ᐅᖃᓚᐅᑎᓯᐅᑏᑦ
LogoHome

ᓯᕗᒧᑦ ᐊᑉᓗᖅᑕ

ᓯᕗᒧᑦ ᐊᑉᓗᖃᑎᒌᓐᓂᖅ

ᑕᑯᔪᒪᔭᕗᑦ

ᓯᕗᓂᑦᑎᓐᓂ ᐊᕐᕌᒍᑦ 20-ᓂ ᑕᑯᓐᓇᙳᐊᕐᓗᒋᑦ ᐸᕐᓇᐅᑎᒋᓗᒋᑦ ᓄᓇᑦᑎᓐᓂ ᓄᓇᕗᒻᒥᐅᑦ ᐃᓅᓯᕐᒥᓂ ᓂᕆᐅᓐᓂᖃᑦᓯᐊᕐᓗᑎᒃ ᐃᒻᒥᓂᖅᓱᑦᓯᐊᕐᓗᑎᒃ - ᐅᑭᐅᖅᑕᖅᑐᒥᐅᑕᐅᓪᓗᑎᒃ, ᑲᓇᑕᒥᐅᑕᐅᓪᓗᑎᒃ ᐃᓚᒋᔭᐅᖃᑕᐅᓗᑎᓪᓗ ᓄᓇᕐᔪᐊᒥ ᑮᓇᐅᔭᓕᐅᕋᓱᐊᕐᓂᕐᒧᑦ.

ᑕᑯᔪᒪᔭᕗᑦ ᐃᓕᓐᓂᐊᖅᓯᒪᓂᖃᕐᓂᖅᓴᓂᒃ ᐃᒻᒥᓂᖅᓱᑦᓯᐊᕐᓂᖅᓴᓂᒃ ᓄᓇᕗᒻᒥᐅᓂᒃ. ᓂᕆᐅᑉᐳᒍᑦ ᐊᒥᓲᓂᖅᓴᐃᑦ ᒪᒃᑯᑦᑐᐃᑦ ᐱᔭᕇᖃᑦᑕᕐᓗᑎᒃ ᐃᓕᓐᓂᐊᕐᕕᐊᓗᒻᒥ, ᓯᓚᑦᑐᓴᕐᕕᒻᒥ ᓯᓚᑦᑐᓴᕐᕕᔾᔪᐊᒥᓘᓐᓃᑦ ᓇᓕᒧᖃᑎᖃᓕᕐᓗᑎᒃ ᐱᔭᕇᖃᑦᑕᖅᑐᓂᒃ ᐊᓯᖏᓐᓂ ᑲᓇᑕᒥ.

ᓄᓇᕗᒻᒥᐅᑦ ᐅᖃᕈᓐᓇᑦᓯᐊᕐᓗᑎᒃ, ᐅᖃᓕᒫᕈᓐᓇᑦᓯᐊᕐᓗᑎᒃ ᑎᑎᕋᕈᓐᓇᑦᓯᐊᕐᓗᑎᓪᓗ ᐅᖃᐅᓯᕐᖓᐅᑎᑐᐃᓐᓇᕆᙱᑕᒥᓂᒃ, ᐊᑲᕐᕆᔮᑦᓯᐊᕐᓗᑎᓪᓗ ᐃᓅᓯᖃᕈᓐᓇᕐᓗᑎᒃ ᓄᑖᕐᖑᐸᓪᓕᐊᔪᒥ ᓄᓇᕐᔪᐊᒥ ᐃᓕᖅᑯᓯᑐᖃᕐᒥᓂᒃ ᐅᑉᐱᕆᔭᕐᒥᓂᓪᓗ ᑐᙵᕕᖃᕈᓐᓇᕐᓗᑎᒃ.

ᑕᑯᔪᒪᔪᒍᑦ ᐱᔭᐅᒍᒪᒋᐊᓪᓚᖁᓪᓗᒋᑦ ᓄᓇᒦᖔᖅᑐᑦ ᐊᑐᓕᖅᑭᑦᑕᐅᒍᓐᓇᖅᑐᑦ ᐊᑐᓕᖅᑭᒐᑦᓴᐅᙱᑦᑐᓪᓗ ᐱᕚᓪᓕᕈᑎᑦᓴᐅᒍᓐᓇᖅᑐᑦ. ᓄᓇᕗᒻᒥ ᐊᐅᓚᑦᓯᓗᑕ ᐱᕙᓪᓕᐊᑎᑦᓯᓗᑕᓗ ᐅᔭᕋᕐᓂᐊᕐᓂᒃᑯᑦ ᐅᔾᔨᖅᓱᑦᓯᐊᕐᓗᑕ, ᐱᕚᓪᓕᕈᑕᐅᒍᓐᓇᕐᓗᓂᓗ ᐃᖅᑲᓇᐃᔭᖅᑎᑦᑎᓐᓄᑦ ᓇᖕᒥᓂᖃᖅᑎᐅᔪᓄᓪᓗ.

ᐊᕐᕌᒍᑦ ᐊᕙᑎᑦ ᓯᕗᓂᑦᓴᑎᓐᓂ ᑕᑯᔪᓐᓇᖅᓯᓂᐊᖅᑐᒍᑦ ᓄᓇᑦᑎᓐᓂ ᑎᒥᒥᒍᑦ ᐃᓱᒪᒥᒍᓪᓗ ᖃᓄᐃᒍᑎᖃᙱᓂᖅᓴᓂᒃ ᑲᔪᖏᕐᓂᖃᑦᓯᐊᕐᓗᑕᓗ ᓯᕗᓂᑦᓴᑎᓐᓄᑦ. ᓂᕆᐅᓐᓂᖃᖅᑐᒍᑦ ᐋᖓᔮᕐᓇᖅᑐᓂᒃ ᐊᔪᓕᕈᑎᖃᖅᓯᒪᔪᑦ ᐃᒻᒥᓃᖃᑦᑕᖅᑐᓪᓗ ᐃᑯᓪᓚᐅᒥᒐᔭᕆᐊᖏᑦ, ᖃᑦᓰᓐᓇᐅᓂᖅᓴᐃᓪᓗ ᐃᓅᖃᑎᕗᑦ ᑕᑎᖃᓗᐊᕈᓐᓃᕐᓗᑎᒃ ᐃᓄᓕᕆᔨᒃᑯᓐᓂᒃ ᐃᑲᔫᓯᐊᖃᑦᑕᓂᕐᒥᒃ ᓄᓇᓕᕗᓪᓗ ᐃᒻᒥᓂᖅᓱᕈᓐᓇᑦᓯᐊᕐᓗᑎᒃ ᑮᓇᐅᔭᓕᐅᕈᓐᓇᑦᓯᐊᕐᓗᑎᒃ, ᐃᓅᖃᑎᒌᑦᓯᐊᕐᓗᑎᒃ ᐃᓕᖅᑯᓯᑎᓂᓪᓗ ᐊᑑᑎᖃᑦᓯᐊᕐᓗᑎᒃ.

ᓯᕗᓂᑦᓴᑎᓐᓂ ᑕᑯᔪᓐᓇᖅᓯᓛᖅᑐᒍᑦ ᓄᓇᕗᑦ ᐃᓚᐅᖃᑕᐅᑦᓯᐊᕐᓗᓂ ᓄᓇᕐᔪᐊᑉ ᐅᑭᐅᖅᑕᖅᑐᖓᓂ ᐱᓕᕆᖃᑎᖃᑦᓯᐊᕐᓂᕐᒥᒃ ᑲᑐᔾᔨᖃᑎᒌᑦᓯᐊᕐᓂᖅᓴᐅᓗᑎᓪᓗ ᐊᕕᑦᑐᖅᓯᒪᓂᐅᔪᓂ ᐃᓄᐃᑦ ᑲᑐᔾᔨᖃᑎᒌᖏᑦ ᑲᓇᑕᓗ ᑐᙵᕕᓕᐅᕈᓐᓇᖁᓪᓗᑕ.

ᐅᓪᓗᒥ ᓇᒦᓕᕐᓂᕗᑦ

ᐃᓅᖃᑎᕗᑦ

ᓄᓇᕗᒻᒥ ᓱᑲᓐᓂᖅᐹᒥᒃ ᐃᓐᓄᑉᐸᓪᓕᐊᓂᖅᐹᖑᒻᒪᑦ ᑲᓇᑕᒥ, ᐊᒻᒪᓗ ᑲᓇᑕᒥ ᐱᒋᐊᕋᑖᖑᓂᖅᐹᖑᓪᓗᓂ; 30 ᐳᓴᓐᑎᖏᑕ ᐅᖓᑖᓃᑦᑐᑦ ᓄᓇᕗᒻᒥᐅᑦ ᐅᑭᐅᓖᑦ 15 ᑐᖔᓂ. ᑕᒪᒃᑯᐊ ᐱᕈᖅᐸᓪᓕᐊᔪᑦ, ᒪᒃᑯᑦᑐᑦ ᐃᓅᖃᑎᕗᑦ ᓱᕐᕋᐸᓪᓕᐊᙱᑦᑐᒥᒃ ᐊᔪᕐᓇᓕᒃᑲᓐᓂᕈᑕᐅᕙᓪᓕᐊᔪᑦ ᓄᓇᕗᒻᒥ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐃᓕᓐᓂᐊᖅᑐᓕᕆᓂᕐᒧᓪᓗ, ᐃᓪᓗᑭᑦᓴᕐᓂᕐᒧᑦ, ᐊᑭᑐᔫᑎᓄᑦ, ᑮᓇᐅᔭᓕᐅᕈᑎᖃᕈᓐᓇᓂᕐᒧᓪᓗ.

