ᐅᖃᓚᐅᑎᓯᐅᑏᑦ

You are here

ᐃᓄᐃᑦ ᐅᖃᐅᓯᖏᓐᓂ ᐱᔪᒪᓕᖅᑎᑦᑎᔾᔪᑎ ᐊᑐᐊᒐᖓ ᐊᖏᖅᑕᖅ

ᓯᑎᐱᕆ 18, 2017

ᐱᕙᓪᓕᐊᔪᖅ ᓴᖅᑭᑕᖅ

ᐃᓄᐃᑦ ᐅᖃᐅᓯᖏᓐᓂ ᐱᔪᒪᓕᖅᑎᑦᑎᔾᔪᑎ ᐊᑐᐊᒐᖓ ᐊᖏᖅᑕᖅ

ᐃᖃᓗᐃᑦ, ᓄᓇᕗᑦ (ᓯᑎᐱᕆ 18, 2017) – ᐱᓇᓱᖕᓂᕐᒧᑦ ᐃᑲᔪᖅᓱᕐᓗᒋᑦ ᐃᖅᑲᓇᐃᔭᖅᑎᑦ ᐊᑐᕐᓗᑎᒃ ᐃᓄᐃᑦ ᐅᖃᐅᓯᖏᓐᓂ ᐃᖅᑲᓇᐃᔭᕐᓗᓂ ᐅᖃᐅᓯᖅᑕᐅᓗᓂ ᑭᒃᑯᑐᐃᓐᓇᕐᓄᑦ ᐱᔨᑦᑎᕋᕈᑎᓄᑦ, ᓄᓇᕗᒻᒥ ᒐᕙᒪᒃᑯᑦ (GN) ᐊᖏᖅᓯᓵᓚᐅᖅᑐᑦ ᐃᓄᐃᑦ ᐅᖃᐅᓯᖏᓐᓂ ᐱᔪᒪᓕᖅᑎᑦᑎᔾᔪᑎ ᐊᑐᐊᒐᖓᓂᒃ, ᐊᑐᓕᖅᑎᑕᐅᓂᐊᖅᑐᖅ ᐱᒋᐊᕐᓗᓂ ᐅᑐᐱᕆ 2, 2017.

"ᑖᓐᓇ ᑐᓂᓯᒪᑦᑎᐊᕐᓂᖅ ᒐᕙᒪᒧᑦ ᐱᒻᒪᕆᐅᓪᓗᓂ ᐃᓗᓕᕆᔭᖓ ᓄᓇᕗᒻᒥ ᒐᕙᒪᒃᑯᑦ ᐃᖅᑲᓇᐃᔭᖅᑐᓕᕆᔨᒃᑯᑦ ᑐᑭᒧᐊᕈᑎᒃᓴᖓ 2014-2018," ᐅᖃᖅᑐᖅ ᒥᓂᔅᑕ ᑮᓇᐅᔭᓕᕆᔨᒃᑯᓐᓄᑦ ᑮᑦ ᐲᑕᓴᓐ. "ᐃᖅᑲᓇᐃᔭᖅᑎᑦ ᐃᓕᓴᕆᔭᐅᓂᐊᖅᑐᑦ, ᑐᓂᔭᐅᓗᑎᒃ ᐱᔪᒪᓕᖅᑎᑕᐅᓗᑎᒃᓗ ᒪᓕᑦᑎᐊᒃᑲᓐᓂᕈᓐᓇᕐᓂᕐᒥᒃ ᐃᓄᐃᑦ ᐅᖃᐅᓯᖏᓐᓂ."

