ᓄᕙᒡᔪᐊᕐᓇᖅ-19 ᓄᓇᕗᑦ ᒐᕙᒪᖓᓂ ᑐᓴᒐᒃᓴᑦ - ᓄᕕᐱᕆ 13, 2020
ᓄᕙᒡᔪᐊᕐᓇᖅ-19 ᓄᓇᕗᑦ ᒐᕙᒪᖓᓂ ᑐᓴᒐᒃᓴᑦ - ᓄᕕᐱᕆ 13, 2020
ᓯᕗᓕᖅᑎᐅᑉ ᑐᓴᒐᒃᓴᖏᑦ ᓄᑖᑦ
ᐅᓪᓛᒃᑯᑦ. ᖃᐅᔨᒪᑎᑕᕋᑖᕋᑦᑕ ᓄᕙᕐᔪᐊᕐᓇᖅ-19ᒧᑦ ᐋᓐᓂᐊᓕᖅᓯᒪᔪᖃᒃᑲᓐᓂᓕᕐᓂᖓᓂᑦ, ᐊᕐᕕᐊᕐᒥᑦ. ᑭᕙᓪᓕᕐᒥᐅᓕᒫᑦ ᒫᓐᓇ ᒪᑐᔭᐅᔪᑦ ᐊᔾᔨᖅᑐᕆᐊᒃᑲᓐᓂᕈᑕᐅᓗᓂ. ᑖᓐᓇ ᓱᑲᑦᑐᐊᓗᒻᒥᑦ ᖃᓄᐃᓐᓂᐅᔪᖅ ᐱᕙᓪᓕᐊᒻᒪᑦ, ᐅᑕᖅᑭᑦᑎᐊᖁᕙᔅᓯ ᐅᕙᑦᑎᓐᓂᒃ.
ᓄᓇᕗᑦ ᒫᓐᓇ ᓇᓗᓇᐃᖅᑕᐅᓯᒪᓪᓚᕆᒃᑐᒥᒃ ᐱᑕᖃᓕᕐᒪᑦ ᑎᓴᒪᓂᑦ ᓄᕙᒡᔪᐊᕐᓇᖅ-19−ᒥᒃ.
ᓗᑦᑖᖅ ᐹᑐᓴᓐ ᐅᖃᐅᓯᕆᐊᒃᑲᓐᓂᖅᑎᓐᓂᐊᖅᑕᕋ ᐊᒻᒪ ᑭᐅᔪᓐᓇᖁᓪᓗᒍᑦ ᐊᐱᖅᑯᑎᓂᑦ, ᑭᓯᐊᓂ ᑕᐃᒫᖑᕙᒻᒪᑦ, ᑲᒪᑦᑎᐊᕆᔅᓯ ᐊᒻᒪ ᐊᑐᕆᐊᖃᓪᓚᕆᑦᑐᓂᑦ ᒪᓕᓪᓗᓯ ᐋᓐᓂᐊᖅᑕᐃᓕᒪᑎᑦᑎᓂᕐᒧᑦ ᖃᓄᐃᓕᐅᕈᑕᐅᔪᓂᑦ.
ᖃᐅᔨᒪᓕᖅᑐᖓ ᑐᓴᙳᖅᑕᐅᓕᖅᑐᖓᐅᒐᓗᐊᖅ ᐅᖃᐅᓯᕇᓐᓇᕋᒃᑯ, ᐊᒡᒐᑎᑦ ᐅᐊᓴᐃᓐᓇᕐᓗᒋᑦ, ᖃᓂᒌᖃᑦᑕᐅᑎᑦᑕᐃᓕᒪᐃᓐᓇᕐᓗᓯ, ᐊᒻᒪ ᐅᒡᓚᖅᓯᒪᖃᑦᑕᖏᑦᑕᖏᓪᓗᓯ ᐊᒻᒪ ᑲᑎᙵᖃᑦᑕᕈᔅᓯ ᖃᑦᑏᓐᓇᐅᒋᐊᖏᓐᓇᕐᓗᓯ. ᑭᕙᓪᓕᕐᒥᑦ, ᖃᓂᒪᒍᕕᑦ ᐊᖏᕐᕋᖅᓯᒪᐃᓐᓇᕆᐊᖃᖅᑐᓯ ᐊᖏᕐᕋᓯᓐᓂᒃ.
ᐅᖄᓚᕕᒋᓗᒍ ᑖᓐᓇ ᓄᕙᕐᔪᐊᕐᓇᐅᑉ ᒥᒃᓵᓄᑦ ᐅᖄᓚᕝᕕᒃᓴᖅ 1-888-975-8601 ᐊᐃᑦᑐᖅᑕᐅᖃᑕᐅᓯᒪᓇᓱᒋᒍᕕᑦ. 10ᒥᑦ ᐅᓪᓛᒃᑯᑦ 6ᒧᑦ ᐅᓐᓄᒃᑯᑦ ᒪᑐᐃᖓᔪᑦ ᑲᓇᖕᓇᒥ
ᑲᒪᒋᑦᑎᐊᕆᔅᓯ ᐃᒻᒥᓂᒃ, ᓄᓇᕗᒻᒥᐅᑦ. ᐊᔾᔨᖅᑐᖅᑎᐊᖏᓐᓇᕐᓗᓯ ᐊᒻᒪ ᐋᓐᓂᐊᓕᖅᑕᐃᓕᒪᐃᓐᓇᑦᑎᐊᕐᓗᓯ ᐊᓯᓐᓂᓪᓗ ᐋᓐᓂᐊᖅᑎᑦᑎᑦᑕᐃᓕᒪᑦᑎᐊᕐᓗᓯ. ᓴᓂᑭᓗᐊᕐᒦᑦᑐᓄᑦ, ᑲᖏᖅᖠᓂᕐᒦᑦᑐᓄᑦ ᐊᕐᕕᐊᓂᓪᓗ, ᑭᕙᓪᓕᕐᒥᐅᓕᒫᓪᓗ ᐊᒻᒪ ᓄᓇᕗᒻᒥᐅᑦ, ᐃᒻᒥᓂᒃ ᑲᒪᒋᑦᑎᐊᕆᔅᓯ.
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᖓᔪᖅᑳᖓᑕ ᑐᓴᖅᑎᑦᑎᔾᔪᑎᖏᑦ ᓄᑖᑦ
ᐅᓪᓛᒃᑯᑦ. ᐅᓐᓅᓚᐅᖅᑐᖅ ᖃᐅᔨᒃᑲᖅᑕᐅᓚᐅᕋᑦᑕ ᐃᓐᓄᒻᒥᒃ ᐊᕐᕕᐊᕐᒥᐅᒥᑦ ᖃᐅᔨᓴᖅᑕᐅᔾᔪᑎᖏᑦ ᓇᓗᓇᐃᖅᑕᐅᒻᒪᑦ ᓄᕙᕐᔪᐊᕐᓇᖅ-19ᖃᕐᓂᖓᓂᒃ. ᑖᓐᓇ ᐃᓄᒃ ᐊᕐᕕᐊᒧᑦ ᐊᑎᓵᖅᑐᖅ ᒪᕐᕉᓐᓂᒃ ᐱᓇᓱᐊᕈᓰᓐᓂᒃ ᐃᓄᐊᒃᑯᕕᒻᒦᓚᐅᖅᑎᓪᓗᒍ ᐅᐃᓂᐸᐃᒻᒥ. ᐅᓪᓗᐃᑦ 7 ᓈᓯᒪᓕᖅᑎᓪᓗᒋᑦ ᐊᖏᕐᕋᒧᑦ ᑎᑭᓚᐅᖅᑎᓪᓗᒍ, ᐋᓐᓂᐊᓕᓚᐅᖅᑐᑦ ᓄᕙᕐᔪᐊᕐᓇᖅ-19ᒥᐅᖏᑦᑐᖅ, ᓇᒻᒥᓂᖅ ᑕᑯᔭᐅᑎᓚᐅᖅᑐᑦ ᐋᓐᓂᐊᕐᕕᒻᒧᑦ. ᐅᓪᓗᐃᑦ ᒪᕐᕉᒃ ᐱᖓᓱᓪᓗ ᐃᓗᐊᓂ ᑖᒃᑯᐊ ᐋᓐᓂᐊᓕᖅᐸᓪᓕᐊᖏᓐᓇᓕᓚᐅᖅᑐᑦ, ᐅᐃᓂᐸᐃᒻᒧᓪᓗ ᑐᐊᕕᕐᓇᖅᑐᒃᑯᑦ ᐊᐅᓪᓚᖅᑎᑕᐅᓪᓗᑎᑦ. ᑖᓐᓇ ᐃᓄᒃ ᖃᐅᔨᓴᖅᑕᐅᒻᒪᑦ ᓄᕙᕐᔪᐊᕐᓇᖅ-19ᒧᑦ ᖃᐅᔨᓴᖅᑕᐅᔾᔪᑎᖓ ᓇᓗᓇᐃᖅᑕᐅᓚᐅᖅᑐᖅ ᖃᕐᓂᖓᓂᒃ ᓄᕕᐱᕆ 12ᒥᑦ. ᑖᓐᓇ ᐃᓄᒃ ᐋᓐᓂᐊᕕᒻᒥᑦ ᐊᓂᓯᒪᓕᖅᑐᖅ ᐊᒻᒪ ᖃᓄᐃᙱᑦᑐᖅ. ᑭᓇᒃᑯᓐᓂᒃ ᑲᑎᓯᓯᒪᓚᐅᕐᒪᖔᖅ ᖃᐅᔨᓴᖅᑕᐅᕙᓪᓕᐊᓕᖅᑐᖅ ᖃᐅᔨᔭᐅᓂᐊᕐᒪᑕ ᑭᓇᒃᑰᓂᖏᓐᓂᑦ ᐊᒻᒪ ᑐᐊᕕᕐᓇᑐᖃᖅᑎᓪᓗᒍ ᐱᓕᕆᔩᑦ ᐃᓗᐊᖅᓴᐃᔩᑦ ᐊᑐᐃᓐᓇᐅᒪᔪᑦ ᐃᑲᔪᕆᐊᕆᐊᖃᖅᐸᑕ ᑕᐃᑯᙵᕐᓂᐊᕐᒪᑕ.
ᑖᔅᓱᒪ ᐃᓅᑉ ᖃᐅᔨᓴᖅᑕᐅᔾᔪᑎᒋᓯᒪᔭᖏᑦ ᓇᓗᓇᐃᖅᑕᐅᔪᑦ ᓄᕙᕐᔪᐊᕐᓇᖅ-19ᖃᕐᓂᖓᓂᒃ ᑲᖏᖅᖠᓂᕐᒥᑦ ᑕᐃᒫᑦᑕᐅᖅ ᐊᔾᔨᒐᓚᖓᓐᓂᒃ ᐊᑐᓚᐅᖅᑐᖅ. ᐅᐃᓂᐸᐃᒻᒦᑐᐃᓐᓇᐅᓚᐅᖅᑑᒃ, ᐃᓄᐊᒃᑯᕕᓐᓂᒃ ᑐᔪᕐᒥᕕᒻᒦᑦᑐᐃᓐᓇᐅᓚᐅᖅᑑᒃ ᐊᑐᐱᕆ ᓄᙳᖅᐸᓯᐊᓂᒃ, ᐊᒻᒪᓗ ᑖᒃᑯᐊ ᐋᓐᓂᐊᕈᑕᐅᖃᑦᑕᖅᑐᓂᑦ ᖃᐅᔨᓕᓚᐅᖅᑐᑦ ᐃᒻᒪᖄ ᐱᓇᓱᐊᕈᓯ ᓈᑎᓪᓗᒍ ᐊᖏᕐᕋᖅᓯᒪᓕᖅᑎᓪᓗᒋᒃ ᓄᓇᕗᒻᒧ. ᑖᓐᓇ ᐃᓄᒃ ᖃᓄᐃᙱᑦᑐᒻᖅ ᐊᒻᒪ ᐊᖏᕐᕋᖅᓯᒪᔪᖅ. ᑭᒃᑯᑦ ᑲᑎᔭᐅᓯᒪᓐᓂᕐᒪᖔᑕ ᖃᐅᔨᓴᖅᑕᐅᖏᓐᓇᖅᑐᑦ ᓱᓕ ᑭᓯᐊᓂ, ᐅᓪᓗᒥᒻᒧᑦ, ᐊᓯᖏᓐᓂᑦ ᐃᓄᓐᓂᑦ ᑲᖏᖅᖠᓂᕐᒥᐅᓂᑦ ᓱᓕ ᓇᓗᓇᐃᖅᑕᐅᔪᖃᓚᐅᙱᑦᑐᖅ ᓄᕙᕐᔪᐊᕐᓇᖅ-19ᒧᑦ ᐊᓐᓂᐊᓕᖅᓯᒪᔪᓂᑦ.
