ᐅᖃᓚᐅᑎᓯᐅᑏᑦ

You are here

ᖃᐅᔨᓴᕐᓂᖅ

ᓄᓕᐊᔪᒃ

ᓄᓕᐊᔪᒃ – ᓄᑖᙳᖃᑕᐅᓂᖅᐹᖑᔪᖅ, ᐊᒥᓱᓂᒃ ᐱᓕᕆᒍᓐᓇᖅᑐᖅ ᖃᐅᔨᓴᕐᓂᒃᑯᑦ ᐅᒥᐊᕐᔪᐊᖑᓪᓗᓂ ᐃᑲᔪᕐᓂᖃᕐᓂᐊᖅᑐᓂ ᖃᐅᔨᓴᖅᑐᓕᕆᓂᕐᒥᑦ ᑐᙵᕕᖃᕐᓗᑎᑦ ᐱᐅᖅᓱᐊᕐᓂᕐᒧᑦ ᑲᔪᓰᓐᓇᕈᓐᓇᖅᑐᒥᓪᓗ ᐱᕙᓪᓕᐊᑎᑦᓯᓂᕐᒥᑦ ᓄᓇᕘᑉ ᐃᖃᓗᓕᕆᓂᖓᓂ. ᑐᙵᕕᐅᓪᓗᓂ ᐱᓕᕆᐊᖑᔪᒪᔪᒥᑦ ᐅᒥᐊᕐᔪᐊᕐᒥᑦ ᐃᑲᔪᕐᓂᖃᕐᓗᓂ ᓄᓇᓖᑦ ᐃᓚᐅᖃᑦᑕᕐᓗᑎᑦ ᐃᖃᓗᓕᕆᓂᕐᒥᑦ, ᐃᑲᔪᕐᓗᑎᑦ ᐊᔪᖅᓴᓗᐊᖅᑕᐃᓕᒪᑎᑦᓯᓂᕐᒥᑦ ᐊᒻᒪᓗ ᐱᕕᖃᖅᑎᑦᓯᓗᑎᑦ ᐊᑑᑎᖃᑦᓯᐊᖅᑐᒥᑦ ᐃᓕᓐᓂᐊᖅᑎᑦᓯᓂᒃᑯᑦ ᐃᓄᓐᓄᑦ.

ᓄᓇᕘᒧᓪᓕ ᖃᓄᖅ ᐃᑲᔫᑎᖃᕐᒪᑦ?

