ᖃᓂᒪᓐᓇᖅ COVID-19 ᐅᓪᓗᑕᒫᑦ ᑐᓴᖅᑎᑦᓯᒋᐊᕈᑎ - ᒫᑦᓯ 18, 2020
ᑭᖑᓪᓕᖅᐹᒥᒃ ᓄᑖᙳᕆᐊᖅᑎᑕᐅᓚᐅᖅᑐᖅ ᕿᑎᖅᑰᑦ, ᒫᔾᔨ 19, 2020
ᖃᓂᒪᓐᓇᖅ COVID-19 ᐅᓪᓗᑕᒫᑦ ᑐᓴᖅᑎᑦᓯᒋᐊᕈᑎ
ᒫᑦᓯ 18, 2020
ᓄᓇᕗᑦ ᒐᕙᒪᒃᑯᓐᓂᓕᒫᖅ ᓄᑖᙳᕆᐊᖅᑎᑕᐅᔪᖅ
- ᐅᓪᓗᒥᒧᑦ ᑎᑭᖦᖢᒍ, ᖃᐅᔨᒪᔭᐅᔪᓂᒃ ᓄᕙᒡᔪᐊᕐᓇᖅ-19−ᒧᑦ ᐱᑕᖃᙱᓚᖅ ᑕᒫᓂ ᐅᑭᐅᖅᑕᖅᑐᒥ ᐊᕕᒃᓯᒪᓂᕆᔭᐅᔪᒥ.
- ᑭᒃᑯᑐᐃᓐᓇᓂᒃ ᐋᓐᓂᐊᖃᖅᑕᐃᓕᑎᑦᑎᓂᕐᒧᑦ ᐊᐃᑦᑐᕐᓘᑕᐅᔪᓐᓇᖅᑐᓄᑦ ᖃᓂᒪᑖᕆᔭᐅᔪᓐᓇᖅᑐᓄᑦ ᐱᓕᕆᖃᑎᒌᑦ ᒪᓕᒃᓯᕗᖅ 50-60−ᐸᓗᖕᓂᒃ ᐃᓄᖕᓂᒃ ᑖᒃᑯᐊ ᖃᐅᔨᓴᖅᑕᐅᕙᓪᓕᐊᓪᓗᑎᒃ. 10-15-ᐸᓗᖕᓂᒃ ᑭᖑᓂᑦᑎᓐᓂ ᐃᓄᖕᓂᒃ, ᑭᖑᓂᑦᑎᓐᓂ ᖃᐅᔨᓴᖅᑕᐅᕝᕕᐅᓚᐅᖅᑐᓂᒃ ᑕᐃᒪᐃᑦᑐᖃᙱᓐᓂᕋᐃᔪᖃᖅᐳᖅ ᑕᒃᑯᐊᓗ ᐅᐸᒃᑕᐅᑦᑕᐃᓕᒪᔪᒦᑦᑐᓐᓃᖅᓯᒪᓕᖅᖢᑎᒃ.
- ᑭᓇᑐᐃᓐᓇᑦᑎᐊᖅ ᓄᓇᕗᒻᒧᙵᐅᓚᐅᖅᑐᖅ ᓴᓇᑦᑕᐃᓕᒥ, ᒫᑦᓯ 15−ᒥ ᑕᐃᒪᙵᓂᓪᓘᓐᓃᑦ ᓇᖕᒥᓂᖅ−ᐅᐸᑦᑕᐅᑦᑕᐃᓂᒪᑎᑦᑕᕆᐊᖃᖅᐳᑦ ᖃᐅᔨᑎᓪᓗᒍᓗ ᐊᓐᓂᐊᕕᓕᐊᕐᕕᓂ ᐱᓯᒪᓕᕈᑎᒃ ᑕᐃᒪᐃᑦᑐᖃᕐᓂᕐᒧᑦ ᖃᐅᔨᔾᔪᑕᐅᔪᓐᓇᖅᑐᓂᒃ.
- ᓄᓇᕗᑦ ᒐᕙᒪᖓ ᓅᑎᑦᑎᕙᓪᓕᐊᓯᒪᓕᖅᐳᖅ ᐃᖅᑲᓇᐃᔮᕆᔭᐅᔪᓂᒃ ᐃᖅᑲᓇᐃᔭᖅᑐᖃᖃᑦᑕᕐᓂᐊᓕᖅᖢᓂ ᐊᖏᕐᕋᕆᔭᒥᓂ ᑕᒪᒃᑯᓄᖓ ᐊᑐᖅᑕᐅᓪᓚᕆᒋᐊᖃᖅᐸᙱᑦᑐᓄᑦ ᒐᕙᒪᒃᑯᓐᓄᑦ ᐃᖅᑲᓇᐃᔭᖅᑎᓄᑦ.
- ᓄᓇᕗᒻᒥ ᓯᓚᑦᑐᖅᓴᕐᕕᒃ ᓄᖅᑲᖅᑎᑦᑎᕗᖅ ᐱᓕᕆᐊᖑᑎᑉᐸᒃᑕᒥᓂᒃ ᐱᓇᓱᐊᕈᓯᕐᓄᑦ ᐱᖓᓱᓄᑦ.
- ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᒥᓂᔅᑕᖓᑦ ᐅᖃᐅᓯᖃᓪᓚᕆᒃᓯᒪᓕᖅᐳᖅ ᑭᒃᑯᑐᐃᓐᓇᓄᑦ ᐊᓐᓂᐊᖃᕐᓇᙱᑦᑐᓕᕆᓂᕐᒧᑦ ᑐᐊᕕᕐᓇᖅᓯᔪᒥᒃ ᓄᓇᕗᒻᒥᐅᓄᑦ. ᐅᖃᐅᓯᖃᓪᓚᕆᒃᐳᒍᑦ ᑭᒃᑯᑐᐃᓐᓇᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑐᐅᕕᕐᓇᖅᑐᒥᒃ ᐊᐅᓚᑦᑎᖃᑕᐅᔪᒪᓪᓗᑕ ᐱᓇᔪᒃᑕᐅᔪᓂᒃ ᑕᒫᓂᓕᒫᖅ ᐅᑭᐅᖅᑕᖅᑐᒥ ᐊᕕᒃᓯᒪᓂᕐᓂ ᑲᓇᑕᒥᓗ ᐱᓕᕆᐊᒃᓴᓂᓗ ᐱᓕᕆᓪᓗᑕ ᑕᐃᒪᐃᓕᐅᖅᑕᐅᔭᕆᐊᖃᖅᑐᓂᒃ ᐱᕙᒌᔭᖅᓯᒪᖁᓪᓗᑕ ᑕᒪᑐᒧᖓ ᖃᓂᒪᓐᓇᖅᑐᒧᑦ.
- ᐊᐱᕆᕙᕗᑦ ᓄᓇᕗᒻᒥᐅᑦ ᐅᐃᒻᒪᒃᓯᒪᖁᙱᓪᓗᒋᑦ. ᑐᐅᕕᕐᓗᓯ ᑲᑎᖅᓱᐃᓇᓱᒃᑕᐃᓕᒋᔅᓯ ᓂᕆᔭᒃᓴᔅᓯᓐᓂᒃ − ᓱᓕ ᑕᒪᒃᑯᓂᖓ ᐱᕙᓪᓕᐊᖏᓐᓇᖅᐳᒍᑦ ᓂᕿᓂᒡᓗ.
- ᓈᓚᒃᐸᒡᓗᒋᑦ ᐅᖃᐅᓯᐅᔪᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᔨᓪᓚᕆᖕᓂᑦ, ᐊᑐᖅᑐᖃᖅᐸᒡᓗᓂ ᑭᒃᑯᑐᐃᓐᓇᓂᒃ ᖃᓂᒃᓴᓗᐊᖅᑕᐃᓕᒪᓂᕐᒥᒃ, ᒪᓕᓐᓇᕐᓗᓯᓗ ᐱᑕᖃᖅᑎᑦᑎᑦᑕᐃᓕᒪᓂᕐᒧᑦ ᐱᓕᕆᐊᖑᔪᓂᒃ (ᐊᒡᒐᑎᑦ ᐅᐊᓴᖅᐸᒡᓗᒋᑦ, ᐊᓯᖏᓪᓗ).
- ᓄᓇᕗᑦ ᒐᕙᒪᖓ ᑲᔪᓯᑎᑦᑏᓐᓇᕐᓂᐊᖅᑐᖅ ᐱᔨᑦᑎᕋᕈᑕᐅᕙᒃᑐᓂᒃ ᓄᓇᕗᒻᒥᐅᓄᑦ.
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ
- ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᒥᓂᔅᑕᖓᑦ ᐅᖃᐅᓯᖃᓪᓚᕆᒃᓯᒪᓕᖅᐳᖅ ᑭᒃᑯᑐᐃᓐᓇᓄᑦ ᐊᓐᓂᐊᖃᕐᓇᙱᑦᑐᓕᕆᓂᕐᒧᑦ ᑐᐊᕕᕐᓇᖅᓯᔪᒥᒃ ᓄᓇᕗᒻᒥᐅᓄᑦ, ᑕᒪᓐᓇᓗ ᐊᑐᓯᒋᐊᕐᓂᐊᖅᖢᓂ ᐅᓪᓗᑐᐃᓐᓇᒥ, ᒫᑦᓯ 20−ᒥ.
- ᑕᒪᕐᒥᑦᑎᐊᖅ ᐃᒥᐊᓗᒋᐊᖅᑐᕐᕖᑦ ᒪᑐᔭᐅᓂᐊᖅᐳᑦ.
- ᑕᒪᕐᒥᑦᑎᐊᖅ ᓂᕆᔭᖅᑐᕐᕖᑦ ᒪᑐᐃᙶᕐᓂᐊᖅᐳᑦ ᑎᑭᓴᖅᑕᐅᔪᓄᑦ/ᑐᓂᔭᐅᔪᓐᓇᖅᑐᓄᐊᖅ ᑭᓯᐊᓂ, ᐊᒻᒪᓗ 10 ᐅᖓᑖᓅᙱᑦᑐᓂᒃ ᑐᑭᓕᕇᓕᖅᑐᖃᕆᐊᖃᖅᐸᒃᖢᓂ.