ᐃᓄᐃᑦ ᓄᓇᕗᒻᒥ ᐊᑯᓂᐊᓗᒃ ᑭᖑᓂᖃᖅᑐᑦ ᓴᐱᓕᖅᑕᐃᓕᖃᑦᑕᓂᕐᒥᒃ ᐃᒻᒥᓂᖅᓱᕈᓐᓇᓂᕐᒥᒃ, ᓱᕈᖅᑎᐸᓪᓕᐊᓯᒪᓪᓗᓂ ᐊᓯᔾᔨᖅᐸᓪᓕᐊᓯᒪᓂᖏᓐᓄᑦ ᐃᓄᐃᑦ ᐃᓅᔾᔪᓯᖏᑦ ᐊᕐᕌᒎᓯᒪᔪᓂᒃ 50-ᓂᒃ. ᓄᓇᕗᒻᒥᐅᑦ ᓵᙵᕕᐅᓕᖅᑐᑦ ᐊᒥᓱᓂᒃ ᐃᓱᒪᓕᕆᓂᕐᒧᑦ ᐃᓅᖃᑎᒌᓄᓪᓗ ᐊᑲᐅᙱᓕᐅᕈᑕᐅᔪᓂᒃ. ᐊᒥᓱᑦ ᒪᒃᑯᑦᑐᖁᑎᕗᑦ ᐃᓕᓐᓂᐊᕆᐊᑦᓯᐊᙱᓗᐊᖃᑦᑕᖅᑐᑦ ᐱᔭᕇᖃᑦᑕᕋᑎᓪᓗ ᐃᓕᓐᓂᐊᖅᑕᐅᓯᒪᒋᐊᓕᓐᓂᒃ ᐱᒋᐊᕈᓐᓇᖅᓯᖁᓪᓗᒋᑦ ᓯᓚᑦᑐᓴᕐᕕᓐᓂ, ᐱᓕᒻᒪᑦᓴᒍᑎᓄᑦ ᐃᖅᑲᓇᐃᔮᑦᓴᓄᓪᓘᓐᓃ.

ᒫᓐᓇᒫᖑᓂᖅᓴᒃᑯᑦ, ᓄᓇᓖᓐᓃᖔᖅᑐᓂᒃ ᐋᖅᑭᐅᒪᔾᔪᑎᑦᓴᓂᒃ ᐃᑲᔪᖅᓱᐃᒋᐊᖃᖅᑐᒍᑦ ᐱᕙᓪᓕᐊᖁᓪᓗᒋᑦ ᐋᓐᓂᐊᖃᕐᓇᖏᑦᑐᓕᕆᓂᖅ, ᐃᓅᓯᖃᑦᓯᐊᕈᓐᓇᕐᓂᖅ ᓄᓇᓕᓐᓂᓗ ᑮᓇᐅᔭᓕᐅᕈᑎᖃᕈᓐᓇᕐᓂᖅ. ᓯᕗᓂᑦᓴᑎᓐᓂ ᐊᑯᓂᐅᔪᒧᑦ, ᐃᓕᓐᓂᐊᖅᑐᓕᕆᓂᖅ ᐃᖅᑲᓇᐃᔭᖅᑐᓕᕆᓂᕐᓗ ᐱᒻᒪᕆᐅᓂᐊᖅᑑᒃ ᑲᒪᒍᑕᐅᓗᑎᒃ ᐊᒥᓱᓂᒃ ᑕᒪᒃᑯᓂᖓ ᐊᑲᐅᙱᓕᐅᕈᑕᐅᔪᓂᒃ. ᐃᓕᓐᓂᐊᖅᑐᓕᕆᓂᒃᑯᑦ ᐊᒥᓲᓂᖅᓴᓂᒃ ᓇᓖᕌᕈᑎᑦᓴᖃᕈᓐᓇᖅᑐᑦ ᑭᓇᑐᐃᓐᓇᕐᒧᑦ; ᐃᖅᑲᓇᐃᔭᕈᓐᓇᕐᓂᒃᑯᑦ, ᑭᒃᑯᑐᐃᓐᓇᐃᑦ ᐱᕕᑦᓴᖃᕐᓂᖅᓴᐅᒍᓐᓇᖅᑐᖅ ᓇᖕᒥᓂᖅᓱᕈᓐᓇᖁᓪᓗᒋᑦ, ᐃᓚᒌᓪᓗ ᓄᓇᖅᑲᑎᒌᓪᓗ.

ᓄᓇᕗᒻᒥ ᒪᒃᑯᑦᑐᖏᑦ ᐃᓐᓇᕈᖅᐸᓪᓕᐊᑎᓪᓗᒋᑦ, ᐊᑦᓱᕉᑎᖃᕆᐊᖃᖅᑐᒍᑦ ᐱᒻᒪᕆᐅᑎᓪᓗᒍ ᐃᒻᒥᓂᖅᓱᕈᓐᓇᕐᓂᖏᑦ ᐱᒋᐅᖅᑎᑕᐅᕙᓪᓕᐊᓗᑎᒃ ᐃᖅᑲᓇᐃᔭᕈᓐᓇᖅᓯᕙᓪᓕᐊᖁᓪᓗᒋᓪᓗ ᐃᓚᐅᖃᑕᐅᒍᓐᓇᑦᓯᐊᕈᓐᓇᖅᓯᖁᓪᓗᒋᑦ ᐅᓪᓗᒥᐅᓕᖅᑐᖅ, ᓄᓇᕐᔪᐊᒥ ᑮᓇᐅᔭᓕᐅᖃᑕᐅᒍᓐᓇᓂᕐᒧᑦ.

ᓄᓇᒋᔭᕗᑦ

ᓄᓇᕗᑦ ᐊᖏᓂᖅᐹᖅ ᑲᓇᑕᒥ ᓄᓇᖓᓂ ᐱᒻᒪᕆᐅᓕᖅᐸᓪᓕᐊᑐᐃᓐᓇᖅᑐᓂᓗ ᑲᓇᑕ ᐅᑭᐅᖅᑕᖅᑐᒥᒃ ᓇᖕᒥᓂᖃᕐᓂᕋᕐᓂᖓᓄᑦ, ᐱᓗᐊᖅᑐᒥ ᐊᒥᓱᕐᖑᐸᓪᓕᐊᓂᐊᕐᓂᕋᖅᑕᐅᑎᓪᓗᒋᑦ ᐅᒥᐊᕐᔪᐊᒃᑰᖅᑎᑦᓯᕙᑦᑐᑦ ᐅᑭᐅᖅᑕᖅᑑᑉ ᐃᒪᖏᓐᓂ.

ᓄᓇᕗᑦ ᓂᕐᔪᑎᖃᐅᑦᓯᐊᖅᑐᖅ, ᐃᖃᓗᖃᐅᑦᓯᐊᖅᑐᓂ ᐊᓯᖏᓐᓂᓪᓗ ᓄᓇᒦᖔᖅᑐᓂᒃ/ᐃᒪᕐᒥᓗ. ᑭᓯᐊᓂᓕ, ᐅᑭᐅᖅᑕᖅᑐᒥ ᐆᒪᔪᓐᓇᖅᑐᓕᒫᑦ ᐊᕙᑎᖏᓪᓗ ᓱᕈᑦᓴᕋᐃᑦᑑᒻᒪᑦ ᐊᑯᓂᐊᓗᓪᓗ ᓯᕗᓪᓕᕐᒥ ᖃᓄᐃᓐᓂᕆᓚᐅᖅᑕᖓᓄᑦ ᐅᑎᕋᓱᐊᓲᖑᓪᓗᓂ. ᐆᒪᔪᕐᓂᒃ ᐊᐅᓚᑦᓯᓂᕐᒧᑦ ᓄᖑᓗᐊᑦᑕᐃᓕᑎᑦᓯᓂᕐᒧᓪᓗ ᐊᑦᓱᕉᑎᒋᔭᕗᑦ ᖃᐅᔨᓴᖅᑕᐅᕙᓪᓕᐊᑐᐃᓐᓇᕐᖓᑕ ᑲᓇᑕᓕᒫᒥ ᓄᓇᕐᔪᐊᓕᒫᒥᓗ.

ᓴᓇᑐᔪᒃᑯᑦ ᐊᐅᓚᑦᓯᔨᐅᖃᑎᒌᓐᓂᕐᒧᑦ ᐋᖅᑭᐅᒪᓂᑦᑎᒍᑦ, ᓄᓇᕗᒻᒥ ᓄᓇᒦᖔᖅᑐᓕᕆᓂᖅ ᐊᐅᓚᑕᐅᑦᓯᐊᕆᐊᓕᒃ ᑮᓇᐅᔭᓕᐅᕈᑕᐅᒍᓐᓇᕐᓂᒃᑯᑦ ᐱᕚᓪᓕᕈᑕᐅᒍᓐᓇᕐᓗᓂ ᓯᕗᕚᑦᓴᑎᓐᓄᑦ, ᐊᒻᒪᓗ ᐅᓪᓗᒥᐅᔪᖅ ᓄᓇᕗᒻᒥᐅᓄᑦ.

