ᐅᖃᓚᐅᑎᓯᐅᑏᑦ

ᐋᖅᑭᑦᓱᖅᓯᒪᓂᖏᑦ ᐱᓕᕆᔩᑦ

ᐊᓪᓚᕝᕕᓕᕆᓂᕐᒧᑦ ᐊᐅᓚᑦᑎᓂᖅ ᐱᓕᕆᐊᖑᖃᑦᑕᖅᐳᖅ ᐊᖓᔪᖅᑲᐅᑎᖃᕐᕕᖕᒥᑦ; ᐊᑐᐊᒐᓄᑦ, ᐸᕐᓇᖕᓂᕐᒧᑦ ᒪᓕᒐᓕᕆᓂᕐᒧᓪᓗ ᐱᓕᕆᕝᕕᖕᒥᑦ; ᐊᓪᓚᕝᕕᓕᕆᔨᒃᑯᓐᓂᓗ.

ᐊᖓᔪᖅᑲᐅᑎᖃᕐᕕᒃ

ᐊᖓᔪᖅᑲᐅᑏᑦ ᐱᓕᕆᐊᒃᓴᖃᖅᐳᑦ ᑕᒪᐃᓐᓄ ᐊᐅᓚᑦᑎᓂᕐᒥᒃ ᑐᑭᒧᐊᒃᑎᑦᑎᓂᕐᒧᓪᓗ ᐊᕙᑎᓕᕆᔨᒃᑯᓐᓂ ᐃᓚᐅᓪᓗᑎᒃ ᐊᓪᓚᕝᕖᑦ ᒥᓂᔅᑕᐅᑉ ᑐᒡᓕᐊᓄ ᒥᓂᔅᑕᐅᓪᓗ ᑐᒡᓕᒃᑲᓂᐊᓄᑦ. ᐊᖓᔪᖅᑲᐅᑏᑦ ᓯᕗᓕᖅᑎᐅᖃᑦᑕᖅᐳᑦ ᐱᓕᕆᕝᕕᖕᒧ ᓇᓗᓇᐃᖅᐸᒃᖢᑎᒡᓗ ᐱᓕᕆᐊᑦ ᐱᔨᑦᑎᕈᑏᓪᓗ ᐊᑐᖅᑕᐅᔪᑦ ᐱᓕᕆᕝᕕᖕᒥ ᒪᓕᒃᑲᓗᐊᕐᒪᖔᑦ ᓯᕗᓪᓕᐅᔾᔭᐅᖁᔭᐅᔪᓂᒃ ᒐᕙᒪᒥ. ᐊᖓᔪᖅᑲᐅᑏᑦ ᐱᓕᕆᐊᒃᓴᖃᕆᕗᑦ ᐃᓚᓕᐅᔾᔨᕙᓪᓕᐊᓂᕐᒥᒃ ᐃᓄᐃᑦ ᐱᒻᒪᕆᐅᒋᔭᖏᓐᓂᑦ ᐱᓕᕆᕝᕕᖕᒥ ᖃᓄᐃᓕᐅᕈᑕᐅᔪᓕᒫᓂᒃ.