- ᐄᔭᒐᖅᑖᕐᕖᑦ, ᐅᖅᓱᐊᓗᒃᑖᕐᕖᑦ, ᓂᕆᔭᐅᔪᒃᓴᓂᒡᓗ ᓂᐅᕕᕐᕖᑦ ᒪᑐᐃᙶᖅᑎᑕᐅᓂᐊᖅᑐᑦ
- ᑕᒪᕐᒥᑦᑎᐊᖅ ᐋᓐᓂᐊᖃᕐᓇᙱᑦᑐᓕᕆᓂᕐᒧᒃ ᐃᖅᑲᓇᐃᔭᖅᑏᑦ ᐊᑐᖅᑕᐅᔭᕆᐊᖃᒻᒪᕆᒃᐸᒃᐳᑦ ᐃᖅᑲᓇᐃᔭᖅᑎᑕᐅᒃᑲᓐᓂᓕᕐᓗᑎᒡᓗ ᑕᐃᒪᐃᑦᑕᕆᐊᖃᓕᕌᒐᑦ.
- ᐊᑐᕈᓐᓇᑲᐅᑎᒋᓂᖅ ᑐᐊᕕᕐᓇᖅᑐᓄᑦ ᓴᖅᑭᑉᐸᓪᓕᐊᔪᓄᓪᓗ ᐊᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᔨᑦᑎᕋᕐᓂᕆᔭᐅᕙᒃᑐᑦ ᒪᓂᒪᔪᑦ ᒪᓂᒪᑎᑕᐅᖏᓐᓇᕐᓂᐊᖅᖢᑎᒡᓗ 24−ᓄᑦ ᐃᑲᕐᕋᓄᑦ, 7−ᓄᑦ ᐅᓪᓗᓄᑦ ᐱᓇᓱᐊᕈᓯᕐᒥ
- ᑕᒪᕐᒥᑦᑎᐊᖅ ᐃᓗᐊᖅᓴᖅᑕᐅᔭᕆᐊᓖᑦ ᐊᐱᕆᔭᐅᕗᑦ ᐅᖄᓚᖃᑦᑕᖁᔭᐅᓪᓗᑎᒃ ᓴᖅᑭᓚᐅᙱᓐᓂᕐᒥᓂ ᐋᓐᓂᐊᕋᕐᓇᙱᑦᑐᓕᕆᓂᕐᒧᑦ ᐃᓂᒋᔭᐅᔪᒥ.
- ᑕᒪᕐᒥᑦᑎᐊᖅ ᐊᑐᓪᓚᕆᒋᐊᖃᙱᑦᑐᑦ ᐃᓗᐊᖅᓴᖅᑕᐅᔭᖅᑐᕐᓗᓂ ᐊᐅᓪᓚᕐᓂᕆᔭᐅᕙᒃᑐᑦ ᑕᒫᙵᑦ ᐊᕕᒃᓯᒪᓂᕐᒥᑦ ᐅᖓᕙᕆᐊᖅᑕᐅᕗᑦ.
- ᓘᒃᑖᑦ ᑲᔪᓰᓐᓇᕐᓂᐊᖅᑐᑦ ᓄᓇᓕᖕᓄᑦ ᑕᑯᔭᖅᑐᖅᓯᕙᒡᓗᑎᒃ.
- ᐳᓛᕆᐊᕐᓃᑦ ᑕᒪᐃᓐᓄᑦ ᐋᓐᓂᐊᕕᓕᐊᕐᕕᖕᓄᑦ ᐃᓱᓕᑦᑕᖅᑎᑕᐅᓂᐊᖅᐳᑦ ᒥᑭᒡᓕᒋᐊᖅᑎᓯᒪᔪᒪᓪᓗᒍ ᖁᐊᖅᓵᕐᓇᖅᑐᖅ ᓇᒧᙵᖅᑎᑦᑎᕙᓪᓕᐊᕙᖕᓂᖅ ᑕᒪᑐᒥᖓ ᖃᓂᒪᓐᓇᖅᑐᒥᒃ.
- ᐃᓱᒪᒃᑯᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᒃ ᐃᑲᔪᖅᑐᐃᓃᑦ ᒪᓂᒪᑎᑕᐅᕗᑦ ᐊᔾᔨᑦᑕᐃᓐᓇᕆᓪᓗᓂᒋᓪᓗ ᑕᒫᓂᓕᒫᖅ ᐅᑭᐅᖅᑕᖅᑐᒥ ᐊᕕᒃᓯᒪᓂᕐᒥ.
- ᖃᓄᐃᙱᑦᑎᐊᖅᑐᓄᑦ ᓄᑕᕋᓛᕐᓄᑦ ᐱᓕᕆᐊᖑᕙᒃᑐᑦ, ᓯᖓᐃᔪᓄᑦ ᑕᑯᔭᖅᑐᖅᓯᓂᐅᕙᒃᑐᑦ ᑲᐱᔭᐅᕙᖕᓃᓪᓗ ᑲᔪᓰᓐᓇᖅᐳᑦ ᓄᓇᕘᓕᒫᒥ.
- ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐱᓕᕆᖃᑎᖃᖅᐳᑦ ᐱᑐᐃᓐᓇᐅᙱᑦᑐᓕᕆᕝᕕᖕᓂ ᐃᓗᐊᖅᓴᖅᑕᐅᕝᕕᖕᓂ ᐃᓂᓴᖃᖅᑎᑦᑎᔪᒪᓪᓗᑎᒃ ᐊᒡᒋᖅᐸᓪᓕᐊᔪᓄᑦ ᐃᓂᑖᑦᑎᑦᑎᕝᕕᐅᔪᓄᑦ.