ᑮᓇᐅᔭᓕᐅᕈᑎᖃᕈᓐᓇᕐᓂᕗᑦ

ᓄᓇᕗᒻᒥ ᐊᔾᔨᒌᙱᑦᑐᓂᒃ ᑮᓇᐅᔭᓕᐅᕈᑎᖃᕈᓐᓇᕐᓂᖅ ᐱᕈᖅᐸᓪᓕᐊᒍᓐᓇᖅᑐᒻᒪᕆᒃ, ᑭᓯᐊᓂ ᒫᓐᓇᐅᔪᖅ ᐱᕙᓪᓕᐊᑎᑕᐅᙱᓗᐊᖅᑐᖅ. ᐃᓚᒋᔭᐅᓪᓗᑎᒃ ᐃᓕᖅᑯᓯᑐᖃᒃᑯᑦ ᓄᓇᓂᒃ ᐊᑐᖃᑦᑕᕐᓂᖅ, ᐊᒥᓱᐊᓘᓪᓗᑎᒃ ᒐᕙᒪᒃᑯᓐᓂ ᐃᖅᑲᓇᐃᔭᖅᑐᑦ, ᐊᖏᓪᓕᒋᐊᖅᑎᑦᓯᓂᖅ ᐅᔭᕋᕐᓂᐊᖅᑐᓕᕆᓂᕐᒥᒃ ᐃᒪᕐᒥᐅᑕᓂᓪᓗ ᑮᓇᐅᔭᓕᐅᕈᑎᖃᕈᓐᓇᓂᕐᒧᑦ, ᒥᑭᔫᑕᐅᓂᖅᓴᐃᓪᓗ ᑮᓇᐅᔭᓕᐅᕈᑕᐅᒍᓐᓇᖅᑐᑦ ᓴᓇᐅᒐᓕᕆᓂᕐᒧᑦ ᒥᖅᓱᒐᓕᕆᓂᕐᒧᓪᓗ, ᑕᕐᕆᔮᑦᓴᓕᕆᓂᖅ ᐳᓚᕋᑦᑐᓕᕆᓂᕐᓗ.

ᐱᕈᖅᐸᓪᓕᐊᑎᑦᓯᓂᖅ ᓄᓇᕗᒻᒥ ᑮᓇᐅᔭᓕᐅᕈᑕᐅᒍᓐᓇᖅᑐᓂᒃ ᑐᙵᕕᓕᒃ ᓴᓇᔭᐅᒋᐊᖃᕐᓂᖏᓐᓂᒃ ᐃᖏᕐᕋᔪᓕᕆᓂᕐᒧᑦ ᐊᑭᑐᔫᑎᑦ, ᐱᕙᓪᓕᐊᑎᑦᓯᓂᕐᒧᑦ ᒪᑭᑕᑦᓯᐊᖅᑐᓂᒃ ᓄᓇᓕᓐᓃᖔᖅᓯᒪᔪᓂᒃ ᓇᖕᒥᓂᖃᖅᑎᐅᔪᓂᒃ, ᐅᔾᔨᖅᓱᑦᓯᐊᕐᓗᑎᒃ ᐱᕙᓪᓕᐊᑎᑦᓯᓂᕐᒧᑦ ᐅᔭᕋᕐᓂᐊᖅᑐᓕᕆᓂᕐᒥᒃ ᐅᖅᓱᐊᓗᓕᕆᓂᕐᒥᓪᓗ, ᐱᕙᓪᓕᐊᑎᑕᐅᓗᑎᓪᓗ ᐱᔪᓐᓇᕐᓂᑖᑦᓯᐊᖅᓯᒪᔪᓂᒃ ᓄᓇᓕᓐᓂ ᐃᖅᑲᓇᐃᔭᖅᑎᐅᒍᓐᓇᖅᑐᓂᒃ.

ᐃᖅᑲᓇᐃᔭᖅᑎᑦᓯᕙᑦᑐᑦ ᖃᓄᐃᑦᑐᑐᐃᓐᓇᕐᓂᒃ ᐊᐅᓚᒍᓐᓇᐅᑎᖃᖅᐸᒻᒪᑕ ᐱᔪᓐᓇᕐᓂᖃᑦᓯᐊᖅᑐᓂᒃ ᐃᖅᑲᓇᐃᔭᖅᑎᓂᒃ ᓯᓚᑖᓃᖔᖅᑐᓂᒃ ᓄᓇᕗᑦ. ᓄᓇᕗᒻᒥᐅᑦ ᐊᑑᑎᖃᑦᓯᐊᕆᐊᓖᑦ ᐃᓕᓐᓂᐊᖃᑦᑕᕐᓗᑎᒃ ᐱᓕᒻᒪᑦᓴᖃᑦᑕᕐᓗᑎᓪᓗ ᐱᕚᓪᓕᕈᑎᖃᕈᓐᓇᖅᓯᖁᓪᓗᒋᑦ ᓄᓇᕗᒻᒥ ᐱᕈᖅᐸᓪᓕᐊᑎᓪᓗᒋᑦ ᑮᓇᐅᔭᓕᐅᕈᑕᐅᒍᓐᓇᖅᑐᑦ, ᐃᖅᑲᓇᐃᔭᖅᑎᐅᓗᑎᒃ ᐅᕝᕙᓘᓐᓃᑦ ᓇᖕᒥᓂᖃᖅᑎᐅᓗᑎᒃ ᓄᓇᓕᓐᓂᖔᖅᓯᒪᔪᓂ ᓇᖕᒥᓂᖃᖅᑎᐅᔪᓂ.

ᒐᕙᒪᒋᔭᕗᑦ

ᓄᓇᕗᒻᒥᐅᑦ ᓂᕆᐅᒋᔭᖃᕐᖓᑕ ᓄᓇᕗᒻᒥ ᒐᕙᒪᒃᑯᖏᑦ ᐊᑑᑎᖃᖁᓪᓗᒋᑦ ᐅᑉᐱᕆᔭᖏᓐᓂᒃ, ᖃᐅᔨᒪᔭᑐᖃᖏᓐᓂᒃ, ᐊᔾᔨᐅᙱᓐᓂᖏᓐᓂᒃ, ᐱᓕᕆᔾᔪᓯᖏᓐᓂᓪᓗ ᐃᓅᓯᓕᕆᓂᕐᒧᑦ ᐅᑭᐅᖅᑕᖅᑐᒥᐅᑕᐅᓪᓗᑎ.

ᓄᓇᕗᑦ ᒐᕙᒪᒃᑯᖏᑦ ᐊᑦᓱᕉᑎᖃᐃᓐᓇᓂᐊᖅᑐᑦ ᐊᑐᓕᖅᑎᑦᓯᕙᓪᓕᐊᓂᕐᒥᒃ ᓄᓇᕗᒻᒥ ᓄᓇᑖᖅᓯᒪᓂᕐᒧᑦ ᐊᖏᕈᑎᓂᒃ, ᓇᓗᓇᐃᖅᓯᓯᒪᒍᑕᐅᒻᒪᑦ ᐃᓚᒋᔭᐅᖃᑕᐅᔪᑦ ᐃᓚᐅᖃᑕᐅᒋᐊᖃᓪᓚᕆᓐᓂᖏᓐᓂᒃ ᐊᐅᓚᑦᓯᓂᕐᒧᑦ ᓄᓇᓂᒃ ᓄᓇᒦᖔᖅᑐᓕᕆᓂᕐᒥᓪᓗ ᐊᒻᒪᓗ ᓴᐳᒻᒥᔭᐅᒋᐊᖃᕐᓂᖏᓐᓄᑦ ᐃᓄᐃᑦ ᐱᖅᑯᓯᖏᑦ, ᐃᓕᖅᑯᓯᖏᑦ ᐱᔪᒪᓂᖏᓪᓗ. ᑲᑐᔾᔨᖃᑎᖃᕆᐊᖃᖅᑐᒍᑦ ᓄᓇᓕᓐᓂ, ᓄᓇᕗᒻᒥ, ᑲᓇᑕᒥ, ᓄᓇᕐᔪᐊᒥᓗ ᑎᒥᐅᔪᓂᒃ ᑲᒪᒋᒍᓐᓇᖅᓯᓂᐊᕈᑦᑎᒍ ᑐᕌᒐᕆᔭᕗᑦ.

ᒐᕙᒪᒃᑯᑦ ᐱᓕᕆᔾᔪᑎᑦᓴᖃᖅᑐᑦ ᐊᑑᑎᒋᒋᐊᓕᑦᑎᓐᓂᒃ ᓴᙱᓕᖅᐸᓪᓕᐊᑎᑦᓯᓂᕐᒧᑦ ᓄᓇᕗᒻᒥ ᐊᔾᔨᐅᙱᑦᑐᓂᒃ ᐊᐅᓚᑦᓯᒍᓯᑦᑎᓐᓂᒃ - ᑲᑎᖅᓱᖅᑕᐅᓯᒪᓪᓗᑎᒃ ᐃᓄᐃᑦ ᐱᖅᑯᓯᖏᑦ, ᐃᑲᔪᖅᓱᐃᓪᓗᑎᒃ ᓴᙱᓕᖅᐸᓪᓕᐊᖁᔨᓪᓗᑎᓪᓗ ᐊᑐᖅᑕᐅᖃᑦᑕᕆᐊᖃᕐᓂᖏᓐᓂᒃ ᐃᓄᐃᑦ ᐅᖃᐅᓯᖏᑦ, ᑎᑭᐅᑎᒍᓐᓇᖅᓯᖁᓪᓗᑕ ᖃᑦᓯᐅᓂᕆᒋᐊᓕᖏᓐᓄᑦ ᒐᕙᒪᒃᑯᓐᓂ ᐃᖅᑲᓇᐃᔭᖅᑎᑕᐅᔪᑦ, ᐃᓚᐅᖃᑕᐅᕕᖃᕐᓗᑕ ᓄᓇᕐᔪᐊᒥ ᐅᑭᐅᖅᑕᖅᑐᒥ ᓴᓂᓪᓕᑎᓐᓂᒃ, ᑲᑐᔾᔨᖃᑎᖃᖃᑦᑕᕐᓗᑕᓗ ᓂᕆᐅᓇᖅᓯᒪᓂᖓᓂᒃ ᓄᓇᕗᑦ.

