ᓄᕙᒡᔪᐊᕐᓇᖅ-19−ᒧᑦ ᓄᓇᕗᑦ ᒐᕙᒪᖓᑕ ᓄᑖᙳᕆᐊᖅᑎᑕᖏᑦ - ᐄᐳᕈ 2, 2020
ᓯᕗᓕᖅᑎᐅᑉ ᑐᒡᓕᐊᓂᑦ ᑐᓴᒐᒃᓴᖅ:
ᐅᓐᓄᒃᓴᒃᑯᑦ. ᓯᕗᓕᖅᑎ ᓴᕕᑲᑖᖅ ᐅᓪᓗᒥ ᐃᓇᖏᖅᓯᒪᓂᐊᖅᑕᕋ, ᑖᓐᓇ ᓄᕙᒡᔪᐊᕐᓇᖅ-19−ᒧᑦ ᐱᓇᓱᐊᕈᓯᑕᒫᑦ ᑲᓇᑕᒥᐅᑦ ᓯᕗᓕᖅᑎᖏᓐᓂᒃ ᐅᖄᓚᖃᑎᖃᖅᐸᖕᓂᖓᓄᑦ.
ᐅᓪᓗᒥᒧᑦ ᑎᑭᖦᖢᒍ, ᖃᓂᒻᒪᒃᓯᒪᔪᖃᕐᒪᖔᖅ ᖃᓂᒪᓇᓱᒋᔭᐅᔪᖃᕐᒪᖔᑦ ᓄᕙᒡᔪᐊᕐᓇᖅ-19−ᒧᑦ ᓱᓕ ᖃᐅᔨᔭᐅᓯᒪᔪᖃᙱᑦᑐᖅ ᓄᓇᕗᒻᒥ.
ᓄᓇᕗᒻᒥᐅᑦ ᑭᒃᑯᑐᐃᓐᓇᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑐᐊᕕᕐᓇᖅᑐᖁᑎᖓᑦ ᐅᖓᕙᕆᐊᖅᑕᐅᓯᒪᕗᖅ ᐄᐳᕈ 16, 2020−ᖑᕋᓱᖕᓂᖓᓄᑦ. ᑕᒪᓐᓇ ᒐᕙᒪᑦᑎᓐᓂᒃ ᐃᑲᔪᕐᓂᐊᖅᐳᖅ ᓇᒧᙵᐅᕙᓪᓕᐊᓂᕆᔭᒥᒎᑦᑎᐊᕐᓗᑕ ᐱᓇᔪᖕᓂᕆᔭᑦᑎᓐᓂ ᐱᕙᒌᔭᑦᑎᐊᖅᓯᒪᔪᒪᓗᑕ ᐅᔾᔨᖅᓱᐃᓐᓇᕐᓗᑕᓗ.
ᐅᓪᓗᒥ ᐅᔾᔨᕐᓇᖅᑐᒻᒪᕆᖕᓂᒃ ᓄᑖᙳᕆᐊᖅᓯᒪᔪᓂᒃ ᐱᑕᖃᙱᓚᖅ, ᑕᐃᒪᐃᓐᓂᖓᓄᓪᓗ ᐱᕕᒃᓴᖃᕐᓂᓐᓂ ᑭᒃᑯᑐᐃᓐᓇᐃᑦ ᐃᖅᑲᐃᑎᑦᑐᒪᕙᒃᑲ ᑕᒪᑐᒧᖓ ᐊᑕᐅᑦᑎᒃᑯᑦ ᑕᐃᒪᐃᑦᑐᒦᑉᐳᒍᑦ− ᓇᓗᓇᕈᔪᒃᑐᒥ, ᐃᓱᒪᑦᑎᐊᕈᓐᓃᕐᓇᖅᑐᑦ, ᑭᐱᙳᓇᖅᓯᕙᖕᓂᖓ, ᐃᒃᐱᒋᔭᖃᕐᓂᖅ ᖃᓄᐃᓕᐅᕐᕕᖃᕈᓐᓇᙱᑦᑎᐊᕐᓂᑦᑎᓐᓂᒃ.
ᐃᒪᓐᓇᑐᐊᑦᑎᐊᖑᕗᖅ ᑕᒪᓐᓇ ᓄᕙᒡᔪᐊᕐᓇᖅ-19 ᐊᑐᕐᓂᐊᕐᓗ, ᐊᖏᕐᕋᖅᓯᒪᓗᓂ, ᓇᒧᙵᖅᐸᓪᓕᐊᓂᖓ ᓴᖑᑎᒋᐊᕐᓗᒍ, ᓱᒃᑲᐃᒡᓕᑎᒋᐊᕐᓗᒍ ᓯᐊᒻᒪᒃᐸᓪᓕᐊᕙᖕᓂᖓ ᑕᒪᑦᑎᓐᓂᒡᓗ ᖁᐊᖅᓵᕐᓇᖅᑐᒦᑎᑦᑕᐃᓕᒪᓂᖅ ᖃᓄᐃᙱᑦᑎᐊᕐᓂᕐᓗ.