ᑖᒃᑯᐊ ᐊᐅᓪᓚᖃᑦᑕᕐᕕᐅᔪᓐᓇᖅᑐᑦ ᖃᓄᐃᓯᒪᓂᖏᑦ ᒫᓐᓇ ᐃᓱᒫᓗᓐᓇᖅᑐᑦ, ᓱᓕ ᒫᓐᓇᒧᑦ ᐅᖃᕈᓐᓇᖏᑦᑐᒍᑦ ᓱᑯᑦᑎᐊᓃᑦᑎᓪᓗᒋᑦ ᑖᒃᑯᐊ ᐊᐃᑦᑐᖅᑕᐅᓂᕐᒪᖔᑕ ᐃᓄᐃᑦ ᓄᕙᒡᔪᐊᕐᓇᖅ-19ᒧᑦ. ᑕᒪᓐᓇ ᐱᓪᓗᒍ ᐊᒻᒪᓗ ᐃᓱᒪᒋᓗᒋᑦ ᒪᕐᕉᓕᕐᒪᑎᒃ ᐋᓐᓂᐊᔫᒃ ᑭᕙᓪᓕᕐᒥᑦ, ᐋᖅᑭᔅᓯᒪᓕᖅᐳᖓ ᑖᒃᑯᐊ ᑭᕙᓪᓕᕐᒥᐅᑦ ᐋᓐᓂᐊᖅᑕᐃᓕᒪᑎᑦᑎᓂᕐᒧᑦ ᑭᒃᑯᑐᐃᓐᓇᕐᓂᒃ ᖃᓄᐃᓕᐅᕆᐊᒃᑲᓐᓂᕈᑎᒋᓗᒍ ᑭᕙᓪᓕᕐᒥᑦ ᑭᒡᓕᖃᖅᑎᑕᐅᒋᐊᒃᑲᓐᓂᕐᓂᐊᓕᖅᑐᑦ.
ᒪᓐᓇᑲᐃᑎᒋᑦ ᐱᒋᐊᕐᓗᒍ, ᑕᒪᕐᒥᑦᑎᐊᖅ ᑮᓇᐅᔭᓕᐅᕋᓱᒃᑏᑦ ᑮᖕᓇᐅᔭᓕᐅᕋᓱᒃᑎᐅᙱᑦᑐᓪᓗ ᓇᖕᒥᓂᕆᔭᐅᔪᑦ ᑭᕙᓪᓕᕐᒥᑦ ᒪᑐᔭᕆᐊᖃᖅᐳᑦ, ᑭᑭᑕᐅᓗᑎᒃ ᓂᕿᑖᕐᕖᑦ ᓂᐅᕕᕐᕖᑦ; ᐅᖅᓱᐊᓗᖕᒧᑦ ᓄᓇᓯᐅᑎᓄᓪᓗ ᐱᔨᑦᑎᕋᕐᕕᖃᕐᓂᕐᒧᑦ ᐃᓂᓄᑦ, ᑲᓇᑕᒥ ᑎᑎᖃᕐᓂᐊᕐᕕᒃ; ᑮᓇᐅᔭᓄᑦ ᐃᓂᒋᔭᐅᕙᒃᑐᑦ. ᓂᕆᔭᖅᑐᕐᕖᑦ ᒪᑐᐃᙶᖅᑐᑦ ᐊᓂᑦᑎᕝᕕᒋᓂᐊᕐᓗᒋᑦ ᒪᑐᐃᙶᕈᓐᓇᖅᐳᑦ ᓲᖑᔪᓂᒃ ᒪᓕᒐᖃᕐᓗᑎᒃ, ᐅᑯᐊ ᐃᓚᒋᔭᐅᓗᑎᒃ, ᑕᒪᕐᒥᑦᑎᐊᖅ ᓂᐅᕕᕆᐊᖅᓯᒪᔪᑦ 2 ᒦᑕᓂᒃ ᐅᖓᓯᒌᒃᑎᒋᖃᑦᑕᕆᐊᖃᖅᐳᑦ ᖃᖓᓕᒫᑦᑎᐊᒃᑯᑦ 10 −ᓗ ᐅᖓᑖᓃᑦᑐᑦ ᐃᓄᐃᑦ ᐱᔪᓐᓴᖅᑎᑕᐅᕗᑦ ᑐᑭᓕᕇᓕᕐᓂᕐᒥᒃ ᖃᖓᓕᒫᑦᑎᐊᒃᑯᒃ. ᐃᓄᓐᓄᑦ ᖃᓄᑐᐃᓐᓇᖅ ᐱᔨᑦᑎᕈᑎᖃᖃᑦᑕᖅᑐᑦ, ᓲᕐᓗ ᓄᔭᓕᕆᔩᑦ, ᖃᓱᓴᐃᔩᑦ, ᑖᒃᑯᐊ ᑕᒪᕐᒥᒃ ᒪᑐᔭᕆᐊᓖᑦ. ᒪᑐᐊᖅᓯᒪᔾᔪᑏᑦ ᐊᑐᕆᐊᖃᓕᖅᑐᑦ ᑭᓇᑐᐃᓐᓇᖅ ᐊᓂᓯᒪᑐᐊᕈᓂ ᐊᖏᕐᕋᒥᓂᒃ.
ᐊᒻᒪᓗᒃᑲᓐᓂᖅᑕᐅᖅ, ᑕᒪᕐᒥᑦᑎᐊᖅ ᐃᓕᓐᓂᐊᕐᕖᑦ, ᐃᓚᒋᔭᐅᓪᓗᓂ ᓄᓇᕗᒻᒥ ᓯᓚᑦᑐᖅᓴᕐᕕᒃ, ᒐᕙᒪᑐᖃᒃᑯᑦ, ᐊᕕᒃᓯᒪᓂᕐᒥᒃ ᒐᕙᒪᒃᑯᑦ, ᓄᓇᓕᖕᓂᓗ ᒐᕙᒪᐃᑦ ᑎᑎᖃᕐᕕᖏᑦ ᒪᑐᔭᕆᐊᖃᖅᐳᑦ ᑭᓯᐊᓂ ᑕᒪᒃᑯᓄᖓ ᐱᓕᕆᐊᖑᓪᓚᕆᒋᐊᓕᖕᓄᑦ ᐱᓕᕆᐊᒃᓴᓄᑦ. ᑕᒪᕐᒥᑦᑎᐊᖅ ᑲᑎᓐᓂᕆᔭᐅᔪᑦ ᐃᓱᓕᑦᑕᖅᑎᑕᐅᕗᑦ ᑕᓪᓕᒪᓄᑦ ᐃᓄᖕᓄᑦ ᑲᑎᑦᑐᖃᖃᑦᑕᔾᔮᙱᓚᕐᓗ ᐊᖏᕐᕋᕆᔭᐅᔪᓂ.
ᓴᓇᑦᑕᐃᓕᒥᑦ ᐱᒋᐊᕐᓗᒍ, ᑭᕙᓪᓕᕐᒥᑦ ᐊᐅᓪᓚᖃᑦᑕᕈᓐᓇᕐᓂᐊᓕᖅᑐᑦ ᑭᓯᐊᓂ ᑖᒃᑯᐊ ᑐᐊᕕᓇᖅᑐᒃᑯᑦ ᐋᓐᓂᐊᕕᓕᐊᖅᑐᓄᑦ, ᐱᑕᖃᕆᐊᖃᓪᓚᑦᑖᖅᑐᑦ ᐃᓯᕆᐊᓕᑦ ᐃᓗᐊᖅᓴᐃᔩᑦ ᐱᓕᕆᔭᖅᑐᖅᑐᑦ, ᑎᒻᒥᓲᑦ ᑐᐊᕕᕐᓇᖅᑐᓕᕆᔩᑦ, ᐊᒻᒪ ᐅᓯᒃᑲᖅᑕᐅᑏᑦ ᑭᓯᐊᓂ. ᑖᒃᑯᐊ ᐊᐅᓪᓚᖅᓯᒪᔪᑦ ᐊᖅᑯᓵᕆᐊᓖᑦ ᑖᒃᑯᑎᒎᓇ ᓱᓕ ᑲᔪᓯᔪᓐᓇᕐᓂᐊᖅᑐᑦ ᑭᕙᓪᓕᖅᑎᒍᑦ. ᑭᓇᑐᐃᓐᓇᖅ ᑭᕙᓪᓕᕐᒧᐊᖅᐸᑦ ᐃᑲᕐᕋᓄᑦ 24 ᐅᖓᑖᓂᑦ ᑕᐃᑲᓃᓪᓗᓂ, ᐊᐅᓪᓚᕆᐊᖃᕈᓐᓃᖅᑎᑕᐅᔪᓄᑦ ᐱᖃᑕᐅᑐᐃᓐᓇᕆᐊᓕᒃ. ᐊᖑᓇᓱᒃᑎᑦ ᓄᓇᓕᖕᓂᑦ ᐊᐅᓪᓚᕈᓐᓇᖃᑦᑕᖅᐳᑦ ᑭᓯᐊᓂᓗ ᓄᒃᑕᕆᐊᖃᙱᓚᑦ ᐊᓯᖏᓐᓄᑦ ᓄᓇᓕᖕᓄᑦ ᐃᓄᖃᖅᑐᒧᓪᓘᓐᓃᑦ.
ᑭᓇᑐᐃᓐᓇᖅ ᐊᐅᓪᓚᕆᐊᖃᓪᓚᕆᑉᐸᑦ ᑭᕙᓪᓕᕐᒧᑦ ᓴᓇᑦᑕᐃᓕᐅᒌᖅᓯᒪᓕᖅᑎᓪᓗᒍ, ᑖᒃᑯᓄᖓ ᑐᔅᓯᕋᐅᑎᓕᐅᕈᓐᓇᖅᑐᖅ @email ᐊᐅᓪᓚᕈᓐᓇᐅᑎᒥᑦ ᐱᑎᑕᐅᓂᐊᕐᒪᑕ ᑎᑎᖅᑲᒥᑦ.
ᐅᖃᐅᔾᔨᒋᐊᖅᐳᖓ ᐃᓇᑦᑎᓪᓗᖓ ᒪᓕᑦᑕᐅᔭᕆᐊᓖᑦ ᑕᒪᕐᒥᒃ ᒪᓕᑦᑕᐅᑦᑎᐊᖁᓪᓗᒋᑦ ᐋᓐᓂᐊᖅᑕᐃᓕᒪᑎᑦᑎᓂᕐᒧᑦ ᑭᒃᑯᑐᐃᓐᓇᕐᓂᑦ ᐋᖅᑭᑦᑕᐅᓯᒪᔪᑦ ᐊᑐᖅᑎᓪᓗᒋᑦ, ᑖᒃᑯᐊ ᐱᐅᓂᖅᐹᖑᒻᒪᑕ ᓄᖅᑲᖓᑎᑦᑎᓂᕐᒥᑦ ᐊᐃᑦᑐᕐᓗᐃᖃᑦᑕᐅᑎᑦᑕᐃᓕᒪᓂᕐᒧᑦ ᑖᔅᓱᒥᖓ ᐋᓐᓂᐊᓕᕐᓇᖅᑐᒥᑦ.
ᖁᔭᓐᓇᒦᒃ
ᐃᓚᒋᔭᐅᓪᓗᓂ ᓄᓇᕗᑦ ᒐᕙᒪᖓᑕ ᐱᓇᔪᒃᑕᖏᓐᓂ ᓴᐳᔾᔨᓯᒪᔪᒪᓪᓗᑎᒃ ᓄᓇᕗᒻᒥᐅᓂᒃ ᓄᕙᒡᔪᐊᕐᓇᖅ-19−ᒥᑦ, ᓄᓇᕗᑦ ᒐᕙᒪᖓᑕ ᐱᓕᕆᕝᕕᒋᑦ ᐅᑯᓂᖓ ᐊᑐᓕᖅᑎᑦᑎᓯᒪᕗᑦ:
ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ ᐱᓕᕆᕝᕕᖓ
ᑭᓯᐊᓂ ᑐᐊᕕᕐᓇᖅᐸᑦ, ᑭᕙᓪᓕᕐᒥᐅᑦ ᐋᓐᓂᐊᕐᕕᖕᒧᑦ ᐅᖄᓚᖅᑳᖃᑦᑕᖁᔭᕗᑦ ᐊᑐᕆᐊᖃᖅᑕᒥᓂᒃ ᐅᖃᐅᔾᔭᐅᓂᐊᕐᒪᑕ. ᑭᓇᑐᐃᓐᓇᑦᑎᐊᖅ ᐊᐱᖅᑯᑎᒃᓴᓕᒃ ᓄᕙᒡᔪᐊᕐᓇᖅ-19 ᒥᒃᓵᓄᑦ ᐊᐱᕆᔭᐅᕗᑦ ᐅᖄᓚᖁᔭᐅᓪᓗᑎᒃ ᐅᕗᖓ, 1-888-975-8601.