ᓯᕗᒧᑦ ᐊᑉᓗᖅᑕ: ᓯᕗᒧᑦ ᐊᑉᓗᖃᑎᒌᓐᓂᖅ

ᒐᕙᒪᕗᑦ ᐊᑦᓱᕉᑎᖃᕐᓂᐊᖅᑐᑦ ᑐᕌᒐᖃᕐᓗᑎᒃ ᓯᑕᒪᐅᓕᖓᔪᓂᒃ ᓯᕗᓪᓕᐅᑎᒍᒪᔭᑦᑎᓐᓂᒃ ᓄᓇᕗᑦ ᐃᓂᑦᓴᐅᑦᓯᐊᒃᑲᓐᓂᖁᓪᓗᒍ ᕿᑐᕐᖓᑎᓐᓄᑦ ᐃᕐᖑᑕᑎᓄᓪᓗ.

  • ᐃᒻᒥᓂᖅᓱᕈᓐᓇᖁᓪᓗᒋᑦ ᓇᓗᖅᑯᑎᙱᓪᓗᑎᒃ ᐃᓕᓐᓂᐊᕐᓂᒃᑯᑦ ᐱᓕᒻᒪᑦᓴᓂᒃᑯᓪᓗ

ᓯᕗᓪᓕᖅᐸᐅᑎᓂᐊᖅᑕᕗᑦ ᐱᕙᓪᓕᐊᑎᑦᓯᓂᖅ ᐃᒻᒥᓂᖅᓱᕈᓐᓇᖅᓯᖁᓪᓗᒋᑦ ᑲᔪᖏᓂᖃᑦᓯᐊᖁᓪᓗᒋᓪᓗ ᐊᑐᐃᓐᓇᖃᕐᕕᐅᑦᓯᐊᖁᔭᕗᑦ ᐃᓕᓐᓂᐊᕈᑎᑦᓴᖏᓐᓂᒃ ᐱᓕᒻᒪᑦᓴᒍᑎᑦᓴᖏᓐᓂᓪᓗ ᓄᓇᕗᒻᒥᐅᑦ ᐅᐸᓗᖓᐃᔭᖅᑕᐅᑦᓯᐊᖁᓪᓗᒋᑦ ᐃᖅᑲᓇᐃᔭᕈᓐᓇᖅᓯᖁᓪᓗᒋᓗ. ᐃᓕᓐᓂᐊᑦᓯᐊᖅᓯᒪᓗᑎᒃ ᐃᖅᑲᓇᐃᔭᕈᓐᓇᖅᓯᒍᑎᓪᓗ ᐊᔪᖅᓴᙱᓂᖅᓴᐅᓕᕐᓂᐊᖅᑐᑦ, ᖃᓄᐃᙱᓂᖅᓴᐅᒍᓐᓇᓂᕐᒥᒃ ᐃᓅᓯᖏᓐᓂ ᐱᕚᓪᓕᕈᑕᐅᒍᓐᓇᕐᓗᓂᓗ ᓇᖕᒥᓂᖅ ᐸᖅᑭᒍᓐᓇᑦᓯᐊᕐᓗᑕ, ᐃᓄᑐᖃᑦᑎᓐᓂᒃ ᕿᑐᕐᖓᑎᓐᓂᓪᓗ.

  • ᐃᓅᖃᑎᒌᑦᓯᐊᖅᑐᑦ ᐃᓚᒌᑦ ᐃᒻᒥᓂᖅᓱᕈᓐᓇᑦᓯᐊᕐᓗᑎᒃ ᓄᓇᖅᑲᑎᒌᑦ

ᑐᙵᕕᖃᑦᓯᐊᖅᑐᑦ ᓄᓇᓖᑦ ᐃᓄᖃᐅᖅᑐᑦ ᖃᓄᐃᙱᑦᓯᐊᖅᑐᓂᒃ ᐃᓚᒌᓂᒃ ᑭᒃᑯᑐᐃᓐᓇᕐᓂᓪᓗ ᐱᔪᓐᓇᕐᓂᖃᑦᓯᐊᖅᑐᑎᒃ ᐱᓕᕆᔾᔪᑎᑦᓴᖃᑦᓯᐊᖅᑐᑎᓪᓗ ᓇᖕᒥᓂᖅ ᐃᒻᒥᓂᖅᓱᕈᓐᓇᓂᕐᒧᑦ ᐃᑲᔪᕈᓐᓇᓂᕐᒧᓪᓗ ᓄᓇᕗᒻᒥ. ᑮᓇᐅᔭᖃᖅᑎᑦᓯᒋᐊᖃᖅᑐᒍᑦ ᓄᓇᓕᓐᓃᖔᖅᑐᓂᒃ ᐋᖅᑭᐅᒪᔾᔪᑎᑦᓴᓂᒃ ᐱᕚᓪᓕᕈᓐᓇᖁᓪᓗᒋᑦ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ, ᐃᓅᓯᖃᑦᓯᐊᕈᓐᓇᓂᕐᒧᑦ ᓄᓇᓕᓐᓂᓗ ᑮᓇᐅᔭᓕᐅᕈᓐᓇᖁᓪᓗᒋᑦ.

  • ᑮᓇᐅᔭᓕᐅᕈᑎᖃᕈᓐᓇᑦᓯᐊᕐᓂᖅ ᐅᔾᔨᖅᓱᑦᓯᐊᕐᓗᑎᒃ ᐱᕙᓪᓕᐊᔪᓕᕆᓂᕐᒧᑦ ᖃᓄᐃᑦᑐᑐᐃᓐᓇᒃᑯᑦ

ᓄᓇᕗᑦ ᐊᒥᒐᙱᑦᑐᓂᒃ ᐱᕚᓪᓕᕈᑎᑦᓴᖃᐅᑦᓯᐊᖅᑐᖅ ᓄᓇᒦᖔᖅᑐᓂᒃ ᐱᑕᖃᐅᑦᓯᐊᖅᑐᖅ - ᐊᑐᓕᖅᑭᑦᑕᐅᒍᓐᓇᖅᑐᓂᒃ ᐊᑐᓕᖅᑭᑦᑕᐅᒍᓐᓇᙱᑦᑐᓂᓪᓗ ᐱᕚᓪᓕᕈᑎᑦᓴᓂᒃ. ᐊᑦᓱᕉᑎᖃᕆᐊᖃᖅᑐᒍᑦ ᐊᔾᔨᒌᙱᑦᑐᓂᒃ ᑮᓇᐅᔭᓕᐅᕈᑎᖃᕈᓐᓇᖅᑎᑦᓯᓂᕐᒥᒃ ᓄᓇᕗᒻᒥᐅᑦ ᐊᔾᔨᒌᙱᑦᑐᓂᒃ ᐃᖅᑲᓇᐃᔮᑦᓴᓂᒃ ᓇᓖᕌᕐᕕᖃᕈᓐᓇᖁᓪᓗᒋᑦ.

  • ᒐᕙᒪᐅᑦᓯᐊᕐᓂᖅ ᐊᑑᑎᖃᑦᓯᐊᕐᓗᑕ ᐱᓕᕆᔾᔪᑎᑦᓴᑎᓐᓂᒃ

ᒐᕙᒪᐅᓪᓗᑕ, ᑐᕌᒐᖃᕈᒪᔪᒍᑦ ᐊᒥᒐᕋᓗᐊᖅᑎᓪᓗᒋᑦ ᑮᓇᐅᔭᐃᑦ ᐱᓕᕆᐊᓄᑦ ᐱᔨᑦᓯᕋᐅᑎᓄᓪᓗ ᓄᓇᕗᒻᒥᐅᑦ ᐃᓅᓯᖃᕈᓐᓇᖁᓪᓗᒋᑦ ᖃᓄᐃᙱᑦᓯᐊᕐᓗᑎᒃ ᐱᓕᕆᑦᓯᐊᕈᓐᓇᕐᓗᑎᓪᓗ. ᐊᑐᓕᖅᑎᑉᐸᓪᓕᐊᓯᓐᓈᕐᓗᒋᑦ ᓯᕗᓪᓕᐅᑎᒍᒪᔭᕗᑦ, ᕿᒥᕐᕈᐊᒋᐊᖃᕐᓂᐊᕐᒥᔪᒍᑦ ᒐᕙᒪᒃᑯᑦ ᐱᓕᕆᐊᖏᓐᓂᒃ ᑮᓇᐅᔭᖃᖅᑎᑦᓯᓂᕐᒧᓪᓗ ᐊᖏᖃᑎᒌᒍᑎᖏᓐᓂᒃ ᓇᓗᓇᐃᖅᑕᐅᓯᒪᖁᓪᓗᒍ ᑲᔪᓯᑎᑦᓯᑦᓯᐊᖃᑦᑕᕋᓗᐊᕐᒪᖔᑦᑕ ᓂᕆᐅᒋᔭᑦᑎᓐᓂᒃ.