- ᐃᖃᓗᖕᒥᐅᓄᑦ, ᑐᐊᕕᕐᓇᙱᑦᑐᓄᑦ ᖃᓄᐃᓕᖓᓂᕆᔭᐅᔪᓄᑦ, ᐅᖄᓚᖅᑳᕐᓗᓯ ᕿᑭᖅᑕᓂ ᐋᓐᓂᐊᕕᓕᐊᓚᐅᖅᑳᕋᓯ.
- ᐃᓗᐊᖅᓴᖅᑕᐅᓃᑦ ᑲᒪᒋᔭᐅᖃᑦᑕᕐᓂᐊᖅᐳᑦ ᐅᖄᓚᐅᑎᑎᒍᑦ ᑕᐃᒪᐃᑦᑐᓐᓇᑐᐊᕌᒐᑕ. ᐃᓂᒃᓴᓕᐅᖅᑕᐅᓯᒪᔪᑦ ᓄᖅᑲᖅᑎᑕᐅᔾᔮᙱᓚᑦ.
- ᐃᓗᐊᖅᓴᖅᑕᐅᔭᕆᐊᓖᑦ ᖃᑕᙳᑎᖏᓪᓗ ᐊᐱᕆᔭᐅᕗᑦ ᖃᐅᔨᑎᑦᑎᖁᔭᐅᓪᓗᑎᒃ ᐋᓐᓂᐊᕕᓕᐊᕐᕕᖕᒥᐅᓂᒃ ᐅᖄᓚᐅᑎᒃᑯᑦ ᓯᕗᓪᓕᖅᐹᖅᓯᐅᑎᒥᒃ ᖃᐅᔨᓴᖅᑕᐅᓂᕐᒥᒃ ᐱᓕᕆᕝᕕᐅᓂᐊᕐᓗᑎᒃ ᐅᖄᓚᐅᑎᒃᑯᑦ.
- ᐱᑐᐃᓐᓇᐅᙱᑦᑐᔨᕆᕝᕖᑦ ᐃᓗᐊᖅᓴᖅᑕᐅᓃᑦ ᓄᖅᑲᖅᑎᑕᐅᓯᒪᓕᖅᐳᑦ. ᐱᓕᕆᔪᖃᖅᐸᓪᓕᐊᕗᖅ ᖃᐅᔨᒪᓕᕈᒪᓂᕐᒧᑦ ᓇᓕᐊᒃ ᐃᓗᐊᖅᓴᖅᑕᐅᔭᕆᐊᓖᑦ ᑲᒪᒋᔭᐅᔪᓐᓇᕐᒪᖔᑕ ᐅᖄᓚᐅᑎᒃᑯᑦ/ᐅᐸᒃᓯᒪᙱᓪᓗᒍ ᑲᒪᒋᔭᐅᓗᑎᒃ.
- ᓘᒃᑖᑦ ᑲᔪᓰᓐᓇᕐᓂᐊᖅᑐᑦ ᓄᓇᓕᖕᓄᑦ ᑕᑯᔭᖅᑐᖅᓯᕙᒡᓗᑎᒃ. ᑕᒪᓐᓇ ᐊᔪᕐᓇᕐᓂᖅᐸᑦ, ᑕᒪᒃᑯᐊ ᑕᑯᓯᓃᑦ ᐱᓕᕆᐊᖑᓂᐊᖅᐳᑦ ᑕᓚᕖᓴᒃᑯᑦ ᐃᓗᐊᖅᓴᖅᑕᐅᓗᑎᒃ.
- ᐃᖃᓗᖕᓂ, ᐅᖁᒪᐃᓐᓂᕐᓂᐊᕐᕕᒃ ᒪᑐᐃᙶᖏᓐᓇᕐᓂᐊᖅᑐᖅ. ᐅᐸᒃᓯᒃᑲᓐᓂᕆᐊᖃᕐᓂᕐᒧᑦ ᐃᓂᓕᐅᖅᑕᐅᓯᒪᔪᑦ ᐃᓂᓕᐅᖅᑕᐅᓂᐊᖅᐳᑦ ᖃᓄᖅ ᑐᐊᕕᕐᓇᖅᑎᒋᓂᖏᓐᓄᑦ, ᐃᓚᖏᓪᓗ ᐅᖓᕙᕆᐊᖅᑕᐅᑐᐃᓐᓇᕆᐊᖃᖅᖢᑎᒃ.
FANS−ᑯᑦ ALTs−ᑯᓪᓗ
- ᐃᓕᓐᓂᐊᖅᑏᑦ ᐃᓕᓐᓂᐊᕐᕕᖕᒥᓃᓪᓗᐊᖅᐳᑦ ᐃᓂᒥᓂ, ᑭᓯᐊᓂ ᑕᒪᓐᓇ ᐃᓕᓐᓂᐊᕐᓂᕆᔭᖓ ᐃᓱᓕᓪᓚᕆᒃᐸᑦ. ᒫᓐᓇᓄᑦ ᑎᑭᖦᖢᒍ, ᐃᓕᓐᓂᐊᕐᓃᑦ ᐊᔪᓕᖅᑎᑕᐅᓚᐅᑲᒃᓯᒪᕗᑦ, ᓄᖅᑲᖅᑎᑕᐅᙱᖦᖢᑎᒃ.