ᒐᕙᒪᒃᑯᑦ ᓄᑖᖑᔪᖅ ᖃᐅᔨᓴᕐᓂᕐᒧᑦ ᐅᒥᐊᕐᔪᐊᖓ ᐅᖓᓯᑦᑐᒧᑦ ᖃᓂᑦᑐᒧᓪᓗ ᐃᑲᔫᑎᖃᕐᓂᐊᖅᑐᖅ ᓄᓇᕘᒧᑦ. ᐅᑭᐅᖅᑕᖅᑐᒥᑦ ᒥᑭᓪᓕᒋᐊᖅᓯᒪᒻᒪᕆᒻᒪᑦ ᐃᒪᖁᑎᖓᓂ ᐃᒪᖁᑎᒋᙱᑕᖓᓂᓗ ᐃᖃᓗᓕᕆᓂᕐᒧᑦ ᖃᐅᔨᓴᕐᓂᕐᒥᑦ. ᓄᓇᕗᑦ ᖃᐅᔨᒪᓂᖃᓕᕐᓂᐊᖅᑐᖅ ᒫᓐᓇᐅᔪᖅ ᓴᖅᑭᔮᖅᑐᓂᒃ ᓯᕗᓂᒃᓴᒥᓪᓗ ᐃᖃᓪᓕᐊᕐᕕᐅᒍᓐᓇᖅᑐᓂᑦ, ᑕᐃᒪᐃᑐᐃᓐᓇᖃᑦᑕᕐᓂᖏᓐᓄᑦ ᐊᒻᒪᓗ ᐊᕙᑎ ᐱᔾᔪᑕᐅᓪᓗᓂ ᐊᒃᑐᐃᓂᖃᓲᑦ ᖃᓄᐃᓐᓂᕆᔭᖓᓂᒃ ᐱᕙᓪᓕᐊᓂᖏᓪᓗ ᐃᖃᓗᓕᕆᓂᐅᑉ. ᑕᒪᓐᓇ ᖃᐅᔨᔭᐅᔪᖅ ᐱᒻᒪᕆᐅᒻᒪᑦ ᐊᑑᑎᖃᑦᓯᐊᕈᓐᓇᕐᓂᖓᓄᑦ ᑲᔪᓯᑦᓯᐊᕈᓐᓇᕐᓂᖓᓄᓪᓗ ᑮᓇᐅᔭᓕᐅᕋᓱᐊᕈᑎᒋᔭᑦᑎᓐᓄᑦ.  ᓄᓇᓖᑦ ᖃᓂᒋᔭᖃᖅᑐᑦ ᖃᐅᔨᓴᕐᕕᐅᔪᓂᒃ ᐃᑲᔪᖅᑕᐅᓂᐊᖅᑐᑦ ᐊᑑᑎᖃᖅᑐᒃᑯᑦ ᓄᐊᑕᐅᓯᒪᔪᓂᒃ ᐊᒻᒪᓗ ᐃᑲᔪᕐᓂᖃᕈᓐᓇᕐᓂᐊᖅᑐᑦ ᐅᖃᐅᓯᖃᕈᓐᓇᕐᓗᑎᑦ, ᖃᐅᔨᓴᖅᑐᓕᕆᓂᖅ ᐊᒻᒪᓗ ᐃᓄᐃᑦ ᖃᐅᔨᓴᓂᖏᑦ ᑲᑎᒐᔭᕐᒥᑎᒃ. ᐅᒥᐊᕐᔪᐊᖅ ᐊᒻᒪᓗ ᖃᐅᔨᓴᕈᑕᐅᔪᑦ ᐱᕕᖃᖅᑎᑦᓯᒐᔭᖅᑐᑦ ᐃᓕᓐᓂᐊᖅᑎᑦᓯᓂᕐᒥᑦ ᐃᖅᑲᓇᐃᔭᖅᑎᑦᓯᓂᕐᒥᓗ ᐃᖃᓗᓕᕆᓂᕐᒥᑦ ᐊᒻᒪᓗ ᐅᒥᐊᕐᔪᐊᒃᑯᑦ ᖃᐅᔨᓴᖅᑐᓕᕆᓂᕐᒥᑦ ᐊᐅᓚᑦᓯᓂᕐᒥᑦ.  ᐊᒥᓱᕆᐊᕋᔭᕐᒪᑕ ᐃᓐᓄᒃᓯᒪᔭᕗᑦ ᑲᒪᒍᓐᓇᖅᑐᓂᒃ ᐊᒻᒪᓗ ᐊᐅᓚᑦᓯᓂᕐᒥᑦ ᐅᕙᒍᑦ ᖃᐅᔨᓴᕈᑎᒃᓴᖏᓐᓂᒃ, ᑲᔪᓯᓂᒃᑯᑦ ᑮᓇᐅᔭᓕᐅᕐᓂᕐᒧᑦ ᐱᕙᓪᓕᐊᑎᑦᓯᓂᕐᒥᑦ ᐊᒻᒪᓗ ᓂᕿᖃᐃᓐᓇᕈᓐᓇᕐᓂᕐᒧᑦ.

ᑭᒃᑯᑦ ᖃᐅᔨᓴᕐᑎᐅᒻᒪᑕ?