ᑖᒃᑯᐊ ᓯᕗᓪᓕᐅᑎᓐᓂᐊᖅᑕᕗᑦ ᐃᓚᒋᓕᐅᑎᕕᐅᓯᒪᔪᑦ ᐊᑑᑎᖃᖅᑐᓂᒃ ᖃᓄᐃᓕᒋᐊᕈᑎᓂᒃ ᓂᕆᐅᒍᑎᐅᓂᐊᕐᓗᑎᒃ ᖃᐅᔨᔭᑦᓴᐅᓪᓚᑦᑖᖅᑐᓂᒃ ᓴᖅᑭᕆᐊᓕᓐᓂᒃ ᓂᕈᐊᖅᑕᐅᓯᒪᓂᑦᑎᓐᓂ ᓯᑕᒪᖓᓐᓂ ᒪᓕᒐᓕᐅᖅᑎᐅᓪᓗᑕ.

ᐃᒻᒥᓂᖅᓱᕈᓐᓇᖁᓪᓗᒋᑦ ᓇᓗᖅᑯᑎᙱᓪᓗᑎᒃ ᐃᓕᓐᓂᐊᕐᓂᒃᑯᑦ ᐱᓕᒻᒪᑦᓴᓂᒃᑯᓪᓗ

ᐃᓕᓐᓂᐊᖅᓯᒪᓂᖃᑦᓯᐊᕐᓂᖅ ᑐᙵᕕᒋᔭᐅᓂᐊᖅᑐᖅ ᐃᖅᑲᓇᐃᔭᕈᓐᓇᓂᕐᒧᑦ ᐃᒻᒥᓂᖅᓱᕈᓐᓇᓂᕐᒧᓪᓗ ᑭᒃᑯᑐᐃᓐᓇᕐᓄᑦ ᐃᓚᒌᓄᓪᓗ. ᒐᕙᒪᒃᑯᑦ, ᓄᓇᓖᑦ, ᐃᓕᓐᓂᐊᖅᑎᑦᓯᔩᑦ, ᐊᖏᔪᖅᑳᕆᔭᐅᔪᑦ, ᐃᓕᓐᓂᐊᖅᑏᓪᓗ ᐊᑕᖏᖅᑐᑎᒃ ᐱᓕᕆᐊᑦᓴᖃᖅᑐᑦ ᐃᓕᓐᓂᐊᕐᓂᒃᑯᑦ ᐱᔭᕇᖅᐸᑦᑐᓂᒃ ᐱᕚᓪᓕᕈᑎᖃᑦᓯᐊᕈᓐᓇᖁᓪᓗᒋᑦ ᓯᕗᓂᑦᓴᑎᓐᓂ.

ᐃᒪᐃᓕᐅᕐᓂᐊᖅᑐᒍᑦ:

  • ᕿᒥᕐᕈᔭᐅᓗᓂ ᐃᓕᓐᓂᐊᖅᑐᓕᕆᓂᕐᒧᑦ ᐱᖁᔭᖅ ᐱᐅᔪᓂᒃ ᐃᓕᓐᓂᐊᕈᓐᓇᖁᓪᓗᒋᑦ ᑐᕌᖓᓂᖃᕐᓗᓂ ᐅᑭᐅᖅᑕᖅᑐᒥᐅᓄᑦ ᑭᓇᒃᑰᓂᑦᑎᓄᓪᓗ ᓄᓇᕗᒻᒥᐅᑕᐅᓪᓗᑕ.
  • ᓇᓗᓇᐃᖅᑕᐅᒋᐊᕐᓗᓂ ᐱᒻᒪᕆᐅᓂᖓ ᓄᑕᖅᑲᓄᑦ ᐃᓕᓐᓂᐊᕆᐅᖅᓴᖅᑎᑦᓯᓂᖅ ᐅᐸᓗᖓᐃᔭᖅᑕᐅᑦᓯᐊᖁᓪᓗᒋᑦ ᕿᑐᕐᖓᕗᑦ ᐊᖏᔪᖅᑳᖏᓪᓗ ᑲᔪᓯᑦᓯᐊᕈᑎᖃᕈᓐᓇᖁᓪᓗᒋᑦ ᐱᒋᐊᓕᓵᕐᓂᐊᑎᓪᓗᒋᑦ ᐃᓅᓯᖏᓐᓂ ᐃᓕᓐᓂᐊᕐᕕᖏᓐᓂᓗ;
  • ᐱᓕᕆᖃᑕᐅᑦᓯᐊᕐᓗᑎᒃ ᓄᓇᓕᓐᓂ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᑦ ᐃᓚᐅᖃᑕᐅᒃᑲᓐᓂᖁᓪᓗᒋᑦ ᐃᓕᓐᓂᐊᖅᑎᓄᑦ ᐊᖏᔪᖅᑳᕆᔭᐅᔪᑦ ᑲᔪᖏᖅᓴᐃᒃᑲᓐᓂᕐᓗᑎᒃ ᐃᓕᓐᓂᐊᕆᐊᑦᓯᐊᖃᑦᑕᖁᔨᓂᕐᒧᑦ ᐃᑲᔪᕐᓂᖃᒃᑲᓐᓂᖁᓪᓗᒋᓪᓗ ᐃᓕᓐᓂᐊᖅᑏᑦ ᑲᔪᓯᑦᓯᐊᕈᑎᖃᕈᓐᓇᕐᓂᖏᓐᓄᑦ; ᐊᒻᒪᓗ
  • ᓇᓗᓇᐃᖅᑕᐅᓯᒪᑦᓯᐊᕐᓗᓂ ᐃᓕᓐᓂᐊᕐᕕᕗᑦ ᐊᑦᑕᓇᖅᑐᒦᑎᑦᓯᖁᓇᒋᑦ ᑐᙵᓇᖅᑑᖁᓪᓗᒋᓪᓗ.

ᕿᑐᕐᖓᕗᑦ ᐃᕐᖑᑕᕗᓪᓗ ᐅᖃᓕᒪᒍᓐᓇᖁᔭᕗᑦ, ᐅᖃᓕᒫᕈᓐᓇᖁᔭᕗᑦ ᑎᑎᕋᕈᓐᓇᖁᔭᕗᓪᓗ ᐃᓕᓴᕆᔭᐅᓯᒪᔪᓂᒃ ᐅᖃᐅᓯᕐᓂᒃ ᐊᑐᕐᓗᑎᒃ. ᓴᙱᔪᒥᒃ ᒪᕐᕉᓐᓂᒃ ᐅᖃᐅᓰᓐᓂᒃ ᐃᓕᓐᓂᐊᖅᑎᑦᓯᖃᑦᑕᕐᓂᖅ ᑲᔪᖏᓕᕈᑕᐅᓂᐊᖅᑐᖅ ᐅᐱᒍᓱᓕᕈᓐᓇᕐᓗᑎᒃ ᒪᒃᑯᑦᑐᕗᑦ ᑲᔪᖏᓕᕈᑕᐅᓗᑎᓪᓗ ᐃᓅᓯᕐᒥᓂ ᐱᐅᔪᓂᒃ ᓂᕈᐊᖔᖃᑦᑕᕈᓐᓇᖁᓪᓗᒋᑦ. ᓂᕈᐊᕈᓐᓇᖅᓯᓂᐊᖅᑐᑦ ᐊᑦᓱᕉᑎᖃᕐᓂᕐᒧᑦ ᐃᓕᖅᑯᓯᖅᑐᖃᒃᑯᑦ ᐅᓪᓗᒥᐅᓕᖅᑐᕐᓗ ᐃᖅᑲᓇᐃᔮᖑᒍᓐᓇᖅᑐᓄᑦ.

ᐃᒪᐃᓕᐅᕐᓂᐊᖅᑐᒍᑦ:

  • ᓴᙱᓕᖅᑎᑕᐅᒋᐊᕐᓗᓂ ᐱᕚᓪᓕᖅᑎᑕᐅᒋᐊᕐᓗᓂᓗ ᐊᑐᖃᑦᑕᕐᓂᖅ ᐃᓄᐃᑦ ᐅᖃᐅᓯᖏᓐᓂᒃ.

ᐃᓕᓐᓂᐊᖅᑐᓕᕆᓂᒃᑯᑦ ᓄᓇᕗᒻᒥ ᐱᔪᓐᓇᕐᓂᖃᑦᓯᐊᖅᑐᓂᒃ ᐃᓚᐅᖃᑕᐅᑦᓯᐊᖅᑐᓂᓪᓗ ᐃᖅᑲᓇᐃᔭᖅᑎᑖᖅᐸᓪᓕᐊᒍᑕᐅᓂᐊᖅᑐᖅ ᐃᑲᔪᕈᑕᐅᓗᓂ ᓄᓇᕗᒻᒥᐅᓂᒃ ᐱᕚᓪᓕᕈᑎᖃᕈᓐᓇᖅᓯᖁᓪᓗᒋᑦ ᐱᕈᖅᐸᓪᓕᐊᒍᓐᓇᖁᓪᓗᒋᓪᓗ ᓄᓇᕐᔪᐊᑉ ᐅᑭᐅᖅᑕᖅᑐᖓᓂᒥᐅᓄᑦ ᓄᓇᕐᔪᐊᒥ ᑮᓇᐅᔭᓕᐅᖃᑕᐅᒍᓐᓇᕐᓗᑎᒃ.