ᑕᒪᓐᓇ ᐊᑯᓂᐅᓂᐊᖅᐳᖅ. ᑕᒪᓐᓇ ᐅᖓᓯᒌᒋᐊᖃᕐᓂᕐᒥᒃ ᐊᑐᕐᓂᐊᖅᐳᖅ. ᑕᒪᓐᓇ ᐅᑕᖅᑭᕖᖃᑦᑎᐊᕐᕕᐅᓂᐊᖅᐳᖅ. ᐊᔪᙱᓐᓂᕆᔭᕗᑦ ᐊᓂᒍᖅᑎᓐᓂᐊᕐᓗᒍ ᐱᓕᕝᕕᒋᓪᓚᕆᒍᒪᓗᒍᓗ
ᓄᓇᕗᒻᒥᐅᑦ − ᐊᖏᕐᕋᖅᓯᒪᓚᐅᕆᔅᓯ. ᐃᓅᓕᑦᑎᒋᑦ/ᐃᓅᓯᒃᓴᖃᖅᑎᑦᑎᒋᑦ.
ᐃᓚᒋᓪᓗᓂᐅᒃ ᓄᓇᕗᑦ ᒐᕙᒪᖓᑕ ᐱᓇᔪᒃᑕᖏᓐᓄᑦ ᓴᐳᔾᔨᓯᒪᔪᒪᓪᓗᑎᒃ ᓄᓇᕗᒻᒥᐅᓂᒃ ᖁᐊᖅᓵᕐᓇᖅᑐᒧᑦ ᓄᕙᒡᔪᐊᕐᓇᖅ-19−ᖃᓕᑐᐃᓐᓇᕆᐊᓕᖕᓄᑦ, ᓄᓇᕗᑦ ᒐᕙᒪᒃᑯᑦ ᐱᓕᕆᕝᕕᖏᑦ ᐊᑐᓕᖅᑎᑦᑎᕗᑦ ᐅᑯᓂᖓ:
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐱᓕᕆᕝᕕᖓᓂ ᑐᓴᒐᒃᓴᑦ
ᓄᓇᕗᒻᒥᐅᑦ ᑭᒃᑯᑐᐃᓐᓇᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑐᐊᕕᕐᓇᖅᑐᖁᑎᖓᑦ ᐅᖓᕙᕆᐊᖅᑕᐅᓯᒪᕗᖅ ᐄᐳᕈ 16−ᖑᕋᓱᖕᓂᖓᓄᑦ.
ᑐᐊᕕᕐᓇᖅᓯᔪᑐᐊᑦ ᑭᒍᑎᓕᕆᓃᑦ ᐱᓕᕆᕝᕕᐅᖃᑦᑕᕐᓂᐊᖅᐳᑦ ᑕᒪᐃᓐᓄᑦ ᓄᓇᕗᒻᒥ ᓄᓇᓕᖕᓄᑦ ᐊᓯᐊᓂᒃ ᑐᓴᖅᑎᑦᑎᔪᖃᒃᑲᓐᓂᓚᐅᙱᓐᓂᖓᓂ.
ᐃᖃᓗᖕᒥᐅᑕᐅᒍᕕᑦ, ᑲᖏᖅᖠᓂᕐᒥᐅᑕᐅᒍᕕᑦ ᐃᖃᓗᑦᑑᑦᑎᐊᕐᒥᐅᑕᐅᒍᕕᓪᓘᓐᓃᑦ ᐊᑐᕐᓗᑎᓪᓗ ᑭᒍᓯᕆᒻᒪᕆᓕᕐᓗᑎᑦ ᐳᕕᓕᕐᓗᑎᓪᓘᓐᓃᑦ, ᖃᐅᔨᒋᐊᕐᕕᖃᕈᓐᓇᖅᐳᑎᑦ ᑭᒍᑎᓕᕆᕝᕕᖕᓂᒃ ᐊᑖᓂ ᑎᑎᕋᖅᑕᐅᓯᒪᔪᓂᒃ ᐅᖃᐅᓯᕆᓗᒍᓗ ᐊᑲᐅᙱᓕᐅᕈᑎᒋᔭᐃᑦ. ᐅᖄᓚᓂᕆᔭᐃᑦ ᑭᐅᔭᐅᙱᑉᐸᑦ, ᒪᓕᒡᓗᒋᑦ ᖃᓄᐃᓕᐅᖁᔨᔪᑦ ᓂᐱᓕᐅᖅᑕᐅᓯᒪᔪᒥ.