ᐊᑐᐊᒐᑦ, ᐸᕐᓇᖕᓂᕐᒧᑦ ᒪᓕᒐᓕᕆᓂᕐᒧᓪᓗ

ᐊᑐᐊᒐᓄᑦ, ᐸᕐᓇᖕᓂᕐᒧᑦ ᒪᓕᒐᓕᕆᓂᕐᒧᓪᓗ ᐱᓕᕆᔩᑦ ᐱᓕᕆᐊᒃᓴᖃᖅᐳᑦ ᐃᓚᓕᐅᔾᔨᓂᕐᒧᑦ ᐋᖅᑭᒃᓱᐃᓂᕐᒧᓪᓗ ᐊᑐᐊᒐᕐᓂᒃ, ᒪᓕᒐᓕᐊᓄᑦ ᐱᕙᓪᓕᐊᑎᑦᑎᓂᕐᒥᒃ, ᐸᕐᓇᒍᑕᐅᔪᓄᑦ ᐱᓕᕆᕝᕕᖕᒥᑦ, ᖃᓄᐃᓕᐅᖁᔨᓂᕐᒧᓪᓗ ᐊᑐᐊᒐᓄᑦ ᐅᐸᓗᖓᐃᔭᖅᓯᒪᔪᒃᑯᓪᓗ ᑐᑭᒧᐊᒃᑎᑦᑎᓂᕐᒧᑦ ᐊᖓᔪᖅᑲᐅᑎᓄ, ᑕᐃᒪᐃᑦᑕᕆᐊᖃᕌᖓ. ᐱᓕᕆᔩᑦ ᓇᓗᓇᐃᖃᑦᑕᖅᐳᑦ ᑐᓴᐅᒪᖃᑎᒌᑦᑎᐊᕋᓗᐊᕐᒪᖔᑦ ᐱᓕᕆᕝᕕᖕᒥ, ᓄᓇᕗᑦ ᒐᕙᒪᒃᑯᓐᓂ, ᓄᓇᕗᒻᒥᐅᓂᓪᓗ, ᑲᓇᑕᓕᒫᒧᓪᓗ ᓄᓇᕐᔪᐊᓕᒫᒧᓪᓗ.

ᐊᕙᑎᓕᕆᔨᒃᑯᑦ ᐊᑐᐊᒐᖏᑦ

 ᐊᓪᓚᕝᕕᖕᒧ ᐱᔨᑦᑎᕋᖅᑏᑦ

ᐊᓪᓚᕝᕕᖕᒧ ᐱᔨᑦᑎᕋᖅᑏᑦ ᑕᒪᐃᓐᓄ ᐃᑲᔪᓲᖑᕗᑦ ᐱᓕᕆᕝᕕᖕᒥ ᐱᓕᕆᐊᓕᒫᓪᓗ ᐱᔨᑦᑎᕈᑎᓕᒫᓪᓗ ᐊᐅᓚᑕᐅᑦᑎᐊᕋᓗᐊᕐᒪᖔᑦ ᓇᓗᓇᐃᖅᐸᒃᖢᑎᒃ. ᓇᓗᓇᐃᖃᑦᑕᕆᓪᓗᑎᒃ ᑮᓇᐅᔭᓕᕆᓂᕐᒧᑦ ᐃᖅᑲᓇᐃᔭᖅᑐᓕᕆᔨᒃᑯᓐᓄᓪᓗ ᐊᐅᓚᑕᐅᔪᑦ ᐊᕙᑎᓕᕆᔨᒃᑯᓐᓂ ᒪᓕᑦᑎᐊᕋᓗᐊᕐᒪᖔᑦ ᐱᓕᕆᕝᕕᐅᑉ ᓄᓇᕗᑦ ᒐᕙᒪᒃᑯᓪᓗ ᐊᑐᐊᒐᖏᓐᓂᒃ ᐊᑐᖅᑕᐅᔾᔪᓯᖏᓐᓂᒡᓗ. ᑐᕌᒐᕆᔭᐅᔪᑦ ᐊᓪᓚᕝᕕᓕᕆᓂᕐᒧᑦ ᐊᐅᓚᑦᑎᔨᓂᒃ ᒪᑯᐊᖑᕗᑦ:

 •ᐅᐸᓗᖓᐃᔭᖅᓯᒪᔪᒥᒃ ᑐᑭᒧᐊᒃᑎᑦᑎᓗᑎᒃ, ᐃᑲᔪᕐᓗᑎᒃ, ᓯᕗᑎᐅᓗᑎᒃ, ᑮᓇᐅᔭᑎᒍᓪᓗ ᑕᑎᒋᔭᐅᔪᓐᓇᕐᓗᑎᒃ ᐱᓕᕆᕝᕕᐅᑉ ᐊᐅᓚᑕᖏᓐᓄᑦ ᐱᓕᕆᐊᑎᒍᑦ ᐱᔨᑦᑎᕈᑎᑎᒍᓪᓗ; ᐊᒻᒪᓗ,

•ᐱᓕᕆᖃᑎᖃᕐᓗᑎᒃ ᐱᓕᕆᕝᕕᐅᑉ ᐃᑲᔪᖅᑕᖏᓐᓄᑦ ᓄᓇᕗᑦ ᒐᕙᒪᓕᒫᒥ ᓯᕗᓪᓕᐅᔾᔭᐅᓇᓱᐊᖅᑐᓂᒃ.

