ᐅᖃᓚᐅᑎᓯᐅᑏᑦ

You are here

ᐃᓕᓐᓂᐊᖅᑎᓂᒃ ᖃᐅᔨᓴᕐᓂᖅ

ᐃᓕᓐᓂᐊᖅᑎᓂᒃ ᖃᐅᔨᓴᖅᑏᑦ, ᐸᖕᓂᖅᑑᕐᒦᑦᐳᖅ, ᖃᐅᔨᓴᖅᑎᐅᕗᑦ, ᐱᕙᓪᓕᐊᑎᑦᑎᔨᐅᕗᑦ, ᐊᑐᓕᖅᑎᑦᑎᔨᐅᕗᑦ ᕿᒥᕐᕈᔨᐅᕗᓪᓗ ᐃᓕᓐᓂᐊᖅᑎᓂᒃ ᖃᐅᔨᓴᕐᓂᕐᒧᑦ ᐊᑐᐊᒐᕐᓂᑦ, ᐊᑐᕈᓯᕐᓂᑦ ᖃᐅᔨᓴᕈᑎᓂᒡᓗ ᖁᕝᕙᕆᐊᕈᑕᐅᕙᒃᑐᓂ ᐃᓕᓐᓂᐊᕈᑎᓕᐅᑦᑎᐊᕐᓂᕐᒧᑦ ᓄᓇᕗᒻᒥ ᐃᓕᓐᓂᐊᕐᕕᓕᒫᓄ. ᖃᐅᔨᓴᕈᑏᑦ ᐊᑐᖅᑕᐅᕙᒃᑐᑦ ᓄᓇᕗᒻᒥ:

  • ᐃᑲᔪᖅᓯᕐᓗᒍ ᑕᐅᑐᙳᐊᖅᑕᐅᔪᖅ ᓄᓇᕗᒻᒥ ᐃᓕᓐᓂᐊᕐᓂᓕᕆᔾᔪᑎᒥ ᓴᓇᔭᐅᓯᒪᔪᖅ ᐃᓄᐃᑦ ᖃᐅᔨᒪᔭᑐᖃᖏᓐᓂ ᐱᒻᒪᕆᐅᒋᔭᐅᔪᓂᑦ, ᐅᒃᐱᕆᔭᐅᔪᓂᑦ ᑕᐅᑐᒃᑕᐅᔪᓂᒡᓗ,
  • ᐱᖅᑯᓯᑎᒍᑦ ᐅᖃᐅᓯᑎᒍᓪᓗ ᓈᒪᔪᑦ ᓄᓇᕗᒻᒧ,
  • ᑐᙵᕕᖃᖅᑐᑦ ᐃᓕᑕᐅᓐᓂᑯᓕᕆᓂᕐᒥ – ᖃᐅᔨᓴᓪᓗᕆᖕᓂᖅ ᐃᓕᓐᓂᐊᕐᓂᕐᒥᑦ ᓄᓇᕗᒻᒥ ᐃᓕᓐᓂᐊᕐᕕᖕᓂ,
  • ᐊᑐᖅᑐᓂ ᑕᑎᒋᔭᒃᓴᓂᒡᓗ ᓇᓗᓇᐃᔭᕈᑎᖃᖅᑎᑦᑎᓪᓗᑎᒃ ᐃᓕᓐᓂᐊᖅᑎᐅᑉ ᐃᓕᑉᐸᓪᓕᐊᔭᖏᓐᓂ ᐊᓂᒎᑎᕙᓪᓕᐊᔭᖏᓐᓂᒡᓗ,
  • ᐊᑐᕐᓗᒍ ᒫᓐᓇᓕᓴᖅ ᐊᑐᖅᑕᐅᔾᔪᓯᑦᑎᐊᕙᐅᓛᖅ ᐃᓕᓐᓂᐊᕐᓂᕐᒥ ᖃᐅᔨᓴᕈᑎᑦ,
  • ᑎᑭᐅᑎᓗᒋᑦ ᐱᔭᐅᔭᕆᐊᓖᑦ ᓄᓇᕗᒻᒥ K-12-ᒥ ᐃᓕᓐᓂᐊᖅᑎᓂᒃ, ᐊᖏᔪᖅᑳᓂᒃ, ᐃᓕᓴᐃᔨᓂᒃ, ᑭᒃᑯᑐᐃᓐᓇᕐᓂᒡᓗ, ᐊᒻᒪᓗ
  • ᐱᐅᓯᒋᐊᕐᓗᒍ ᐃᓕᓴᐃᓂᖅ ᐃᓕᓐᓂᐊᖅᑕᐅᔪᓪᓗ.