- ᐃᖃᓗᐃᑦ: ᐊᕕᒃᓯᒪᓂᕐᒥ ᑭᒍᑎᓕᕆᓂᕐᒧᑦ ᐊᐅᓚᑦᑎᔨ ᕿᑭᖅᑕᓂ ᐋᓐᓂᐊᕕᖕᒥ ᐅᕙᓂ 867-975-8600 ᓇᕿᑦᑕᒃᑲᓐᓂᕐᓗᒋᑦ ᐅᑯᐊ 6206
- ᑲᖏᖅᖠᓂᕐᒥ ᐅᕙᓂ, 867-645-2776
- ᐃᖃᓗᒃᑑᑦᑎᐊᒥ ᐅᕙᓂ, 867-983-4171
ᑕᐃᑯᙵᐅᑦᑕᐃᓕᒋᑦ ᑭᒍᑎᓕᕆᕝᕕᖕᒧᑦ ᐋᖅᑭᒃᑕᐅᓯᒪᕙᒌᖅᑐᒥᒃ ᐃᓂᒃᓴᒥᒃ ᖃᑯᒍᙳᖅᐸᑦ ᐱᓯᒪᙱᒃᑯᕕᑦ. ᐃᓄᐃᑦ ᑕᐃᑯᙵᐅᔪᑦ ᑭᒍᑎᓕᕆᕝᕕᖕᓄᑦ ᐋᖅᑭᒃᑕᐅᓯᒪᕙᒌᖅᑐᒥᒃ ᐃᓂᒃᓴᓕᐅᖅᑕᐅᓯᒪᙱᓪᓗᑎᒃ ᑕᑯᔭᐅᖃᑦᑕᔾᔮᙱᑦᑐᑦ.
ᐊᐱᕆᕙᑦᑎᒋᑦ ᑕᐃᑯᙵᐅᖃᑦᑕᖁᓪᓗᑎᑦ ᐱᕕᒃᓴᕐᓂᒃ ᓈᒻᒪᖅᑯᑦᑎᓗᑎᑦ, ᑭᖑᕙᖅᑐᓂᒃ ᑕᐃᑯᙵᖅᑑᒐᓗᐊᓂᒃ ᑲᒪᔪᓐᓇᙱᑐᐃᓐᓇᕆᐊᖃᕋᑦᑕ.
ᑕᐃᒃᑯᓄᖓ ᐃᖃᓗᖕᒥᐅᑕᐅᙱᑦᑐᓄᑦ, ᑲᖏᖅᖠᓂᕐᒥᐅᑕᐅᙱᑦᑐᓄᑦ ᐃᖃᓗᒃᑑᑦᑎᐊᒥᐅᑕᐅᙱᑦᑐᓄᓪᓘᓐᓃᑦ ᑭᒍᓯᕆᓪᓚᕆᒃᑐᓄᑦ ᐳᕕᓕᖅᓯᒪᔪᓄᓪᓘᓐᓃᑦ, ᓄᓇᔅᓯᓐᓂ ᐋᓐᓂᐊᕕᓕᐊᕐᕕᓯ ᐅᖄᓚᕝᕕᒋᓗᒍ.
ᐅᐸᒃᑕᐅᑦᑕᐃᓕᒪᓂᕐᒧᑦ ᐃᓃᑦ
ᑕᐃᒃᑯᐊ ᐅᐸᒃᑕᐅᑦᑎᐃᓕᒪᔪᑦ ᐊᑐᕈᓐᓇᖅᐳᑦ, ᑕᓚᕖᓴᓂᒃ ᑕᐅᑐᒍᓐᓇᕐᓂᕐᒥᒃ, ᐃᑭᐊᖅᑭᕕᖕᒥᒃ, ᐱᖓᓱᐃᖅᓱᕐᓗᑎᒃ ᐅᓪᓗᒥ ᓂᕆᑎᑕᐅᕙᒡᓗᑎᒃ, ᓴᓗᒪᔪᓂᒃ ᐊᓪᓕᓂᖅᑖᖅᑎᑕᐅᕙᒡᓗᑎᒃ ᓴᓗᒪᖅᓴᐅᑎᑖᖅᑎᑎᑕᐅᕙᒡᓗᑎᒡᓗ. ᓴᓂᕐᓗᑯᖏᑦ ᖃᐅᑕᒫᑦ ᐱᔭᐅᕙᒃᐳᑦ. ᑕᒪᒃᑯᐊ ᐊᑭᓕᕆᐊᖃᕐᓂᖏᑦ ᑲᒪᒋᔭᐅᕗᑦ ᓄᓇᕗᑦ ᒐᕙᒪᒃᑯᖏᓐᓂᑦ.
