ᓯᑕᒪᑦ ᓄᑖᑦ ᓄᕙᔾᔪᐊᕐᓇᖅ 19-ᑖᖅᓯᒪᔪ ᓄᓇᕗᒻᒥ
ᐱᕙᓪᓕᐊᔪᑦ ᑐᓴᕋᑦᓴᑦ
ᓯᑕᒪᑦ ᓄᑖᑦ ᓄᕙᔾᔪᐊᕐᓇᖅ 19-ᑖᖅᓯᒪᔪ ᓄᓇᕗᒻᒥ
ᐃᖃᓗᐃᑦ, ᓄᓇᕗᑦ (ᓄᕕᐱᕆ 19, 2020) − ᐅᓪᓗᒥ, ᓄᓇᕗᒻᒥ ᑲᑎᓕᒫᖅᑐᒋᑦ 74 ᓇᓗᓇᐃᖅᑕᐅᓯᒪᔪᑦ ᓄᕙᔾᔪᐊᕐᓇᖅ 19-ᑖᖅᓯᒪᔪᑦ. ᐱᖓᓱᑦ ᓄᑖᑦ ᓇᓗᓇᐃᖅᑕᐅᓯᒪᔪᑦ ᐊᕐᕕᐊᓂ, ᓄᓇᖓᓐᓂ ᑲᑎᓕᒫᖅᑐᒋᑦ ᓄᕙᔾᔪᐊᕐᓇᖅᑖᖅᓯᒪᔪᑦ 57. ᐊᑕᐅᓯᒃᑲᓐᓂᕐᒥᒃ ᓇᓗᓇᐃᖅᑕᐅᓯᒪᔪᖃᖅᑐᖅ ᑲᖏᖅᖠᓂᕐᒥ, ᓄᓇᖓᓐᓂ ᑲᑎᓕᒫᖅᑐᒋᑦ ᓇᓗᓇᐃᖅᑕᐅᓯᒪᔪᑦ 7. ᐊᓯᔾᔨᖅᓯᒪᙱᑦᑐᑦ ᓄᕙᔾᔪᐊᕐᓇᖅᑐᓖᑦ ᑎᑭᕋᕐᔪᐊᕐᒥ ᓴᓂᑭᓗᐊᕐᒥᓗ.
“ᓄᑖᑦ ᓄᕙᔾᔪᐊᕐᓇᖅᑖᖅᓯᒪᔪᑦ ᑲᖏᖅᖠᓂᕐᒥ ᑐᕌᖓᔪᑦ ᓯᕗᓪᓕᕐᒥ ᓇᓗᓇᐃᖅᑕᐅᓚᐅᖅᑐᓄᑦ. ᓇᓗᓇᐃᖅᑕᐅᓯᒪᙱᑦᑐᖅ ᓄᓇᓕᓐᓂ ᓯᐊᕐᒪᐸᓪᓕᐊᓂᖓᓂᒃ ᓴᓂᑭᓗᐊᕐᒥ, ᑲᖏᖅᖠᓂᕐᒥ ᑎᑭᕋᕐᔪᐊᒥᓗ. ᐃᓘᓐᓇᑎᒃ ᓇᓗᓇᐃᖅᑕᐅᓯᒪᔪ ᐊᓂᑦᑕᐃᓕᑎᑕᐅᔪᑦ ᖃᓄᐃᒐᑎᓪᓗ. ᓱᓕ ᑲᔪᓯᒍᑎᖃᖅᑐᒍᑦ ᑲᑎᔭᒥᓂᐅᔪᓕᒫᓂᒃ ᐊᑦᑐᖅᑕᐅᓯᒪᔪᓕᒫᓂ ᓄᓇᓕᓐᓂ ᖃᐅᔨᓴᖅᐸᓪᓕᐊᖏᓐᓇᖅᑐᑕᓗ ᐃᓘᓐᓇᖏᓐᓂᒃ ᐊᓂᑦᑕᐃᓕᒋᐊᖃᖅᑎᑕᐅᔪᓂᒃ,” ᐅᖃᖅᓯᒪᔪᖅ ᓘᑦᑖᖅ ᒪᐃᑯᓪ ᐸᑐᓴᓐ, ᓄᓇᕗᒻᒥ ᐋᓐᓂᐊᖃᕐᓇᖏᑦᑐᓕᕆᔨᒻᒪᕆᒃ.