ᒫᓐᓇ ᓇᓗᓇᐃᖅᑕᐅᓯᒪᔪᑦ ᖃᐅᔨᓴᖅᑕᐅᔾᔪᑎᖏᑦ ᑎᓴᒪᑦ ᓄᕙᒡᔪᐊᕐᓇᖅ-19ᖃᓕᖅᑐᑦ ᓄᓇᕗᒻᒥ. ᑲᑎᖦᖢᒋᑦ ᐃᓄᐃᑦ ᒫᓐᓇᒧᑦ ᑎᑭᖦᖢᒍ ᖃᐅᔨᓴᖅᑕᐅᓯᒪᓕᖅᑐᑦ 4017−ᖑᓕᖅᑐᑦ. 735 ᐃᓄᐃᑦ ᒫᓐᓇ ᖃᐅᔨᓴᖅᑕᐅᔪᑦ.
ᒪᑐᓯᒪᔪᖅ/ᖁᔭᓈᖅᑕᐅᔪᑦ/ᓄᖅᑲᖓᑎᑕᐅᑲᐃᓐᓇᖅᑐᑦ ᐱᔨᑦᑎᕈᑏᑦ (ᑭᕙᓪᓕᕐᒥᑦ, ᓴᓂᑭᓗᐊᕐᒥᑦ):
- ᑕᒪᕐᒥᑦᑎᐊᖅ ᐱᑐᐃᓐᓇᐅᙱᑦᑐᓕᕆᓂᕐᒧᒃ ᐃᓗᐊᖅᓴᖅᑕᐅᓂᐊᕙᒃᑐᑦ ᓄᖅᑲᖅᑎᑕᐅᕗᑦ ᑐᓴᖅᑎᑦᑎᔪᖃᒃᑲᓐᓂᓚᐅᙱᓐᓂᖓᓂ.
- ᑭᒍᑎᓕᕆᓂᐅᕙᒃᑐᑦ ᐱᔨᑦᑎᕋᕐᓃᑦ ᓄᖅᑲᖅᑎᑕᐅᕗᑦ ᑭᓯᐊᓂ ᑐᐊᕕᖅᓇᖅᑐᓄᑐᐊᖅ.
- ᑕᓚᕖᓴᒃᑯᑦ ᐃᓂᒃᓴᓕᐅᖅᑕᐅᓯᒪᕙᒃᑐᑦ ᓄᖅᑲᖅᑎᑕᐅᕗᑦ ᑐᓴᖅᑎᑦᑎᔪᖃᒃᑲᓐᓂᓚᐅᙱᓐᓂᖓᓂ.
- ᐱᔭᕆᐊᖃᓪᓚᕆᙱᑦᑐᑦ ᐋᓐᓂᐊᕕᓕᐊᕐᓗᓂ ᐊᐅᓪᓚᖅᐸᖕᓃᑦ ᐃᖃᓗᖕᓄᑦ ᐅᖓᕙᕙᕆᐊᖅᑕᐅᕗᑦ. ᐃᓂᒃᓴᓕᐅᖅᑕᐅᓯᒪᔪᑦ ᐋᖅᑭᒃᓱᖅᑕᐅᒃᑲᓐᓂᕐᓂᐊᖅᐳᑦ ᖃᖓᙳᒃᑲᓐᓂᖅᐸᑦ.
- ᐊᖏᕐᕋᕆᔭᐅᔪᓂ ᑲᒪᒋᔭᖃᖅᐸᖕᓂᕐᒧᑦ ᐅᒡᓚᖅᐸᖕᓃᑦ ᒫᓐᓇᒃᑯᑦ ᓄᖅᑲᖓᑎᑕᐅᕗᑦ.
ᐋᖅᑭᒋᐊᖅᑕᐅᔪᑦ ᐱᔨᑦᑎᕈᑏᑦ (ᑲᖏᖅᖠᓂᖅ):
ᑕᒪᕐᒥᑦᑎᐊᖅ ᓯᖓᐃᔪᓂᕆᓂᕐᒧᑦ ᐃᓂᒃᓴᓕᐅᖅᑕᐅᔪᑦ ᐃᓂᒃᓴᓕᐅᖅᑕᐅᓗᑎᒃ ᑭᓯᐊᓂᑐᐊᖑᔭᕆᐊᖃᖅᐳᖅ, ᐃᖅᓂᓱᒃᓰᕝᕕᒃᑯᑦ.
| ᑲᑎᖦᖢᒋᑦ (ᑕᒪᕐᒥᑦᑎᐊᖅ ᐃᓄᑐᐊᒃᑯᕕᖕᒦᑦᑐᑦ) | |
| ᐊᐅᓪᓚᖅᓯᒪᔫᑉ ᖃᓄᐃᑦᑑᓂᖓ | ᑐᔪᕐᒥᕕᖕᒦᑦᑐᑦ ᐊᓂᑦᑕᐃᓕᑎᑕᐅᔪᑦ ᓄᕕᐱᕆ 13−ᒥ ᐱᒋᐊᖅᖢᒍ |
| ᐋᓐᓂᐊᕐᕕᓕᐊᖅᑐᑦ | 520 |
| ᑭᒃᑯᑐᐃᓐᓇᑦ | 283 |
| ᑲᑎᖦᖢᒋᑦ | 803 |
ᐊᐅᓪᓚᖅᐸᒃᑐᑦ ᐅᑎᖅᑎᑕᐅᓯᒪᓕᖅᑐᑦ ᖃᓄᐃᓕᖓᓂᖏᑦ:
| ᐅᓪᓗᖅ ᐊᐅᓪᓚᕐᕕᒃᓴᖓ | ᖃᔅᓯᐅᓂᖏᑦ ᐊᐅᓪᓚᕐᓂᐊᖅᑐᑦ ᐃᓄᑐᐊᒃᑯᕕᖕᒦᑦᑐᑦ |
| ᓄᕕᐱᕆ 13 | 44 |
| ᓄᕕᐱᕆ 14 | 0 |
| ᓄᕕᐱᕆ 15 | 20 |
| ᓄᕕᐱᕆ 16 | 113 |
| ᑲᑎᖦᖢᒋᑦ | 177 |
ᐱᑕᖃᕆᐊᖃᓪᓚᕆᒃᑐᑦ ᐃᖅᑲᓇᐃᔭᖅᑏᑦ ᑐᒃᓯᕋᖅᑕᐅᔪᑦ
ᓄᕕᐱᕆ 13−ᒥ ᐱᒋᐊᖅᖢᒍ, 8774−ᓂᒃ ᑐᒃᓯᕋᖅᑐᖃᓚᐅᖅᐳᖅ, 4116−ᖑᓪᓗᑎᒃ ᐃᖅᑲᓇᐃᔭᕆᐊᖃᓪᓚᕆᒃᑐᓄᑦ ᑐᒃᓯᕋᖅᑕᐅᔪᑦ.
| ᑐᒃᓯᕋᖅᑕᐅᓯᒪᔪᑦ ᖃᓄᐃᓕᖓᓂᖏᑦ | # | % |
| ᐊᖏᖅᑕᐅᓯᒪᔪᑦ (ᐅᑯᐊᖑᕗᑦ ᐱᔭᕆᐊᖃᓪᓚᕆᒃᑐᑦ ᐊᒻᒪ ᐱᔭᕆᐊᖃᓪᓚᕆᙱᑦᑐᑦ) | 5867 | 66.9% |
| ᐊᖏᖅᑕᐅᙱᑦᑐᑦ | 280 | 3.2% |
| ᐅᑕᖅᑭᔪᑦ | 231 | 2.6% |
| ᐊᐅᓪᓚᕐᕕᐅᔪᓐᓇᕐᑐᑦ ᐊᑐᖅᑕᐅᒐᔪᒃᑐᓄᑦ ᐊᖏᖅᑕᑦ | 2396 | 27.3% |
| ᑲᑎᖦᖢᒋᑦ | 8774 | 100% |
ᐃᓕᓐᓂᐊᕐᓂᓕᕆᔨᒃᑯᓐᓄᑦ ᐱᔨᑦᑎᕋᐅᑎᖏᑦ
ᑭᕙᓪᓕᖅᒥ
ᐃᓕᓐᓂᐊᓕᓵᖅᑐᓂᒃ ᖁᕝᕙᓯᖕᓂᓕᖕᓄᑦ 12−ᒧᑦ ᐃᓕᓐᓂᐊᕐᕖᑦ
- ᒪᓕᒃᖢᒍ ᓄᓇᕗᒻᒥ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᖓᔪᖅᑳᖓᑕ ᐅᖃᐅᓯᕆᔭᖓ, ᐃᓕᓐᓂᐊᕐᕕᓕᒫᑦ ᐊᑕᖏᓪᓗᒋᑦ ᑭᕙᓪᓕᕐᒥᑦ ᒫᓐᓇ ᐸᕐᓇᐅᑎ 4-ᒦᓕᖅᑐᑦ: ᓇᓗᓇᐃᖅᑕᐅᓯᒪᔪᑦ ᐋᓐᓂᐊᔪᑦ ᓄᓇᓕᖕᓂ ᓯᐊᒻᒪᒃᐸᓕᐊᓂᖓ ᓄᕙᒡᔪᐊᕐᓇᖅ-19, ᑐᓴᖅᑎᑕᐅᒃᑲᓐᓂᓚᐅᙱᓐᓂᕐᒥᓂ.
- ᐃᓕᓐᓂᐊᕐᕕᓕᒫᑦ ᑭᕙᓪᓕᕐᒥᑦ (ᐊᕐᕕᐊᑦ, ᖃᒪᓂᑦᑐᐊᖅ, ᐃᒡᓗᓕᒑᕐᔪᒃ, ᓴᓪᓕᖅ, ᑲᖏᖅᖠᓂᖅ, ᓇᐅᔮᑦ, ᑎᑭᕋᔪᐊᖅ) ᐊᑐᓕᖅᑎᑦᑎᓂᐊᓕᖅᑐᑦ ᐸᕐᓇᐅᑎ 4ᒥᑦ ᖃᓄᐃᓕᐅᕈᑕᐅᓂᐊᖅᑐᓂᑦ.
- ᑕᒪᕐᒥᑦᑎᐊᖅ ᐃᓕᓐᓂᐊᕐᕖᑦ ᑭᕙᓪᓕᕐᒥᑦ ᒪᑐᕗᑦ ᐃᓕᓐᓂᐊᖅᑎᓄᑦ, ᐃᖅᑲᓇᐃᔭᖅᑎᓄᑦ, ᑭᒃᑯᑐᐃᓐᓇᓄᓪᓗ ᑐᓴᖅᑎᑦᑎᔪᖃᒃᑲᓐᓂᓚᐅᙱᓐᓂᖓᓂ ᑕᐃᑲᙵᑦ ᐋᓐᓂᐊᖃᕐᓇᙱᑦᑐᓕᕆᔨᒻᒪᕆᖕᒥᑦ.
- ᖃᕆᓴᐅᔭᒃᑯᑦ ᑕᒪᕐᒥᑦᑎᐊᖅ ᐃᓕᓴᖅᑕᐅᑲᑕᖕᓂᐊᖅᐳᑦ ᑭᕙᓪᓕᕐᒥᑦ ᐅᐸᒃᓯᒪᙱᓪᓗᒋᑦ.
- ᐅᐸᒃᓯᒪᙱᓪᓗᒋᑦ ᐃᓕᑦᑎᕙᓪᓕᐊᓂᖅ ᐱᓕᕆᐊᖑᓂᐊᖅᐳᖅ ᐅᖃᓘᑎᒃᑯᑦ ᐃᓕᑦᑎᕙᓪᓕᐊᓂᕐᒧᓪᓗ ᑲᑎᖅᓱᖅᑕᐅᓯᒪᔪᓄᑦ.
- ᐃᓕᓴᐃᔩᑦ/ᐃᓕᓐᓂᐊᕐᕕᖕᒥ ᐃᖅᑲᓇᐃᔭᖅᑏᑦ ᖃᐅᔨᒋᐊᓛᖅᐳᑦ ᐃᓕᓐᓂᐊᖅᑎᓄᑦ ᐃᓚᖏᓐᓄᓪᓗ ᐊᔪᕐᓇᕈᓐᓃᑐᐊᖅᐸᑦ.
- ᓄᑖᙳᕆᐊᖅᓯᒪᔪᓂᒃ ᓄᓇᓕᖕᒥᐅᑦ ᖃᓄᐃᓕᕙᓪᓕᐊᓂᖏᓐᓄᑦ ᑕᑯᒃᓴᕈᖅᑎᑕᐅᓂᐊᖅᐳᑦ ᐃᓕᓐᓂᐊᕐᓂᓕᕆᔨᒃᑯᑦ ᐃᑭᐊᖅᑭᕕᖓᓂ ᐅᕙᓂ: https://gov.nu.ca/education/information/2020-21-opening-plan-nunavut-sc…
- ᐃᓕᓐᓂᐊᕐᕖᑦ ᒪᑐᔭᐅᓂᖏᓐᓄᑦ ᐃᖅᑲᓇᐃᔭᖅᑎᖏᑕ ᑮᓇᐅᔾᔭᔅᓵᖏᑦ ᐊᑦᑐᖅᑕᐅᔾᔮᖏᑦᑐᑦ.