 

ᐱᓕᕆᐊᑦ ᖃᓄᐃᓕᐅᕈᑕᐅᔪᓪᓗ ᖃᐅᔨᓴᖅᑕᐅᕙᒃᐳᑦ ᑲᑎᖅᓱᐃᓂᖅᑎᒍᑦ ᐊᓂᒎᑕᐅᓯᒪᔪᓂᒃ ᐅᐸᒍᑕᐅᕙᒃᑐᓂᒡᓗ ᐃᓕᓐᓂᐊᕐᕕᖕᒥ 

ᐃᖅᑲᓇᐃᔭᖅᑎᓂᒃ ᐊᑐᖅᖢᑎᒃ ᐃᓕᓐᓂᐊᖅᑏᑦ ᑐᑭᓯᒋᐊᕈᑎᖏᑦᑕ ᑐᖅᑯᐃᕕᖓᓂ (SIS), ᖃᐅᔨᓴᖅᑕᐅᓪᓗᑎᒡᓗ ᐱᓕᕆᐊᓂ ᕿᒥᕐᕈᔨᒥ. 

 

ᐃᓕᑕᐅᓐᓂᑯᓕᕆᓂᖅ  ᐃᓕᑕᐅᓐᓂᑯᓕᕆᓂᖅ​ ᑐᑭᖃᖅᐳᖅ ᑕᒪᐃᓐᓂ ᖃᓄᐃᓕᐅᕈᑕᐅᕙᒃᑐᒥᑦ ᐃᓕᓐᓂᐊᖅᑎᓂᒃ ᖃᐅᔨᓴᕐᓂᕐᒥᑦ, ᐅᓂᒃᑲᐅᑎᓕᐅᕐᓂᕐᒥᒡᓗ ᑐᕌᖓᓪᓗᓂ ᓄᓇᕗᒻᒥ ᐃᓕᓐᓂᐊᕐᕕᖕᓄ. ᑐᙵᕕᐅᔪᖅ ᑎᑎᖅᑲᖁᑎᖓ ᐃᑲᔪᐅᕙᒃᐳᖅ ᐃᓕᓐᓂᐊᖅᑎᓂᒃ ᐊᑐᓕᖅᑎᑦᑎᓂᕐᒧᑦ ᓄᓇᕗᒻᒥ ᑕᐅᑐᙳᐊᖅᑕᐅᔪᖅ ᐃᓕᓐᓂᐊᕐᕖᑦ ᐊᑐᓕᕐᓗᑎᒃ ᑐᙵᕕᓂᑦ ᐃᓄᐃᑦ ᖃᐅᔨᒪᔭᑐᖃᖏᑦ. ᓄᓇᕗᒻᒥ ᐃᓕᓐᓂᐊᕐᕕᐊᕈᓰᑦ ᖃᓄᐃᑦᑐᑯᓘᔭᐅᕗᑦ, ᐱᔭᕆᑐᓪᓗᑎᒃ, ᖁᑦᑎᓕᕇᑯᓘᔭᖅᑐᓂᒃ ᐃᓕᓐᓂᐊᕐᕕᐅᓪᓗᑎᒡᓗ. ᑐᙵᕕᐅᔪᑦ ᐃᓕᑕᐅᓐᓂᑯᓕᕆᓂᕐᒥ ᑲᑐᔾᔨᖃᑎᖃᕐᓗᑎᒃ ᒪᕐᕉᖕᓂ ᐊᓯᖏᓐ ᑐᙵᕕᐅᖃᑕᐅᔪᓂ ᐃᓕᓐᓂᐊᕐᓂᕐᒧᑦ ᓄᓇᕗᒻ: ᐃᓄᐃᑦ ᖃᐅᔨᒪᔭᑐᖃᖏᑦ ᐃᓕᓐᓂᐊᕐᓂᓕᕆᓂᕐᒧᑦ ᐊᑐᖅᑕᐅᔪᒃᓴᖅ ᓄᓇᕗᒻᒥ ᐃᓕᓐᓂᐊᒐᒃᓴᓄ, ᐊᒻᒪᓗ ᐃᓄᒡᓗᒋᔭᐃᑦᑐᖅ ᑐᙵᕕᒃ ᓈᒪᔪᒥ ᐃᓕᓐᓂᐊᖅᑎᑦᑎᓂᕐᒧᑦ ᓄᓇᕗᑦ ᐃᓕᓐᓂᐊᕐᕕᖏᓐᓂ

