ᓄᓇᕗᑦ ᒐᕙᒪᖓ ᐊᑎᓕᐅᖅᐳᖅ ᑎᑎᕋᖅᓯᒪᔪᑎᒍᑦ ᑐᑭᓯᐅᒪᖃᑦᑕᐅᑎᓂᕐᒥᒃ ᓄᓇᕐᔪᐊᓕᒫᒥ ᐅᒥᐊᕐᔪᐊᒃᑯᑦ ᐊᐅᓚᑦᑎᔨᑦ ᑲᑐᔾᔨᖃᑎᒌᓂᑦ
ᐱᕙᓪᓕᐊᔪᑦ ᓴᖅᑭᑕᐅᔪᑦ
ᓄᓇᕗᑦ ᒐᕙᒪᖓ ᐊᑎᓕᐅᖅᐳᖅ ᑎᑎᕋᖅᓯᒪᔪᑎᒍᑦ ᑐᑭᓯᐅᒪᖃᑦᑕᐅᑎᓂᕐᒥᒃ ᓄᓇᕐᔪᐊᓕᒫᒥ ᐅᒥᐊᕐᔪᐊᒃᑯᑦ ᐊᐅᓚᑦᑎᔨᑦ ᑲᑐᔾᔨᖃᑎᒌᓂᑦ
ᐃᖃᓗᐃᑦ, ᓄᓇᕗᑦ (ᐊᐃᕐᕆᓕ 16, 2019) – ᓄᓇᕗᑦ ᒐᕙᒪᖓᑦ ᐊᒻᒪ ᑲᑐᔾᔨᖃᑎᒌᑦ ᐅᑭᐅᖅᑕᖅᑐᒥ ᓄᒃᑕᖅᑎᑦ ᐅᒥᐊᕐᔪᐊᒃᑯᑦ ᐊᐅᓚᑦᑎᔨᖏᑦ, ᐅᓪᓗᒥ ᐊᑎᓕᐅᖅᑲᐅᕗᑦ ᑎᑎᕋᖅᓯᒪᔪᑎᒍᑦ ᑐᑭᓯᐅᒪᖃᑦᑕᐅᑎᓂᕐᒥᒃ ᐱᓕᕆᖃᑎᒌᒍᒪᓪᓗᑎᒃ ᐅᒥᐊᕐᔪᐊᒃᑯᑦ ᐳᓚᕋᖅᐸᒃᑐᓂᑦ ᓄᓇᕘᒥ.
“ᓄᓇᕗᑦ ᒐᕙᒪᖓᑦ ᐊᖏᒡᓕᒋᐊᖅᑎᑦᑎᔪᒪᓪᓚᑦᑖᖅᐳᑦ ᐱᐅᓯᒋᐊᖅᑎᑦᑎᓗᑎᒡᓗ ᐱᕙᓪᓕᐊᔪᓕᕆᓂᕐᒥᒃ ᓇᖕᒥᓂᖅ ᒪᑭᑕᔪᓐᓇᖅᓯᒃᑲᓐᓂᖁᓪᓗᒋᑦ ᐊᒻᒪ ᓄᓇᓕᖕᓂ ᐃᖅᑲᓇᐃᔮᒃᓴᓂᒃ ᓴᖅᑭᑎᑦᑎᓗᑎᒃ ᐅᒥᐊᕐᔪᐊᒃᑯᑦ ᐳᓚᕋᖅᑐᓕᕆᔨᖏᓐᓂᒃ," ᐱᕙᓪᓕᐊᔪᓕᕆᔨᒃᑯᑦ ᐃᖏᕐᕋᔪᓕᕆᔨᒃᑯᓐᓄᓪᓗ ᒥᓂᔅᑕᖓ, ᑕᐃᕕᑦ ᐊᕿᐊᕈᖅ ᐅᖃᖅᑐᖅ. “ᑖᓐᓇ ᑎᑎᕋᖅᓯᒪᔪᑎᒍᑦ ᑐᑭᓯᐅᒪᖃᑦᑕᐅᑎᓂᖅ ᐱᓕᕆᖃᑎᒌᑦᑎᐊᖅᑎᑦᑎᓂᖅᓴᐅᓂᐊᖅᐳᖅ ᑲᑐᔾᔨᖃᑎᒌᓂᑦ ᑭᒡᒐᖅᑐᐃᔪᓂᑦ ᐅᒥᐊᕐᔪᐊᒃᑯᑦ ᐊᐅᓚᑦᑎᔨᓂᒃ ᐅᓄᕐᓂᖅᓴᓂᒃ ᑲᓇᑕᐅᑉ ᐅᑭᐅᖅᑕᖅᑐᖓᓂ.”