- ᐱᓕᕆᕝᕕᒃ ᐊᑐᖁᔨᕗᑦ ᑭᕙᓪᓕᕐᒥᐅᑦ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᓐᓂᑦ (DEA) ᐃᖅᑲᓇᐃᔭᖅᑎᖏᑦ ᑕᒪᕐᒥᒃ ᓄᖅᑲᖓᓗᑎᑦ, ᑕᕝᕙᙵᑦ ᑐᑭᒧᐊᑎᑦᑎᒍᑕᐅᔪᖅ ᒪᓕᓪᓗᒍ ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ ᓘᑦᑖᑦ ᐊᖓᔪᖅᑳᖓ.
- ᑮᓇᐅᔭᖃᖅᑎᑕᐅᓂᖏᑦ ᑭᕙᓪᓕᕐᒥᑦ ᐃᓕᓐᓂᐊᖅᑐᓕᕆᔨᒃᑯᑦ ᐊᒃᑐᖅᑕᐅᔾᔮᙱᓚᑦ, ᑭᕙᓪᓕᕐᒥᐅᑦ ᐃᓕᓐᓂᐊᖅᑐᓕᕆᔨᒃᑯᑦ ᑎᓕᐅᖅᑕᐅᕗᑦ ᑲᔪᓯᐊᖏᓐᓇᖁᔭᐅᓪᓗᑎᒃ ᐊᑭᓕᖅᓱᐃᓂᕐᒥᒃ ᐃᖅᑲᓇᐃᔭᖅᑎᒥᓂᒃ ᐊᑐᖅᐸᒃᑕᒥᑎᑐᑦ.
ᐃᓕᓐᓂᐊᕆᐅᖅᓴᔪᑦ ᐸᐃᕆᕕᓪᓗ
- ᐱᑕᖃᓪᓚᕆᓕᕐᓂᖓᓄᑦ ᓄᕙᒡᔪᐊᕐᓇᖅ-19-ᒥᒃ, ᐸᐃᕆᕝᕖᑦ ᐊᕐᕕᐊᓂᑦ ᐊᒻᒪ ᑲᖏᖅᖠᓂᕐᒥ, ᑭᕙᓪᓕᕐᒥᓗ ᒪᑐᖁᔭᐅᓯᒪᕗᑦ ᑕᐃᔅᓱᒪᙵᑦ ᐋᓐᓂᐊᖃᕐᓇᙱᑦᑐᒃᑯᑦ ᓘᑦᑖᑦ ᐊᖓᔪᖅᑳᖓᑕ.
- ᓄᓇᕗᑦ ᒐᕙᒪᖓᑕ ᑮᓇᔭᖃᖅᑎᑕᖓ ᓚᐃᓴᓕᖕᓄ ᐸᐃᕆᕝᕕᖕᓄᑦ ᐃᓂᓄᑦ ᑭᕙᓪᓕᕐᒥᑦ ᑲᔪᓰᓐᓇᕐᓂᐊᖅᐳᖅ ᐊᑐᖅᑕᐅᕙᒃᑐᑎᑐᑦ.
ᓴᓂᑭᓗᐊᖅ
ᐃᓕᓐᓂᐊᓕᓵᖅᑐᓂᒃ ᖁᕝᕙᓯᖕᓂᓕᖕᓄᑦ 12−ᒧᑦ ᐃᓕᓐᓂᐊᕐᕖᑦ
- ᒪᓕᒃᖢᒍ ᓄᓇᕗᒻᒥᐅᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᓗᑖᑦ ᐊᖓᔪᖅᑳᖓ, ᓴᓂᑭᓗᐊᕐᒥᑦ ᐃᓕᓐᓂᐊᕐᕕᒃᐳᑦ ᒫᓐᓇ ᓱᓕ ᐸᕐᓇᐅᑎ 4−ᒦᑉᐳᖅ: ᓇᓗᓇᐃᖅᑕᐅᓯᒪᔪᑦ ᐋᓐᓂᐊᔪᑦ ᓄᓇᓕᖕᓂ ᓯᐊᒻᒪᒃᐸᓕᐊᓂᖓ ᓄᕙᒡᔪᐊᕐᓇᖅ-19, ᑐᓴᖅᑎᑕᐅᒃᑲᓐᓂᓚᐅᙱᓐᓂᕐᒥᓂ.
- ᑕᒪᕐᒥᑦᑎᐊᖅ ᐃᓕᓐᓂᐊᕐᕖᑦ ᓴᓂᑭᓗᐊᒥ ᒪᑐᓯᒪᐃᓐᓇᖅᐳᑦ ᓱᓕ ᐃᓕᓐᓂᐊᖅᑎᓄᑦ, ᐃᖅᑲᓴᐃᔭᖅᑎᓄᑦ, ᑭᒃᑯᑐᐃᓐᓇᓄᓪᓗ ᑐᓴᖅᑎᑦᑦᑎᔪᖃᒃᑲᓐᓂᓚᐅᙱᓐᓂᖓᓂ ᑕᐃᑲᙵᑦ ᐋᓐᓂᐊᖃᕐᓇᙱᑦᑐᓕᕆᔨᒻᒪᕆᖕᒥᑦ.
- ᖃᕆᓴᐅᔭᕆᓕᔾᔪᑏᑦ ᐃᓕᓐᓂᐊᕐᓂᕐᒧᑦ ᐊᑐᖅᑕᐅᔪᓐᓇᖅᑐᑦ ᐊᖏᕐᕋᒥᑦ ᓴᓂᑭᓗᐊᕐᒧᑦ ᑎᓯᒪᓕᖅᑐᑦ ᐊᐃᑉᐱᕐᒥᑦ, ᓄᕕᐱᕆ 10. ᑖᒃᑯᐊ ᑐᓂᔭᐅᓚᐅᖅᑐᑦ ᐹᑦᓵᓕᒃ ᐃᓕᓐᓂᐊᕐᕕᐊᓗᐊᓄᑦ ᐃᓕᓐᓂᐊᖅᑎᓄᑦ.
ᐃᓕᓐᓂᐊᕆᐅᖅᓴᔪᑦ ᐸᐃᕆᕕᓪᓗ
- ᐱᑕᖃᓪᓚᕆᓕᕐᓂᖓᓄᑦ ᓄᕙᒡᔪᐊᕐᓇᖅ-19-ᒥᒃ ᓴᓂᑭᓗᐊᕐᒥᑦ, ᐸᐃᕆᕝᕖᑦ ᒪᑐᓯᒪᓂᐃᓐᓇᕐᓂᐊᖅᑐᑦ ᓱᓕ ᑕᐃᔅᓱᒪᙵᑦ ᐋᓐᓂᐊᖃᕐᓇᙱᑦᑐᓕᕆᔨᓪᓗᐊᑕᕐᒥᑦ.
ᐃᖃᓗᐃᑦ
ᐃᓕᓐᓂᐊᓕᓵᖅᑐᓂᒃ ᖁᕝᕙᓯᖕᓂᓕᖕᓄᑦ 12−ᒧᑦ ᐃᓕᓐᓂᐊᕐᕖᑦ
- ᒪᓕᓪᓗᒍ ᓄᓇᕗᒻᒥ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᓘᑦᑖᑦ ᐊᖓᔪᖅᑳᖓ, ᐃᓕᓐᓂᕐᕖᑦ ᐃᖃᓗᐃᑦ (ᐃᖃᓗᐃᑦ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᑦ, ᓂᐊᖁᙴᖅ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᑦ, ᐊᒻᒪ ᐅᐃᕖᑦ ᐃᓕᓐᓂᐊᕐᑐᓕᕆᓂᕐᒧᑦ ᑲᑐᔾᔨᖃᑎᒌᖏᑦ ᓄᓇᕗᒻᒥ) ᓱᓕ ᑖᔅᓱᒥᖓ ᐊᑐᕐᓂᐊᖅᑐᑦ ᐸᕐᓇᐅᑎ 2: ᐊᑦᑕᕐᓇᖅᑐᒦᓕᖅᐸᓪᓕᐊᔪᑦ ᓄᕙᒡᔪᐊᕐᓇᖅ-19−ᒥ ᐊᐃᑦᑐᕐᓗᐃᔪᓐᓇᖅᑐᑦ ᐊᕕᒃᑐᖅᓯᒪᔪᓂ, ᑭᓯᐊᓂ ᐅᖃᐅᓯᐅᒃᑲᓐᓂᖅᐸᑦ.
- ᒥᑭᔫᑕᐅᓂᖅᓴᑦ ᐃᓕᓐᓂᐊᖅᕖᑦ ᐃᖃᓗᓐᓂ (ᐃᖃᓗᐃᑦ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᑦ, ᓂᐊᖁᙴ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᑦ, ᐊᒻᒪ ᐅᐃᕖᑦ ᐃᓕᓐᓂᐊᕐᑐᓕᕆᓂᕐᒧᑦ ᑲᑐᔾᔨᖃᑎᒌᖏᑦ ᓄᓇᕗᒻᒥ) ᒪᑐᐃᖓᐃᓐᓇᕐᓂᐊᖅᑐᑦ ᐅᓪᓗᓕᒫᖅ, ᑕᓪᓕᒪᓄᑦ ᐅᓪᓗᓄᑦ ᐱᓇᓱᐊᕈᓯᕐᒥᑦ.
- ᐊᑯᓪᓕᖅᐹᒥ ᖁᑦᑎᖕᓂᖅᓴᒥᓪᓗ ᐃᓕᓐᓂᐊᖅᑐᑦ ᐃᖃᓗᓐᓂᑦ ᓇᑭᖅᑖᕐᓗᑎᑦ ᐃᓕᓐᓂᐊᖃᑦᑕᕐᓂᐊᖅᑐᑦ ᐊᒻᒪ ᖃᕆᓴᐅᔭᒃᑯᑦ. ᐃᓕᓐᓂᐊᖅᑎᑦ ᐃᓕᓐᓂᐊᕐᕕᖕᒦᖃᑦᑕᕐᓂᐊᖅᑐᑦ 2-3 ᐅᓪᓗᑦ ᐱᓇᓱᐊᕈᓯᕐᒥ. ᐋᖅᑭᒃᑕᐅᓯᒪᔪᑦ ᐃᓕᓐᓂᐊᖅᑕᐅᔪᒃᓴᑦ ᐃᓱᒪᓕᐊᖑᖃᑦᑕᕐᓂᐊᖅᐳᑦ ᖃᐅᑕᒫᑦ ᐃᓕᓐᓂᐊᕐᕕᖕᒥ ᐱᓕᕆᔾᔪᓯᖅ 2 ᐱᓕᕆᐊᖑᔪᒃᓴᑦ ᐸᕐᓇᐅᑎᒥᒃ.
ᐃᓕᓐᓂᐊᕆᐅᖅᓴᔪᑦ ᐸᐃᕆᕕᓪᓗ
- ᒪᓕᒃᖢᒍ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᖓᔪᖅᑳᖓᑕ ᐅᖃᐅᓯᖏᑦ, ᐸᐃᕆᕕᓕᒫᑦ ᐃᖃᓗᖕᓂ ᒪᒃᐱᖅᓯᒪᐃᓐᓇᕈᓐᓇᖅᑐᑦ ᒪᓕᒡᓗᑎᒃ ᒫᓐᓇ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᒻᒪ ᐊᑦᑕᕐᓇᖅᑕᐃᓕᒪᔪᓕᕆᔨᒃᑯᑦ ᑐᑭᒧᐊᒍᑎᖏᓐᓂᒃ ᐊᒻᒪ ᐆᒃᑐᖅᑕᐅᖁᔭᖏᓐᓂᒃ.
ᓄᓇᕗᒻᒥ ᓯᓚᑦᑐᖅᓴᕐᕕᒃ
ᑭᕙᓪᓕᕐᒥ ᓄᓇᓖᑦ − ᐸᕐᓇᐅᑎᖓ 4 − ᐊᐅᐸᖅᑐᖅ:
- ᓄᓇᕗᒻᒥ ᓯᓚᑦᑐᖅᓴᕐᕖᑦ ᐃᓄᖕᓄᑦ ᒪᑐᓯᒪᔪᑦ.
- ᐊᔪᕐᓇᖏᑦᑕᕌᖓᑦ, ᐃᓕᓐᓂᐊᖅᑐᑦ ᓱᓕ ᑲᔪᓯᓂᐊᖅᑐᑦ ᖃᕆᓴᐅᔭᒃᑯᑦ ᐊᖏᕐᕋᒥ.