 

 

ᐃᓕᑕᐅᓐᓂᑯᓕᕆᓂᖅ ᑐᙵᕖᑦ

ᐊᕐᕕᓂᓖᑦ ᒪᕐᕉᓪᓗ ᑐᙵᕖᑦ ᐃᑲᔪᐅᕗᑦ ᖃᐅᔨᓴᕐᓂᕐᒥᑦ ᓄᓇᕗᑦ ᐃᓕᓐᓂᐊᕐᕕᖏᓐᓂ. ᐃᓕᑕᐅᓐᓂᑯᓕᕆᓂᖅ ᑕᑯᒃᓴᐅᑎᑦᑎᕗᖅ ᐃᓄᐃᑦ ᐱᒻᒪᕆᐅᒋᔭᖏᓐᓂ ᐃᑲᔪᖅᓯᖅᑕᐅᓪᓗᓂᓗ ᖃᐅᔨᓴᕐᓂᕐᒥᑦ ᐃᓱᒪᒋᔭᐅᔪᓂᒡᓗ. ᖃᐅᔨᓴᕈᑕᐅᔪᑦ ᓄᓇᕗᑦ ᐃᓕᓐᓂᐊᕐᕕᖏᓐᓂ ᒪᑯᐊᖑᕗᑦ:

  1. ᐃᑲᔪᖅᓯᐃᓂᖅ ᐃᓕᓐᓂᐊᖏᓐᓇᕐᓂᕐᒥᑦ ᐃᓕᓐᓂᐊᖅᑎᓕᒫᓂᒃ;
  2. ᐱᑦᑎᐊᕐᓂᖅ ᐃᓕᓐᓂᐊᖅᑎᓕᒫᓂᒃ;
  3. ᐃᓕᑕᖅᓯᓂᖅ ᐃᓛᒃᑯᑦ ᐃᓕᓐᓂᐊᖅᑏᑦ ᐊᔪᙱᑕᒥᖕᓂᑦ;
  4. ᐅᔾᔨᕐᓇᖅᓯᑎᓪᓗᒍ ᑕᑎᖃᖃᑎᒌᖕᓂᖏᑦ, ᐱᕈᖅᐸᓪᓕᐊᓂᖏᑦ, ᐊᓂᒎᑎᕙᓪᓕᐊᓂᖏᓪᓗ ᐃᓕᓐᓂᐊᖅᑏᑦ;
  5. ᓇᓗᓇᐃᕐᓗᒍ ᖃᐅᔨᓴᕐᓂᖅ ᓴᖅᑭᓯᒪᔪᓂᒃ ᑐᙵᕕᖃᕐᓂᖏᓐᓂ;​
  6. ᐊᔾᔨᒌᙱᑦᑐᓂᒃ ᐱᔾᔪᑎᖃᕐᓗᒍ ᖃᐅᔨᓴᕐᓂᖅ;
  7. ᓇᓗᓇᐃᕐᓗᒍ ᖃᐅᔨᓴᕐᓂᖅ ᐱᓪᓚᑖᖑᓂᖓᓂ, ᑐᑭᓯᓇᕐᓂᖓᓂ, ᐃᓕᓐᓂᐊᖅᑎᓂᒡᓗ ᓴᙱᒃᑎᒋᐊᕈᑕᐅᓂᖓᓂ.

 

 

ᐃᓕᓐᓂᐊᕐᕕᐊᕈᓯᕐᒥᑦ ᖃᐅᔨᓴᕐᓂᖅ

 

ᖃᐅᔨᓴᓲᑦ ᑲᑎᖅᓱᐃᕙᓪᓕᐊᓪᓗᑎᒃ ᓇᓗᓇᐃᕈᑕᐅᕙᒃᑐᓂ ᐃᓕᓐᓂᐊᖅᑎᐅᑉ ᐱᕙᓪᓕᐊᓂᕆᔭᖓᓂ ᐊᓂᒎᑎᕙᓪᓕᐊᓂᕆᔭᖏᓐᓂᒡᓗ ᐃᓕᓐᓂᐊᕈᑎᒋᔭᒥᓂᒃ ᐊᒃᑑᑎᔪᑦ ᐃᓕᓐᓂᐊᕈᑕᐅᔪᑦ ᓴᖅᑮᔾᔪᑎᒋᔭᒥᓂᒃ ᓇᓗᓇᐃᒃᑯᑕᐅᔪᓄᓪᓗ. ᐋᖅᑭᒃᓱᐃᔭᕆᐊᖃᖅᐳᑦ ᐃᓛᒃᑯᑦ ᐃᓕᑕᐅᔪᒪᔪᓂᒃ ᖃᐅᔨᓴᕐᓂᕐᒥᒡᓗ ᐊᓂᒎᑎᔭᐅᕙᓪᓕᐊᔪᓂᑦ ᐃᓕᑕᐅᓇᓱᐊᖅᑐᓄ. ᐃᓕᓴᐃᔩᑦ ᐃᓱᒪᓕᐅᕆᕙᒃᐳᑦ ᖃᓄᖅ ᐃᓕᓐᓂᐊᖅᑏᑦ ᖃᐅᔨᒪᖕᒪᖔᑦ ᖃᓄᕐᓗ ᐊᔪᙱᒻᒪᖔᑦ, ᖁᕕᐊᓲᑎᖃᖅᐸᒃᖢᑎᒡᓗ ᐊᓂᒎᑎᕙᓪᓕᐊᓂᕆᔭᒥᓂᒃ.