ᖃᐅᔨᓴᕐᓂᖅ ᐅᒥᐊᕐᔪᐊᕐᒥᑦ ᑮᓇᐅᔭᖃᖅᑎᑕᐅᔪᖅ ᐊᒻᒪᓗ ᑲᒪᒋᔭᐅᔪᖅ ᑲᑐᔾᔨᖃᑎᒌᓂᒃᑯᑦ ᑖᒃᑯᓄᖓ ᐃᖃᓗᓕᕆᔨᒃᑯᑦ ᐃᒪᓕᕆᔨᒃᑯᓪᓗ ᑲᓇᑕᒥ, ᑲᓇᑕᒥ ᐅᑭᐅᖅᑕᖅᑐᒥ ᐱᕙᓪᓕᐊᔪᓕᕆᔨᒃᑯᑦ , ᐅᐃᓐᓱᒥ ᓯᓚᑦᑐᖅᓴᕐᕕᔾᔪᐊᖅ, ᕕᒃᑐᐊᕆᐊᒥ ᓯᓚᑦᑐᖅᓴᕐᕕᔾᔪᐊᖅ, ᒪᒧᐊᕆᐅᓪ ᓯᓚᑦᑐᖅᓴᕐᕕᔾᔪᐊᖓ, ᓂᐅ ᐳᕌᓐᓱᐃᒃ ᓯᓚᑦᑐᖅᓴᕐᕕᔾᔪᐊᖓ, ᑎᐊᓪᕼᐊᐅᓯ ᓯᓚᑦᑐᖅᓴᕐᕕᔾᔪᐊᖓ, ᐋᒃᑎᒃᓇᑦ, ᓲᕐ ᐋᓕᔅᑎᐅᕐ ᕼᐋᕐᑎ ᑐᙵᕕᖓ ᑕᕆᐅᕐᒥᑦ ᖃᐅᔨᓴᖅᑐᓕᕆᓂᕐᒧᑦ, ᐸᓐᓂᖅᑑᑉ ᓄᓇᓕᖓ ᐊᒻᒪᓗ ᐱᓕᕆᕝᕕᕗᑦ. ᐃᖅᑲᓇᐃᔭᖅᑎᕗᑦ ᐃᑲᔪᖅᓱᕐᓂᐊᖅᑐᑦ ᑖᑦᓱᒥᖓ ᐱᓕᕆᐊᖑᔪᒥᑦ ᐊᒻᒪᓗ ᐃᖃᓗᓕᕆᓂᕐᒨᖓᔪᓂᒃ ᖃᐅᔨᓴᕐᓂᕐᒥᑦ ᑲᒪᓂᐊᕐᒥᔪᑦ ᑲᑐᔾᔨᖃᑎᖃᕐᓗᑎᑦ ᑖᒃᑯᓂᖓ ᑎᒥᐅᔪᓂᑦ. ᐱᓕᕆᖃᑎᒌᑦᓯᐊᕐᓂᖅ ᐱᒻᒪᕆᐅᕗᖅ ᐱᐅᓂᖅᐹᒥᑦ ᐃᑲᔪᕐᓂᖃᖁᓪᓗᒍ ᓄᓇᕘᒧᑦ.

ᑭᒃᑰᕙᑦ ᐊᕐᓇᐅᑉ ᑲᑎᙵᖃᑎᖏᑦ ᖃᓄᕐᓗ ᐱᓕᒻᒪᒃᓴᖅᑕᐅᓯᒪᕙᑦ? 