- ᓯᓚᑦᑐᓴᕐᕕᐅᑉ ᐃᓕᓐᓂᐊᖅᑎᖏᑦ ᖃᐅᔨᒃᑲᐅᑎᖁᔭᐅᕗᑦ ᐅᖄᓚᐅᑎᖏᑕ ᐊᒻᒪ ᖃᓄᖅ ᐅᖃᕐᕕᒋᔭᔅᓴᐅᒻᒪᖔᑕ (ᐅᖄᓚᐅᑎᖓ ᐊᒻᒪᓗ/ᐅᕝᕙᓗᓃᑦ ᐃᕐᖐᓈᖅᑕᐅᑎᒃᑯᑦ) ᐃᓕᓐᓂᐊᖅᑎᑦᑎᔨᖓᓐᓄᑦ.
- ᓄᓇᕗᒻᒥ ᓯᓚᑦᑐᖅᓴᕐᕕᒻᒥ ᐃᓕᓐᓂᐊᖅᑎᑦ, ᐃᖅᑲᓇᐃᔭᖅᑎᑦ ᐊᒻᒪ ᓯᓚᑦᑐᖅᓴᕐᕕᖕᒥᐅᑦ ᑎᓕᐅᖅᑕᐅᕗᑦ ᐊᒡᒐᑎᒃ ᐅᐊᓴᑦᑎᐊᖃᑦᑕᖁᓪᓗᒋᑦ ᐅᐊᓴᕋᔪᒡᓗᒋᓪᓗ, ᐅᖓᓯ[ᒋᒃᑕᑲᑕᒡᓗᑎᒃ ᐊᐃᓯᒪᓗᑎᒡᓗ ᖃᓂᒪᑐᐊᖅᐸᑕ.
- ᐅᒡᓚᕐᓃᑦ ᐃᓕᓐᓂᐊᖅᑏᑦ ᓇᔪᒐᖏᓐᓄᑦ ᒫᓐᓇ ᒪᑐᔭᐅᔪᑦ ᑭᒃᑯᑐᐃᓐᓇᕐᓄᑦ.
- ᖃᓄᑐᐃᓐᓇᖅ ᖃᐅᔨᓴᖅᑕᐅᓯᒪᔪᑦ ᐊᒃᑐᐊᓂᓖᑦ ᐱᓕᕆᐊᓄᑦ ᑖᒃᑯᓇᓂ ᓄᓇᓕᖕᓂ ᓄᖅᑲᖓᑲᓚᐅᖁᔭᐅᓪᓗᑎᑦ ᓄᓇᓕᖕᓂ ᑲᑎᙵᕈᓘᔭᖃᑦᑕᖅᑐᑦ ᐋᖅᑭᒋᐊᖅᓯᒃᑲᓐᓂᖁᔭᐅᓪᓗᑎᒃ.
ᐃᖃᓗᐃᑦ − ᐸᕐᓇᐅᑎ 2 − ᖁᖅᓱᖅᑐᖅ:
- ᓯᓚᑦᑐᓴᕐᕕᒻᒥᑦ ᐃᓪᓗᖁᑎᖏᑦ ᒪᑐᓯᒪᔪᑦ ᐃᓄᓐᓄᑦ ᑭᒃᑯᑐᐃᓐᓇᕐᓄᑦ ᑖᓐᓇᓗ ᓂᕆᔭᖅᑐᕐᕕᖓ ᐊᒻᒪ ᐅᖃᓕᒫᒐᖃᕐᕕᖓ (ᓄᑖᖑᕆᐊᖅᑕᐅᔪᖅ ᓯᕗᓪᓕᕐᒥᑦ ᐊᑐᖅᑕᐅᓚᐅᖅᑐᑦ ᒪᑐᐃᖅᑎᓪᓗᒋᑦ ᐸᕐᓇᐅᑎᖓᓐᓂᑦ).
- ᐃᓕᓐᓂᐊᖅᑐᑦ ᑲᔪᓯᓂᐊᖅᑐᑦ ᑕᐃᒫᖑᕙᒻᒪᑦ.
- ᓄᓇᕗᒻᒥ ᓯᓚᑦᑐᖅᓴᕐᕕᒻᒥ ᐃᓕᓐᓂᐊᖅᑎᑦ, ᐃᖅᑲᓇᐃᔭᖅᑎᑦ ᐊᒻᒪ ᓯᓚᑦᑐᖅᓴᕐᕕᖕᒥᐅᑦ ᑎᓕᐅᖅᑕᐅᕗᑦ ᐊᒡᒐᑎᒃ ᐅᐊᓴᑦᑎᐊᖃᑦᑕᖁᓪᓗᒋᑦ ᐅᐊᓴᕋᔪᒡᓗᒋᓪᓗ, ᐅᖓᓯ[ᒋᒃᑕᑲᑕᒡᓗᑎᒃ ᐊᐃᓯᒪᓗᑎᒡᓗ ᖃᓂᒪᑐᐊᖅᐸᑕ.
- ᐃᓕᓐᓂᐊᖅᑎᑦ ᑐᔪᕐᒥᕕᖕᒦᑦᑐᑦ ᐳᓛᖅᑕᐅᖃᑦᑕᖅᑐᑦ ᐃᓄᒋᐊᑲᑕᖁᔭᐅᙱᑉᐳᑦ ᐃᓚᒌᑐᐊᑦ ᒫᓐᓇ ᖃᓄᐃᒋᔭᐅᙱᑦᑐᑦ (ᓄᑖᖑᕆᐊᖅᑕᐅᔪᖅ ᓯᕗᓪᓕᕐᒥᑦ ᐊᑐᖅᑕᐅᓚᐅᖅᑐᒥᑦ ᒪᑐᐃᖅᑎᓪᓗᒋᑦ ᐸᕐᓇᐅᑎᖓᓐᓂᒃ).
- ᖃᓄᑐᐃᓐᓇᖅ ᖃᐅᔨᓴᖅᑕᐅᓯᒪᔪᑦ ᐊᒃᑐᐊᓂᓖᑦ ᐱᓕᕆᐊᓄᑦ ᑖᒃᑯᓇᓂ ᓄᓇᓕᖕᓂ ᑎᓕᐅᖅᑕᐅᕗᑦ ᓄᓇᓕᖕᓂ ᑲᑎᙵᕈᓘᔭᖃᑦᑕᖅᑐᑦ ᐋᖅᑭᒋᐊᖅᓯᒃᑲᓐᓂᖁᔭᐅᓪᓗᑎᒃ.
ᐃᓄᓕᕆᔨᒃᑯᑦ
ᓄᑕᖅᑲᑦ ᑲᒪᒋᔭᐅᑦᑎᐊᕐᓂᖏᓐᓄᑦ ᓴᐳᒻᒥᔭᐅᓂᖏᑦ
ᐃᓱᒫᓘᑎᖃᕌᖓᔅᓯ ᓄᑕᖅᑲᑦ ᐊᒻᒪ/ᐅᕝᕙᓘᓐᓃᑦ ᒪᒃᑯᒃᑐᑦ ᖃᓄᐃᓕᖓᓂᖏᓐᓂᒃ, ᐅᖃᓗᖃᑦᑕᕆᔅᓯ ᓄᓇᔅᓯᓐᓂ ᐃᓄᓕᕆᔨᓄᑦ.
ᐊᕐᕕᐊᕐᓂ:
- ᖃᑕᙳᑎᒌᓄᑦ ᐃᓅᓯᕆᒃᑐᓕᕆᔨ (ᓄᓇᓕᓐᓂ ᐃᓄᓕᕆᔨ): 867-857-3202 ᐅᕝᕙᓘᓐᓃᑦ 867-857-6871
- ᐊᖏᔪᖅᑳᖅ ᐃᓚᒌᓄᑦ ᖃᓄᐃᙱᑦᑎᐊᖅᑐᓕᕆᔨᑦ (867-857 3102) 867-857-6786
ᖃᒪᓂ'ᑐᐊᖅ:
- ᖃᑕᙳᑎᒌᓄᑦ ᐃᓅᓯᕆᒃᑐᓕᕆᔨ (ᓄᓇᓕᓐᓂ ᐃᓄᓕᕆᔨ): 867-793-2839 ᐅᕝᕙᓘᓐᓃᑦ 867-793 5126
- ᐊᖏᔪᖅᑳᖅ ᐃᓚᒌᓄᑦ ᖃᓄᐃᙱᑦᑎᐊᖅᑐᓕᕆᔨᑦ: 867-793 2839 ᐅᕝᕙᓘᓐᓃᑦ 867-793 1348
ᓴᓪᓖᑦ:
- ᖃᑕᙳᑎᒌᓄᑦ ᐃᓅᓯᕆᒃᑐᓕᕆᔨ (ᓄᓇᓕᓐᓂ ᐃᓄᓕᕆᔨ): 867-645-7608 ᐅᕝᕙᓘᓐᓃᑦ 867-645-6756
- ᐊᖏᔪᖅᑳᖅ ᐃᓚᒌᓄᑦ ᖃᓄᐃᙱᑦᑎᐊᖅᑐᓕᕆᔨᑦ: 867-645-5064 ᐅᕝᕙᓘᓐᓃᑦ 867-645-6547
ᐃᒡᓗᓕᒑᕐᔪᒃ:
ᖃᑕᙳᑎᒌᓄᑦ ᐃᓅᓯᕆᒃᑐᓕᕆᔨ (ᓄᓇᓕᓐᓂ ᐃᓄᓕᕆᔨ): 867-793-5126
ᐊᖏᔪᖅᑳᖅ ᐃᓚᒌᓄᑦ ᖃᓄᐃᙱᑦᑎᐊᖅᑐᓕᕆᔨᑦ 867-793-2839 ᐅᕝᕙᓘᓐᓃᑦ 867-793-1348
ᓇᐅᔮᑦ:
- ᖃᑕᙳᑎᒌᓄᑦ ᐃᓅᓯᕆᒃᑐᓕᕆᔨ (ᓄᓇᓕᓐᓂ ᐃᓄᓕᕆᔨ): 867-462-4020 ᐅᕝᕙᓘᓐᓃᑦ 867-222-1385
- ᐊᖏᔪᖅᑳᖅ ᐃᓚᒌᓄᑦ ᖃᓄᐃᙱᑦᑎᐊᖅᑐᓕᕆᔨᑦ: 867-793-2839 ᐅᕝᕙᓘᓐᓃᑦ 867-793-1691
ᑎᑭᕋᕐᔪᐊᖅ:
- ᖃᑕᙳᑎᒌᓄᑦ ᐃᓅᓯᕆᒃᑐᓕᕆᔨ (ᓄᓇᓕᓐᓂ ᐃᓄᓕᕆᔨ): 867-896-9062 ᐅᕝᕙᓘᓐᓃᑦ 867-222-2336
- ᐊᖏᔪᖅᑳᖅ ᐃᓚᒌᓄᑦ ᖃᓄᐃᙱᑦᑎᐊᖅᑐᓕᕆᔨᑦ 867-857-3201 ᐅᕝᕙᓘᓐᓃᑦ 867-857-6786
ᓄᓇᕗᓕᒫᒥ ᐅᖄᓚᕝᕕᒃᓴᑦ: 1-844-FW-CHILD (1-844-392-4453)
ᐃᓱᒫᓘᑎᖃᕈᕕᓪᓘᓐᓃᑦ ᓄᑕᖅᑲᓄᑦ ᐅᕝᕙᓘᓐᓃᑦ ᒪᒃᑯᒃᑐᓄᑦ ᐱᔨᑦᑎᕋᕈᑕᐅᔪᓂᒃ ᐅᖃᐅᓯᒃᓴᖃᕈᕕᓪᓘᓐᓃᑦ ᐅᐱᒋᔭᖃᕈᕕᓪᓘᓐᓃᖅ, ᐅᕙᑦᑎᓐᓄᑦ ᖃᐅᔨᒋᐊᖃᑦᑕᕆᑦ ᐅᕗᖓ ᐅᖃᓗᒡᓗᓯ 1-855-522-5201 ᐅᕝᕙᓘᓐᓃᑦ ᐃᕐᖐᓐᓈᖅᑕᐅᒃᑯᑦ ᑎᑎᕋᕐᓗᓯ ᐅᕗᖓ @email
ᐸᓖᓯᒃᑯᑦ: 867-857-1111
ᐃᓄᓕᕆᔨᒃᑯᑦ ᓄᓇᓕᖕᓂᓗ ᐸᓖᓯᒃᑯᑦ ᖃᐅᔨᒋᐊᕐᕕᖃᕐᓂᕐᒧᑦ ᑐᓴᖅᑕᐅᔪᒃᓴᐃᑦ ᑕᒪᐃᓐᓄᑦ ᐊᑐᓂᑦ ᓄᓇᓕᖕᓄᑦ ᓇᓂᔭᐅᔪᓐᓴᖅᐳᑦ ᐅᕙᓂ, ᐃᓚᒌᓂᒃ ᖃᓄᐃᙱᑦᑎᐊᖅᑎᑦᑎᓂᕐᒧᑦ ᐱᓕᕆᕝᕕᖕᒥ ᐃᑭᐊᖅᑭᕕᑦᑎᓐᓂ ᐅᕙᓂ, https://www.gov.nu.ca/family-services/information/child-protection.