ᓄᓇᕗᑦ ᒐᕙᒪᒃᑯᖏᑦ ᐊᑭᓖᓂᐊᖅᐳᑦ ᖁᐃᖏᓕᓴᕐᓄᑦ, ᓄᑕᕋᓛᑦ ᐊᒫᒪᒃᐸᒃᑕᖏᓐᓄᑦ ᐊᕐᓇᖅᓯᐅᑎᓄᓪᓗ. ᑕᐃᑲᓃᑎᑕᐅᔪᑦ ᑲᒪᒋᔭᒃᓴᖃᖅᐳᑦ ᑎᑭᓴᐃᓂᕐᒥᒃ ᑕᒪᒃᑯᓂᖓ ᐱᖁᑎᓂᒃ ᐱᕝᕕᐅᔪᓐᓇᖅᑐᓂᑦ ᑐᓂᓯᔭᖅᑐᖃᑦᑕᕈᓐᓇᕐᓗᑎᒃ, ᑭᓯᐊᓂ ᑖᒃᑯᓄᖓ ᐱᖁᑎᓄᑦ ᐊᑭᓕᒐᒃᓴᖅᑖᖅᑎᑕᐅᔾᔮᙱᑦᑐᑦ.
ᑕᐃᓐᓇ ᑐᙵᓱᒃᑎᑦᑎᓂᕐᒧᑦ ᑲᑎᖅᓱᖅᑕᐅᓯᒪᔪᖅ ᐊᓯᔾᔨᕆᐊᖅᑕᐅᓯᒪᓕᖅᐳᖅ ᐃᓚᖃᖅᑎᑕᐅᓂᐊᓕᖅᖢᓂ ᑐᓴᖅᑕᐅᔪᒃᓴᓂᒃ ᓂᕆᔭᒃᓴᓂᒃ ᑎᑭᓴᐃᕙᖕᓂᕐᒧᑦ ᐊᐃᒃᖠᕈᓐᓇᖅᐸᖕᓂᕐᒧᓪᓗ. ᑕᒪᕐᒥᒃ ᑖᒃᑯᐊᒃ ᑐᔪᕐᒥᕕᖕᒧᙵᐅᔭᐅᖃᑦᑕᕈᓐᓇᖅᐳᒃ. ᑕᒪᒃᑯᐊ ᐊᒡᔭᖅᓯᕕᐅᓃᑦ ᐊᒃᑐᐊᓂᓖᓪᓗ ᐊᑭᖏᑦ ᐊᑭᓕᖅᑕᐅᖃᑦᑕᔾᔮᙱᓚᑦ ᓄᓇᕗᑦ ᒐᕙᒪᑯᖏᓐᓂᑦ.
|
ᑲᑎᖦᖢᒋᑦ (ᑕᒪᕐᒥᑦᑎᐊᖅ ᐅᐸᒃᑕᐅᑦᑕᐃᓕᒪᓂᕐᒧᑦ ᐃᓃᑦ) |
|
|
ᐊᐅᓪᓚᖅᓯᒪᔫᑉ ᖃᓄᕆᑦᑑᓂᖓ |
ᑐᔪᕐᒥᑎᑕᐅᔪᑦ ᐅᐸᒃᑕᐅᑦᑕᐃᓕᒪᔪᓂ ᐄᐳᕈ 1-ᒥᑦ |
|
ᐋᓐᓂᐊᖅᑐᓕᕆᓂᕐᒧᑦ |
199 |
| ᐃᓄᓕᒫᑦ | 86 |
| ᐃᓕᓐᓂᐊᖅᑏᑦ | 60 |
| ᑲᑎᖦᖢᒋᑦ | 345 |
ᐅᓄᕐᓂᖏᑦ
ᑲᑎᖦᖢᒋᑦ ᖃᔅᓯᐅᓂᕆᔭᖏᑦ ᐃᓄᐃᑦ ᐅᐸᒃᑕᐅᑦᑕᐃᓕᒪᔪᒦᑦᑐᑦ ᒫᑦᓯ 31-ᖑᓚᐅᕐᓂᖓᓂᑦ 315−ᖑᕗᑦ – 178−ᖑᓪᓗᑎᒃ ᐋᓐᓂᐊᕕᓕᐊᖅᓯᒪᔪᑦ, 78−ᖑᓪᓗᑎᒃ ᓄᓇᓖᑦ ᐊᐅᓪᓚᖅᓯᒪᔪᑦ 59−ᖑᓪᓗᑎᒡᓗ ᐃᓕᓐᓂᐊᖅᑏᑦ.