ᓄᓇᕗᒻᒥ ᒐᕙᒪᒃᑯᓐᓂ ᐃᖅᑲᓇᐃᔭᖅᑎᑦ ᐊᑐᖅᑐᑦ ᒪᓕᑦᑎᐊᕐᓂᕐᒥᒃ ᐊᑭᓕᖅᑕᐅᓇᔭᖅᑐᑦ ᐊᕐᕌᒍᑕᒫᖅᓯᐅᒻᒥᒃ ᐃᑲᔫᓯᐊᕐᒥᒃ ᑐᙵᕕᖃᕐᓗᓂ ᒪᓕᑦᑎᐊᕐᓂᖏᑕ ᖁᑦᑎᖕᓂᖓᓂ: ᐅᖃᕈᓐᓇᕐᓂᖅ – $1,500; ᐅᖃᕈᓐᓇᕐᓂᖅ ᐅᖃᓕᒫᕈᓐᓇᕐᓗᓂᓗ ᑎᑎᕋᕈᓐᓇᕐᓗᓂᓗ – $2,400; ᐊᒻᒪᓗ ᐅᖃᐅᓯᓕᕆᔪᓐᓇᑦᑎᐊᕐᓂᖅ – $5,000. ᐅᖃᐅᓯᕐᓄᑦ ᖃᐅᔨᓴᖅᑕᐅᓂᖅ ᖃᐅᔨᓴᕐᓗᒍ ᒪᓕᑦᑎᐊᕐᓂᖏᑕ ᖁᑦᑎᖕᓂᖓᓂ ᐱᓕᕆᐊᖑᓂᐊᖅᑐᖅ ᐃᓄᐃᑦ ᐅᖃᐅᓯᖏᓐᓂᒃ ᑕᐃᒎᓯᓕᐅᖅᑎᒃᑯᓐᓄᑦ (IUT).

"ᑖᓐᓇ ᑐᑭᒋᒻᒪᕆᒃᑕᖓ ᖃᓄᖅ ᒐᕙᒪᕗᑦ ᓴᐳᒻᒦᔪᓐᓇᕐᒪᖔᑦ ᖁᕝᕙᓯᒋᐊᕐᓗᒍᓗ ᐅᖃᐅᓯᖅᐳᑦ," ᐅᖃᖅᑐᖅ ᒥᓂᔅᑕ ᐃᓕᖅᑯᓯᓕᕆᔨᒃᑯᓐᓄᑦ ᔪᐊᔾ ᖁᒃᓱᒃ. "ᐃᑲᔪᕐᓂᐊᖅᑐᖅ ᓴᙱᒃᑎᒋᐊᕐᓗᒍ ᐊᑐᖅᑕᐅᓂᖓ ᐃᓄᒃᑐᑦ ᒐᕙᒪᒃᑯᑦ ᐃᖅᑲᓇᐃᔭᕐᕕᖏᓐᓂ, ᐱᑎᑦᑎᓯᒻᒫᑦ ᑐᑭᓯᓇᖅᑐᒥᒃ ᑐᓴᒐᒃᓴᒥᒃ ᒪᒃᑯᒃᑐᑦᑎᓐᓄᑦ ᐊᔪᙱᓐᓂᖅ ᐃᓄᒃᑐᑦ ᐱᒻᒪᕆᒋᔭᐅᓂᖏᓐᓂ ᐱᒻᒪᕆᐅᓪᓗᑎᒃᓗ ᓯᕗᓂᑦᑎᓐᓂ ᐃᖅᑲᓇᐃᔮᕐᓂ."

"ᐃᓄᐃᑦ ᐅᖃᐅᓯᖏᓐᓂᒃ ᑕᐃᒎᓯᓕᐅᖅᑏᑦ ᖁᕕᐊᓱᒃᑐᑦ ᐱᓕᕆᖃᑎᖃᕐᓂᕐᒥᒃ ᓄᓇᕗᒻᒥ ᒐᕙᒪᒃᑯᓐᓂ ᑖᔅᓱᒥᖓ ᓴᕆᒪᓇᖅᑐᒥᒃ ᐱᓕᕆᐊᖑᔪᒃᓴᒥᒃIUT," ᐅᖃᖅᑐᖅ ᐃᓄᐃᑦ ᐅᖃᐅᓯᖏᓐᓂᒃ ᑕᐃᒎᓯᓕᐅᖅᑏᑦ ᐃᒃᓯᕙᐅᑕᖓᑦ ᒥᐊᕆ ᑖᒻᓴᓐ. "ᓴᙱᓂᒃᑯᑦ ᖃᐅᔨᓴᕐᓂᕐᓂ ᓄᓇᕗᒻᒥ ᒐᕙᒪᒃᑯᑦ ᐃᖅᑲᓇᐃᔭᖅᑎᖏᑕ ᐅᖃᐅᓯᖏᑕ ᐱᔪᓐᓇᖅᑕᖏᑦ, ᑖᓐᓇ ᐃᑲᔪᕐᓂᐊᖅᑐᖅ ᖁᕝᕙᕆᐊᖅᑎᑦᑎᓗᓂ ᑕᒪᒃᑭᖅᑐᓂᒃ ᐃᓄᒃᑐᑦ ᑭᒃᑯᑐᐃᓐᓇᕐᓄᑦ ᐱᔨᑦᑎᕋᐅᑎᓂᑦ."