ᓂᖃᐃᓱᖅᑐᓕᕆᔩᑦ ᐊᕕᒃᓯᒪᓂᕐᒥ ᖃᐅᔨᒋᐊᕐᕕᖃᕐᓂᕐᒧᑦ ᑐᓴᖅᑕᐅᔪᒃᓴᑦ
ᐊᕐᕕᐊᑦ, ᖃᒪᓂᑦᑐᐊᖅ, ᐃᒡᓗᓕᒑᕐᔪᒃ, ᓴᓪᓕᖅ, ᓇᐅᔮᑦ, ᐊᒻᒪ ᑎᑭᕋᕐᔪᐊᖅ:
- ᑭᕙᓪᓕᖅ: ᐊᑭᖃᙱᑦᑐᖅ ᐅᖃᓘᑎ: (1-800-953-8516) ᓇᕿᒃᑲᓐᓂᕐᓗᒋᑦ ᐅᑯᐊ 1602
- ᑭᕙᓪᓕᕐᒥ ᐊᕕᑦᑐᖅᓯᒪᓂᐅᔪᒧᑦ ᑎᑎᕋᕐᕕᖓ: 1-867-645-5040 ᓇᕿᒃᑲᓐᓂᕐᓗᒋᑦ 1602 ᐅᓇᓘᓐᓃᑦ 1600
ᐃᖅᑲᓇᐃᔭᖅᑎᐅᓂᕐᒧᑦ ᐱᕙᓪᓕᐊᓂᕐᒧᑦ ᑐᓴᖅᑕᐅᔪᒃᓴᐃᑦ
ᐊᕐᕕᐊᑦ, ᖃᒪᓂᑦᑐᐊᖅ, ᐃᒡᓗᓕᒑᕐᔪᒃ, ᓴᓪᓕᖅ, ᓇᐅᔮᑦ, ᐊᒻᒪ ᑎᑭᕋᕐᔪᐊᖅ:
- ᑭᕙᓪᓕᖅ: 1-800-953-8516 ext 1611
ᐃᓐᓇᕐᓄᑦ ᐃᓕᓐᓂᐊᕐᓂᕐᒧᑦ ᐱᔭᕆᐅᖅᓴᓂᕐᒧᑦ ᐃᑲᔫᓯᐊᑦ ᐃᓕᓐᓂᐊᖅᑏᑦ ᒫᓐᓇ ᐃᓚᐅᔪᑦ ᑲᔪᓰᓐᓇᕐᓂᐊᖅᐳᖅ ᑐᓂᔭᕙᒡᓗᑎᒃ ᐊᔪᕈᓐᓃᖅᓴᕐᓂᕐᒧᑦ ᐱᔭᐅᕙᒃᑐᓂᒃ ᐊᕐᕌᒍᒧᑦ ᑮᓇᐅᔭᓄᑦ ᐃᓱᒋᔭᐅᔪᒧᑦ.
ᐃᓕᖅᑯᓯᓕᕆᔨᒃᑯᓐᓂ ᐱᓕᕆᕝᕕᖓᓐᓂᑦ ᐱᔨᑦᑎᕈᑎᖏᑦ
ᐋᖅᑭᒋᐊᖅᑕᐅᓯᒪᓕᖅᑐᑦ ᐱᔨᑦᑎᕋᕈᑕᐅᕙᒃᑐᑦ
ᐃᓕᖅᑯᓯᓕᕆᔨᒃᑯᑦ ᓱᓕ ᐊᐃᑦᑑᑎᑦ ᐃᑲᔫᑎᓪᓗ ᐊᑐᐃᓐᓇᑎᓐᓂᐊᖅᑕᖏᑦ ᑐᒃᓯᕋᐅᑎᓕᐅᕐᓂᒧᑦ ᐱᓕᕆᐊᓄᑦ ᓴᖅᑭᔮᖅᑎᑦᑎᔾᔪᑎᓄᑦ, ᓴᐳᔾᔨᔾᔪᑎᓄᑦ, ᔭᒐᑎᑦᑎᑦᑕᐃᓕᒪᔪᓄᑦ ᐊᒻᒪ ᓄᑖᙳᕆᐊᖅᑎᑦᑎᔪᓄᑦ ᐃᓕᖅᑯᓯᕐᒧᑦ, ᐅᖃᐅᓯᕐᒧᑦ, ᓴᓇᙳᐊᖅᑕᐅᕙᒃᑐᓄᑦ ᐊᒻᒪ ᓄᓇᕗᒻᒥ ᐃᑦᑕᕐᓂᓴᓕᕆᓂᕐᒧᑦ. ᑕᒪᕐᒥᒃ ᓄᓇᓕᓐᓃᑦᑐᑦ, ᑮᓇᐅᔭᓕᐅᕋᓱᐊᖅᑎᐅᓐᖏᑦᑐᖅ ᑲᑐᔾᔨᖃᑎᒌ, ᕼᐋᒻᒪᓚᒃᑯᑦ ᑯᐊᐳᕇᓴᒃᑯᖏᑦ, ᐅᕙᓗ ᐃᓄᐃᑦ ᐱᓕᕆᐊᔅᓴᓕᕆᔪᒪᔪᑦ ᐃᑲᔪᖅᑕᐅᒃᑲᓐᓂᕈᒪᔪᑦ ᑐᔅᓯᕋᐅᑎᓕᐅᕈᓐᓇᖅᑐᑦ ᐃᑭᐊᖅᑭᕕᒃᑯᑦ ᐅᕙᙵᑦ https://www.gov.nu.ca/culture-and-heritage/information/grants-and-contr…
ᒪᑐᓯᒪᔪᑦ ᐱᔨᑦᑎᕈᑏᑦ
ᐅᖃᓕᒫᒐᖃᕐᕕᒃ ᖃᒪᓂ'ᑐᐊᕐᒥᑦ ᒪᑐᓯᒪᓂᐊᓕᖅᑐᖅ ᓇᓗᓇᐃᖅᑕᐅᓛᖅᑐᖅ ᒪᑐᐃᒃᑲᓐᓂᕈᓐᓇᖅᓯᑉᐸᑦ.
ᒪᓕᒐᓕᕆᔨᒃᑯᓐᓂᑦ ᐱᔨᑦᑎᕋᐅᑎᑦ
ᐋᖅᑭᒋᐊᖅᑕᐅᓯᒪᓕᖅᑐᑦ ᐱᔨᑦᑎᕋᕈᑕᐅᕙᒃᑐᑦ:
ᓄᓇᓕᖕᓂ ᒪᓕᒐᓕᕆᔨᑦ
ᐊᐴᑎᓯᒪᓗᑎᒃ ᑲᑎᒪᓃᑦ ᑕᒪᒃᑯᓄᖓ ᑭᓯᐊᓂ ᑐᐊᕕᕐᓇᖅᑐᓄᑦ ᐊᔪᕐᓇᙱᑎᑕᐅᕗᑦ, ᑕᐃᓐᓇ ᐱᓕᕆᖃᑎᒋᔭᐅᔪᖅ ᐅᖄᓚᐅᑎᖃᕈᓐᓇᙱᑉᐸᑦ ᑯᐊᖅᓵᕐᓇᙱᑦᑐᒥᓘᓐᓃᑦ ᐃᓂᒥᒃ ᐊᑐᕈᓐᓇᙱᓪᓗᓂ ᐱᓕᕆᔨᑦᑎᓐᓄᑦ ᖃᐅᔨᒋᐊᕆᐊᒃᓴᖅ ᐅᖄᓚᐅᑎᒃᑯᑦ. ᐃᓄᐃᑦ ᐊᐱᕆᔭᐅᕗᑦ ᖃᐅᔨᒋᐊᕐᕕᖃᖁᔭᐅᓪᓗᑎᒃ ᐃᓚᒌᓂ ᐋᓐᓂᖅᓯᔪᖃᖅᐸᖕᓂᖓᓄᑦ ᐱᓕᕆᕝᕕᖃᖔᓕᕐᓂᕐᒧᑦ ᐱᖁᔭᕐᒧᑦ (FAIA) ᐅᖄᓚᕝᕕᐅᔪᓐᓇᖅᑐᒧᑦ ᐊᐱᖅᑯᑎᒃᓴᖃᕐᓂᕈᑎᒃ ᐃᑲᔪᖅᑕᐅᔭᕆᐊᖃᕈᑎᒡᓘᓐᓃᑦᐆᒥᖓ ᓈᓴᐅᒻᒥᒃ ᐊᑐᕐᓗᑎᒃ, 1-844-534-1038. ᑕᒪᓐᓇ ᐅᖄᓚᓂᖅ ᖃᐅᔨᓴᖅᑕᐅᓂᐊᖅᐳᖅ ᖃᐅᔨᒪᓕᕈᒪᓂᕐᒧᑦ ᐃᑲᔪᖅᑕᐅᔭᕆᐊᖃᕐᓂᕐᒧᑦ ᐱᔭᐅᔭᕆᐊᓕᖕᒧᑦ ᑐᕌᖅᑎᑕᐅᓗᓂ ᓄᓇᓕᖕᓂ ᐱᑐᐃᓐᓇᐅᙱᑦᑐᓕᕆᓂᕐᒧᑦ ᑖᓐᓇᓗ ᐃᑲᔪᕈᓐᓇᖅᖢᓂ ᐱᓇᔫᑎᒋᔭᐅᔪᓄᑦ ᐊᑐᖅᑕᐅᔪᓐᓇᖅᑐᓂᒡᓗ ᓇᓗᓇᐃᖅᓯᔪᓐᓇᖅᖢᓂ.
ᓄᓇᓕᖕᓂ ᐃᑲᔪᖅᑕᐅᕕᑦ
ᑭᕙᓪᓕᕐᒥᑦ ᑎᒍᔭᐅᓯᒪᔪᓕᕆᔨᑦ ᐊᒡᓚᕝᕕᖏᑦ ᑭᒃᑯᑐᐃᓐᓇᓄᑦ ᒪᑐᓯᒪᔪᑦ ᑭᓯᐊᓂ ᑐᓴᖅᑎᑦᑎᔾᔪᑕᐅᒃᑲᓐᓂᖅᐸᑦ. ᑕᒪᕐᒥᑦᑎᐊᖅ ᑭᕙᓪᓕᕐᒥᑦ ᓄᓇᓕᖕᓂ ᑎᒍᔭᐅᓯᒪᔪᓕᕆᓂᕐᒧᑦ ᐱᓕᕆᕝᕕᐅᕙᒃᑐᑦ ᐅᖃᖃᑦᑕᕆᐊᖃᖅᐳᑦ ᐅᖄᓚᐅᑎᒃᑯᑦ ᐊᕕᑦᑐᖅᓯᒪᔪᓂᑦ ᐊᖓᔪᖅᑳᕆᔭᐅᔪᑦ ᑎᒍᔭᐅᓯᒪᔪᓕᕆᓂᕐᒧᑦ ᐱᓕᕆᔨᒧᑦ ᐊᑐᕐᓗᑎᒃ ᐆᒥᖓ ᓈᓴᐅᒻᒥᒃ: 1-888-770-7696.
ᒪᑐᔭᐅᔪᑦ/ᓄᖅᑲᖅᑎᑕᐅᔪᑦ/ᐊᑐᕈᓐᓃᖅᑎᑕᐅᔪᑦ ᐱᔨᑦᑎᕋᕐᓂᕆᔭᐅᔪᑦ:
ᐃᑲᔪᖅᑕᐅᕝᕕᓕᕆᕝᕖᑦ
ᖃᐅᔨᒪᑦᑎᐊᕈᒪᓂᕐᒧᑦ ᖃᓄᐃᙱᑦᑎᐊᕐᓂᖏᓐᓄᑦ ᖁᐊᖅᓵᕐᓇᖅᑐᒦᙱᓐᓂᖏᓐᓄᓪᓗ ᐃᖅᑲᓇᐃᔭᖅᑎᓕᒫᑦ ᑎᒍᔭᐅᓯᒪᔪᓪᓗ ᐃᓂᒋᔭᒃᑎᓐᓂ, ᑕᒪᒥᑦᑎᐊᖅ ᐅᐸᒡᓗᒋ ᐅᒡᓚᖅᐸᖕᓃᑦ ᓄᖅᑲᖅᑎᑕᐅᓂᐊᖅᐳᑦ ᑐᓴᖅᑎᑦᑎᔪᖃᒃᑲᓐᓂᓚᐅᙱᓐᓂᖓᓂ.
