ᐅᖃᓚᐅᑎᓯᐅᑏᑦ

You are here

ᓯᕗᓕᖅᑎ ᐱᓕᕆᐊᖃᖁᔨᒻᒪᕆᒃᐳᖅ ᑲᓇᑕᒥᙶᖅᑐᓂᑦ ᖁᐊᖅᓵᕐᓇᓪᓚᕆᒃᑐᒥᒃ ᖃᕐᔪᙳᐊᕌᓗᖕᒥᒃ ᖃᖓᑦᑕᕐᑎᑕᐅᔪᖃᕐᓯᒪᓂᖓᓂᒃ

ᐊᒃᑐᐸ 06, 2017

 

ᐅᖃᐅᓯᐅᔪᖅ

ᓯᕗᓕᖅᑎ ᐱᓕᕆᐊᖃᖁᔨᒻᒪᕆᒃᐳᖅ ᑲᓇᑕᒥᙶᖅᑐᓂᑦ ᖁᐊᖅᓵᕐᓇᓪᓚᕆᒃᑐᒥᒃ ᖃᕐᔪᙳᐊᕌᓗᖕᒥᒃ ᖃᖓᑦᑕᕐᑎᑕᐅᔪᖃᕐᓯᒪᓂᖓᓂᒃ


ᓯᕗᓕᖅᑎ ᐲᑕ ᑕᑉᑑᓇ ᐆᒥᖓ ᐅᖃᐅᓯᕐᒥᓂᒃ ᐅᓪᓗᒥ ᓴᖅᑭᑎᑦᑎᖅᑲᐅᕗᖅ:

“ᕉᓯᐊᒥᐅᑦ ᐱᓇᔪᑲᑕᐃᓐᓇᕐᒪᑕ ᖃᖓᑦᑕᖅᑎᑦᑎᓇᓱᒃᖢᑎᒃ ᖃᕐᔪᙳᐊᕌᓗᖕᓂᒃ ᐅᖅᓱᓕᖅᓯᒪᔪᓂᒃ hydrazine−ᒥᒃ, ᖁᐊᖅᓵᕐᓇᓪᓚᕆᒃᑐᒥᒃ ᐃᖏᕐᕋᑎᑦᑎᔪᓐᓇᖅᑐᒥᒃ ᐱᖓᓱᐃᓕᖅᑲᖓᓪᓗᓂ ᖃᖓᑦᑕᖅᑎᑕᐅᓂᐊᖅᖢᓂ ᐅᑐᐱᕆ 13, 2017−ᒥ. ᑲᓇᑕ ᐱᓕᕆᐊᒃᓴᖃᖅᐳᖅ ᓴᐳᔾᔨᓯᒪᓂᕐᒥᒃ ᓄᓇᓕᖕᒥᐅᑕᐅᖃᑎᑦᑎᓐᓂᒃ ᐃᒪᕆᔭᑦᑎᓐᓂᒡᓗ ᑲᓇᑕᒥᐅᑕᐅᙱᑦᑐᓂᑦ ᐱᓕᕆᐊᖑᔪᓂᒃ ᓴᖅᑭᑎᑦᑎᑐᐃᓐᓇᕆᐊᖃᖅᐸᒃᑐᓂᒃ ᓄᓇᒋᔭᐅᔪᒥᒃ ᓱᕈᖅᑎᑦᑎᓪᓚᕆᖕᓂᕐᒥᒃ ᐋᓐᓂᐊᖃᕐᓇᙱᑦᑐᓕᕆᓂᕐᒧᓪᓗ ᐊᒃᑐᖅᓯᓂᐅᓇᔭᖅᑐᓂᒃ ᑕᐃᒪᐃᔾᔪᑎᖃᕐᓗᑎᒃ hydrazine ᐅᖅᓱᕆᔭᐅᔫᑉ ᐊᓂᐊᑎᑉᐸᓪᓕᐊᔭᖓᓂᑦ ᓴᕕᕋᔭᖕᓂᒡᓗ ᐊᑐᒐᒃᓴᐅᔪᓐᓃᖅᑐᓂᒃ ᐃᒫᓄᑦ ᑲᑕᒃᑐᓂᒃ.