ᐄᐳᕈ 2−ᖑᓚᐅᕐᓂᖓᓂᑦ (ᐅᓪᓛᒃᑯᑦ) 360−ᓂᒃ ᐊᐅᓪᓚᕈᒪᓂᕐᒧᑦ ᐱᔪᒪᔪᖃᖅᓯᒪᕗᖅ, 286−ᖑᓂᖏᓪᓗ ᐱᕕᒡᔪᐊᖑᓪᓗᑎᒃ ᐃᖅᑲᓇᐃᔭᖅᑎᓂᒃ ᐱᔪᒪᔾᔪᑕᐅᓪᓗᑎᒃ.
| ᐱᔪᒪᔪᖃᖅᐸᖕᓂᖓᓄᑦ ᖃᓄᐃᓕᖓᓂᖓ | # | % |
| ᐊᖏᖅᑕᐅᓯᒪᔪᑦ (ᑕᒪᓐᓇ ᐃᓚᖃᖅᐳᖅ ᐱᒻᒪᕆᐊᓗᖕᓂᑦ ᐱᒻᒪᕆᐊᓘᙱᑦᑐᓂᒡᓗ) | 247 | 68.6% |
| ᐊᖏᕐᑕᐅᙱᑦᑐᖅ | 34 | 9.4% |
| ᐅᑕᖅᑭᔪᑦ | 79 | 21.0% |
| ᑲᑎᖦᖢᒋᑦ | 360 | 100% |
ᑲᔪᓰᓐᓇᖅᑐᑦ ᐱᔨᑦᑎᕋᐅᑕᐅᔪᑦ:
ᐋᓐᓂᐊᖃᕐᓇᙱᑦᑐᓕᔨᓄᑦ ᐱᔨᑦᑎᕋᕐᓂᕆᔭᐅᕙᒃᑐᓄᑦ ᐃᑲᔪᖅᑕᐅᓂᐅᖃᑦᑕᖅᑐᑦ ᓱᓕ ᐊᑐᐃᓐᓇᐅᔪᑦ ᑕᒪᐃᓐᓄᑦ ᓄᓇᓕᖕᓂ 7-ᓄᑦ ᐅᓪᓗᓄᑦ ᐱᓇᓱᐊᕈᓯᕐᒥ. ᑐᐊᕕᕐᓇᙱᑦᑐᓕᒫᑦ ᑲᒪᒋᔭᕆᐊᓖᑦ ᐱᓕᕆᐊᖑᖃᑦᑕᕐᓂᐊᖅᑐᑦ ᖃᐅᑕᒫᑦ ᑐᐊᕕᕐᓇᓂᖏᑦ ᒪᓕᓪᓗᒋᑦ. ᑐᐊᕕᕐᓇᖅᑐᓕᕆᔨᓄᑦ ᐋᓐᓂᐊᕕᖕᒥᑦ ᐱᔨᑎᕋᐅᑎᖏᑦ ᓱᓕ ᐊᑐᐃᓐᓇᖏᓐᓇᕐᓂᐊᖅᑐᑦ 24−ᓄᑦ ᐃᑲᕐᕋᓄᑦ, ᐱᓇᓱᐊᕈᓯᓕᒫᑦᑎᐊᖅ. ᐃᓗᐊᖅᓴᖅᑕᐅᔭᕆᐊᖃᖅᑐᓕᒫᑦ ᐅᖄᓚᖃᑦᑕᖁᔭᐅᕗᑦ ᓴᖅᑭᓚᐅᙱᓐᓂᕐᒥᓂ ᐋᓐᓂᐊᕐᕕᖕᒧᑦ.
- ᐃᖃᓗᖕᓂ, ᐅᖁᒪᐃᓐᓂᕐᓂᐊᕐᕕᒃ, ᑐᐊᕕᕐᓇᖅᑐᓕᕆᕝᕕᒃ ᐃᒡᓗᕈᓯᖅ ᐅᓂᒃᓯᒪᕝᕕᐅᕙᒃᑐᕐᓗ ᒪᑐᐃᖓᐃᓐᓇᕐᓂᐊᖅᑐᑦ.