ᐱᕙᓪᓕᐊᔪᓕᕆᔨᒃᑯᑦ ᐃᖏᕐᕋᔪᓕᕆᔨᒃᑯᓪᓗ ᐱᓕᕆᕝᕕᖓᑕ ᐱᔨᑦᑎᕈᑎᖏᑦ
ᐱᔨᑦᑎᕋᖅᑕᐅᖏᓐᓇᖅᑐᑦ:
ᒥᑦᑕᕐᕕᓕᕆᔩᑦ ᐊᐅᓚᔾᔪᑏᑦ ᐋᖅᑭᐅᒪᔾᔪᑎᓪᓗ ᐃᑲᔪᖅᑎᐅᔪᑦ ᓱᓕ ᑲᔪᓯᓂᐊᖅᑐᑦ ᓄᓇᕗᒻᒥ ᒥᑦᑕᕐᕕᖏᓐᓄᑦ ᐱᓕᕆᕝᕕᖓᓐᓄᑦ ᑲᖏᖅᖠᓂᕐᒥᑦ.
ᐊᑐᕈᓐᓇᕐᓂᖅ ᑭᕙᓪᓕᕐᒥᑦ ᒥᑦᑕᕐᕕᐅᑉ ᐅᑕᖅᑭᕕᖓᓂᒃ ᐃᒡᓗᕐᔪᐊᒥᒃ ᐃᓱᓕᑦᑕᖅᑎᑕᐅᕗᖅ ᐃᖅᑲᓇᐃᔭᖅᑎᓄᑐᐊᖅ, ᖃᖓᑕᓂᐊᖅᑐᓄᑦ, ᐃᓄᖕᓄᓪᓗ ᐃᑲᔪᖅᑐᓄᑦ ᐃᑭᒪᕙᒃᑐᓂᒃ.
ᒪᑐᐊᑦ ᖃᖓᓕᒫᑦᑎᐊᒃᑯᑦ ᐊᑐᖅᑕᐅᔭᕆᐊᖃᖅᐳᑦ ᑕᒪᐃᓐᓂᒃ ᓄᓇᕗᒻᒥ ᒥᑦᑕᕐᕕᐅᑉ ᐅᑕᖅᑭᕕᖏᓐᓂᒃ.
ᐋᖅᑭᒋᐊᖅᑕᐅᓯᒪᓕᖅᑐᑦ ᐱᔨᑦᑎᕋᕈᑕᐅᕙᒃᑐᑦ:
- ᓄᓇᓕᓐᓂᑦ ᐅᔭᕋᖕᓂᐊᕐᓂᓕᕆᔨᒃᑯᑦ ᑎᑎᕋᕐᕕᖏᑦ ᐊᕐᕕᐊᓂᑦ ᐱᓕᕆᔨᖏᑦ ᐊᖏᕐᕋᖏᓐᓂᑦ ᐱᓕᕆᖃᑦᑕᕐᓂᐊᖅᑐᑦ.
- ᐊᑐᐃᓐᓇᐅᔪᓕᒫᑦ ᐃᖏᕐᕋᔪᓕᕆᔨᒃᑯᑦ ᐱᔨᑦᑎᕈᑎᖏᑦ ᑭᕙᓪᓕᕐᒥᑦ ᐊᑐᐃᓐᓇᐅᔪᑦ ᐃᑭᐊᖅᑭᕕᒃᑯᑦ.
- ᐊᓯᖏᑦ ᑕᒪᕐᒥᑦᑎᐊᖅ ᐱᓕᕆᕝᕕᒋᔭᐅᔪᓂ ᐱᔨᑦᑎᕋᕐᓃᑦ ᑭᕙᓪᓕᕐᒥᐅᓂᑦ ᓅᑎᑦᑎᓕᖅᐳᑦ ᐃᖅᑲᓇᐃᔭᖃᑦᑕᕐᓂᐊᓕᖅᖢᑎᒃ ᐊᖏᕐᕋᕆᔭᒥᓂ, ᑐᑭᒧᐊᖅᑎᑦᑎᔩᑦ ᐊᓯᖏᓪᓗ ᐊᑐᖅᑕᐅᓪᓚᕆᒋᐊᓖᑦ ᐃᖅᑲᓇᐃᔭᖅᑏᑦ ᑎᑎᕋᕐᕕᖕᒦᖦᖢᑎᒃ.
- ᓄᓇᒃᑰᕈᑎᓕᕆᔨᒃᑯᑦᓇᓗᓇᐃᔭᕐᕕᐅᕙᖕᓂᖏᑦ ᑕᒪᕐᒥᑲᓴᓘ ᓚᐃᓴᓂᒃ ᓄᑖᑕᙳᕆᐊᖅᑎᑦᑎᓃᑦ ᓱᓕ ᐱᓕᕆᐊᖑᖃᑦᑕᖅᐳᑦ.
- ᑭᒃᑯᑐᐃᓐᓇᓄᑦ ᓇᓗᓇᐃᒃᑯᑕᖅᑖᖅᑎᑦᑎᕙᖕᓂᖅ ᑭᕙᓪᓕᕐᒥᐅᓂᑦ ᐱᓕᕆᕝᕕᐅᔪᓐᓴᖅᐳᖅ ᑭᓯᐊᓂ ᑐᐊᕕᕐᓇᖅᑐᑎᒍᑦ.
- ᓄᑖᓂᒃ ᐊᖁᑦᑐᓐᓇᐅᑎᓂᒃ ᐱᓕᕆᔪᖃᔾᔮᙱᓚᖅ ᑭᕙᓪᓕᕐᒥᑦ ᑭᓯᐊᓂ ᓇᓗᓇᐃᖅᑕᐅᓚᐅᙱᓐᓂᖓᓂᒃ ᖃᖓᒃᑯᑦ ᐱᔪᓐᓇᖅᓯᓛᕐᒪᖔᑕ ᑕᐃᒪᐃᓕᖓᓗᓂ.
- ᑐᒃᓯᕋᐅᑏᑦ ᐱᔨᑦᑎᕋᕈᑎᓄᑦ ᓇᓂᔭᐅᔪᓐᓇᕐᑐᑦ ᐃᑭᐊᕿᕕᒃᑯᑦ ᐅᕙᓂ https://www.gov.nu.ca/motor_vehicles ᐅᑯᓄᖓ:
- ᐊᖁᑦᑐᓐᓇᐅᑎᓄᑦ ᓄᑖᙳᕆᐊᖅᑎᑦᑎᓂᖅ
- ᓄᓇᕗᒻᒥᑦ ᓇᓗᓇᐃᒃᑯᑕᕐᓄᑦ ᓄᑖᙳᕆᐊᖅᑎᑦᑎᓂᖅ
- ᓄᓇᒃᑰᕈᑎᓄᑦ ᐊᑎᓕᐅᕐᕕᖕᒧᑦ ᓄᑖᙳᕆᐊᖅᑎᑦᑎᓂᖅ
- ᑐᒃᓯᕋᐅᑏᑦ ᐊᖁᑦᑐᓐᓇᐅᑎᓂᑦ, ᓄᓇᑰᕈᑎᓯᐅᕐᓂᖅ, ᐊᒻᒪᓗ ᐱᕐᕈᓗᐊᕿᔪᓂ ᐅᓂᑳᕐᓂᖅ
ᒪᑐᔭᐅᔪᑦ/ᓄᖅᑲᖅᑎᑕᐅᔪᑦ/ᐊᑐᕈᓐᓃᖅᑎᑕᐅᔪᑦ ᐱᔨᑦᑎᕋᕐᓂᕆᔭᐅᔪᑦ:
ᑕᒪᕐᒥᑦᑎᐊᖅ ᑐᐊᕕᕐᓇᙱᑦᑐᑦ ᐃᖏᕐᕋᔾᔪᑎᓄᑦ ᐱᔨᑦᑎᕋᕐᓂᐅᕙᒃᑐᑦ ᑭᕙᓪᓕᕐᒥᑦ ᐃᓚᒋᔭᐅᓪᓗᓂ ᐊᖁᑎᒥᒃ ᖃᐅᔨᓴᖅᓯᕙᖕᓃᑦ, ᑕᒪᕐᒥᑦᑎᐊᖅ ᑭᕙᓪᓕᕐᒧᑦ ᑎᑭᑉᐸᒃᑐᓄᑦ ᐃᓂᒥ ᐱᓕᕆᐊᖑᕙᒃᑐᑦ, ᑕᒪᕐᒥᑦᑎᐊᖅ ᐱᓕᕆᕝᕕᒋᔭᐅᔪᒥᑦ ᑲᔪᓯᑎᑕᐅᔪᑦ ᑲᑎᒪᕐᔪᐊᕐᓃᑦ ᑭᕙᓪᓕᕐᒥᑦ ᐊᒻᒪ ᑕᒪᕐᒥᒃ ᐅᐸᒃᓯᒪᓗᒋᓪᓗ ᐊᔪᕈᓐᓃᖅᓴᖅᑎᑕᐅᕙᖕᓃᑦ ᓄᖅᑲᖅᑎᑕᐅᕗᑦ.
ᐊᕙᑎᓕᕆᔨᒃᑯᑦ ᐱᔨᑦᑎᕋᕐᓂᖏᑦ
ᐱᔨᑦᑎᕋᖅᑕᐅᖏᓐᓇᖅᑐᑦ:
ᐊᕙᑎᓕᕆᔨᒃᑯᑦ ᑲᔪᓰᓐᓇᖅᐳᑦ ᐱᑎᑦᑎᕙᒃᖢᑎᒃ ᐱᔨᑦᑎᕋᕐᓂᕆᔭᐅᔪᓂᒃ ᓄᓇᕘᓕᒫᒥ ᑕᐃᒪᐃᑉᐸᒃᑕᒥᑎᑐᑦ, ᒪᓕᒃᖢᑎᒃ ᐊᑐᖁᔭᐅᓯᒪᔪᓂ ᑭᒃᑯᑐᐃᓐᓇᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᑐᖅᑕᐅᕙᒃᑐᓂᒃ.
ᐱᓕᕆᕝᕕᒋᔭᐅᔪᖅ ᑭᐅᓯᖃᑦᑕᐃᓐᓇᕐᓂᐊᖅᐳᖅ ᐊᑲᐅᙱᓕᐅᕈᑎᒋᐅᔪᓄᑦ ᓂᕐᔪᑎᓄᑦ ᑯᕕᔪᓄᓪᓗ. ᑕᒪᕐᒥᑦᑎᐊᖅ ᑯᕕᔪᑦ ᐅᖃᐅᓯᐅᔭᕆᐊᖃᖅᐳᑦ ᓄᓇᕗᒻᒥ ᑯᕕᔪᓄ ᐅᖄᓚᕝᕕᐅᕙᒃᑐᒧᑦ ᐅᕗᖓ, 867-920-8130, 24−ᓄᑦ ᐃᑲᕐᕋᓄᑦ ᐅᓪᓗᒥ: https://www.gov.nu.ca/environment/documents/spill-response
ᓇᓄᕐᓂᑦ ᖃᐅᔨᓴᖅᑏᑦ ᓱᓕ ᑲᔪᓯᓂᐊᖅᑐᑦ ᓄᓇᓕᓐᓂᑦ ᑖᒃᑯᓇᓂ ᓇᓄᖃᖃᑦᑕᕐᓂᖅᓴᐅᔪᓂᑦ (ᐱᓗᐊᖅᑐᒥᑦ. ᐊᕐᕕᐊᑦ ᐊᒻᒪ ᑎᑭᕋᔪᐊᕐᒥᑦ), ᐊᔪᕆᖅᓱᖅᑕᐅᓯᒪᓗᑎᑦ ᑖᒃᑯᐊ ᐃᓄᓐᓂᑦ ᑭᓇᒃᑯᑐᐃᓐᓇᕐᓂᑦ ᑲᑎᓯᔭᕆᐊᖃᙱᑦᑐᑦ ᐊᒻᒪ ᒪᓕᓪᓗᒋᑦ ᒪᓕᒋᐊᓖᑦ ᓇᓗᓇᐃᖅᑕᐅᓯᒪᔪᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᓘᑦᑖᖅ ᐊᖓᔪᖅᑳᖓᑕ.