ᐊᖏᕈᑎ ᐱᓕᕆᖃᑎᒌᒃᐸᓪᓕᐊᑎᑦᑎᓂᐊᖅᐳᖅ ᐊᐅᓚᑦᑎᔨᓂᒃ ᐅᒥᐊᕐᔪᐊᒃᑯᑦ ᓄᒃᑕᖅᑎᓂᑦ ᐊᒻᒪ ᓄᓇᕗᒻᒥ ᐱᖃᖅᑎᐅᖃᑕᐅᔪᓂᑦ. ᑎᑎᕋᖅᓯᒪᔪᑎᒍᑦ ᑐᑭᓯᐅᒪᖃᑦᑕᐅᑎᓂᕐᒥᑦ ᐅᑯᐊ ᓇᓗᓇᐃᖅᓯᒪᔪᑦ ᐱᓕᕆᖃᑎᒌᒍᓐᓇᑐᐃᓐᓇᕆᐊᓖᑦ, ᐅᑯᐊᓗ ᓇᓗᓇᐃᖅᓯᔩᑦ ᑲᔪᓯᑎᑕᐅᕙᓪᓕᐊᓂᖓ: ᐃᓄᐃᑦ ᐅᒥᐊᕐᔪᐊᒃᑯᑦ ᐊᔪᕈᓐᓃᖅᓴᖅᑎᑕᐅᕙᓪᓕᐊᔪᒪᔪᑦ; ᐅᒥᐊᕐᔪᐊᒃᑯᑦ ᐊᑐᐃᓐᓇᐅᓂᖅ! ᓄᓇᓕᖕᓂ ᐱᕙᒌᔭᖅᑎᑦᑎᓗᑎᒃ ᐃᓕᓐᓂᐊᖅᑎᑦᑎᓂᖅ; ᑎᑎᕋᖅᓯᒪᔪᓂᒃ ᑐᓴᖅᑎᑦᑎᓂᐊᕐᓗᓂ ᒪᓕᒃᑕᐅᔭᕆᐊᓖᑦ ᐊᒻᒪ ᐱᕙᓪᓕᐊᑎᑦᑎᓂᖅ ᐃᓂᒋᔭᒥᑦ ᓇᓗᓇᐃᖅᓯᒪᔪᒧᑦ ᑐᑭᒧᐊᒍᑎᓂᑦ ᐃᓄᐃᑦ ᐱᖁᑎᖏᓐᓂᒃ ᓇᐅᑦᑎᖅᓱᖅᑎᑦ ᖃᐅᔨᒪᔭᖏᓐᓂᒃ ᐃᓕᖅᑯᓯᓕᕆᔨᒃᑯᓪᓗ ᓄᓇᕗᑦ ᒐᕙᒪᖓᓂ ᖃᐅᔨᒪᔭᖏᓐᓂᒃ ᐊᑐᕐᓗᑎᒃ.
“ᐅᑭᐅᖅᑕᖅᑐᒥ ᓄᒃᑕᖅᑎᑦ ᐅᒥᐊᕐᔪᐊᒃᑯᑦ ᐊᐅᓚᑦᑎᔨᖏᑦ ᐊᐅᓚᑦᑎᔪᒪᑦᑎᐊᖅᑐᑦ ᑲᔪᓯᑎᑕᐅᔪᓐᓇᖅᑐᓂᒃ ᑲᒪᒋᔭᕆᐊᓕᖕᓂᓪᓗ ᐳᓚᕋᖅᑐᓕᕆᓂᕐᒥᑦ ᐅᑭᐅᖅᑕᖅᑐᒥ," ᕗᕆᒡ ᔪᐊᔭᓐᓴᓐ ᐅᖃᖅᑐᖅ, ᐅᑭᐅᖅᑕᖅᑐᒥ ᓄᒃᑕᖅᑎᑦ ᐅᒥᐊᕐᔪᐊᒃᑯᑦ ᐊᐅᓚᑦᑎᔨᖏᓐᓄᑦ ᐃᓱᒻᒥᖅᑐᐃᔨ. “ᐅᖃᖃᑎᒌᑦᑎᐊᒃᑲᓐᓂᖃᑦᑕᓕᕐᓗᑎᒃ ᐊᒻᒪ ᐱᓕᕆᖃᑎᖃᑦᑎᐊᓕᒃᑲᓐᓂᕐᓗᑎᒃ ᓄᓇᓕᖕᓃᑦᑐᓂᒃ ᓯᕗᓪᓕᐅᑎᑕᐅᔪᒪᕗᖅ ᑲᑎᒪᔨᑦᑎᓐᓄᑦ. ᐅᒃᐱᕈᓱᒃᐳᒍᑦ ᑲᒪᒋᔭᖃᕐᓂᐊᖅᑐᑦ ