑦ ᓱᖏᐅᑎᒍᑎᒃᓴᒧᑦ

ᕕᕝᕗᐊᓕ 03, 2017

ᑐᓴᒐᑦᓴᓐᖑᖅᑎᑕᐅᔪᖅ

ᓄᓇᓖᑦ ᑲᑎᑦᑐᑦ ᒪᑭᑉᐸᓪᓕᐊᑎᑦᓯᒍᑎᒃᓴᒥᓄᑦ ᓄᓇᕗᒻᒥ ᓯᓚᒧᑦ ᓱᖏᐅᑎᒍᑎᒃᓴᒧᑦ

ᐃᖃᓗᐃᑦ, ᓄᓇᕗᑦ (ᕕᑉᕗᐊᓕ 3, 2017) − ᓄᓇᕗᑦ ᒐᕙᒪᖓ (GN) ᐊᒻᒪᓗ ᓄᓇᕗᑦ ᑐᓐᖓᕕᒃ ᑎᒥᖓᑕ (NTI), ᑲᑐᔾᔨᖃᖅᑐᑎᒃ ᑲᓇᑕ ᒐᕙᒪᖓᓂᒃ, ᐅᓪᓗᓂᒃ ᐱᖓᓱᓂᒃ ᑲᑎᒪᓚᐅᖅᑐᑦ ᐋᔩᕋᕈᑎᖃᖅᑐᑎᒃ ᒪᑭᑉᐸᓪᓕᐊᒍᑎᒃᓴᖓᓂᒃ ᓄᓇᕗᑦ ᓱᖏᐅᑎᕙᓪᓕᐊᒋᐊᖃᕐᓂᖓᓄᑦ ᓯᓚᐅᑉ ᐊᓯᔾᔨᐸᓪᓕᐊᓂᖓᓄᑦ. ᑲᑎᒪᓚᐅᖅᑐᑦ ᔭᓐᓄᐊᓕ 31-ᒥᓂᒃ ᕕᑉᕗᐊᓕ 2, 2017−ᒧᓄᑦ, ᐃᖃᓗᓐᓂ.

ᑲᑎᓐᓂᕆᓚᐅᖅᑕᖓ ᑲᑎᑎᑦᓯᓚᐅᖅᑐᖅ 70 ᖃᓂᒋᔮᓃᑦᑐᓂᒃ ᓄᓇᓕᓐᓃᖔᖅᑐᓂᒃ, ᑭᒡᒐᖅᑐᐃᔪᓂᒃ ᓄᓇᓕᓕᒫᓂᒃ ᓄᓇᕗᒻᒥ. ᐃᓐᓇᐃᑦ, ᒪᒃᑯᑦᑐᑦ, ᓄᓇᓕᓐᓂ ᐊᖑᓇᓱᒃᑐᓕᕆᔨᒃᑯᑦ ᑲᑐᔾᔨᖃᑎᒌᑦ, ᐊᒻᒪᓗ ᓄᓇᓕᓐᓂ ᑎᒍᒥᐊᖅᑏᑦ ᐋᔩᕋᖃᑕᐅᓚᐅᖅᑐᑦ ᖃᓄᖅ ᐃᓄᐃᑦ ᓱᖏᐅᑎᖃᑦᑕᕐᓯᒪᓂᖏᓐᓂᒃ ᐊᓯᔾᔨᖅᑐᓄᑦ ᑭᖑᓂᕆᓚᐅᖅᑕᑎᓐᓂ, ᐊᑦᓱᕈᕐᓇᖅᑐᓂᒃ ᓵᓐᖓᔭᕆᐊᖃᖃᑦᑕᕐᓂᖏᑦ ᓄᓇᓖᑦ ᒫᓐᓇ, ᐊᒻᒪᓗ ᖃᓄᖅ ᓄᓇᓖᑦ ᓱᖏᐅᑎᕙᓪᓕᐊᒍᑎᖃᕈᓐᓇᕐᒪᖔᑕ ᓯᕗᓂᑦᑎᓐᓂ ᒪᑭᒪᔾᔪᑎᒃᓴᖏᓐᓄᑦ.