RV ᓄᓕᐊᔪᒃ ᐱᓕᕆᖃᑎᒌᒃᕕᐅᔪᖅ RCG ᐃᒪᕐᒥᐅᑕᓄᑦ ᖃᐅᔨᒃᑲᐃᕝᕕᒃ ᓂᐅᕙᐅᓐᓛᓐ ᓛᐳᑐᐊᓕᒥᒃᓗ, ᓵᓚᒃᓴᖅᓯᒪᔪᑦ ᐊᑭᑦᑐᕋᐅᑎᒥᒃ ᑭᒃᑯᑐᐃᓐᓇᕐᓄᑦ ᐊᑭᑦᑐᕋᐅᑎᑎᓪᓗᑕ 2011-ᒥ. ᐊᕐᓇᐅᑉ ᐅᓪᓗᓕᒫᖅ ᐱᓕᕆᖃᑎᖏᑦ ᐃᓚᐅᑎᑦᑎᔪᖅ ᓴᒃᑯᐊᖅᑎ ᓯᓯᐅᓪ ᐹᓂᔅᑐ, ᓯᕗᓪᓕᖅᐹᖓ ᐱᖃᑎᖓ ᒪᕐᕉᒃᓗ ᐅᒥᐊᕐᔪᐊᒥ ᐃᑲᔪᖅᑏᒃ. ᑕᒪᕐᒥᒃ ᐱᓕᕆᖃᑎᒌᑦ ᑲᑎᖃᑦᑕᖅᑐᑦ ᐅᖓᑕᐅᔾᔨᓪᓗᑎᒃᓗ ᐊᑐᕐᓂᑯᒋᔭᕆᐊᖃᖅᑕᖏᓐᓂᒃ ᐱᓕᒻᒪᒃᓴᓂᕐᒥᒃᓗ ᐱᔭᕇᖅᓯᒪᔭᕆᐊᖃᖅᑕᖏᓐᓂᒃ ᐱᔭᕆᐊᓕᖕᓂ ᐃᖏᕐᕋᔪᓕᕆᔨᒃᑯᑦ ᑲᓇᑕᒥ ᐃᖅᑲᓇᐃᔭᕐᓂᐊᕐᓗᓂ ᐅᒥᐊᕐᔪᐊᒥ. ᓄᓕᐊᔪᒃ ᐱᓕᕆᕝᕕᐅᖕᒥᔪᖅ ᐱᓕᒻᒪᒃᓴᐃᑎᑦᑎᓂᕐᒥᒃ ᐃᓄᖕᓂᑦ ᐃᖅᑲᓇᐃᔭᕐᓂᕐᒥᒃ ᖃᐅᔨᓴᕐᓂᕐᒧᑦ ᐅᒥᐊᕐᔪᐊᓂᑦ, ᐱᓕᒻᒪᒃᓴᐃᓂᖅ ᐃᖅᑲᓇᐃᔭᖅᑎᑦᑎᓂᕐᓗ ᐊᕐᕕᓂᓕᖕᓄᑦ ᑎᑭᓪᓗᒍ ᐊᕐᕌᒍᑕᒫᑦ, ᑕᒪᕐᒥᒃ ᐃᓕᓐᓂᐊᕌᓂᒃᑐᑦ ᓄᓇᕗᒻᒥ ᐃᖃᓗᓕᕆᓂᕐᒧᑦ ᐃᒪᕐᒥᐅᑕᓄᓪᓗ ᐱᓕᒻᒪᒃᓴᕐᓂᖅ ᐃᓕᓐᓂᐊᕐᓂᕐᒧᑦ ᑲᑐᔾᔨᖃᑎᒌᓄᑦ. ᐊᕐᓇᖅ ᐃᖅᑲᓇᐃᔭᖅᑎᑦᑎᓲᖅ ᒪᕐᕉᖕᓂᒃ ᐃᓅᖕᓂᒃ ᖃᖓᑐᐃᓐᓇᒃᑯᑦ ᐱᕕᒃᓴᐅᔪᒃᑯᑦ, ᐃᓕᓐᓂᐊᖅᑏᓪᓗ ᓄᓇᕗᑦ ᐅᑭᐅᖅᑕᖅᑐᒥ ᓯᓚᑦᑐᖅᓴᕐᕕᖓᑕ ᐊᕙᑎᓕᕆᓂᕐᒧᑦ ᐃᓕᓐᓂᐊᒐᒃᓴᒥᑦ ᑐᙵᓱᒃᑎᑕᐅᓲᑦ ᐅᒥᐊᕐᔪᐊᒦᓂᕐᒥᑦ ᑐᓚᒃᓯᒪᑎᓪᓗᒍ ᐃᖃᓗᖕᓂ. ᐊᖑᑎᑦ ᐊᕐᓇᓪᓗ ᑕᒪᕐᒥᒃ ᐱᓕᒻᒪᒃᓴᕐᑕᐅᓪᓗᑎᒃ ᐃᖅᑲᓇᐃᔭᓕᖅᑎᑕᐅᓪᓗᑎᒃᓗ ᐱᓕᕆᖃᑎᒌᖕᓂᕐᒧᑦ. ᒪᕐᕉᒃ ᐃᓅᒃ ᐱᓕᒻᒪᒃᓴᖅᑑᒃ ᐅᐸᒍᑎᓯᒪᓂᐊᖅᑑᒃ ᐅᒥᐊᕐᔪᐊᖃᕐᕕᖕᒥ ᒪᐃ 20, 2015-ᒥ, ᐱᓕᕆᐊᖃᕐᓗᑎᒃ ᒪᕐᕉᖕᓄᒃ ᐱᓇᓱᐊᕈᓰᖕᓄᒃ ᐃᖃᓗᓕᕆᓂᕐᒥᒃ ᐊᕙᑎᓕᕆᓂᕐᒥᒃᓗ ᖃᐅᔨᓴᕐᓂᕐᒥᑦ ᐱᓕᒻᒪᒃᓴᓗᑎᒃ ᐸᕐᓇᒃᓯᒪᓂᐊᕐᒪᑎᒃ ᖃᐅᔨᓴᒻᒪᕆᓕᖅᓗᑎᒃ ᓄᓇᕗᒻᒥ ᐊᐅᔭᐅᓂᐊᖅᑐᒥ. ᐅᓄᖅᓱᐃᕐᖢᓂ ᐊᑐᖅᐸᒃᑐᖅ ᐱᓕᒻᒪᒃᓴᓂᕐᒧᑦ ᐱᕕᒃᓴᓂᑦ ᐱᓕᕆᖃᑎᒌᓄᑦ ᖃᐅᔨᓴᖅᑎᓄᓪᓗ ᐊᕝᕗᕐᓗᑎᒃ ᐊᐅᓚᑦᑎᓗᑎᒃ ᐱᓕᕆᐊᖃᕐᓗᑎᒃᓗ ᐱᓕᕆᔭᒃᓴᓂᑦ ᐊᑕᐅᑦᑎᒃᑯᑦ. ᖁᕕᐊᓱᑦᑎᐊᖅᑐᒍᒃ ᑲᔪᓯᓂᕐᒥᒃ ᐱᓕᕆᖃᑎᖃᕐᓂᕐᓂᑦ ᑕᒡᕙᓂ, ᓂᕆᐅᒃᖢᑕᓗ ᐊᒡᒋᖅᑐᒧᑦ 2015 ᐅᒥᐊᕐᔪᐊᖃᕐᓇᖓᓂ, ᐅᖓᑖᓄᓪᓗ.

