ᐅᖃᓚᐅᑎᓯᐅᑏᑦ

You are here

ᑮᓇᐅᔭᓕᐊᖑᕙᒃᑐᓄᑦ ᑖᒃᓯᓕᕆᔾᔪᑎᑦ ᐊᑐᓕᖅᑎᑕᐅᓂᖓᓗ ᓄᓇᕗᒻᒥ

ᑲᓇᑕᒥ ᒐᕙᒪᓕᒫᑦᑎᐊᑦ ᐊᑐᖅᐸᒃᑐᐃᓐᓈᓘᖕᒪᑕ ᑮᓇᐅᔭᓕᐊᕆᔭᐅᔪᑦ ᑖᒃᓯᖏᓐᓂᒃ, ᓄᓇᕗᓪᓗ ᑭᑭᑕᐅᙱᖦᖢᓂ.
ᓄᓇᕗᒥᐅᑦ ᐱᐅᓱᒋᔾᔪᑎᖃᕐᒪᑕ ᐊᑭᑭᓐᓂᖅᐹᑦᑎᐊᒥᒃ ᑖᒃᓯᓕᕆᔾᔪᑎᖃᕐᓂᖏᓐᓄᑦ ᓄᓇᕘᒥ, ᑭᑭᑕᐅᓪᓗᑎᑦ ᖃᔅᓯᑲᓪᓛᓗᐃᑦ ᐊᑭᑐᓛᑦᑎᐊᓂᒃ ᑮᓇᐅᔭᓕᐅᕐᕕᓖᑦ, ᐊᖏᓂᖅᓴᐅᕌᕐᔪᒻᒪᕆᒃᑐᖅ ᐊᓪᐴᑕᓕᒫᖅ ᑕᐅᑐᒃᖢᒍ 10ᐳᓴᖓᓂᒃ. ᓇᐅᒃᑯᑐᐃᓐᓇᖅ, ᓄᓇᕗᒻᒥ ᑮᓇᐅᔭᓕᐊᖏᑦᑕ ᑖᒃᓯᓕᕆᔾᔪᑎᖏᑦ ᐱᕚᓪᓕᖅᐸᓪᓕᐊᑐᐃᓐᓇᖅᐳᖅ, ᐊᔾᔨᒌᒃᑎᑦᑎᓪᓗᓂ, ᐊᒻᒪ ᑮᓇᐅᔭᓕᕆᓂᖅᑎᒍᑦ ᐱᓕᕆᖃᑕᐅᓪᓚᕆᒃᑐᐊᓘᓪᓗᑎᒃ ᑲᓇᑕᒥ ᑭᒡᒐᖅᑐᐃᕝᕕᐅᔪᓕᒫᓂᒃ, ᐃᓚᒋᔭᐅᓪᓗᑎᒃ ᒪᕐᕉᒃ ᐊᓯᖏᒃ ᓄᓇᐅᔫᒃ.

ᑖᒃᓯᓕᕆᔾᔪᑏᑦ ᒥᒃᓴᐅᓯᖅᑕᐅᓂᖏᑦ

ᑮᓇᐅᔭᓕᐊᕆᔭᐅᔪᑦ ᑖᒃᓯᖏᑦ ᒥᒃᓴᐅᓯᖅᑕᐅᓲᖑᕗᑦ ᑲᑎᓗᒃᑖᖅᖢᒋᑦ ᑖᒃᓰᔭᖅᑕᐅᔾᔪᑕᐅᕙᒃᑐᓂᒃ ᐃᓄᖕᓄᑦ ᑯᐊᐳᕇᓴᓄᓪᓘᓐᓃᑦ.

ᑖᒃᓰᑦ ᐊᑭᖏᑦ

ᑮᓇᐅᔭᓕᐊᖑᕙᒃᑐᑦ ᑖᒃᓯᒋᕙᒃᑕᖏᑦᑕ ᐊᑭᖏᑦ ᐋᖅᑭᒃᑕᐅᓲᖑᕗᑦ ᐊᕐᕌᒍᑕᒫᑦ. ᑕᑯᒋᐊᕈᓐᓇᖅᐳᓯ ᓄᓇᕗᒻᒥ ᑖᒃᓰᑦ ᐊᑭᖏᓐᓄᑦ ᒪᒃᐱᖅᑐᒐᕐᒧᑦ ᑕᒪᑐᒧᖓ ᐊᕐᕌᒍᒧᑦ ᑮᓇᐅᔭᓕᐊᑦ ᑖᒃᓰᑦ ᐊᑭᖏᑦᑕ ᒥᒃᓵᓄᑦ ᖃᐅᔨᒋᐊᕈᒪᒍᔅᓯ.

