ᑮᓇᐅᔭᓕᐅᕈᑕᐅᓪᓗᐊᑕᕋᓱᒃᑐᑦ ᐃᑲᔪᖅᑐᐃᖁᓪᓗᒋᑦ ᓄᓇᕗᒻᒥ ᐅᐃᕖᑎᑐᑦ ᐃᓕᓐᓂᐊᕐᕕᑐᐊᑦᑎᐊᖓ ᐊᖏᒡᓕᒋᐊᖅᑕᐅᖁᓪᓗᒍ
ᑮᓇᐅᔭᓕᐅᕈᑕᐅᓪᓗᐊᑕᕋᓱᒃᑐᑦ ᐃᑲᔪᖅᑐᐃᖁᓪᓗᒋᑦ ᓄᓇᕗᒻᒥ ᐅᐃᕖᑎᑐᑦ ᐃᓕᓐᓂᐊᕐᕕᑐᐊᑦᑎᐊᖓ ᐊᖏᒡᓕᒋᐊᖅᑕᐅᖁᓪᓗᒍ
ᐃᖃᓗᐃᑦ − ᓅᕕᐱᕆ 9, 2020 - ᖃᕆᓴᐅᔭᒃᑯᑦ ᐱᕙᓪᓕᐊᔪᓕᕆᔨᓂᑦ ᑲᑎᒪᖃᑎᖃᖅᖢᑎᒃ ᐅᑯᓂᖓ ᑲᑐᔾᔨᖃᑎᖃᖅᖢᑎᒃ ᒪᓕᒐᓕᐅᖅᑎ ᑕᐃᕕᑦ ᔪᐊᓇᓯ, ᓄᓇᕗᒻᒥ ᒥᓂᔅᑕ ᐃᓕᓐᓂᐊᖅᑐᓕᕆᓂᕐᒧᑦ, ᒪᓕᒐᓕᐅᖅᑎ ᒥᓚᓂ ᔮᓕ, ᒥᓂᔅᑕ ᐱᕙᓪᓕᐊᔪᓕᕆᓂᕐᒧᑦ ᐃᖏᕐᕋᔪᓕᕆᓂᕐᒧᓪᓗ ᐅᖃᐅᓯᓕᕆᓂᕐᒧᓪᓗ, ᑐᓴᖅᑎᑦᑎᖅᑲᐅᕗᑦ ᑲᓇᑕᐅᑉ ᒐᕙᒪᒃᑯᖏᑦ $10,769,000-ᓂᒃ ᑮᓇᐅᔭᖅᑖᖅᑎᑦᑎᓂᐊᕐᒪᑕ ᐅᐃᕖᑦ ᐃᓕᓐᓂᐊᕐᕕᖓᓂ ᐊᒻᒪ ᓇᓄᖅ ᐅᐃᕖᓄᑦ ᐸᐃᕆᕝᕕᖓᓂ ᐊᖏᒡᓕᒋᐊᖅᑕᐅᔾᔪᑎᒃᓴᖏᓐᓄᑦ ᐱᖁᑎᖏᓪᓗ ᓄᑖᙳᕆᐊᖅᑕᐅᓗᑎᒃ. ᓄᓇᕗᑦ ᒐᕙᒪᒃᑯᑦ ᑮᓇᐅᔭᖃᖅᑎᑦᑎᔪᒪᕗᑦ $9,001.000-ᓂᑦ ᑖᔅᓱᒧᖓ ᐱᒻᒪᕆᐊᓗᖕᒧᑦ ᐱᓕᕆᐊᒃᓴᒧᑦ, ᐃᓚᔭᐅᔭᕆᐊᖃᕋᔭᕐᒪᑦ ᐃᖃᐃᓕᓴᕐᕕᖕᒥ ᑎᓴᒪᓂᒡᓗ ᐃᓕᓐᓂᐊᕐᕕᐊᕈᓯᕐᓂ, ᐱᖁᑎᓂᒃ ᓂᐅᕕᕆᐊᖃᖅᖢᑎᒃ ᐊᒻᒪ ᓄᑕᖅᑲᓄᑦ ᐸᐃᕆᕝᕕᒃ ᐊᖏᒡᓕᒋᐊᖅᑕᐅᓗᓂ. ᐊᖏᒡᓕᒋᐊᖅᑕᐅᕌᓂᒃᐸᑦ ᐱᖁᑎᖃᑦᑎᐊᓕᕐᓗᓂᓗ, ᐅᐃᕖᑦ ᐃᓕᓐᓂᐊᕐᕕᖓ ᐃᓂᖃᖅᑎᑦᑎᔪᓐᓇᖅᓯᓂᐊᖅᐳᖅ ᑕᒪᐃᓐᓂᒃ ᐊᕕᒃᑐᖅᓯᒪᔪᓂ ᐅᐃᕖᑎᑐᑦ ᐅᖃᐅᓯᓕᖕᓂᑦ ᐃᓕᓐᓂᐊᖅᑎᓂᑦ ᐊᑕᐅᓯᕐᒦᓪᓗᑎᒃ. ᒫᓐᓇᓕ, ᐃᓕᓐᓂᐊᖅᑏᑦ ᓅᑎᑕᐅᔭᕆᐊᖃᖃᑦᑕᖅᐳᑦ ᖃᓪᓗᓈᑎᑐᑦ−ᐅᖃᐅᓯᓕᖕᓄᑦ ᐊᖓᔪᒃᖡᑦ ᐃᓕᓐᓂᐊᕐᕕᖓᓄᑦ ᖁᑦᑎᖕᓂᓕᖕᒥ 8-ᒥ ᐊᓂᒍᐃᔪᑦ.