- ᖃᓄᐃᙱᑦᑎᐊᖅᑐᓄᑦ ᓄᑕᕋᓛᕐᓄᑦ ᐱᓕᕆᐊᖑᕙᒃᑐᑦ, ᓯᖓᐃᔪᓄᑦ ᑕᑯᔭᐅᕙᒃᑐᑦ ᑲᐱᔭᐅᕙᒃᑐᓪᓗ ᑲᔪᓰᓐᓇᖅᐳᑦ ᓄᓇᕘᓕᒫᒥ.
- ᓘᒃᑖᑦ ᑲᔪᓰᓐᓇᕐᓂᐊᖅᑐᑦ ᓄᓇᓕᖕᓄᑦ ᐳᓚᕋᖃᑦᑕᕐᓂᖏᑦ. ᑕᒪᓐᓇ ᐊᔪᕐᓇᕐᓂᖅᐸᑦ, ᑕᑯᔭᐅᖃᑦᑕᕐᓂᐊᖅᑐᑦ ᑕᓚᕖᓴᒃᑯᑦ ᐃᓗᐊᖅᓴᖅᑕᐅᓗᑎᒃ ᐅᖄᓚᐅᑎᒃᑯᓪᓘᓐᓃᑦ.
ᐋᖅᑭᒋᐊᖅᑕᐅᓯᒪᓕᖅᑐᑦ ᐱᔨᑦᑎᕋᕈᑕᐅᕙᒃᑐᑦ:
- ᐃᓂᒃᓴᓕᐅᖅᑐᑦ ᐋᓐᓂᐊᕕᖕᒧᑦ ᑐᐊᕕᕐᓇᕐᓂᕆᔭᖏᑦ ᒪᓕᒃᑕᐅᖃᑦᑕᕐᓂᐊᖅᐳᑦ; ᑕᐃᒪᐃᒻᒪᑦ ᐅᖃᓘᑎᒃᑯᑦ ᐃᓂᒃᓴᓕᐅᖃᑦᑕᕐᓂᐊᖅᐳᑦ ᐅᕝᕙᓘᓐᓃᑦ ᐅᐸᒡᓗᑎᒃ.
- ᐋᓐᓂᐊᕕᓕᐊᖅᑐᓄᑦ ᐊᐅᓪᓚᖃᑦᑕᖅᑐᑦ ᐅᓄᕈᓐᓃᕆᐊᖅᑕᐅᔪᑦ ᑭᓯᐊᓂ ᑐᐊᕕᕐᓇᓐᑐᓄᑦ ᐋᓐᓂᐊᕕᓕᐊᕆᐊᓕᖕᓄᑐᐊᖅ ᐊᐅᓚᖅᑎᑕᐅᖃᑦᑕᕐᓂᐊᖅᑐᑦ. ᑲᒪᒋᔭᐅᕙᒃᑐᑦ ᐅᖃᐅᔾᔪᖅᑕᐅᓂᐊᖅᐳᑦ ᐊᓯᔾᔨᖅᑕᐅᔪᓂᑦ ᐅᖃᖃᑎᒌᖃᑕᐅᓗᑎᒡᓗ ᑐᓴᕆᐊᓕᖏᓐᓂᑦ.
- ᐃᖃᓗᖕᓂ, ᐋᓂᐊᕐᕕᓕᐊᖃᑦᑕᖅᑐᓄᑦ ᐊᒻᒪ ᑎᒥᒃᑯᑦ ᐃᖃᐃᓕᓴᕆᐊᓖᑦ ᑕᑯᔭᐅᖃᑦᑕᖅᑐᑦ ᑐᐊᕕᕐᓇᕐᓂᖏᑦ ᒪᓕᓪᓗᒋᑦ ᑕᑯᔭᐅᖃᑦᑕᖅᑐᑦ ᐊᒻᒪ ᑕᑯᔭᒃᓴᓕᐊᖑᓯᒪᔪᓂ ᓱᓕ ᑕᑯᖃᑦᑕᖅᑐᑦ. ᐊᐅᖏᖅᑕᐅᓯᒪᔪᓂᑦ ᖃᐅᔨᓴᕐᕕᖓ ᐊᒻᒪ ᑕᕐᕋᖅᑐᖅᑕᐅᕕᖓ ᕿᑭᖅᑕᓂ ᐋᓐᓂᐊᕕᖕᒥ ᐃᓚᐃᓐᓇᖏᓐᓂᑦ ᑲᒪᖃᑦᑕᕐᓂᐊᖅᑐᑦ. ᑕᑯᔭᐅᕝᕕᒃᓴᓕᓕᒫᑦ ᐊᒡᒋᖅᐸᓪᓕᐊᔪᑦ ᐃᓂᒃᓴᓕᐅᖅᑕᐅᓯᒪᔪᑦ ᑐᐊᕕᕐᓇᓂᖏᑦᑎᒍᑦ ᒪᓕᓪᓗᒋᑦ ᐋᖅᑭᒃᒋᐊᖅᑕᐅᒃᑲᓐᓂᖅᐸᓪᓕᐊᕗᑦ.