ᑮᓇᐅᔭᓕᐊᑦ ᑖᒃᓯᖏᑦ ᐊᐅᓚᑕᐅᓂᖏᑦ

ᑮᓇᐅᔭᓕᐊᑦ ᑖᒃᓯᓕᕆᔾᔪᑎᖏᑦ ᐊᐅᓚᑕᐅᓂᖓ ᐊᐅᓚᑕᐅᖕᒪᑦ ᒪᕐᕉᖕᓄᑦ ᑮᓇᐅᔭᓕᐊᑦ ᑖᒃᓯᓕᕆᔾᔪᑏᒃ ᒪᓕᒐᖏᓐᓂᒃ, ᐊᑕᐅᓯᖅ ᑲᓇᑕᒥᐅᑎᑐᑦ ᐊᑕᐅᓯᕐᓗ ᓄᓇᕘᒥᐅᑎᑐᑦ.
ᓄᓇᕘᒥᐅᑦ ᐊᑎᓕᐅᓚᐅᖅᓯᒪᒋᕗᑦ ᑖᒃᓯᓕᕆᔾᔪᑎᓄᑦ ᑲᑎᖅᓱᐃᕙᒃᑐᑦ ᐊᖏᕈᑖᓂᒃ ᐱᔪᓐᓇᖅᑎᑦᑎᔪᒧᑦ ᑲᓇᑕᒥ ᑖᒃᓰᔭᕐᕕᖓᓐᓂᒃ ᑲᑎᖅᓱᐃᔾᔪᔾᔭᐅᔪᓐᓇᕐᓗᑕ ᑖᒃᓯᓂᒃ, ᐊᐅᓚᑦᑎᓗᑎᒃ ᑮᓇᐅᔭᓕᐊᑦᑕ ᑖᒃᓯᓕᕆᔾᔪᑎᖏᓐᓂᒃ ᑭᒡᒐᖅᑐᖅᑕᐅᓗᑕ, ᒪᓂᒪᑎᑦᑎᓪᓗᑎᓪᓗ ᐊᓯᒃᑲᓐᓂᖏᓐᓂᒃ ᐱᔨᑦᑎᕋᐅᑎᒃᑲᓐᓂᕐᓂᒃ ᐅᕙᑦᑎᓐᓄᑦ ᐊᑭᑭᑦᑐᒃᑯᑦ. ᓄᓇᕗᑦ ᐊᖏᕈᑎᖃᖅᐳᑦ ᑖᒃᓯᓕᕆᔾᔪᑎᕗᑦ ᐊᔾᔨᐸᓗᒋᔭᕆᐊᖃᕐᓂᖓᓂᒃ ᑲᓇᑕᒥ ᑖᒃᓯᓕᕆᔾᔪᑖᓄᑦ ᐊᑑᑎᖃᑦᑎᐊᖅᑐᓂᒃ ᐊᐅᓚᑦᑎᓂᕐᒥᒃ ᐊᑐᓕᖅᑎᑦᑎᓂᕐᒥᒡᓗ.
ᑮᓇᐅᔭᓕᐊᖑᕙᒃᑐᑦ ᑖᒃᓯᖏᑕ ᒪᓕᒐᖓ (ᓄᓇᕗᒻᒥ) ᓇᖕᒥᓂᖅ ᒪᓕᒐᕆᒐᑦᑎᒍᑦ ᐊᐅᓚᑦᑎᔾᔪᑎᒋᓪᓗᑎᒍᑦ ᑖᒃᓯᓕᕆᔾᔪᑎᑦᑎᓐᓄᑦ, ᐋᖅᑭᒍᑕᐅᔪᓐᓇᖅᖢᓂ ᑲᓇᑕᒥ ᐱᓕᕆᔾᔪᓯᖅᑎᑐᑦ ᓇᓗᓇᐃᖅᑕᐅᕙᓪᓕᐊᓗᑎᒃ ᓄᓇᕘᒧ-ᑐᕌᖓᔪᑦ ᒪᓕᒋᐊᓖᑦ ᓲᕐᓗ ᐱᑦᑎᐊᓕᔭᐅᔪᑦ ᑖᒃᓰᔭᕈᑎᓄᑦ ᐃᓚᙵᖅᓯᒋᐊᕈᑏᑦ ᐊᑐᖅᑕᐅᔪᑑᓪᓗᓂᓗ ᓄᓇᕗᒻᒥ.