ᑭᓲᕙᑦ ᖃᓄᐃᓕᐅᕐᓇᐅᓂᐊᖅᑐᑦ 2015 ᐅᒥᐊᕐᔪᐊᖃᕐᓇᖓᓄᑦ?

ᐱᔭᕇᓚᐅᖅᑎᓪᓗᒍ ᑭᖑᓪᓕᖅᐹᒥ ᐅᒥᐊᕐᔪᐊᖃᕐᓇᖅ ᒪᑐᑎᓪᓗᒍ ᓄᕕᐱᕆ 2014-ᒥ, ᓄᓕᐊᔪᒃ ᑐᓚᒃᓯᒪᑎᑕᐅᓪᓗᓂ ᒍᓘᕗᑕᐅᓐ ᐅᒥᐊᕐᔪᐊᖃᕐᕕᖓᓂ ᐅᑭᐅᕐᒧᑦ. ᐅᑭᐅᒥ ᓄᖅᑲᖓᑎᓪᓗᒍ, ᓄᓕᐊᔪᒃ ᐱᑎᑕᐅᓪᓗᓂ ᓄᑖᖑᕆᐊᕐᔪᐊᕈᑎᓂᒃ ᐱᐅᓯᒋᐊᖁᓪᓗᒍ ᐱᓕᕆᐊᕆᖃᑦᑕᖅᑕᖓ ᐃᒪᕐᒥᑦ, ᒪᓕᑦᑎᐊᖏᓐᓇᕐᓗᓂ ᐃᖏᕐᕋᔪᓕᕆᔨᒃᑯᓐᓂᑦ ᑲᓇᑕᒥ, ᐃᑲᔪᖅᓱᑦᑎᐊᕐᓗᒋᓪᓗ ᐅᓄᖅᑐᑦ ᖃᓄᐃᑦᑑᓂᖏᑦ ᖃᐅᔨᓴᕐᓂᕐᒧᑦ ᐱᓕᕆᐊᖑᔪᑦ ᐅᒥᐊᕐᔪᐊᒥ. ᑐᒃᓯᕋᖅᑕᐅᓯᒪᔪᖅ 2015 ᖃᐅᔨᓴᕐᓂᕐᒧᑦ ᖃᓄᐃᓕᐅᕈᑎᑦ ᓴᓇᓂᐊᖅᑐᑦ ᖃᐅᔨᓴᕐᓂᕐᒥᒃ ᐱᓕᕆᐊᖑᓯᒪᔪᒥᒃ 2014−ᒥ ᐃᓚᐅᑎᑦᑎᓪᓗᓂᓗ:  