- ᐃᓕᓐᓂᐊᖅᑏᑦ ᐊᖏᕐᕋᖏᑦ ᒪᑐᐃᙶᖏᓐᓇᖅᐳᑦ, ᐃᓕᓐᓂᐊᖅᑏᓪᓗ ᐱᔪᓐᓇᖅᑎᑕᐅᓪᓗᑎᒃ ᐃᓕᓐᓂᐊᕕᖏᑕ ᐊᖏᕐᕋᕆᑎᑉᐸᒃᑕᖏ ᓂᓐᓂᐊᖅᖢᑎᒃ ᐄᐳᕈ ᐃᓱᓕᓐᓇᓱᖕᓂᖓᓄᑦ. ᐃᓕᓐᓂᐊᕖᑦᑕᐅᖅ ᑲᔪᓯᑎᑦᑎᒋᕗᑦ ᓂᕆᑎᑦᑎᕙᖕᓂᕆᔭᒥᓂᒃ.
- ᖃᐅᔨᒪᑦᑎᐊᕈᒪᓂᕐᒧᑦ ᑮᓇᐅᔭᑎᒍᑦ ᐊᒃᓱᕈᓐᓇᖅᑐᖅᓯᐅᖅᑐᖃᙱᓐᓂᖓᓂᒃ ᑕᒪᒃᑯᓄᖓ ᑕᒫᓂᕐᒥᐅᑕᐅᙱᑦᑐᓄᑦ ᐃᓕᓐᓂᐊᖅᑎᓄᑦ, ᑕᐃᒃᑯᐊ ᑮᓇᐅᔭᖅᑖᖅᐸᒃᑐᑦ FANS−ᑯᓐᓂᑦ ALTS−ᑯᓐᓂᓘᓐᓃᑦ ᐱᖃᑦᑕᐃᓐᓇᕐᓂᐊᖅᐳᑦ ᑮᓇᐅᔭᓂᒃ ᑕᐃᒪᙵᓕᒫᖅ ᐊᖏᕐᕋᕆᔭᒥᓂᑦ ᐊᐅᓪᓚᖅᓯᒪᑐᐊᕈᑎᒃ
ᐃᓕᓐᓂᐊᕐᓂᓕᕆᔨᒃᑯᑦ
- ᓄᓇᕗᑦ ᒐᕙᒪᖓ ᐱᓕᕆᐊᖃᖅᐸᓪᓕᐊᕗᖅ ᐋᖅᑭᒃᓯᒪᓕᕈᑕᐅᕙᒃᑐᓂᒃ ᑕᒪᒃᑯᐊ ᓄᑕᖅᑲᑦ ᓂᕇᖃᑦᑕᐃᓐᓇᖃᑦᑕᖁᓪᓗᒋᑦ.
- ᐱᔪᓐᓇᐅᑎᓕᑦ ᓄᑕᖅᑲᓂᒃ ᑲᒪᒋᔭᖃᕐᕕᐅᕙᒃᑐᑦ ᐃᖅᑲᓇᐃᔭᖅᑎᖏᑦ ᐊᑭᓕᖅᑕᐅᙱᓐᓇᓪᓗᐊᖅᐳᖅ ᑕᒪᒃᑯᐊ ᓄᑕᖅᑲᓂᒃ ᑲᒪᒋᔭᖃᕐᕖᑦ ᒪᑐᓯᒪᓕᕋᓗᐊᖅᐸᑕ.
- ᐃᓕᓐᓂᐊᕐᕖᑦ ᒪᑐᐃᖅᑕᐅᒃᑲᓐᓂᖅᐸᑕ, ᑕᒪᒃᑯᐊ ᐃᒡᓗᕐᔪᐊᑦ ᓴᓗᒻᒪᖅᓴᖅᑕᐅᓂᐊᖅᐳᑦ ᖁᐱᕐᕈᐃᔭᖅᑕᐅᓗᑎᒡᓗ ᐱᑕᖃᖅᑎᑦᑎᑦᑕᐃᓕᒪᔪᒪᓂᕐᒧᑦ ᓯᐊᒻᒪᒃᑎᕆᓂᕐᒥᒃ ᖃᓄᑐᐃᓐᓇᖅ ᑕᒪᑐᒥᖓ ᓄᕙᒡᔪᐊᕐᓇᖅ-19−ᒥᒃ.
ᒪᓕᒐᓕᕆᔨᒃᑯᑦ
- ᒪᓕᒐᓕᕆᔨᒃᑯᑦ ᑕᐅᑐᒐᖃᓪᓗᐊᑕᖅᐳᑦ ᖃᓄᐃᙱᑦᑎᐊᕐᓂᖏᓐᓄᑦ ᖁᐊᖅᓵᕐᓇᖅᑐᒦᙱᓐᓂᖏᓐᓄᓪᓗ ᐃᖅᑲᓇᐃᔭᖅᑏᑦ, ᑎᒍᔭᐅᓯᒪᔪᑦ ᓄᓇᓖᓪᓗ. ᐋᖅᑭᒃᓱᐃᓯᒪᕗᒍᑦ ᖃᓄᐃᓕᐅᖅᓯᓕᕋᔭᕐᓂᕐᒧᑦ ᐱᕙᒌᔭᕈᑎᓂᒃ ᖃᐅᔨᒪᑦᑎᐊᕈᒪᓂᑦᑎᓐᓄᑦ ᑲᔪᓰᓐᓇᕈᓐᓇᕐᓂᐊᕐᒥᓂᑦᑎᓐᓂᒃ ᐊᐅᓚᓂᕆᕙᒃᑕᑦᑎᓐᓂᒃ
- ᑎᒍᔭᐅᓯᒪᕖᑦ ᒪᑐᔭᐅᓯᒪᓕᖅᐳᑦ ᑎᒍᔭᐅᓯᒪᔪᓂᒃ ᐳᓛᕆᐊᕐᓂᐅᕙᒃᑐᓂᒃ, ᑎᒍᔭᐅᓯᒪᕝᕕᒃᑰᖅᑎᑕᐅᓯᒪᔪᑦ ᐅᖃᖃᑦᑕᕆᐊᖃᖅᐳᑦ ᐅᖄᓚᐅᑎᒃᑯᑦ ᓄᓇᓕᖕᓂ ᑎᒍᔭᐅᓯᒪᔪᓕᕆᓕᓂᕐᒧᑦ ᐱᓕᕆᔨᒧᑦ.