ᐃᒪᐃᓕᐅᕐᓂᐊᖅᑐᒍᑦ:

  • ᑐᕌᒐᖃᕐᓗᑕ ᑐᙵᕕᖏᓐᓂᒃ ᐅᖃᓕᒫᕈᓐᓇᕐᓂᖅ, ᑎᑎᕋᕈᓐᓇᕐᓂᖅ, ᓈᓴᐅᓯᕆᒍᓐᓇᕐᓂᖅ ᐃᓱᒪᒃᑯᓪᓗ ᐋᖅᑭᑦᓱᐃᒍᓐᓇᕐᓂᖅ ᐊᒥᓱᕐᖑᕆᐊᖅᑕᐅᒍᓐᓇᖁᓪᓗᒋᑦ ᐃᓕᓐᓂᐊᖅᑕᒥᓂᒃ ᐱᔭᕇᖅᐸᑦᑐᑦ, ᐅᐸᓗᐃᔭᖅᑕᐅᓯᒪᑦᓯᐊᕐᓗᑎᒃ ᐃᓕᓐᓂᐊᖅᑏᑦ ᓯᓚᑦᑐᓴᕐᕕᓕᐊᕈᓐᓇᖅᓯᖁᓪᓗᒋᑦ, ᐸᕐᓇᑦᓯᐊᕈᓐᓇᖁᓪᓗᒋᓪᓗ ᐃᖅᑲᓇᐃᔭᕈᓐᓇᖅᓯᓂᕐᒧᑦ;
  • ᓄᓇᕗᒻᒥᐅᑦ ᐱᓕᒻᒪᑦᓴᖃᑕᐅᒍᓐᓇᖅᓯᖁᓪᓗᒋᑦ ᓴᓇᔪᓕᕆᓂᕐᒨᖓᔪᓂᒃ ᐃᖅᑲᓇᐃᔭᕐᓗᑎᒃ ᐃᓕᓐᓂᐊᖅᓯᓐᓈᕈᓐᓇᓂᕐᒧᑦ ᐱᔭᕇᕈᑎᓂᓪᓗ ᐸᐃᑉᐹᖅᑖᕈᓐᓇᖅᓯᖁᓪᓗᒋᑦ ᐃᖅᑲᓇᐃᔮᖏᓐᓂ; ᐊᒻᒪᓗ
  • ᐃᑲᔪᖅᓱᕐᓗᒋᑦ ᐃᖅᑲᓇᐃᔮᖏᓐᓂ ᐱᓕᒻᒪᑦᓴᕈᓐᓇᕐᓂᖏᑦ, ᖁᕝᕙᐸᓪᓕᐊᒍᓐᓇᖁᓪᓗᒋᑦ ᐃᖅᑲᓇᐃᔭᕈᓐᓇᖅᓯᖁᓪᓗᒋᓪᓗ ᖃᓄᖅᑑᕈᑎᖃᑦᓯᐊᖅᓯᒪᓗᑕ ᑲᑐᔾᔨᖃᑎᒋᓂᐊᖅᑕᑎᓐᓂᒃ.

ᐃᓅᖃᑎᒌᑦᓯᐊᖅᑐᑦ ᐃᓚᒌᑦ ᐃᒻᒥᓂᖅᓱᕈᓐᓇᑦᓯᐊᕐᓗᑎᒃ ᓄᓇᖅᑲᑎᒌᑦ

ᑐᙵᕕᖃᑦᓯᐊᖅᑐᑦ ᓄᓇᓖᑦ ᐃᓄᖃᐅᖅᑐᑦ ᖃᓄᐃᙱᑦᓯᐊᖅᑐᓂᒃ ᐃᓚᒌᓂᒃ ᑭᒃᑯᑐᐃᓐᓇᕐᓂᓪᓗ ᐱᔪᓐᓇᕐᓂᖃᑦᓯᐊᖅᑐᑎᒃ ᐱᓕᕆᔾᔪᑎᑦᓴᖃᑦᓯᐊᖅᑐᑎᓪᓗ ᓇᖕᒥᓂᖅ ᒪᑭᑕᔪᓐᓇᓂᕐᒧᑦ ᐃᑲᔪᕈᓐᓇᓂᕐᒧᓪᓗ ᓄᓇᕗᒻᒥ.

ᐊᒥᓲᓗᐊᖅᑐᑦ ᓄᓇᕗᒻᒥᐅᑦ ᑕᑎᖃᓗᐊᕐᖓᑕ ᒐᕙᒪᒃᑯᓐᓂᒃ ᐅᓪᓗᑕᒫᑦ ᐃᓅᔾᔪᑎᑦᓴᖏᓐᓄᑦ. ᐱᔪᓐᓃᕐᔫᒥᑎᒐᓱᐊᕆᐊᓕᕗᑦ ᑕᒪᓐᓇ ᐊᓯᒥᓂᒃ ᑕᑎᖃᓗᐊᓕᖅᓯᒪᓂᖅ.

ᐃᒪᐃᓕᐅᕐᓂᐊᖅᑐᒍᑦ:

  • ᕿᒥᕐᕈᔭᐅᓗᓂ ᐋᖅᑭᒋᐊᖅᑕᐅᓗᓂᓗ ᐱᓕᕆᔾᔪᓯᕗᑦ ᐃᓄᓕᕆᔨᒃᑯᓐᓂᒃ ᐃᑲᔫᓯᐊᖅᑐᓕᕆᓂᕐᒧᑦ ᓇᓗᓇᐃᖅᑕᐅᓯᒪᖁᓪᓗᒍ ᐃᑲᔪᖅᑕᐅᒋᐊᖃᓪᓚᑦᑖᖅᑐᑦ ᐃᑲᔪᖅᑕᐅᒍᓐᓇᖁᓪᓗᒋᑦ, ᐊᑕᐅᑦᓯᒃᑯᑦ ᑮᓇᐅᔭᖃᖅᑎᑦᓯᓗᑕ ᐱᕙᓪᓕᐊᔪᓕᕆᓂᕐᒧᑦ ᓇᓗᓇᐃᖅᑕᐅᓯᒪᖁᓪᓗᒍ ᖃᑭᒍᓐᓇᖅᓯᖁᓪᓗᒋᑦ ᓯᕗᓂᑦᓴᑎᓐᓂ ᐊᑕᖏᕐᓗᒋᑦ.

ᐊᒥᓱᑦ ᓄᓇᕗᒻᒥᐅᑦ ᐃᓚᖏᓪᓗ ᐊᑦᓱᕈᕐᓇᖅᑐᒃᑰᕐᖓᑕ ᐃᓱᒪᓕᕆᓂᒃᑯᑦ ᐊᑲᐅᙱᓕᐅᕈᑎᖃᕐᓂᕐᒧᑦ, ᐊᔪᕈᑎᖃᓕᖅᐸᓐᓂᖏᓐᓄᑦ ᐃᒥᐊᓗᓐᓂᒃ/ᐋᖓᔮᕐᓇᖅᑐᓂᒃ ᐊᖏᕐᕋᖏᓐᓂᓗ ᐋᓐᓂᖅᑎᖅᑕᐅᖃᑦᑕᓂᕐᒧᑦ. ᐃᓕᓴᕆᓯᒪᓂᐊᖅᑕᕗᑦ ᐃᑲᔪᕐᓂᖃᕈᓐᓇᕐᓂᖏᑦ ᑕᒪᒃᑮᑦ ᐃᓕᖅᑯᓯᑐᖃᖅᑎᒍᑦ ᐃᓱᐊᖅᓴᐃᔨᓄᓪᓗ ᐱᓕᕆᔾᔪᓯᐅᔪᑦ ᑭᒃᑯᑐᐃᓐᓇᐃᑦ ᖃᓄᐃᒍᓐᓃᖅᐸᓪᓕᐊᒍᓐᓇᖁᓪᓗᒋᑦ ᐃᓅᓯᖃᑦᓯᐊᕈᓐᓇᖁᓪᓗᒋᓪᓗ. ᐃᓚᒌᑦ ᓄᓇᓕᓐᓂᓗ ᑲᑐᔾᔨᖃᑎᒌᑦ ᐱᒻᒪᕆᐅᔪᓂᒃ ᐃᑲᔪᕐᓂᖃᕐᓂᐊᖅᑐᑦ ᐃᓅᓯᖏᓐᓂ ᐃᑲᔪᖅᑕᐅᒋᐊᓕᓐᓄᑦ.

ᐃᒪᐃᓕᐅᕐᓂᐊᖅᑐᒍᑦ:

  • ᑲᒪᒋᔭᐅᓗᓂ ᐃᓱᒪᒥᒍᑦ ᐋᓐᓂᐊᕈᑎᓖᑦ, ᐊᔪᓕᕈᑎᖃᖅᓯᒪᔪᑦ ᐊᖏᕐᕋᕆᔭᐅᔪᓂᓗ ᐋᓐᓂᖅᑎᕆᓂᐅᕙᑦᑐᖅ ᐃᓕᓴᕆᔭᐅᓯᒪᓗᑎᒃ ᐱᓕᕆᔾᔪᑎᑦᓴᖃᖅᑎᑦᓯᓗᑎᓪᓗ ᓄᓇᓕᓐᓃᖔᖅᑐᓂᒃ ᐋᖅᑭᐅᒪᒍᑎᑦᓴᓂᒃ ᐃᑲᔪᖅᑕᐅᖁᓪᓗᒋᑦ ᐃᓚᒌᑦ ᑭᒃᑯᑐᐃᓐᓇᐃᓪᓗ ᐃᑲᔪᖅᑕᐅᒍᓐᓇᖅᓯᓗᑎᒃ ᒪᒥᓴᕈᓐᓇᖁᓪᓗᒋᑦ ᐊᒻᒪᓗ ᐃᒥᐊᓗᓗᐊᖃᑦᑕᕈᓐᓃᖁᓪᓗᒋᑦ/ ᐋᖓᔮᕐᓇᖅᑐᑐᓗᐊᖁᒍᓐᓃᖁᓪᓗᒋᓪᓗ;
  • ᓇᓗᓇᐃᖅᑕᐅᓯᒪᓗᓂ ᖃᐅᔨᒪᔨᑕᒻᒪᕆᓐᓂᒃ ᒪᒥᓴᕐᕕᓂᓪᓗ ᐊᑐᐃᓐᓇᐅᑦᓯᐊᖁᓪᓗᒋᑦ ᓄᓇᕗᒻᒥᐅᓄᑦ; ᐊᒻᒪᓗ
  • ᐱᓕᕆᖃᑎᒋᑦᓯᐊᕐᓗᒋᑦ ᑲᑐᔾᔨᖃᑎᒋᕙᑦᑕᕗᑦ, ᕿᒥᕐᕈᔭᐅᓗᑎᒃ ᓄᑖᕐᖑᕆᐊᖅᑕᐅᓗᑎᓪᓗ ᐱᓕᕆᐊᑦ ᐃᒻᒥᓃᖅᑕᐃᓕᑎᑦᓯᖃᑦᑕᓂᕐᒧᑦ.