ᐱᖓᓱᐃᓕᖅᑲᖓᓂᖓᑕ ᓯᕗᓪᓕᖅᐹᖓ ᑖᔅᓱᒪ Soviet SS-19−ᖑᓂᕋᖅᑕᐅᔫᑉ ᓄᓇᒋᔭᐅᔪᒐᓚᒃᑎᒎᕐᓗᓂ ᓱᒃᑲᓕᓗᓂ ᓇᒧᙵᖅᐸᓪᓕᐊᕙᒃᑑᑉ ᓂᕆᐅᒋᔭᐅᔪᖅ ᐲᕐᓂᐊᕋᓱᒋᔭᐅᓪᓗᓂ ᐆᒪ ᖁᓛᒍᑦ, Barents Sea, ᐅᐊᖕᓇᖓᓂ Norway, ᐊᐃᑉᐸᖓᓗ ᐲᖅᑕᕐᓂᖓᑕ ᓄᓇᒧᑦ ᑐᓐᓂᐊᖅᖢᓂ ᐅᕙᓂ, North Water ᐊᐅᒃᑲᕐᓂᕐᒥ Baffin Bay−ᒥ. ᑖᓐᓇ ᐊᐅᒃᑲᕐᓂᖅ ᖃᐅᔨᒪᔭᐅᓪᓗᓂ ᐃᒪᓐᓇ, ᐱᑭᐊᓚᓱᖅᓱᐊᖅ, ᐱᕐᔪᐊᒻᒪᕆᐊᓘᕗᖅ ᐅᑭᐅᖅᑕᖅᑐᒥ ᐃᓂᒋᔭᐅᕙᒃᖢᓂ ᓂᕐᔪᑎᓄᑦ ᐅᕙᓃᖦᖢᓂ Ellesmere Island−ᓗ ᑲᓇᑕᒥ ᑲᓛᖦᖡᓪᓗ ᓄᓈᑕ ᐊᑯᓐᓂᖓᓐᓃᖦᖢᓂ.

ᓈᒻᒪᒋᙱᓪᓚᕆᒃᐸᕗᑦ ᕉᓯᐊᒥᐅᑦ ᐱᓕᕆᓂᕆᔭᖏᑦ ᐅᖃᓪᓚᕆᒃᖢᑕᓗ ᑕᒪᓐᓇ ᖃᖓᑦᑕᖅᑎᑦᑎᓂᕆᔭᖓᑦ ᓄᖅᑲᖅᑎᑕᐅᖁᓪᓗᒍ. ᐃᒪᓐᓇᐅᖁᔨᙱᒻᒪᕆᒃᐳᒍᑦ, ᖃᐅᔨᒪᓇᙱᑦᑐᓂᒃ ᖃᓄᖅ ᐊᖏᑎᒋᓂᖏᓐᓂᒃ hydrazine−ᒥᒃ ᐅᖅᓱᕆᔭᐅᔪᒥᒃ ᓄᓇᒧᐊᖅᑐᖃᕐᓗᓂ ᐊᖏᓛᑦᑎᐊᒧᑦ ᐊᐅᒃᑲᕐᓂᕐᒧᑦ ᐅᑭᐅᖅᑕᖅᑐᒥᐅᓕᒫᓂ. ᐃᓄᐃᑦ ᓄᓇᓖᑦ ᑖᔅᓱᒪ ᐃᓂᐅᑉ ᖃᓂᒋᔮᓂ ᓱᓕᑦᑎᐊᕐᓗᑎᒃ ᐃᓲᒫᓘᑎᖃᕋᔭᖅᐳᑦ ᓲᖃᐃᒻᒪ ᐊᑯᓐᓂᕆᔭᖓ ᑖᒃᑯᐊᒃ ᒪᕐᕉᒃ ᕿᑭᖅᑖᒃ 92 ᑭᓗᒦᑕᐅᓂᖓᓄᑦ ᐅᖓᓯᒌᖕᓂᕆᓂᖅᐹᖓᓂ, 32 ᑭᓗᒦᑕᐅᓪᓗᓂᓗ ᖃᓂᒌᖕᓂᕆᓂᖅᐹᖓᓂ ᑐᐊᓐᓂᕆᓂᖅᐹᖓᓂ.