ᐃᓄᒃᑐᑦ, ᖃᓪᓗᓈᑎᑐᑦ, ᐊᒻᒪ ᐅᐃᕖᑎᑐᑦ ᐅᖃᐅᓰᑦ ᐃᓕᓴᕆᔭᐅᓯᒪᕗᑦ ᓄᓇᕗᒻᒥ. ᓄᓇᕗᒻᒥ ᐅᐃᕖᑎᑐᑦ ᐅᖃᐅᓯᓖᑦ ᐃᓄᒋᐊᒃᓯᕙᓪᓕᐊᓪᓗᑎᒃ, ᐅᓄᖅᓯᒋᐊᕐᓂᖏᓐᓂᒃ ᐅᔾᔨᕐᓇᓗᐊᖅᐳᖅ ᐃᓕᓐᓂᐊᕈᑎᑦᑎᓐᓂ. ᑕᐃᒪᐃᒻᒪᑦ ᒐᕙᒪᑐᖃᒃᑯᑦ ᐃᑲᔪᖅᑐᐃᔭᕆᐊᖃᓪᓚᕆᒃᐳᑦ ᑖᔅᓱᒥᖓ ᐃᓕᓴᕆᔭᐅᓯᒪᔪᒥᑦ−ᐅᖃᐅᓯᕐᒥᑦ ᐅᓄᙱᓛᓂᑦ ᓄᓇᓕᖕᓂ.
ᐃᓄᒃᑐᑦ ᐊᓯᐅᔨᔭᐅᑦᑕᐃᓕᒪᑎᓪᓗᒍ ᖄᒃᑲᓐᓂᐊᒍᑦᑕᐅᖅ, ᓄᓇᕗᑦ ᒐᕙᒪᒃᑯᑦ ᓄᓇᕘᓕᒫᒥ ᑕᒪᐃᓐᓂᒃ ᒪᕐᕉᖕᓂᒃ ᐅᖃᐅᓯᓕᖕᓂᑦ ᑲᑐᔾᔨᖃᑎᒌᓕᖁᔨᕗᑦ ᐃᓄᖏᑦ ᐃᓄᒃᑎᑐᑐᐃᓐᓇᖅ ᐅᖃᓪᓚᒍᓐᓇᑐᐃᓐᓇᙱᓪᓗᑎᒃ, ᑭᓯᐊᓂ ᖃᓪᓗᓈᑎᑐᑦ ᐅᐃᕖᑎᑐᓪᓗ ᐅᖃᕈᓐᓇᑦᑎᐊᕐᒥᓗᑎᒃ.
"ᑲᓇᑕᒥᐅᓕᒫᑦ ᐃᓕᓐᓂᐊᖅᑎᑕᐅᑦᑎᐊᕆᐊᖃᖅᐳᑦ ᐅᖃᐅᓯᕐᙵᐅᑎᒥᓂᒃ ᐅᖃᐅᓯᖓᑕᓗ ᐱᖃᑖᓂ, ᓇᓕᐊᖕᓂ ᓄᓇᖃᕋᓗᐊᖅᐸᑕ. ᓄᓇᕗᒻᒥ ᐅᐃᕖᑎᑐᑦ ᐅᖃᐅᓯᓖᑦ ᐃᓕᓐᓂᐊᕐᕕᖏᑦ ᓴᙱᒃᑎᒋᐊᖅᑎᓪᓗᒋᑦ ᐱᓕᕆᖃᑎᒋᔭᖏᓪᓗ, ᒐᕙᒪᕗᑦ ᐃᑲᔪᕐᓂᐊᖅᐳᑦ ᐅᐃᕖᑎᑐᑦ ᐅᖃᐅᓯᓖᑦ ᓴᖅᑭᑉᐸᓪᓕᐊᖁᓪᓗᒋᑦ ᑲᓇᑕᒥ ᐅᑭᐅᖅᑕᖅᑐᒦᓛᑦ ᐊᕕᒃᑐᖅᓯᒪᔪᓂ."