 

ᐃᓕᓴᐃᔨᐅᑉ ᐱᓕᕆᐊᒃᓴᕆᔭᖓ ᖃᐅᔨᓴᖅᐸᓪᓕᐊᔭᕆᐊᖃᖅᖢᓂ ᐃᓕᓐᓂᐊᖅᑎᓂᒃ ᐊᓯᔾᔨᖅᑕᙱᓪᓗᓂ, ᓈᒻᒪᒡᓗᓂ ᖃᐅᔨᓴᐃᓐᓇᖅᐸᒡᓗᓂᓗ, ᐱᖓᓱᐃᖅᓱᕐᓗᓂᓗ ᐊᕐᕌᒎᑉ ᐃᓗᐊᓂ, ᓇᓗᓇᐃᕐᕕᒋᕙᒡᓗᒋᑦ ᑕᒪᐃᓐᓂ ᐃᓕᓐᓂᐊᖅᑏᑦ ᐊᖏᔪᖅᑳᖏᓪᓗ ᖃᓄᐃᑉᐸᓪᓕᐊᓂᕆᔭᖓᓂ, ᐃᓕᖅᑯᓯᖓᓂ ᐅᐸᖃᑦᑕᕐᓂᕆᔭᖓᓗ ᐃᓕᓐᓂᐊᖅᑎᐅᑉ ᖃᐅᔨᒃᑲᕐᓗᒋᓗ ᖃᓄᐃᒃᑲᓐᓂᕆᐊᖃᕐᒪᖔᑦ ᐃᓕᓐᓂᐊᖅᑎ ᓯᕗᒻᒧᐊᕈᒪᒍᓂ ᐃᓕᓐᓂᐊᖅᑕᒥᓂᒃ (ᐃᓕᓐᓂᐊᕐᓂᓕᕆᓂᕐᒧᑦ ᐱᖁᔭᖅ, 2008). ᐃᓕᓐᓂᐊᕐᕕᐊᕈᓯᕐᒥᑦ ᖃᐅᔨᓴᕐᓂᖅ ᑲᑎᖅᓱᐃᕙᓪᓕᐊᕙᒃᖢᑎᒃ, ᓇᑭᑯᓘᔭᖅ, ᑐᑭᓯᒋᐊᕈᑎᓂᒃ ᓴᖅᑭᔮᖅᑎᑦᑎᑦᑎᐊᕐᓗᓂ ᖃᓄᖅ ᐃᓕᓐᓂᐊᖅᑎ ᐊᓂᒎᑎᕙᓪᓕᐊᖕᒪᖔᑦ ᐃᓕᓐᓂᐊᖅᐸᓪᓕᐊᔭᒥᓂᒃ. 

 