ᑖᒃᓯᓂᒃ ᑲᑎᖅᓱᐃᓂᖅ

ᑮᓇᐅᔭᓕᐊᖑᕙᒃᑐᑦ ᑖᒃᓯᖏᑦ ᑲᑎᖅᓱᖅᑕᐅᕙᒃᐳᑦ ᑲᓇᑕᒥ ᑖᒃᓰᔭᕐᕕᖓᓐᓂᒃ (CRA) ᓄᓇᕗᒥᐅᑦ ᑭᒡᒐᖅᑐᖅᑕᐅᓗᑎᒃ. ᑮᓇᐅᔭᓕᕆᔨᒃᑯᑦ (ᑲᓇᑕᒥ) ᐱᕙᒌᔭᖅᐸᓪᓕᐊᕗᑦ ᒥᒃᓴᐅᓯᖅᓯᓂᕐᒥᒃ ᑲᑎᑕᐅᓛᕋᓱᒋᔭᐅᔪᒥᒃ ᑲᓇᑕᒥ ᑖᒃᓰᔭᕐᕕᖓᓐᓂᒃ CRA, ᑖᓐᓇᓗ ᒥᒃᓴᐅᓯᖅᑕᐅᓯᒪᔪᖅ ᐊᑭᓕᖅᑕᐅᕙᒃᖢᓂ ᓄᓇᕗᑦ ᒐᕙᒪᒃᑯᓐᓄᑦ ᐱᓇᓱᐊᕈᓯᑕᒫᑦ. ᐃᒪᐃᒐᔪᖕᓂᖓᓄᑦ 18-ᓂᒃ 24-ᓄᑦ ᑕᖅᑭᓄᑦ ᑖᒃᓯᓕᕆᓐᓇᐅᑉ ᐊᕐᕌᒍᖓ ᑭᖑᓪᓕᖅᐹᖅᓱᖅᑎᑕᐅᖃᑦᑕᕐᒪᑕ, ᐋᖅᑭᒋᐊᖅᑕᐅᒃᑲᓐᓂᕆᐊᖃᕋᔪᒃᖢᑎᓪᓗ ᑲᑎᖅᓱᖅᑕᐅᓚᐅᖅᑐᑦ ᑲᓇᑕᒥ ᑖᒃᓰᔭᕐᕕᖓᓐᓂᒃ ᐊᒻᒪᓗ ᐊᑭᓕᖅᑕᐅᓪᓚᑦᑖᓚᐅᖅᑐᖅ ᑮᓇᐅᔭᓕᕆᔨᒃᑯᓐᓂᒃ (ᑲᓇᑕᒥ).

ᐊᓄᓪᓚᒃᓯᖅᑕᐅᓂᖅ ᐊᑭᓕᕆᐊᓖᓪᓗ

ᑭᒃᑯᑐᐃᓐᓇᑦᑎᐊᑦ ᓱᕋᐃᔪᖅ ᐅᕝᕙᓘᓐᓃᑦ ᒪᓕᙱᑦᑐᑦ ᑖᔅᓱᒥᖓ ᒪᓕᒐᕐᒥᒃ ᒪᓕᒋᐊᓕᖏᓐᓂᒡᓘᓐᓃᑦ ᐸᓯᔭᒃᓴᐅᕗᑦ ᐱᕋᔭᖕᓂᕐᒧᑦ. 