ᒪᑐᔭᐅᔪᑦ/ᓄᖅᑲᖅᑎᑕᐅᔪᑦ/ᐊᑐᕈᓐᓃᖅᑎᑕᐅᔪᑦ ᐱᔨᑦᑎᕋᕐᓂᕆᔭᐅᔪᑦ
ᑕᒪᕐᒥᒃ ᐆᒪᔪᕐᓂᐊᖅᑏᑦ ᐊᒡᓚᕝᕕᖏᑦ ᒥᕐᙳᐃᖅᓯᕐᕕᖕᒧᓪᓗ ᑎᑎᕋᕕᖏᑦ ᑭᕙᓪᓕᕐᒥᑦ ᒪᑐᓯᒪᔪᑦ ᑭᒃᑯᑐᐃᓐᓇᓄᑦ ᑭᓯᐊᓂ ᑐᓴᖅᑎᑦᑎᔾᔪᑕᐅᒃᑲᓐᓂᖅᐸᑦ. ᐆᒻᒪᔪᕐᓂᐊᖅᑎᓄᑦ ᐱᓕᕆᐊᔅᓴᖅᑕᖃᖅᐸᑦ ᒪᑐᐃᖓᐃᓐᓇᕐᓂᐊᖅᑐᑦ ᐊᑐᐃᓐᓇᐅᖏᓐᓇᕐᓂᐊᖅᑐᑦ ᖃᖓᓕᒫᒃᑯᑦ, ᐅᖃᓛᓗᑎᑦ ᐅᑯᓄᖓ:
- ᐊᕐᕕᐊᕐᓂ: 867-857-6944
- ᖃᒪᓂ'ᑐᐊᖅ: 867-793-1692
- ᐃᒡᓗᓕᒑᕐᔪᒃ: 867-222-0330
- ᓴᓪᓖᑦ: 867-222-0058
- ᓇᐅᔮᑦ: 867-222-1437
- ᑲᖏᖅᖠᓂᖅ: 867-645-6447
- ᑎᑭᕋᕐᔪᐊᖅ: 867-341-0388
ᒐᕙᒪᓕᕆᔨᒃᑯᑦ
ᐋᖅᑭᒋᐊᖅᑕᐅᓯᒪᓕᖅᑐᑦ ᐱᔨᑦᑎᕋᕈᑕᐅᕙᒃᑐᑦ:
ᒐᕙᒪᒃᑯᓐᓂᒃ ᑐᓴᐅᒪᔪᓕᕆᔨᐅᑉ ᑎᑎᕋᕐᕕᖏᑦ ᑭᕙᓪᓕᕐᒥᑦ ᒪᑐᐃᓯᒪᔪᑦ ᐃᓄᓐᓄᑦ. ᒐᕙᒪᒃᑯᓐᓂᒃ ᑐᓴᐅᒪᔪᓕᕆᔨᐅᑉ ᑎᑎᕋᕐᕕᖓ ᑖᒃᑯᐊ ᐱᓕᕆᐊᖏᓐᓂᑦ ᑲᔪᓯᔪᑦ ᐊᖏᕐᕋᖏᓐᓂᑦ ᐅᖃᕐᕕᔅᓴᐅᔪᑦ ᐅᑯᐊ:
- ᑲᖏᖅᖠᓂᖅ: ᓕᑎᐊ ᑕᑎ, ᑭᕙᓪᓕᕐᒥᑦ ᐊᖏᔪᖅᑳᖓ, ᑭᕙᓪᓕᖅ, @email
- ᓇᐅᔮᑦ: ᒍᕋᑎ ᐸᓂᑲ−ᑎᓇᔅᓗ, ᒐᕙᒪᒃᑯᓐᓂᒃ ᑐᓴᐅᒪᔪᓕᕆᔨᖓ, @email
- ᓴᓪᓖᑦ: ᐃᓕᓴᐱ ᓂᖏᐅᖓᓐ, ᒐᕙᒪᒃᑯᑦ ᑐᓴᒐᒃᓴᓕᕆᔨᖓ, @email
- ᐃᒡᓗᓕᒑᕐᔪᒃ: ᒪᓕᑭ ᑲᑎᒐᑦᓯᐊᖅ, ᒐᕙᒪᒃᑯᑦ ᑐᓴᒐᒃᓴᓕᕆᔨᖓ, @email
- ᑎᑭᕋᕐᔪᐊᖅ: ᓯᐅᕋᓐ ᐅᑲᓕᖅ, ᒐᕙᒪᒃᑯᑦ ᑐᓴᒐᒃᓴᓕᕆᔨᖓᑦ, @email
- ᐊᕐᕕᐊᕐᓂ: ᓯᐅᕋᓐ ᐅᑲᓕᖅ, ᒐᕙᒪᒃᑯᑦ ᑐᓴᒐᒃᓴᓕᕆᔨᖓᑦ, @email
- ᖃᒪᓂ'ᑐᐊᖅ: ᒐᐃᐳᕆᐅᓪ ᑭᖏᓕᒃ, ᒐᕙᒪᒃᑯᑦ ᑐᓴᒐᒃᓴᓕᕆᔨᖓᑦ, @email
ᐃᖅᑲᓇᐃᔭᖅᑐᓕᕆᔨᒃᑯᑦ ᐱᓕᕆᕝᕕᖓ
ᓄᓇᕗᑦ ᒐᕙᒪᒃᑯᖏᑦᑕ ᑎᑎᕋᕐᕕᖏᑦ ᓴᓂᑭᓗᐊᒥ ᐊᒻᒪᓗ ᑭᕙᓪᓕᕐᒥᐅᓂᑦ ᒪᑐᓯᒪᔪᑦ ᑭᒃᑯᑐᐃᓐᓇᖕᓄᑦ.
ᐱᔭᕆᐊᖃᓪᓚᕆᙱᑦᑐᓕᒫᑦ ᓄᓇᕗᑦ ᒐᕙᒪᒃᑯᑦ ᐃᖅᑲᓇᐃᔭᖅᑎᖏᑦ ᓴᓂᑭᓗᐊᒥ ᐊᒻᒪᓗ ᑭᕙᓪᓕᕐᒥᐅᓂᑦ ᐊᖏᕐᕋᒥᓂ ᐃᖅᑲᓇᐃᔭᕆᐊᖃᖅᑐᑦ. ᐊᖏᔪᖅᑳᕕᑦ ᐱᓕᕆᖃᑎᒋᓂᐊᖅᐹᑎᑦ ᐱᖁᑎᑖᕆᔭᕆᐊᓕᖕᓂ ᐱᑎᑕᐅᓗᑎᑦ ᐊᑐᒐᒃᓴᓂᒡᓘᓐᓃᑦ ᐊᖏᕐᕋᕐᓂ ᐃᖅᑲᓇᐃᔭᕐᓂᐊᖅᑎᓪᓗᑎᑦ. ᐊᖏᕐᕋᒥᓂ ᐃᖅᑲᓇᐃᔭᕐᓂᐊᖅᑐᓄᑦ ᐊᑐᖁᔭᐅᔪᑦ ᐃᑲᔫᑎᒃᓴᐃᓪᓗ ᓄᓇᕗᑦ ᒐᕙᒪᒃᑯᑦ ᐃᑭᐊᖅᑭᕕᖓᓂ ᓇᓂᔭᐅᔪᓐᓇᖅᐳᑦ ᐅᕙᓂ: http://intranet/covid19/ ᐃᕐᙲᓐᓈᖅᑕᐅᒃᑯᓪᓗ ᓇᒃᓯᐅᔾᔭᐅᓂᐊᖅᖢᑎᒃ.
ᐃᖅᑲᓇᐃᔭᕐᕕᖕᓂ ᐃᕐᙲᓐᓈᖅᑕᐅᒃᑯᑦ ᑎᑎᖅᑲᐅᓯᐊᕆᕙᒃᑕᑎᑦ ᐱᔪᓐᓇᖅᑕᑎᑦ ᐅᕙᓂ https://www.office.com/ ᐅᕝᕙᓘᓐᓃᑦ Microsoft Outlook ᐅᖃᓘᑎᕋᓛᕐᓄᐊᕐᓗᒍ.
ᐱᔭᕆᐊᖃᓪᓚᕆᙱᑦᑐᑦ ᓄᓇᕗᑦ ᒐᕙᒪᒃᑯᑦ ᐃᖅᑲᓇᐃᔭᖅᑎᖏᑦ ᓴᓂᑭᓗᐊᕐᒥᓗ ᑭᕙᓪᓕᕐᒥᓗ ᐊᖏᕐᕋᒥᓂ ᐱᓕᕆᔪᓐᓇᖅᑐᑦ, ᐊᖏᕐᕋᒥᓂ ᐃᖅᑲᓇᐃᔭᕆᐊᖃᖅᐳᑦ. ᑕᐃᒪᐃᙱᑉᐸᑦ, ᐃᖅᑲᓇᐃᔭᕐᕕᖕᒥᓂ ᐱᓕᕆᖃᑦᑕᕐᓂᐊᖅᐳᑦ ᒪᓕᖕᓂᐊᖅᖢᑎᒡᓗ ᐋᓐᓂᐊᖅᑕᐃᓕᒪᓂᕐᒧᑦ, ᐊᑦᑕᕐᓇᖅᑕᐃᓕᒪᓂᕐᒧᑦ ᖃᓄᐃᙱᑦᑎᐊᕐᓂᕐᒧᓪᓗ ᖃᐅᔨᓴᕈᑎᓂᒃ ᓄᓇᕗᑦ ᒐᕙᒪᒃᑯᑦ ᐃᖅᑲᓇᐃᔭᕐᕕᖏᓐᓄᑦ ᐊᒻᒪ ᐃᖅᑲᓇᐃᔭᕐᕕᖕᒧᑦ ᐅᑎᕐᓂᐊᖅᑐᓄᑦ ᖃᐅᔨᓴᕈᑎᒥᒃ ᓄᓇᕗᑦ ᒐᕙᒪᒃᑯᑦ ᐃᖅᑲᓇᐃᔭᖅᑎᖏᓐᓄᑦ, ᐅᖃᓕᒫᕐᓗᒍ ᓄᕙᒡᔪᐊᕐᓇᖅ-19−ᒧᑦ ᐊᐱᖅᑯᑏᑦ ᑭᒡᒍᓰᓪᓗ ᐊᒻᒪ ᒪᓕᒡᓗᒋᑦ ᓴᖅᑭᑎᑕᐅᓯᒪᔪᑦ ᐋᓐᓂᐊᖅᑕᐃᓕᒪᓂᕐᒧᑦ ᐊᑦᑕᕐᓇᖅᑕᐃᓕᒪᓂᕐᒧᓪᓗ ᓇᓗᓇᐃᒃᑯᑕᐃᑦ ᓄᕙᒡᔪᐊᕐᓇᖅ-19−ᒥ ᐊᐃᑦᑐᕐᓗᐃᑦᑕᐃᓕᒪᖁᓪᓗᒋᑦ. ᖃᐅᔨᓴᕈᑎᑦ, ᐊᐱᖅᑯᑎᑦ ᑭᐅᔾᔪᑎᓪᓗ ᐊᒻᒪ ᐊᑭᓐᓇᕐᒥᐅᑕᐃᑦ ᓇᓂᔪᓐᓇᖅᑕᑎᑦ ᓄᓇᕗᑦ ᒐᕙᒪᒃᑯᑦ ᐃᑭᐊᖅᑭᕕᒃᑰᕈᑖᓂ: http/intranet/covid19/.
ᖃᐅᔨᒋᐊᕐᓗᑎᑦ @email ᓄᓇᕗᑦ ᒐᕙᒪᒃᑯᑦ ᐃᑭᐊᖅᑭᕕᒃᑰᕈᑖᓂ ᐱᖃᙱᒃᑯᕕᑦ ᐊᒻᒪ ᓇᓕᐊᖕᓂᑐᐃᓐᓇᖅ ᐃᑲᔫᑎᒃᓴᑦ ᐊᔾᔨᖓᓂ ᓴᖅᑭᔮᖅᑎᑕᐅᔪᓂᑦ ᐱᔭᕆᐊᖃᕐᓗᑎᑦ.
ᒫᓐᓇᐅᔪᖅ, ᓄᓇᕗᑦ ᒐᕙᒪᒃᑯᑦ ᐃᖅᑲᓇᐃᔭᖅᑎᖏᑦ ᐊᓯᓕᒫᖏᓐᓂ ᓄᓇᓕᖕᓂ ᐃᖅᑲᓇᐃᔭᕆᐊᖃᑦᑕᕆᐊᖃᖅᐳᑦ ᓴᓂᑭᓗᐊᕐᒥᐅᑦ ᑭᕙᓪᓕᕐᒥᐅᓪᓗ ᐊᓯᖏᑦ.
ᓄᓇᕗᒻᒥᐅᓂ ᖃᓄᐃᙱᑦᑎᐊᖅᑎᑦᑎᓇᓱᒡᓗᑕ ᑕᒪᑦᑕ ᑲᒪᒋᔭᒃᓴᖃᖅᐳᒍᑦ! ᐳᐃᒍᖅᑕᐃᓕᒋᑦ: ᐊᒡᒐᑎᑦ ᐋᓪᓕᕋᐃᓪᓗ ᐅᐊᓴᖃᑦᑕᕐᓗᒋᑦ, ᖃᓂᒌᓗᐊᖅᑕᐃᓕᕙᒡᓗᓯ, ᐃᖢᐊᖅᓴᐃᔨᓄᑦ ᐅᖃᐅᔾᔪᐃᔾᔪᑕᐅᔪᓂᑦ ᓈᓚᒃᐸᒡᓗᓯ, ᐊᖏᕐᕋᖅᓯᒪᐃᓐᓇᕐᓗᑕᓗ ᖃᓂᒪᒍᑦᑕ.