ᐃᓄᑐᖃᐃᑦ ᒥᐊᓂᖅᓯᔩᑦ ᐊᙳᑎᒃᓴᓂᒃ: ᐊᕙᑎᓕᕆᔨᒃᑯᑦ ᐃᓐᓇᐃᑦ ᐅᖃᐅᔾᔨᒋᐊᖅᑏᑦ ᑲᑎᒪᔨᕋᓛᖏᑦ

ᐱᓕᕆᐊᒃᓴᕆᔭᐅᔪᑦ ᐊᕙᑎᓕᕆᔨᒃᑯᑦ ᐃᓐᓇᐃᑦ ᐅᖃᐅᔾᔨᒋᐊᖅᑏᑦ ᑲᑎᒪᔨᕋᓛᖏᓐᓂ ᐃᑲᔪᖅᓱᐃᓗᑎᒃ ᐊᑐᖅᑕᐅᓂᖏᓐᓂ ᑐᙵᕕᐅᔪᑦ ᐃᓱᒪᒋᔭᐅᔪᓪᓗ ᐃᓄᐃᑦ ᖃᐅᔨᒪᔭᑐᖃᖏᓐᓂ ᐆᒪᔪᓕᕆᓂᕐᒧᑦ ᐊᕙᑎᓕᕆᓂᕐᒧᓪᓗ ᐊᐅᓚᑦᑎᓂᕐᒥᒃ ᓄᓇᕗᒻᒥ. ᑲᑎᒪᔨᕋᓛᑦ ᖃᓄᐃᓕᐅᖁᔨᖃᑦᑕᖅᐳᑦ ᐊᑐᓕᖁᔨᕙᒃᖢᑎᒡᓗ ᒥᓂᔅᑕ ᐊᕙᑎᓕᕆᔨᒃᑯᓐᓄᑦ ᐊᒃᑑᑎᔪᓄᑦ ᐆᒪᔪᓕᕆᓂᕐᒧᑦ ᐊᐅᓚᑦᑎᓂᕐᒧᑦ ᐊᓯᖏᓄᓪᓗ ᐱᓕᕆᐊᓄᑦ ᐊᑐᕆᐊᖃᕌᖓ.

ᒫᓐᓇ ᐃᓚᒋᔭᐅᔪᑦ ᐃᓄᑐᖃᐃᑦ ᒥᐊᓂᖅᓯᔩᑦ ᐊᙳᑎᒃᓴᓂᒃ ᐃᓐᓇᐃᑦ ᐅᖃᐅᔾᔨᒋᐊᖅᑏᑦ ᑲᑎᒪᔨᕋᓛᒃᑯᓐᓂ:

ᕿᑭᖅᑕᓂ:

ᓚᐃᓴ ᓂᖏᐅᖅ (ᐊᐅᓱᐃᑦᑐᖅ)

ᓘ ᐱᓕᑉ (ᐃᖃᓗᐃᑦ)

ᔫ ᐊᕐᓗᒃᑑ (ᑭᒻᒥᕈᑦ)

 

ᑭᕙᓪᓕᖅ:

ᒐᐃ ᐊᓕᑯᑦ (ᐊᕐᕕᐊᑦ)

ᕼᐅ ᑐᓗᕆᐊᓕᒃ (ᖃᒪᓂᑦᑐᐊᖅ)

ᔪᐊᓇᓯ ᓇᑰᓚᒃ (ᓴᓪᓕᖅ)

 

ᕿᑎᕐᒥᐅᑦ:

ᐹᑉ ᑯᓄᓇ (ᐅᖅᓱᖅᑑᖅ)

ᔨᒥ ᕼᐊᓂᓕᐊᒃ (ᐃᖃᓗᒃᑑᑦᑎᐊᖅ)