ᐱᕋᔭᒍᓰᑦ

ᐱᕋᔭᒍᓰᑦ ᓇᓗᓇᐃᖅᑕᐅᕐᔪᐊᖅᓯᒪᔪᑦ ᑮᓇᐅᔭᓕᐊᕆᔭᐅᕙᒃᑐᑦ ᑖᒃᓯᖏᑕ ᒪᓕᒐᖓᓐᓂᒃ (ᑲᓇᑕᒥ) ᐃᓚᓕᐅᔾᔨᓯᒪᓪᓗᑎᒡᓗ ᐃᒪᐃᑦᑐᓂᒃ:

ᐱᓕᕆᔭᐅᑎᑦᑎᙱᑉᐸᑦ ᑖᒃᓯᓕᕆᔾᔪᑎᖏᓐᓂᒃ,
ᓴᒡᓗᓯᒪᔪᓂᒃ ᑎᑎᕋᖅᓯᒪᔪᑦ, ᐃᓚᐅᓗᓂᓗ ᑖᒃᓯᓕᕆᔾᔪᑎᓄᑦ ᐱᕋᔭᒃᑐᓂᒃ ᐅᕝᕙᓘᓐᓃᑦ ᐱᕋᔭᒍᒪᓂᕋᖅᓯᒪᓗᓂ ᒪᓕᒐᕐᒥᒃ,
ᑭᓇᑐᐃᓐᓇᑦᑎᐊᖅ ᓱᕋᐃᔪᖅ ᑕᒪᐅᙵᕈᓘᔭᕆᐊᖃᙱᑦᑐᓂᒃ ᑖᒃᓯᓕᕆᔾᔪᑏᑦ ᑐᑭᓯᒋᐊᕈᑎᓂᒃ ᐸᓯᔭᒃᓴᐅᕗᖅ ᓴᙱᓗᐊᙱᑦᑐᒧᑦ ᐃᖅᑲᖅᑐᖅᑕᐅᓂᕐᒧᑦ

ᓄᓇᕘᒧᑦ ᑐᕌᖓᔪᑦ ᑖᒃᓯᓕᕆᔾᔪᑏᑦ

ᖃᔅᓯᑲᓪᓚᖕᓂᒃ ᐃᓄᐃᑦ ᑮᓇᐅᔭᓕᐊᖏᑦᑕ ᑖᒃᓯᓕᕆᔾᔪᑎᖏᑦ ᐃᓚᓕᐅᔾᔭᐅᓯᒪᔪᑦ ᑮᓇᐅᔭᓕᐊᑦ ᑖᒃᓯᓕᕆᔾᔪᑏᑦ ᒪᓕᒐᖓᓐᓂᒃ (ᓄᓇᕘᒻᒥ) ᑲᓇᑕᒥ ᐃᑲᔪᖅᑎᖃᙱᑦᑐᓂᒃ. ᑖᒃᑯᐊ ᐱᓕᕆᔾᔪᓰᑦ ᐊᒃᑐᐃᓲᖑᕗᑦ ᖃᔅᓯᑐᕐᓂᕆᔭᖓᓂᒃ ᓄᓇᕘᒥ ᑮᓇᐅᔭᖅᑖᖑᕙᒃᑐᑦ ᑖᒃᓯᖏᑦ ᑲᑎᑕᐅᕙᒃᑐᓄᑦ, ᐊᒃᑐᐃᕙᙱᖦᖢᑎᓪᓗ ᖃᔅᓯᑐᕐᓂᕆᔭᖓᓄᑦ ᑲᓇᑕᒥ ᑮᓇᐅᔭᓕᐊᑦ ᑖᒃᓯᖏᑦ ᑲᑎᑕᐅᕙᒃᑐᓄᑦ. ᐅᑯᐊ ᑕᕝᕙ ᒪᓕᒃᑕᐅᔪᑦ:

ᐃᓅᓂᕐᒧᑦ ᐃᑲᔫᓯᐊᑦ
ᓄᓇᓖᑦ ᐅᑎᖅᑎᑦᑎᓇᓱᒍᓐᓇᖅᐳᑦ ᐅᑎᖅᑎᑕᒃᓴᒥᒃ ᑖᒃᓯᓄᑦ ᐃᓚᙵᕆᐊᕈᑖᓄᑦ $1,200-ᒧᑦ ᑎᑭᓪᓗᒍ

ᐃᓅᓂᕐᒧᑦ ᐃᓚᒋᐊᕈᑏᑦ ᐊᖓᔪᖅᑳᓄᑦ ᐃᓄᑑᔪᓄᑦ
ᐃᓄᑑᔪᑦ ᐊᖓᔪᖅᑳᑦ $60,000 ᐅᖓᑖᓄᑦ ᐋᖅᑭᒋᐊᖅᓯᒪᔪᓂᒃ ᑮᓇᐅᔭᖅᑖᖏᑦ ᐲᖅᓯᕝᕕᐅᓚᐅᖅᑎᓪᓗᒋᑦ ᐅᑎᖅᑎᑦᑎᓇᓱᒍᓐᓇᖅᐳᑦ ᐅᑎᖅᑎᑕᒃᓴᒥᒃ ᑖᒃᓯᓄᑦ ᐃᓚᙵᕆᐊᕈᑖᓄᑦ $255.12-ᒧᑦ ᑎᑭᓪᓗᒍ.

ᖃᔅᓯᑐᕐᒪᖔᑦ ᓄᑕᖅᑲᓄᑦ
ᐊᖓᔪᖅᑳᑦ ᕿᑐᕐᖓᓖᑦ ᐊᕐᕌᒍᓕᖕᓂᒃ 6 ᑐᖔᓂ ᐱᖃᑦᑕᖅᑐᑦ ᓄᓇᕐᔪᐊᒥ ᓄᑕᕋᖅᓯᐅᑎᑖᕆᔭᐅᕙᒃᑐᒥᒃ ᐅᑎᖅᑎᑦᑎᓇᓱᒍᓐᓇᖅᐳᑦ $1,200 ᑎᑭᓪᓗᒍ ᓄᑕᕋᕐᒧᑦ ᐊᑕᐅᓯᕐᒧᑦ. 

ᖃᑦᑎᕆᔩᑦ ᑖᒃᓯᓕᕆᔾᔪᑎᓄᑦ ᐃᓚᙵᕆᐊᕈᑏᑦ
ᑕᒪᕐᒥᑦᑎᐊᖅ ᖃᑦᑎᕆᔨᐅᖏᓐᓇᖅᑐᑦ ᐊᒻᒪ ᐃᓚᐃᓐᓇᖓᒍᑦ ᖃᑦᑎᕆᔩᑦ ᐱᐊᓂᒃᓯᓯᒪᔪᑦ ᐃᒻᒪᖄ 200-ᓂᒃ ᐃᑲᕐᕋᓂᒃ ᓄᓇᓕᖕᓂ ᐱᔨᑦᑎᕋᕐᓗᑎᒃ, ᐃᓚᒋᔭᐅᓗᓂ ᐃᓕᓐᓂᐊᕐᓂᖅ, ᐊᔪᖅᑎᑕᐅᔾᔮᙱᑦᑐᑦ ᐅᑎᖅᑎᑦᑎᓇᓱᒋᐊᒃᓴᖅ $500-ᒥ ᐅᑎᖅᑎᒐᒃᓴᐅᙱᑦᑐᓄᑦ ᑖᒃᓯᓄᑦ ᐃᓚᙵᕆᐊᕈᑎᓄᑦ. ᑖᓐᓇ ᐃᓚᙵᕆᐊᕈᑖ ᐊᑐᓯᒋᐊᕋᔭᖅᖢᓂ 2008-ᒥ ᑖᒃᓯᓕᕆᓇᖓᑕ ᐊᕐᕌᒍᐊᓂ, ᐊᒻᒪᓗ ᓇᓗᓇᐃᒃᑯᑦᑎᖅᑕᐅᓯᒪᓕᕐᓗᓂ ᐊᑭᑦᑐᕆᐊᖏᓐᓇᐅᔭᕐᓂᖓᓂᒃ ᐊᕐᕌᒍᑕᒫᑦ 2009-ᒥ ᐱᒋᐊᕐᓗᓂ.