- ᐃᓱᒪᓕᕆᔨ ᐅᐃᕆᓯᒪᔪᓕᕆᔨᓗ ᓅᓯᒪᓕᖅᐳᑦ ᐅᖄᓚᐅᑎᒃᑯᑦ ᖃᐅᔨᒋᐊᕐᕕᐅᔪᓐᓇᖅᖢᑎᒃ ᐃᑲᔪᖅᑐᐃᓂᕐᒧᓪᓗ ᐃᓚᖏᓐᓄᑦ ᑲᒪᒋᔭᐅᔪᓄᑦ. ᑕᑯᔭᔅᓴᓕᐊᖑᓯᒪᔪᑦ ᐃᔭᒐᖏᓐᓂᑦ ᐊᐃᔅᓯᕆᐊᓖᑦ ᐊᒻᒪ ᐱᓕᕆᖃᖅᑕᕐᓂᕆᕙᑦᑕᖏᑦ ᓱᓕ ᐊᓯᔾᔨᖏᑦᑐᑦ. ᑐᐅᕕᕐᓇᖅᑐᒦᓪᓚᕆᒃᑯᕕᑦ, ᐋᓐᓂᐊᕐᕕᖕᒧᐊᕐᓗᑎᑦ. ᐊᖏᕐᕋᕆᔭᐅᔪᓄᑦ ᐅᐸᑦᑕᐅᖃᑦᑕᖅᑐᑦ ᐄᔭᒐᖏᑕ ᒥᔅᓵᓄᑦ ᐊᑕᐅᓯᐅᓈᖅᑎᕐᓗᒋᑦ ᐱᓕᕆᐊᖃᑦᑕᕐᓂᐊᖅᑐᑦ.
ᒪᑐᔭᐅᔪᖅ/ᓄᖅᑲᖅᑎᑕᐅᔪᖅ/ᓄᖅᑲᖓᑎᑕᓚᐅᑲᒃᑐᖅ ᐱᔨᑦᑎᕋᐅᑏᑦ:
- ᐱᑐᐃᓐᓇᐅᙱᑦᑐᔨᕆᕝᕖᑦ ᐃᓗᐊᖅᓴᖅᑕᐅᓃᑦ ᓄᖅᑲᖅᑎᑕᐅᓯᒪᓕᖅᐳᑦ. ᐱᓕᕆᔪᖃᖅᐸᓪᓕᐊᕗᖅ ᑐᑭᓯᓇᓱᒃᖢᑎᒃ ᓇᓕᐊᒃ ᐃᓗᐊᖅᓴᖅᑕᐅᔭᕆᐊᓖᑦ ᑲᒪᒋᔭᐅᔪᓐᓇᕐᒪᖔᑕ ᐅᖄᓚᐅᑎᒃᑯᑦ/ᖃᕆᓴᐅᔭᒃᑯᑦ ᑲᒪᒋᔭᐅᓗᑎᒃ.
- ᐊᐅᓪᓚᕆᐊᓖᑦ ᐱᔭᕆᐊᖃᓪᓚᕆᖏᑦᑐᑦ ᐃᓱᒪᓕᕆᔨᒃᑯᑎᒍᑦ ᐱᓕᕆᕝᕕᐅᕙᒃᑐᓄᑦ ᐃᓚᒌᓐᓄᓪᓗ ᓄᖅᑲᖅᑎᑕᐅᕗᑦ. ᐊᐅᓪᓚᕆᐊᖃᖅᑐᓕᒫᑦ ᖃᑕᙳᑎᒥᓂᒃ ᐋᓐᓂᐊᕐᕕᖕᒦᑦᑐᒥᒃ ᑕᑯᔭᖅᑐᖅᐸᒃᑐᑦ ᓄᖅᑲᖅᑎᑕᐅᔪᑦ.
- ᐳᓛᕆᐊᖅᑐᖃᖃᑦᑕᕈᓐᓇᔾᔮᙱᑦᑐᖅ ᐊᕗᖓᑲᓪᓚ ᑲᒪᒋᔭᖃᖅᐸᖕᓂᕐᒧᑦ ᐃᓂᒋᔭᐅᔪᐅᓂ ᓄᓇᕗᒻᒥ − ᑎᒥᒥᒍᑦ ᐃᓕᖅᑯᓯᖅᓱᙱᑦᑐᓄᑦ ᐃᓂᒋᔭᐅᔪᓂ ᐃᓐᓇᐃᓪᓗ ᐊᖏᕐᕋᕆᔭᖏᓐᓂ.