—ᒪᓕᒐᓕᐅᖅᑎ ᒥᓚᓂ ᔮᓕ, ᒥᓂᔅᑕ ᐱᕙᓪᓕᐊᔪᓕᕆᓂᕐᒧᑦ ᐃᖏᕐᕋᔪᓕᕆᓂᕐᒧᓪᓗ ᐅᖃᐅᓯᓕᕆᓂᕐᒧᓪᓗ
"ᓄᓇᕗᒻᒥ ᒪᒃᑯᒃᑐᓂᑦ ᐃᓄᖃᖅᐳᖅ ᐃᓄᒋᐊᒃᓯᕙᓪᓕᐊᓪᓗᑎᒡᓗ ᐅᖃᐅᓯᕐᒥᓂ ᐊᑐᑦᑎᐊᖅᑐᑦ ᓴᖅᑭᑉᐸᓪᓕᐊᓪᓗᑎᒃ ᓄᓇᕗᒻᒥ. ᐊᓕᐊᓇᐃᑦᑎᐊᖃᑦᑕᖅᐳᖅ ᐃᓕᓐᓂᐊᕐᕖᑦ ᐊᒻᒪ ᐸᐃᕆᕝᕖᑦ ᐊᖏᒡᓕᒋᐊᖅᑕᐅᓕᕌᖓᑕ ᐱᐅᓯᒋᐊᖅᑕᐅᓪᓗᑎᒡᓗ ᓲᖃᐃᒻᒪ ᒪᒃᑯᒃᑐᑦ ᐊᑲᐅᓛᒥᒃ ᐃᓕᓐᓂᐊᕐᕕᖃᕆᐊᖃᕐᒪᑕ. ᐃᒡᓗᕐᔪᐊᑦ ᓄᑖᙳᕆᐊᖅᑕᐅᔪᑦ ᐱᐅᔪᒥᒃ ᐊᒃᑐᐃᓪᓚᕆᖕᓂᐊᖅᐳᑦ ᓄᓇᕗᒻᒥᐅᓄᑦ ᐅᓄᖅᑐᓄᑦ ᐅᖃᐅᓯᖃᖃᑎᒌᙱᑦᑐᓂᑦ ᐃᓕᖅᑯᓯᖃᖃᑎᒌᙱᑦᑐᓂᓪᓗ." −ᒪᓕᒐᓕᐅᖅᑎ ᑕᐃᕕᑦ ᔪᐊᓇᓯ, ᓄᓇᕗᒻᒥ ᒥᓂᔅᑕ ᐃᓕᓐᓂᐊᕐᓂᓕᕆᓂᕐᒧᑦ
ᑐᑭᓯᒋᐊᒃᑲᓐᓂᕈᒪᒍᕕᑦ, (ᑐᓴᒐᒃᓴᑐᐊᓂᒃ) ᐅᓇ ᖃᐅᔨᒋᐊᕐᕕᒋᓗᒍ:
ᑲᑕᕆ ᒨᕐᓃᕐ−ᑎᐊᔅᕈᑐᔅ
ᐱᕙᓪᓕᐊᔪᓄᑦ ᑎᑎᕋᖅᑎ
ᒥᓂᔅᑕ ᐱᕙᓪᓕᐊᔪᓕᕆᓂᕐᒧᑦ ᐃᖏᕐᕋᔪᓕᕆᓂᕐᒧᓪᓗ
ᐅᖃᐅᓯᓕᕆᓂᕐᒧᓪᓗ ᑎᑎᕋᕐᕕᖓ
613-295-3617
@email
ᑐᓴᒐᒃᓴᓕᕆᔨᑦ
ᑲᓇᑕᒥ ᐱᖅᑯᓯᓕᕆᔩᑦ
819-994-9101
1-866-569-6155
@email
ᑐᕋᐃ ᕉᑦᔅ
ᐊᐅᓚᑦᑎᔨᐅᑲᐃᓐᓇᖅᑐᖅ, ᑐᓴᐅᒪᔪᓕᕆᓂᕐᓄᑦ
ᐃᓕᓐᓂᐊᕐᓂᓕᕆᔨᒃᑯᑦ
ᓄᓇᕗᑦ ᒐᕙᒪᖓ
867-975-5680
@email