ᑕᒪᐃᓐᓂ ᖃᐅᔨᓴᕐᓂᖅ

ᒫᓐᓇᐅᔪᖅ, ᓄᓇᕗᒻᒥ ᐃᓕᓐᓂᐊᖅᑏᑦ ᑎᑎᕋᖃᑦᑕᕆᐊᖃᖅᐳᑦ ᐃᐅᓪᐴᑕᐅᑉ ᖃᐅᔨᓴᖅᑕᐅᔾᔪᑎᖓᓂ ᓂᕈᐊᖅᑕᐅᓯᒪᔪᓂᒃ ᖁᑦᑎᖕᓂᓕ 12-ᒥ ᐃᓕᓐᓂᐊᒐᒃᓴᐅᔪᓂᒃ (ᖃᓪᓗᓈᑉ ᐅᖃᐅᓯᖓ 30-1 ᐊᒻᒪ 30-2, ᓈᓴᐅᓯᕆᓂᖅ 30-1 ᐊᒻᒪ 30-2, ᐅᐃᕖᑉ ᐅᖃᐅᓯᖓ 30-1, ᐅᐃᕖᑐᑦ 30-1, ᐆᒪᔪᓕᕆᓂᖅ 30, ᐃᓚᐅᕈᑎᒃᓴᓕᕆᓂᖅ 30, ᐊᐅᓚᔪᓐᓇᐅᑎᓕᖕᓂ ᐃᒃᑕᕆᖕᓂᓕᖕᓂ ᖃᐅᔨᕐᓂᖅ 30, ᐊᒻᒪ ᖃᐅᔨᓴᕐᓂᖅ 30). ᖃᐅᔨᓴᖅᑕᐅᔾᔪᑏᑦ ᐊᐅᓚᑕᐅᕗᑦ ᐃᐅᓪᐴᑕᐅᑉ ᐃᓕᓐᓂᐊᕐᓂᓕᕆᔨᒃᑯᖏᓐᓂ. ᓄᓇᕗᒻᒥ ᐃᓕᓐᓂᐊᖅᑏᑦ ᐃᓕᓐᓂᐊᖅᐸᒃᖢᑎᒃ ᓂᕈᐊᕆᔭᐅᔪᓂᒃ ᐃᓕᓐᓂᐊᒐᒃᓴᓂᑦ ᐃᓕᓐᓂᐊᖅᑎᑦ ᑐᑭᓯᒋᐊᕈᑎᖏᓐᓂ ᑐᖅᑯᐃᕕᖓᑦᑎᒍ ᐃᓕᓐᓂᐊᖅᑎᑦ ᑐᑭᓯᒋᐊᕈᑎᖏᑦ ᑐᖅᑯᐃᕕᖓ ᑎᑎᕋᕆᐊᖃᓕᖅᐸᒃᖢᑎᒃ ᖃᐅᔨᓴᖅᑕᐅᔾᔪᑎᒥᒃ ᐱᕕᓕᐊᖑᔪᖅ ᓈᒻᒪᒃᓯᔭᕌᖓᒥᑦ. ᖃᓄᐃᓐᓂᕆᔭᖓ ᖃᐅᔨᓴᖅᑕᐅᓚᐅᖅᑎᓪᓗᓂ 50%-ᖓᓃᑉᐳᖅ ᐃᓕᓐᓂᐊᖅᑎᐅᑉ ᐃᓕᓐᓂᐊᕈᑎᒋᔭᖓᓂ. ᐊᓯᖓ 50% ᐃᓕᓐᓂᐊᕐᕕᐊᕈᓯᖓᓂ ᐱᓕᕆᐊᖓᓂᓪᓘᓐᓃ. 

 

 

 

ᖃᐅᔨᒋᐊᕐᕖᑦ:

ᓄᓇᕗᒻᒥ ᐃᓕᓴᐃᔩᑦ ᖃᐅᔨᓴᕐᓂᕐᒧᑦ ᐃᑭᐊᖅᑭᕕᒃᑰᕈᑎᖓ (ᓴᖅᑭᓵᓕᓛᓕᖅᑐᖅ!)

ᐃᓱᒪᒃᓴᖅᓯᐅᒃᑲᓐᓂᕐᓂᖅ ᐃᓕᓐᓂᐊᕐᕕᐊᕈᓯᕐᒥᑦ ᖃᐅᔨᓴᕐᓂᕐᒧᑦ ᐱᔾᔪᑎᖃᕐᓗᓂ, WNCP, 2006

 

 

ᓄᓇᕗᒻᒥ ᐃᓕᓐᓂᐊᖅᑎᓂ ᐅᓂᒃᑳᓕᐅᕐᓂᕐᒧᑦ ᐊᑐᖅᑕᐅᕙᒃᑐᖅ

ᒪᓕᒋᐊᓕᖕᓂ ᐊᑐᕐᓗᒍ ᓄᓇᕗᒻᒥ ᐃᓕᓐᓂᐊᖅᑎᑦ ᑐᑭᓯᒋᐊᕈᑎᖏᓐᓂ ᑐᖅᑯᐃᕕᖓᓂ ᐃᓕᓐᓂᐊᖅᑎᓂᒃ ᐅᓂᒃᑳᓕᐅᕐᓂᕐᒧᑦ, ᐊᑏ ᐅᐸᒡᓗᒍ: http://nunavutsis.wikispaces.com/