ᓈᒻᒪᑦᑐᓂᒃ ᓂᕆᔭᑦᓴᖃᑦᓯᐊᕐᓂᖅ ᐃᓪᓗᑦᓴᖃᑦᓯᐊᕐᓂᕐᓗ ᑐᙵᕕᒋᔭᐅᒻᒪᑎᒃ ᖃᓄᐃᑦᑕᐃᓕᓂᕐᒧᑦ, ᐃᓕᓐᓂᐊᖅᑐᓕᕆᓂᕐᒧᑦ ᐃᓅᓯᖃᑦᓯᐊᕈᓐᓇᕐᓂᖏᓐᓄᓪᓗ ᓄᓇᕗᒻᒥᐅᑦ.

ᐃᒪᐃᓕᐅᕐᓂᐊᖅᑐᒍᑦ:

  • ᓴᖅᑭᔮᖅᑎᑦᓯᒋᐊᕐᓂᖅ ᐃᑲᔪᖅᓱᐃᓂᕐᓗ ᐊᑑᑎᐅᒍᓐᓇᖁᓪᓗᒋᑦ ᐊᖑᓇᓱᒍᓐᓇᕐᓂᖏᑦ ᓄᓇᓕᓐᓃᖔᖅᑐᓂᓪᓗ ᐋᖅᑭᐅᒪᒋᐊᕈᑎᑦᓴᓂᒃ ᐊᑐᐃᓐᓇᖃᕆᐊᒃᑲᓐᓂᖁᓪᓗᒋᑦ ᓂᕿᑦᓯᐊᕙᓐᓂᒃ ᓄᓇᕗᓕᒫᒥ.

ᑮᓇᐅᔭᖃᖅᑎᑦᓯᔨᐅᓪᓗᑕ ᐃᓪᓗᑦᓴᖃᖅᑎᑦᓯᓂᕐᒧᑦ ᑲᑐᔾᔨᖃᑎᕗᓪᓗ, ᐃᒪᐃᓕᐅᕐᓂᐊᖅᑐᒍᑦ:

  • ᐋᖅᑭᑦᓱᐃᓗᑎᒃ ᐆᒻᒪᖅᑯᑎᑐᙱᓂᖅᓴᓂᒃ/ᐅᖅᓱᐊᓗᑦᑐᙱᓐᓂᖅᓴᓂᒃ ᐊᑭᑭᓐᓂᖅᓴᓂᓪᓗ ᐋᖅᑭᐅᒪᔾᔪᑎᑦᓴᓂᒃ; ᐊᒻᒪᓗ
  • ᓇᓗᓇᐃᖅᑕᐅᓯᒪᓗᓂ ᐊᑭᑐᓗᐊᙱᑦᑐᓂᒃ ᐃᓪᓗᑦᓴᖃᖅᑎᑦᓯᓂᖅ ᐊᓯᖏᓐᓂᓪᓗ ᐊᑐᐃᓐᓇᐅᖁᓪᓗᒋᑦ ᑭᒃᑯᑐᐃᓐᓇᐃᑦ ᐱᔭᕆᐊᓕᖏᓐᓄᑦ ᑐᕌᖓᑦᓯᐊᕐᓗᑎᒃ.

ᑮᓇᐅᔭᓕᐅᕈᑎᖃᕈᓐᓇᑦᓯᐊᕐᓂᖅ ᐅᔾᔨᖅᓱᑦᓯᐊᕐᓗᑎᒃ ᐱᕙᓪᓕᐊᔪᓕᕆᓂᕐᒧᑦ ᖃᓄᐃᑦᑐᑐᐃᓐᓇᒃᑯᑦ

ᓇᖕᒥᓂᖁᑎᑖᖅᐸᓪᓕᐊᓂᖅ ᐅᔭᕋᕐᓂᐊᖅᑐᓕᕆᓂᕐᓗ ᑐᙵᕕᐅᓂᐊᖅᑑᒃ ᓯᕗᓂᑦᓴᑎᓐᓂ ᖃᑭᒍᑎᖃᕈᓐᓇᓂᑦᑎᓐᓄᑦ ᑲᔪᓯᑦᓯᐊᕈᑎᖃᕈᓐᓇᓂᖅᑎᓄᓪᓗ. ᐱᕙᓪᓕᐊᑎᑦᓯᓂᖅ ᐱᕚᓪᓕᕈᑕᐅᒋᐊᓕᒃ ᓄᓇᕗᒻᒥ ᐅᔾᔨᖅᓱᑦᓯᐊᕐᓗᑎᒃ ᐊᑐᕐᓗᑎᒃ ᐊᒥᒐᙱᑦᑐᓂᒃ ᓄᓇᒦᖔᖅᑐᓂᒃ ᐱᕚᓪᓕᕈᑎᑦᓴᓂᒃ.

ᐃᒪᐃᓕᐅᕐᓂᐊᖅᑐᒍᑦ:

  • ᑲᔪᓯᒍᑎᖃᕐᓗᑕ ᓴᖅᑭᔮᖅᑎᑦᓯᒋᐊᕐᓂᕐᒥᒃ ᐱᖁᔭᖅᑎᒍᑦ ᐱᓕᕆᔾᔪᓯᐅᔪᓂᒃ ᑲᔪᖏᑦᓯᐊᓕᕈᓐᓇᖁᓪᓗᒋᑦ ᐱᕙᓪᓕᐊᑎᑦᓯᒍᓐᓇᖅᑐᑦ; ᐊᒻᒪᓗ
  • ᓇᓗᓇᐃᖅᓯᓯᒪᓂᖅ ᐊᑕᖏᑦᓯᐊᖅᑐᒥᒃ ᐆᒪᔪᕐᓂᒃ ᐊᐅᓚᑦᓯᔾᔪᓯᖃᖁᓪᓗᑕ ᐱᕚᓪᓕᕈᑕᐅᓯᒪᓗᓂ ᓄᓇᕗᒻᒥᐅᓄᑦ.

ᓄᓇᓕᓐᓂ ᐱᕙᓪᓕᐊᔪᓕᕆᓂᖅ ᐊᑑᑎᖃᑦᓯᐊᕐᓂᖅᐹᖑᒍᓐᓇᖅᑐᖅ ᑐᙵᕕᖃᕐᓗᓂ ᓄᓇᓕᓐᓂ ᐊᑐᐃᓐᓇᐅᔪᓂᒃ ᐊᑑᑎᖃᕐᓗᑎᒃ ᐱᕚᓪᓕᕈᑎᑦᓴᓂᒃ ᐱᔪᓐᓇᕐᓂᖏᓐᓂᓪᓗ, ᐊᒻᒪᓗ ᑕᑯᔭᐅᒍᒪᓂᐊᖅᑐᓂᒃ ᓯᕗᓂᑦᓴᑎᓐᓂ. ᐊᑐᓂᑦ ᓄᓇᓖᑦ ᐊᔾᔨᒌᙱᑦᑐᓂᒃ ᐱᕚᓪᓕᕈᑎᖃᕈᓐᓇᑦᓯᐊᖅᑐᑦ ᓴᖅᑭᖅᓯᓂᒃᑯᑦ ᐃᖅᑲᓇᐃᔮᑦᓴᓂᒃ ᓄᓇᕗᒻᒥᐅᓄᑦ.