  • ᐃᖅᑲᙳᐊᓕᐅᕐᓂᖅ ᕿᓂᕐᓂᕐᒧᓪᓗ ᐃᖃᓗᒐᓱᖕᓂᕐᒥᑦ ᓯᐅᓇᑦᒧᑦ ᑕᓯᐅᔭᕐᔪᐊᒥ;
  • ᑲᔪᓯᓂᖅ ᓇᑖᕐᓇᕐᓄᑦ ᓂᕕᖓᑖᓕᖅᓱᐃᓂᖅ ᖃᐅᔨᓴᕐᓂᕐᒧᓪᓗ ᐊᑐᓕᖅᑎᑕᐅᔪᓂᒃ ᑎᓄᔾᔭᕐᕕᖕᒥᑦ, ᐃᑲᔪᖅᓱᕐᓗᒍ ᓄᒃᑎᖅᑕᐅᓂᖓ ᑎᓄᔾᔭᕐᕕᖕᒥ ᐊᐅᓚᑦᑎᓂᖅ ᑭᒃᓕᖃᕐᕕᖓᓂ ᐃᖃᓗᒐᓱᖕᓇᕐᓂᐅᑉ ᑭᒃᓕᖏᓐᓂ ᐃᒪᕕᖕᒥ ᒥᒃᖠᒋᐊᕐᓗᒍᓗ ᐃᖃᓗᒃᑕᐅᖃᑦᑕᕐᓂᖏᑦ;
  • ᖃᐅᔨᓴᕐᓂᖅ ᐃᖏᕐᕋᓂᖏᓐᓂ ᓇᑖᕐᓇᑦ ᕿᑭᖅᑖᓘᑉ ᐃᒪᖓᓂ ᐊᑯᓐᓂᖓᓂ ᓯᒡᔭᓂᑦ, ᕿᑎᐊᓂ ᓯᒡᔭᓂᑦ ᐊᒻᒪ ᐃᒪᕕᖕᓂᑦ;
  • ᖃᐅᔨᓴᕐᓗᒋᑦ ᐃᖃᓗᒐᓱᖕᓂᖅ ᓇᑖᕐᓇᓂᑦ ᓇᑦᑎᖅᓱᔪᖅᒥ ᑲᖏᖅᑐᐊᓗᖕᒥᓪᓗ (ᖃᓂᒋᔭᖓᓂ ᑲᖏᖅᑐᒑᐱᒃ);
  • ᓄᓇᒥ−ᓱᓕᓂᓕᕆᓂᖅ ᓄᓇᙳᐊᓕᐅᒃᑲᓐᓂᕐᓂᕐᓗ ᐱᑕᖃᑐᐃᓐᓇᕆᐊᓕᖕᓂᑦ ᓄᓇᒥ−ᐃᖃᓗᖕᓂᑦ ᓯᓚᑉᐱᐊᓕᖕᓂᓪᓗ ᐊᕙᑎᖏᑦ ᕿᑭᖅᑖᓘᑉ ᓯᒡᔭᖏᓐᓂ ᐱᓗᐊᖅᑐᒥᒃ ᖃᐅᔨᓴᕐᓂᖅ ᓂᐅᕕᐊᒃᓴᐅᕙᒃᑐᓂᑦ ᐊᒻᒨᒪᔪᑦ ᐊᖏᓂᖏᓐᓂᒃ ᕿᑭᖅᑕᕐᔪᐊᒥᕈᔪᒃ; ᐊᒻᒪᓗ
  • ᓄᓇᙳᐊᓕᐅᕐᓂᖅ ᐊᑦᑕᕐᓇᙱᑦᑐᓂᒃ ᑐᓚᒡᕕᖕᓂᑦ ᐃᓗᐊᓃᑦᑐᓂᒃᓗ ᐊᖅᑯᑎᓂᑦ ᐊᑯᓐᓂᖓᓂ ᑲᖏᖅᑐᒑᐱᒃ, ᕿᑭᖅᑕᕐᔪᐊᖅ, ᐸᖕᓂᖅᑑᖅ ᐊᒻᒪ ᐃᖃᓗᐃᑦ