- ᑕᒪᕐᒥᑦᑎᐊᖅ ᐳᓛᕆᐊᓂᐅᕙᒃᑐᑦ ᑕᒪᒃᑯᓄᖓ ᐃᓂᒋᔭᐅᔪᓄᑦ ᓄᖅᑲᖅᑎᑕᐅᓯᒪᕗᑦ, ᖃᐅᔨᒪᑦᑎᐊᕈᒪᓂᕐᒧᑦ ᖃᓄᐃᙱᑦᑎᐊᕈᓐᓇᕐᓂᖏᓐᓄᑦ ᖁᐊᖅᓴᕐᓇᖅᑐ ᒥᙱᓂᖏᓐᓄᒡᓗ ᑎᒍᔭᐅᓯᒪᔪᑦ ᐃᖅᑲᓇᐃᔭᖅᑏᓪᓗ.
- ᓄᓇᕗᒥᑦ ᐃᖅᑲᖅᑐᐃᕕᓕᕆᔩᑦ ᓄᖅᑲᖅᑎᑦᑎᓚᐅᖅᐳᑦ ᖃᐅᑕᒫᑦ ᐊᐅᓚᑎᑉᐸᒃᑕᒥᓂᒃ, ᑭᓯᐊᓂᓗ, ᑖᒃᑯᐊ ᓄᓇᕗᒻᒥ ᐃᖅᑲᖅᑐᐃᕕᓕᕆᔩᑦ ᑲᔪᓰᓐᓇᕐᓂᐊᖅᐳᑦ ᑐᓵᕙᒡᓗᑎᒃ ᑐᐊᕕᕐᓇᖅᑐᓂᒃ ᑕᒪᓐᓇ ᖃᓄᐃᓐᓂᕆᔭᐅᔪᖅ ᐊᑐᖅᑎᓪᓗᒍ.
ᑮᓇᐅᔭᓕᕆᔨᒃᑯᑦ
- ᓄᓇᕗᒻᒥᐅᑦ ᓄᓇᕗᒻᒥᓗ ᓇᖕᒥᓂᕆᔭᐅᔪᑦ ᐊᒥᓱᓂᒃ ᐊᑐᖅᑕᖃᓕᕈᓐᓇᖅᐳᑦ ᐊᖑᒻᒪᑎᔪᒪᓪᓗᑎᒃ ᐃᓐᑲᒻᑖᒃᓯᓕᕆᓂᕐᒧᑦ ᐅᓪᓗᓂᒃ ᑭᖑᓕᖅᐹᖑᑎᑕᐅᔪᓂᒃ ᒪᓕᒋᐊᖃᖅᑕᖏᓐᓂᒡᓗ.
- ᓄᓇᕗᒻᒥᐅᑦ ᓄᓇᕗᒻᒥᓗ ᓇᖕᒥᓂᕆᔭᐅᔪᑦ ᐱᔪᓐᓇᖅᑎᑕᐅᕗᑦ ᐅᖄᓚᓗᑎᒃ ᐊᑭᓖᓂᐊᕐᓗᑎᒃ ᓄᓇᕗᑦ ᒐᕙᒪᖓᑕ ᐊᑭᓕᕆᐊᖃᖅᑐᖁᑎᖏᓐᓂᒃ.
- ᓄᓇᕗᑦ ᒐᕙᓚᖓᑕ ᓂᐅᕕᖅᑎᖁᑎᖏᑦ ᐱᔪᓐᓇᖅᑎᑕᐅᕗᑦ ᑐᓂᓯᔪᓐᓇᖅᖢᑎᒃ ᐊᑭᓕᒐᒃᓴᖁᑎᒥᓂᒃ ᖃᕆᑕᐅᔭᒃᑯᑦ.
- ᐊᔪᖅᑎᑕᐅᙱᑦᑐᑦ ᓄᓇᕗᑦ ᒐᕙᒪᖓᑕ ᐃᖅᑲᓇᐃᔭᖅᑎᖏᑦ ᐱᔪᓐᓇᖅᐳᖅ ᐊᑭᓕᖅᑕᐅᓂᕐᒧᑦ ᑎᑎᖅᑲᓂᒃ ᖃᕆᑕᐅᔭᒃᑯᑦ ᐃᑭᐊᖅᑭᕕᒃᑯᑦ.