ᐊᕙᑎᓕᕆᔨᒃᑯᑦ ᐱᔨᑦᑎᕋᕐᓂᕆᔭᖏᑦ
ᓄᑖᑦ (ᑮᓇᐅᔭᑎᒍᑦ) ᐊᕐᕌᒍᒋᔭᐅᔪᒥ ᐊᖏᖃᑎᒌᒍᑕᐅᓯᒪᔪᑦ ᐋᖅᑭᒃᓱᖅᑕᐅᓂᐊᖅᐳᑦ ᑲᔪᓯᑎᑦᑎᔪᒪᓂᕐᒧᑦ ᐊᐅᓚᑦᑎᓂᕐᒧᑦ ᐊᔪᙱᓐᓂᕆᔭᑦᑎᓐᓂᒃ ᐊᒻᒪᓗ/ᐅᕝᕙᓗᓃᑦ ᑭᐅᓯᓂᐊᕐᓗᑎᒃ 2020-21−ᒧᑦ ᐱᓕᕆᐊᖃᕐᓂᐊᕐᓂᕐᒧᑦ ᐱᕙᒌᔭᖅᓯᒪᔪᓄᑦ ᓯᕗᓪᓕᖅᐸᐅᑦᑎᔭᐅᓯᒪᔪᓄᑦ.
ᐊᕙᑎᓕᕆᓂᕐᒧᑦ ᓴᐳᔾᔨᓯᒪᓂᕐᒧᑦ ᐱᓕᕆᕝᕕᒃ ᐱᓕᕆᐊᖃᖅᐳᖅ ᒐᕙᒪᑐᖃᒃᑯᓐᓂᒃ, ᐊᕕᒃᓯᒪᓂᓂᕐᓂ ᒐᕙᒪᒋᔭᐅᔪᓂᒃ, ᑲᓇᑕᒥᓗ ᐊᕕᒃᑐᖅᓯᒪᓂᕐᓂᒃ ᐱᓕᕆᖃᑎᒋᕙᒃᑕᒥᓂᒃ ᑎᑎᕋᖅᓯᒪᓕᖅᑎᑦᑎᔪᒪᓪᓗᑎᒃ ᒥᑭᒡᓕᒋᐊᖅᑐᓂᒃ ᐃᓯᐊᕿᑎᑕᐅᕙᒃᑐᓂᒃ ᑕᐃᒪᐃᔾᔪᑎᖃᖅᖢᑎᒃ ᖃᓂᒪᕐᔪᐊᕐᓇᖅᑐᒧᑦ ᑭᐅᓯᔪᒪᓂᖕᓂᒃ.
ᐱᓕᕆᕝᕕᒋᔭᐅᔪᒥ ᐃᖅᑲᓇᐃᔭᖅᑏᑦ ᐊᖏᕐᕋᒥᓂ ᐃᖅᑲᓇᐃᔭᖅᐳᑦ ᐱᓕᕆᐊᒃᓴᓂᖕᓗ ᑲᔪᓯᑎᑦᑎᕙᖕᓂᖅ ᑲᔪᓰᓐᓇᖅᐳᖅ.
ᓄᓇᕗᒻᒥᐅᑦ ᖃᓄᐃᙱᑦᑎᐊᕈᓐᓇᕐᓂᖏᑦ ᑕᒪᑦᑕᑦᑎᐊᖅ ᑲᒪᒋᔭᒃᓴᕆᕙᕗᑦ! ᐳᐃᒍᖅᑕᐃᓕᒋᑦ: ᐊᒡᒐᑎᑦ ᐅᐊᓴᖅᐊᒡᓗᒋᑦ ᖄᕆᔭᐅᔪᓪᓗ, ᐊᑐᖅᐸᒡᓗᑎᒃ ᑭᒃᑯᑐᐃᓐᓇᓂᒃ ᖃᓂᒃᓴᓗᐊᖅᑕᐃᓕᒪᓂᕐᒥᒃ, ᓈᓚᒃᐸᒡᓗᑎᓪᓗ ᐅᖃᐅᔾᔪᐃᔾᔪᑕᐅᔪᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᔨᓂᑦ, ᐊᖏᕐᕋᖅᓯᒪᕙᒡᓗᑎᒡᓗ ᖃᓂᒪᔭᕌᖓᕕᑦ.