ᓄᕕᐱᕆ 18-ᒧᓄᑦ, 103 ᖃᐅᔨᓴᖅᑕᐅᓯᒪᔪᑦ ᓴᓂᑭᓗᐊᕐᒥ ᓄᕙᔾᔪᐊᕐᓇᖅᑐᖃᙱᑦᑐᑦ. ᑲᖏᖅᖠᓂᕐᒥ, 104 ᖃᐅᔨᓴᖅᑕᐅᓯᒪᔪᑦ ᓄᕙᔾᔪᐊᕐᓇᖅᑐᖃᙱᑦᑐᑦ. ᐊᕐᕕᐊᓂ 130 ᖃᐅᔨᓴᖅᑕᐅᓯᒪᔪᑦ ᓄᕙᔾᔪᐊᕐᓇᖅᑐᖃᙱᑦᑐᑦ. ᖃᐅᔨᓴᖅᑕᐅᓯᒪᔪᑦ ᑎᑭᕋᕐᔪᐊᒥ ᖁᓕᑦ ᓄᕙᔾᔪᐊᕐᓇᖅᑐᖃᙱᑦᑐᑦ.
ᑭᓇᑐᐃᓐᓇᖅ ᖃᓂᒋᔭᖃᖅᑐᒥᓂᐅᓱᕆᒍᓂ ᓄᕙᔾᔪᐊᕐᓇᖅ 19-ᓕᒻᒧᑦ ᐅᖄᓚᖁᔭᐅᔪᖅ ᓄᕙᔾᔪᐊᕐᓇᐅᑉ ᒥᑦᓵᓄᑦ ᐅᖃᓚᕕᒻᒧᑦ 1-888-975-8601 ᐊᑯᓐᓂᖏᓐᓂ 10 ᐅᓪᓛᓴᒃᑯᑦ ᐊᒻᒪᓗ 6 ᐅᓐᓄᓴᒃᑯᑦ, ᖃᐅᔨᒃᑲᐃᑦᓴᐅᑎᒋᓗᑎᓪᓘᓐᓃᑦ ᓄᓇᓕᓐᓂ ᐋᓐᓂᐊᕐᕕᖓᓄᑦ, ᐊᓂᑦᑕᐃᓕᑦᓴᐅᑎᒋᓕᕐᓗᑎᓪᓗ ᐊᖏᕐᕋᒥᓐᓂᒃ ᐅᓪᓗᓂᒃ 14-ᓂᒃ. ᐅᐸᒍᑎᑦᑕᐃᓕᓗᑎᒃ ᐋᓐᓂᐊᕐᕕᒻᒧᑦ.
ᓄᑖᖑᓂᖅᐹᓂᒃ ᑐᑭᓯᒋᐊᖃᑦᑕᕈᒪᒍᕕᑦ ᐃᑲᔫᑎᑦᓴᐃᓪᓗ ᒥᑦᓵᓄᑦ ᓄᕙᔾᔪᐊᕐᓇᖅ 19 ᓄᓇᕗᒻᒥ, ᐅᕗᖓᕐᓗᑎᑦ: www.gov.nu.ca/iu/aanniaqangnanngittulirijikku.
ᓄᑖᖑᓂᖅᐹᓂᒃ ᑐᑭᓯᒋᐊᖃᑦᑕᕈᒪᒍᕕᑦ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᒪᓕᑦᑕᐅᒋᐊᓕᓐᓂᒃ, ᐅᕗᖓᕐᓗᑎᑦ: https://www.gov.nu.ca/health/information/nunavuts-path
ᑐᓴᖅᑎᑦᓯᒋᐊᓚᖓᔪᑦ ᐱᕙᓪᓕᐊᔪᓕᕆᔨᓂᒃ ᖃᐅᔨᒃᑲᐃᓕᖅᑲᑕ 11:00 ᐅᓪᓛᓴᒃᑯᑦ ᑲᓇᓐᓇᕐᒥ ᓯᕿᕐᖑᔭᖓᒍᑦ, ᑕᓪᓕᒥᕐᒥ, ᓄᕕᐱᕆ 20.
###
ᐱᕙᓪᓕᐊᔪᓕᕆᔨᓄᑦ ᖃᐅᔨᒋᐊᕐᕕᑦᓵᒃ:
ᑲᐃᑦ ᒪᒃᓚᐅᑦ
ᐱᕙᓪᓕᐊᔪᓕᕆᓂᕐᒧᑦ ᑎᑎᕋᖅᑎ ᓯᕗᓕᖅᑎ ᓴᕕᖃᑖᕐᒧᑦ
867-975-5059
@email
ᑯᕆᔅ ᐳᓕᐊ
ᑐᓴᕋᑦᓴᓕᕆᓂᕐᒧᑦ ᐊᐅᓚᑦᓯᔨᐅᑲᐃᓐᓇᖅᑐᖅ
ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ
867-975-5949
@email