"ᓱᖅᑯᐃᕐᓯᓯᒪᒋᐊᖃᕋᑦᑕ ᐃᓚᐅᑎᑦᓯᓂᕗᑦ ᓄᓇᓕᓐᓄᑦ ᐊᑐᐃᓐᓇᕈᕐᓴᐃᓗᑕ ᐸᕐᓇᓪᓗᑕᓗ ᓯᓚᐅᑉ ᐊᓯᔾᔨᐸᓪᓕᐊᓂᖓᓄᑦ,’ ᐅᖃᓚᐅᖅᑐᖅ ᔫ ᓴᕕᑲᑖᖅ, ᓄᓇᕗᑦ ᒥᓂᔅᑕᖓ ᐊᕙᑎᓕᕆᓂᕐᒧᑦ. "ᐱᖕᒪᕆᐅᒻᒪᑦ ᓄᓇᓖᑦ ᓂᐱᖏᑦ ᑐᓴᖅᑕᐅᖃᑦᑕᕆᐊᖃᕐᓂᖏᑦ ᐃᓚᓕᐅᔾᔭᐅᖃᑦᑕᕐᓗᑎᓪᓗ ᐃᑯᓪᓚᐅᒥᑎᑦᓯᒍᑎᒃᓴᓄᑦ ᓱᖏᐅᑎᕙᓪᓕᐊᒍᑎᒃᓴᓄᓪᓗ ᐸᕐᓇᑕᐅᕙᓪᓕᐊᓂᖓᓄᑦ ᒐᕙᒪᑦᑕ ᐱᓕᕆᐊᒃᓴᖏᓐᓄᑦ. ᐱᓇᓱᐊᒐᕆᒐᒃᑯ ᓈᖕᒪᑦᓯᐊᑐᒃᑯᑦ ᐃᓚᐅᑎᑕᐅᑦᓯᐊᕆᐊᖃᕐᓂᖏᓐᓂᒃ ᓄᓇᕗᒻᒥᐅᑦ ᓯᕗᒧᐊᒃᐸᓪᓕᐊᖃᑎᒌᑦᑎᓪᓗᑕ ᑕᑉᕗᖓ."

"ᑖᓐᓇ ᑲᔪᓯᑦᓯᐊᓚᐅᖅᑐᖅ ᓯᕗᓪᓕᕐᐹᒥ ᐊᓪᓗᕆᐊᕐᓂᕗᑦ ᐃᓚᐅᑎᑦᓯᓂᕐᒥᒃ ᓄᓇᓕᖕᓂ ᓱᖏᐅᔾᔨᓂᕐᒧᑦ ᐊᒻᒪᓗ ᒪᑭᑉᐸᓪᓕᐊᒍᑎᒃᓴᑎᓐᓂᒃ ᓱᖏᐅᑎᓯᒪᓗᑕ. ᐊᖏᕈᑎᒋᓯᒪᑦᓯᐊᖅᑕᕗᑦ ᑲᔪᓯᑎᑦᓯᕙᓪᓕᐊᓂᖅ ᐃᓚᓕᐅᑎᑦᓯᓯᐊᕐᓗᑕ ᓄᓇᓕᖕᓂᒃ. ᐱᓇᓱᐊᖃᑎᒌᒐᐃᒐᑦᑕ ᐱᕙᓪᓕᐊᑎᑦᓯᖃᑎᖃᕐᓂᕐᒥᒃ ᐋᖅᑭᒍᑎᒃᓴᓂᒃ, ᓄᓇᓖᑦ ᓱᖏᐅᑎᓯᒪᑦᓯᐊᕈᓐᓇᓂᕐᓴᐅᓂᐊᖅᑐᑦ ᐊᓯᔾᔨᖅᑐᓄᑦ ᑕᑯᓐᓇᑕᑦᑎᓐᓄᑦ ᐊᒻᒪᓗ ᓂᕆᐅᒋᔭᑦᑎᓐᓂ ᓯᕗᓂᑦᑎᓐᓂ. ᑲᑐᔾᔨᖃᑎᒌᑦᑐᓂᒃ ᑕᑯᖃᑦᑕᕈᒪᓂᕐᓴᐅᔪᒍᑦ ᓲᕐᓗ ᒫᓐᓇᑐᑦ ᓯᕗᒧᐊᒃᐸᓪᓕᐊᑎᓪᓗᑕ ᓯᕗᓂᑦᑎᓐᓄ." ᐅᖃᖅᑐᖅ ᔭᐃᒥᓯ ᐃᑦᑐᓗᒃ, ᐊᖓᔪᖅᑳᑉ−ᑐᒡᓕᐊ ᑐᓐᖓᕕᒃᑯᓐᓂ.

ᑲᑎᒪᔭᖅᑐᕐᓯᒪᔪᑦ ᐅᓂᒃᑳᖃᑦᑕᓚᐅᖅᑐᑦ ᐋᔩᕋᕈᑎᖃᕐᑐᑎᒃ ᖃᓄᖅ ᓄᓇᓖᑦ ᐃᖅᑲᓇᐃᔭᖃᑎᒌᒍᓐᓇᕐᒪᖔᑕ ᒐᕙᒪᓅᓕᖓᔪᓕᒫᑦ ᐊᒻᒪᓗ ᐃᓄᐃᑦ ᑲᑐᔾᔨᖃᑎᒌᑦ ᐋᖅᑭᑦᓱᐃᖃᑎᒌᑦᑎᓪᓗᒋᑦ ᐊᖅᑯᑎᒃᓴᒥᒃ. ᑲᑎᒪᓂᕐᒥ ᑲᑎᒪᔭᖅᑐᕐᓯᒪᔪᓂᒃ ᑐᑭᓯᓂᐊᓚᐅᖅᑐᑦ ᐅᖃᐅᓯᖏᑎᒍᑦ ᐊᒻᒪᓗ ᓄᓇᓖᑦ ᓯᕗᓪᓕᐅᔾᔭᐅᔭᕆᐊᓕᖁᑎᖏᓐᓂᒃ, ᐱᔪᒪᔭᖏᓐᓂᒃ ᐊᒻᒪᓗ ᐱᔭᕆᐊᓕᖏᓐᓂᒃ ᒪᑭᑉᐸᓪᓕᐊᒍᑎᒃᓴᖏᓐᓄᑦ ᓯᓚᒧᑦ−ᓱᖏᐅᑎᓯᒪᔭᕆᐊᖃᕐᓂᕐᒧᑦ ᓄᓇᓕᖕᓂ ᓄᓇᕗᓕᒫᒥ.