ᐱᕙᓪᓕᐊᔪᓕᕆᔨᒃᑯᑦ ᐃᖏᕐᕋᔪᓕᕆᔨᑯᓪᓗ
- ᐋᖅᑭᒃᑕᐅᓯᒪᕙᒌᖅᑐᑦ ᖃᖓᑕᓂᕐᒧᑦ ᐱᔨᑦᑎᕋᕈᑕᐅᕙᒃᑐᑦ ᒪᓂᒪᑎᑕᐅᖏᓐᓇᖅᐳᑦ ᐃᑲᔪᖅᑐᐃᔪᒪᓂᕐᒧᑦ ᐊᑐᓪᓚᕆᒋᐊᖃᖅᐸᒃᑐᓂᒃ ᓇᒧᙵᐅᔭᕆᐊᖃᕐᓂᕐᒧᑦ.
- ᓄᓇᕗᒻᒥᐅᑦ ᖃᖓᑕᓲᒃᑯᑦ ᑎᑭᑎᑉᐸᒃᑕᖏᑦ ᐱᖁᑏᓂᒃ ᓱᓕ ᑲᔪᓯᓂᖃᑦᑎᐊᖅᐳᑦ ᐃᓚᖃᖅᖢᑎᒡᓗ ᖃᔅᓯᑲᓪᓚᖕᓂᒃ ᐃᓛᒃᑰᖅᑐᓂᒃ ᐊᑐᖅᑕᐅᓕᕈᓐᓇᖅᑐᓂᒃ. ᑕᒪᓐᓇ ᐅᐃᒻᒪᒃᓯᒪᓗᓂ ᓂᐅᕕᕐᓂᖅ ᐱᑕᖃᓕᖅᑎᑦᑎᓂᐊᖅᑎᓪᓗᒍ ᒪᐅᖓᑦᑎᐊᖅ ᐊᒥᒐᖅᓯᓂᕐᓂᒃ, ᓄᓇᓕᖕᓂ ᓂᐅᕕᕐᕖᑦ ᐱᑕᖅᑎᑕᐅᕙᓪᓕᐊᒃᑲᓐᓂᕐᓂᐊᖅᐳᑦ.
- ᓄᓇᕗᒻᒥᐅᑦ ᓄᑖᙳᕆᐊᖅᑎᑦᑎᖃᑦᑕᕈᓐᓇᕐᓂᐊᖅᐳᑦ ᐊᖁᑦᑐᓐᓇᐅᑎᒥᓂᒃ ᐃᖏᕐᕋᔾᔪᑎᓄᓪᓗ ᓇᓗᓇᐃᔭᐃᓂᕐᓂᒃ ᐊᒻᒪᓗ – ᑖᓐᓇ ᐱᒻᒪᕆᐅᓪᓗᓂ, – ᐊᑐᖅᑎᑕᐅᑎᐊᖏᓐᓇᕈᓐᓇᕐᓗᑎᒃ ᐱᔾᔪᑎᖃᕐᓗᑎᒃ ᓇᓪᓕᐅᒃᑯᒫᖏᓐᓄᑦ ᐊᑭᓕᕆᐊᖃᖅᐸᒃᑕᒥᓂᒃ ᐊᒻᒪᓗ/ᐅᕝᕙᓗᓃᑦᐃᖅᑲᓇᐃᔭᕐᓂᕐᒧᑦ(ᑕᒪᓐᓇ ᐃᖅᑲᓇᐃᔭᕐᓂᖓᑦ ᐊᑐᕆᐊᖃᕐᕕᐅᒃᐸᑦ ᐊᖁᓐᓂᕐᒥᒃ). ᑕᐃᒪᐃᓕᐅᕐᓂᕐᒥᓂᓗ ᐅᔾᔨᖅᓱᖅᐸᒡᓗᑎᒃ ᐊᑐᖅᑕᐅᖁᔭᐅᔪᒥᒃ ᐃᓅᖃᑎᒥᓂᒃ ᖃᓂᒃᓴᓗᐊᖅᑕᐃᓕᒪᓂᕐᒧᑦ ᐊᑐᖅᑕᐅᕙᒃᑐᓂᒃ.
- ᐱᕙᓪᓕᐊᔪᓕᕆᔨᒃᑯᑦ ᐃᖏᕐᕋᔪᓕᕆᔨᒃᑯᓪᓗ ᓄᖅᑲᖅᑎᑦᑎᓯᒪᓕᖅᐳᑦ ᑕᒪᐃᓐᓂᑦᑎᐊᖅ ᐊᖁᑎᓂᒃ ᖃᐅᔨᓴᖅᓯᕙᖕᓂᕐᓂᒃ ᐄᐳᕈ 7−ᖑᕋᓱᖕᓂᖓᓂ, ᓄᖅᑲᖅᑎᑦᑎᓪᓗᑎᒡᓗ ᐱᓕᕆᖃᑎᒌᓂ ᐱᓕᕆᐊᖑᕙᒃᑐᓂᒃ ᑕᒪᒃᑯᓇᓂ ᐳᓛᕆᐊᖅᑐᓄᑦ ᐃᓂᒋᔭᐅᕙᒃᑐᓂ.