ᐃᒪᐃᓕᐅᕐᓂᐊᖅᑐᒍᑦ:

  • ᑲᔪᖏᖅᓴᐃᓂᖅ ᐃᑲᔪᖅᓱᐃᓂᕐᓗ ᓄᓇᓕᓐᓃᖔᖅᑐᓂᒃ ᐱᕙᓪᓕᐊᔪᓕᕆᓂᕐᒧᑦ ᐱᒋᐊᖅᑎᑕᐅᓯᒪᔪᓂᒃ ᑐᙵᕕᖃᕐᓗᑎᒃ ᐱᒋᐊᒃᑲᓐᓂᕈᑕᐅᓗᑎᓪᓗ ᓇᓗᓇᐃᖅᑕᐅᓯᒪᔪᓂᒃ ᐱᕚᓪᓕᕈᑕᐅᒍᓐᓇᖅᑐᓂᒃ, ᐃᓚᒋᔭᐅᓪᓗᑎᒃ ᐊᖑᓇᓱᑦᑐᓕᕆᓂᒃᑯᑦ, ᓴᓇᙳᐊᕐᓂᒃᑯᑦ ᒥᖅᓱᒐᒃᑯᓪᓗ ᐳᓚᕋᑦᑐᓕᕆᓂᒃᑯᓪᓗ;
  • ᐃᑲᔪᖅᓱᐃᓂᖅ ᓇᖕᒥᓂᖅᑖᖅᐸᓪᓕᐊᖁᔨᓂᕐᒥᒃ ᓇᖕᒥᓂᖃᖅᑎᐅᔪᓂᓪᓗ ᐱᕙᓪᓪᓕᐊᑎᑦᓯᓂᖅ ᐊᔪᕐᓇᕈᓐᓃᖅᑎᑕᐅᒋᐊᕐᓗᑎᒃ ᐊᑐᐊᒐᐃᑦ ᐊᔪᕐᓇᙱᓂᖅᓴᐅᓕᖅᑎᓪᓗᒍᓗ ᒥᑭᓂᖅᓴᐅᔪᓄᑦ ᓇᖕᒥᓂᖃᖅᑎᐅᔪᓄᑦ ᐊᐅᓚᑦᓯᔨᓄᑦ ᒪᓕᑦᓯᐊᕈᓐᓇᖅᓯᖁᓪᓗᒋᑦ; ᐊᒻᒪᓗ
  • ᐃᑲᔪᖅᓱᖅᑕᐅᓗᑎᒃ ᐱᕙᓪᓕᐊᑎᑕᐅᖁᓪᓗᒋᑦ ᐅᓪᓗᒥ ᓯᕗᓂᑦᓴᑎᓐᓂᓗ ᓄᓇᕗᒻᒥ ᓴᓇᙳᐊᖅᑏᑦ/ᒥᖅᓱᖅᑏᑦ ᑭᓱᑐᐃᓐᓇᕐᓂᒃ ᐱᐅᓂᖅᐹᓂᒃ ᓴᓇᖃᑦᑕᕈᓐᓇᖅᓯᖁᓪᓗᒋᑦ ᓂᐅᕐᕈᑎᖃᕈᓐᓇᖅᓯᖁᓪᓗᒋᓪᓗ ᓴᓇᐅᒐᖏᓐᓂᒃ ᑲᓇᑕᓕᒫᒥ ᓄᓇᕐᔪᐊᒥᓗ.

ᒐᕙᒪᐅᑦᓯᐊᕐᓂᖅ ᐊᑑᑎᖃᑦᓯᐊᕐᓗᑕ ᐱᓕᕆᔾᔪᑎᑦᓴᑎᓐᓂᒃ

ᐊᐅᓚᑦᓯᖃᑦᑕᓂᐊᖅᑐᒍᑦ ᐱᓕᕆᐊᓂᒃ ᐱᔨᑦᓯᕋᐅᑎᓂᓪᓗ ᐊᑑᑎᖃᑦᓯᐊᖅᑐᓂᒃ, ᐊᐅᓚᓂᖃᑦᓯᐊᖅᑐᓂᒃ ᐊᑭᑐᓗᐊᙱᑦᑐᓂᓪᓗ. ᑐᕌᒐᖃᕐᓂᐊᖅᑐᒍᑦ ᐊᒥᒐᖅᑐᓂᒃ ᑮᓇᐅᔭᑦᑎᓐᓂᒃ ᐱᓕᕆᐊᓄᑦ ᐱᔨᑦᓯᕋᐅᑎᓄᓪᓗ ᓄᓇᕗᒻᒥᐅᑦ ᖃᓄᐃᙱᑦᓯᐊᕐᓗᑎᒃ ᐱᕙᓪᓕᐊᓂᖃᑦᓯᐊᖅᑐᓂᓪᓗ ᐃᓅᓯᖃᑦᓯᐊᕈᓐᓇᖁᓪᓗᒋᑦ.

ᐊᑐᓕᖅᑎᑦᓯᕙᓪᓕᐊᑎᓪᓗᑕ ᓯᕗᓪᓕᐅᑎᒍᒪᔭᑦᑎᓐᓂᒃ, ᐃᒪᐃᓕᐅᕐᓂᐊᖅᑐᒍᑦ:

  • ᕿᒥᕐᕈᓗᒋᑦ ᒐᕙᒪᒃᑯᑦ ᐱᓕᕆᐊᖏᑦ ᓇᓗᓇᐃᖅᑕᐅᖁᓪᓗᒍ ᑭᓱᑦ ᐊᐅᓚᓂᖃᑦᓯᐊᕐᒪᖔᑕ, ᑭᓱᑦ ᐱᐅᓯᒋᐊᖅᑕᐅᒋᐊᖃᕐᒪᖔᑕ, ᑭᓱᓪᓗ ᓄᖅᑲᖅᑎᑕᐅᒋᐊᖃᕐᒪᖔᑕ ᑐᕌᒐᖃᑦᓯᐊᖔᕈᒪᓪᓗᑕ ᐱᓕᕆᔾᔪᑎᑦᓴᑎᓐᓂᒃ ᓄᓇᕗᑦ ᑲᔪᓯᑦᓯᐊᕐᓂᖃᕈᓐᓇᖁᓪᓗᒍ; ᐊᒻᒪᓗ
  • ᓇᓗᓇᐃᖅᑕᐅᓯᒪᓗᓂ ᓄᓇᕗᑦ ᒐᕙᒪᒃᑯᖏᓐᓃᖔᖅᑐᓂᒃ ᑮᓇᐅᔭᖃᖅᑎᑕᐅᕙᑦᑐᑦ ᐊᑐᐃᓐᓇᕈᐃᖃᑦᑕᖁᓪᓗᒋᑦ ᓂᕆᐅᒋᔭᑦᑎᓐᓂᒃ ᓴᖅᑭᖅᑕᐅᖁᓯᒪᔭᑦᑎᓐᓂᒃ ᑮᓇᐅᔭᖃᖅᑎᑦᓯᓂᒃᑯᑦ.

ᐱᓕᕆᐊᖃᖅᐸᓪᓕᐊᖏᓐᓇᕐᓂᐊᖅᑐᒍᑦ ᑐᕌᖓᓂᖃᑦᓯᐊᖅᑐᓂᒃ ᖃᑦᓯᐅᓂᖏᓐᓄᑦ ᒐᕙᒪᒃᑯᓐᓂ ᐃᖅᑲᓇᐃᔭᖅᑎᖃᕐᓂᕐᒧᑦ, ᐃᓄᐃᑦ ᐃᖅᑲᓇᐃᔭᖅᑎᑕᐅᓗᑎᒃ ᒐᕙᒪᒃᑯᓐᓂ ᓯᕗᓪᓕᖅᑎᐅᖃᑕᐅᓗᑎᓪᓗ ᓄᓇᕗᒻᒥ.

ᐃᒪᐃᓕᐅᕐᓂᐊᖅᑐᒍᑦ:

  • ᑲᔪᓯᒍᑎᖃᕐᓂᐊᖅᑐᒍᑦ ᐱᐅᓯᕙᓪᓕᐊᑎᓪᓗᒍ ᐃᓚᐃᓐᓈᖅᓯᒪᙱᑐᒃᑯᑦ ᑐᑭᓯᓇᑦᓯᐊᖅᑐᓂᓪᓗ ᐱᓕᕆᔾᔪᓯᖃᕐᓂᖅ ᐃᖅᑲᓇᐃᔭᖅᑎᑖᕋᓱᐊᖃᑦᑕᓂᕐᒧᑦ ᐃᖅᑲᓇᐃᔮᖏᓐᓂᓗ ᖁᕝᕙᐸᓪᓕᐊᒍᓐᓇᖁᓪᓗᒋᑦ ᒐᕙᒪᒃᑯᓐᓂ ᐃᖅᑲᓇᐃᔭᖅᑎᓄᑦ;
  • ᓇᓗᓇᐃᖅᑕᐅᓯᒪᓗᓂ ᒐᕙᒪᒃᑯᓐᓂ ᐱᓕᕆᕕᓕᒫᖏᑦ ᒐᕙᒪᒃᑯᓪᓗ ᑎᒥᖁᑎᖏᓐᓂ ᐊᑦᓱᕉᑎᖃᖁᓪᓗᒋᑦ ᐊᒥᓱᕐᖑᕆᐊᖅᑎᑦᓯᒐᓱᐊᕐᓂᕐᒧᑦ ᐃᓄᓐᓂᒃ ᐃᖅᑲᓇᐃᔭᖅᑎᓂᒃ; ᐊᒻᒪᓗ
  • ᑲᔪᓯᒍᑎᖃᕐᓂᐊᖅᑐᒍᑦ ᑮᓇᐅᔭᖃᖅᑎᑦᓯᖃᑦᑕᓂᕐᒥᒃ ᐃᓕᓐᓂᐊᖅᑐᓕᕆᓂᕐᒧᑦ ᐋᖅᑭᑦᓱᐃᓂᕐᒧᓪᓗ ᐅᓪᓗᒥᐅᔪᖅ ᓯᕗᓂᑦᓴᑎᓐᓂᓗ ᒐᕙᒪᒃᑯᓐᓂ ᐃᖅᑲᓇᐃᔭᖅᑎᓂᒃ, ᐱᒻᒪᕆᐅᑎᑕᐅᓗᓂ ᐊᒥᓱᕐᖑᕆᐊᖅᑎᑦᓯᓂᖅ ᐃᓄᓐᓂᒃ ᐃᖅᑲᓇᐃᔭᖅᑎᑦᓯᓂᕐᒧᑦ ᖃᐅᔨᒪᔨᑕᐅᓗᑎᒃ ᓯᕗᓕᖅᑎᐅᒍᓐᓇᕐᓗᑎᓪᓗ ᒐᕙᒪᒃᑯᓐᓂ.