ᐃᓄᒋᔭᕗᑦ ᐊᑐᕆᐊᖃᓪᓚᕆᒃᐸᒃᐳᑦ ᐃᒪᕐᒥᐅᑕᕐᓂᒃ ᐆᒪᑎᑦᑐᒪᓪᓗᒋᑦ ᐃᑲᔪᖅᑐᕐᓗᒋᑦ ᐃᓚᒋᔭᕗᑦ, ᓄᓇᓖᑦ ᐆᒪᔾᔪᑕᐅᕙᒃᑐᓪᓗ. ᑲᓇᑕᒥᐅᑦ ᑎᓐᒫᒃᒥᐅᓪᓗ ᐱᓕᕆᐊᖃᓯᑲᐅᑎᒋᖁᕙᕗᑦ ᑕᒪᑐᒧᖓ ᓄᓇᕐᔪᐊᕐᒥᐅᑕᓕᒫᑎᒍᑦ ᐅᖃᖃᑎᒌᒃᑎᑦᑎᖁᓪᓗᒋᑦ ᑕᒪᒃᑯᓄᖓ ᐱᓕᕆᓂᕆᔭᐅᔪᓄᑦ, ᓯᕗᒻᒧᐊᖅᐸᓪᓕᐊᓗᑎᒡᓗ ᓴᐳᔾᔨᓯᒪᔪᒪᓂᕐᒥᒃ ᑖᔅᓱᒥᖓ ᐃᓂᒥᒃ ᓄᓇᒋᔭᒥᑎᒍᑦ ᓄᓇᕐᔪᐊᕐᒥᐅᑕᑎᒍᓪᓗ ᐅᑯᑎᒎᓈᕐᓗᑎᒃ, ᐅᑭᐅᖅᑕᖅᑐᒧᑦ ᑲᑎᒪᔨᒋᔭᐅᔪᓄᑦ, ᕈᓯᐊᒥᐅᓪᓗ ᑖᒃᑯᓄᖓ ᐃᓚᒋᔭᐅᒋᓪᓗᑎᒃ.

ᑲᓇᑕᐅᑉ ᓯᕗᓕᖅᑎᖓ ᑐᕉᑑ ᐅᖃᐅᑎᓯᒪᓕᖅᑕᕋ ᑕᒪᑐᒧᖓ ᐅᖃᐅᓯᖃᖁᓪᓗᒍ ᓄᓇᕘᒥᐅᑦ ᐃᓱᒫᓘᑎᒋᔭᖓᓂᒃ ᐊᐃᑦᑖᕈᓱᒡᕕᒋᔭᖓᓂᒡᓗ.”

###

ᑐᓴᖅᑕᐅᔪᒃᓴᓄᑦ ᖃᐅᔨᒋᐊᕐᕕᒃᓴᖅ:
ᔮᔅᒥᓇ ᐱᐸ
ᐱᓕᕆᔨᓪᓗᐊᑕᖅ, ᑭᒃᑯᑐᐃᓐᓇᓄᑦ ᐱᓕᕆᓂᐅᕙᒃᑐᓄᑦ ᓯᕗᓕᖅᑎᐅᑉ ᑎᑎᕋᕐᕕᖓᓂ
ᓄᓇᕗᑦ ᒐᕙᒪᖓ
867-975-5059
ypepa@gov.nu.ca