- ᓄᓇᕗᒻᒥᐅᑦ ᓇᓗᓇᐃᖅᕕᐅᑦᑎᐊᕈᓐᓇᖅᐳᑦ ᑕᒪᒃᑯᐊ ᖃᓄᐃᓕᐅᖅᑕᐅᕙᓪᓕᐊᔪᑦ ᐃᓕᐅᖅᑲᖅᑕᐅᓯᒪᓂᖏᓐᓂᒃ ᓴᐳᔾᔨᓯᒪᔪᒪᓂᕐᒧᑦ ᑭᒃᑯᑐᐃᓐᓇᓂᒃ ᑕᒪᒃᑯᐊᓗ ᐅᔭᕋᖕᓂᐊᕐᓂᕐᒧᑦ ᐱᓕᕆᐊᖑᔪᑦ ᐊᒃᑐᐊᓂᖃᙱᓚᑦ ᐊᖏᒡᓕᕙᓪᓕᐊᓂᖓᓄᑦ ᑕᒪᑐᒪ ᖁᐊᖅᓵᕐᓇᖅᑑᑉ.
ᐊᓯᖏᑦ:
- ᐃᓄᓕᕆᔨᒃᑯᑦ ᓄᓇᕗᑦ ᒐᕙᒪᖓ ᐱᓕᕆᐊᖃᖅᐸᓪᓕᐊᕗᖅ ᕿᒫᕝᕕᖕᓄᑦ ᓱᓴᐃᐊᑎᒋᔭᐅᔪᓂᒃ ᐊᔪᖅᑎᑦᑎᔪᒪᙱᓐᓂᕐᒥᓄᑦ ᐅᖓᕙᕆᐊᖅᑕᐅᔪᓂᒃ ᐃᑲᕐᕋᓂᒃ ᐊᒻᒪᓗᑦᑕᐅᖅ ᐊᑐᖅᓯᓗᑎᒃ ᐃᓂᒃᓴᒃᑲᓐᓂᐊᔪᓐᓇᖅᑐᓂᒃ ᐊᔪᖅᑎᑦᑎᔪᒪᙱᓐᓂᕐᒥᓄᑦ ᑕᒪᑐᒥᖓ ᐃᓅᖃᑎᒌᓂ ᖃᓂᒌᒃᑎᑦᑎᓗᐊᖅᑕᐃᓕᒪᓂᕐᓂᒧᒃ. ᐱᖓᓱᐃᓐᓇᕐᓂᒃ ᕿᒫᕝᕕᒃᑕᖃᖅᐳᖅ ᓄᓇᕗᒻᒥ, ᒫᓐᓇᓗ ᑖᒃᑯᐊ ᒪᑐᓯᒪᕙᒃᖢᑎᒃ ᐅᓪᓗᒃᑯᑦ.
- ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᑲᔪᓰᓐᓇᕐᓂᐊᖅᐳᑦ ᐱᑎᑦᑎᕙᒡᓗᑎᒃ ᖁᐊᖅᓵᕐᓇᙱᑦᑐᒥᒃ ᐊᑐᖅᑕᐅᑦᑎᐊᕈᓐᓇᖅᑐᒥᒡᓗ ᐆᒻᒪᖅᑯᒻᒥᒃ ᓄᓇᕗᒻᒥᐅᓄᑦ, ᐱᑎᑦᑎᕙᒡᓗᑎᒡᓗ ᐊᑐᖅᑎᓂᒃ ᐃᖅᑲᓇᐃᔭᖅᑎᓂᒡᓗ ᖃᖓᙳᕌᖓᑦ ᑐᓴᒐᒃᓴᓂᒃ ᓄᑖᙳᕆᐊᖅᓯᒪᔪᓂᒃ.
- ᐃᓕᖅᑯᓯᓕᕆᔨᒃᑯᑦ: ᑕᐃᓐᓇ ᐃᖃᓗᖕᓂ ᕿᒥᕐᕈᐊᒐᖃᕐᕕᒃ ᒪᑐᐃᙵᖏᓐᓇᖅᑎᓪᓗᒍ ᑭᒃᑯᑐᐃᓐᓇᓄᑦ, ᑕᒪᕐᒥᑦᑎᐊᖅ ᐱᓕᕆᐊᕆᑎᑉᐸᑦᑕᖏᑦ ᓄᖅᑲᖅᑎᑕᐅᓯᒪᓕᖅᐳᑦ ᑕᐃᑲᓂ ᐃᖃᓗᖕᓂ ᕿᒥᕐᕈᐊᒐᖃᕐᕕᖕᒥ. ᑕᐃᓐᓇ ᕿᒥᕐᕈᐊᒐᖃᕐᕕᒃ ᒪᑐᐃᙵᖏᓐᓇᖅᐳᖅ
- ᐊᕙᑎᓕᕆᔨᒃᑯᑦ ᐊᑐᖅᑕᐅᔭᕆᐊᖃᒻᒪᕆᒃᐸᒃᑐᑦ ᐱᔨᑦᑎᕋᕐᓂᕆᔭᐅᔪᑦ ᓲᕐᓗ ᐊᑲᐅᙱᓕᐅᖅᑎᑦᑎᔪᓂᒃ ᓂᕐᔪᑎᓂᒃ ᐱᓕᕆᐊᖃᓕᕐᓂᖅ ᑯᕕᔪᖃᖅᑎᓪᓗᒍᓗ ᑭᐅᓯᓂᖅ ᑲᔪᓰᓐᓇᕐᓂᐊᖅᐳᒃ ᐊᑐᖅᑕᐅᕙᒃᑐᑎᑐᑦ.