ᑲᑎᒪᔾᔪᑕᐅᔪᑦ ᑐᕋᐃᓐᓇᖅᑐᒥᒃ ᐃᑲᔫᑎᖃᕐᓂᐊᖅᑐᑦ ᐃᓄᓕᕆᔨᑐᖃᒃᑯᑦ ᐋᖅᑭᑦᓱᐃᕙᓪᓕᐊᑎᓪᓗᒋᑦ ᐅᑭᐅᖅᑕᖅᑐᒥ ᓱᖏᐅᑎᕙᓪᓕᐊᓂᕐᒧᑦ ᑐᑭᒧᐊᒍᑎᒃᓴᓂᒃ, ᐊᒻᒪᓗ ᐃᑲᔫᑎᖃᕐᓂᐊᕐᒥᔪᑦ ᐸᕐᓇᑕᐅᑎᓪᓗᒋᑦ ᑮᓇᐅᔭᓕᑕᐅᔾᔪᑎᒃᓴᑦ ᐊᒻᒪᓗ ᐱᓕᕆᐊᒃᓴᑦ ᐅᑭᐅᖅᑕᖅᑐᒥ ᓄᓇᓕᖏᓐᓄᑦ. ᓄᓇᕗᑦ ᒐᕙᒪᖓᑕ ᓯᓚᐅᑉ ᐊᓯᔾᔨᐸᓪᓕᐊᓂᖓᓄᑦ ᑐᑦᑕᕐᕕᖓ ᐊᒻᒪᓗ ᑐᓐᖓᕕᒃᑯᑦ ᐊᑐᕐᓂᐊᖅᑕᖏᑦ ᑲᑎᒪᔾᔪᑎᒥᓃᑦ ᐊᒻᒪᓗ ᐅᖃᐅᓯᐅᓚᐅᖅᑐᑦ ᑲᑎᒪᓂᕐᓂ ᐃᑲᔫᑕᐅᓗᑎᒃ ᐋᖅᑭᑦᓱᐃᕙᓪᓕᐊᑎᓪᓗᒋᑦ ᓄᓇᑦᑕ ᓱᖏᐅᑎᕙᓪᓕᐊᓂᖓᓄᑦ ᓯᕗᓪᓕᐅᔾᔭᐅᔭᕆᐊᓕᖕᓂᒃ ᐊᕐᕌᒎᓂᐊᖅᑐᓄᑦ. ᑲᑎᒪᓂᕐᒥᒃ ᐅᓂᒃᑳᑦ ᓴᖅᑭᖅᑕᐅᓂᐊᖅᑐᑦ ᑕᖅᑭᐅᓂᐊᖅᑐᓂ.

ᐅᓂᒃᑳᕈᓐᓇᓯᐊᖅᑐᑎᒃ ᓇᖕᒥᓂᖅ ᐊᑐᕐᓯᒪᔭᓐᓂᒃ ᓱᖏᐅᑎᓯᒪᓂᕐᒧᑦ ᐊᒻᒪᓗ ᓯᓚᒧᑦ ᓱᖏᐅᑎᓯᒪᓂᕐᒧ, ᐅᕙᓂ

www.climatechangenunavut.ca ᐃᕐᖐᓐᓈᕈᑎᒃᑯᓘᓐᓃᑦ climatechange@gov.nu.ca.

###

ᑐᑭᓯᒋᐊᒃᑲᓂᕐᕕᒃᓴᖅ, ᐅᖃᕐᕕᒋᓗᒍ:

ᔫ ᒫᑑᔅ
ᐊᐅᓚᑦᓯᔨ, ᓯᓚᐅᑉ ᐊᓯᔾᔨᐸᓪᓕᐊᓂᖓᓄᑦ ᑐᓴᕈᑎᓕᕆᔩᑦ
ᓄᓇᕗᑦ ᒐᕙᒪᖓ
867-975-7755
zmartos@gov.nu.ca

ᑭᐅᕆ ᒪᒃᓕᔅᑭ
ᑐᑭᒧᐊᒃᑎᑦᑎᔨ ᑐᓴᐅᒪᔾᔪᑎᓕᕆᔨᒃᑯᓐᓂ
ᓄᓇᕗᑦ ᑐᓐᖓᕕᒃ ᑎᒥᖓ
867-975-4914 ᐅᕝᕙᓘᓐᓃᑦ 1-888-646-0006
kmccluskey@tunngavik.com