ᑖᓐᓇ ᐊᑐᐊᒐᖅ ᐊᖅᑐᑎᒃᓴᐅᖃᑕᐅᖕᒥᔪᖅ ᓄᓇᕗᒻᒥ ᒐᕙᒪᒃᑯᑦ ᐊᑐᖅᑎᑦᑐᓐᓇᖅᑕᖓᓂᒃ ᑐᕌᒐᕆᔭᖏᓐᓄᑦ ᑕᐃᑰᓇ ᐃᓄᐃᑦ ᐅᖃᐅᓯᖏᓐᓂ ᓴᐳᒻᒦᓂᕐᒥᒃ ᐱᖁᔭᖓᓂ (ILPA). ᐃᓄᐃᑦ ᐅᖃᐅᓯᖏᓐᓂ ᓴᐳᒻᒦᓂᕐᒥᒃ ᐱᖁᔭᖓ ᐃᓂᖓᓃᑦᑐᖅ ᐱᖁᓪᓗᒍ ᓄᓇᕗᒻᒥ ᐃᓕᓐᓂᐊᕐᕖᑦ ᖃᐅᔨᓗᑎᒃ ᐊᑐᓕᖅᑎᑦᑎᓗᑎᒃᓗ ᐱᐅᔪᒃᑯᑦ ᐊᑐᕆᐊᕐᓂᕐᓂ ᐊᑐᖅᑕᐅᒃᑲᓐᓂᖁᓪᓗᒍ ᐃᓄᐃᑦ ᐅᖃᐅᓯᖓᑦ ᐃᖅᑲᓇᐃᔭᕐᕕᖕᒥ, ᐱᐅᓯᒋᐊᖁᓪᓗᒋᓪᓗ ᐊᑐᖅᑎᑕᐅᓂᖏᑦ ᐱᔨᑦᑎᕋᕈᑎᑦ ᐱᑎᑕᐅᔪᓂ ᓄᓇᕗᒻᒥ ᒐᕙᒪᒃᑯᓐᓂ ᑭᒃᑯᑐᐃᓐᓇᕐᓄᑦ ᐃᓄᐃᑦ ᐅᖃᐅᓯᖏᓐᓂ.

###

ᐱᕙᓪᓕᐊᔪᓄᑦ ᑐᓴᕆᐊᕐᕕᒃᓴᖅ:

ᑕᓃᔅ ᒍᕌᓐᒪᐃᓴᓐ
ᐊᐅᓚᑦᑎᔨ, ᑐᓴᐅᒪᔪᓕᕆᔨᒃᑯᑦ
ᑮᓇᐅᔭᓕᕆᔨᒃᑯᑦ
867-975-6818
FinanceComs@gov.nu.ca

ᑖᓐ ᐱᒪᓐᑎᐅᓪ
ᑐᓴᐅᒪᔪᓕᕆᔨᒃᑯᑦ ᐊᐅᓚᑦᑎᔨᖓᑦ
ᐃᓕᖅᑯᓯᓕᕆᔨᒃᑯᑦ
867-975-5526
dpimentel@gov.nu.ca

ᓵᓚᒪᓐ ᐊᕙ
ᐊᐅᓚᑦᑎᔨ ᐅᖃᐅᓯᓕᕆᓂᕐᒧᑦ
ᐃᓄᐃᑦ ᐅᖃᐅᓯᖏᓐᓂᒃ ᑕᐃᒎᓯᓕᐅᖅᑏᑦ
867-975-5545
sawa1@gov.nu.ca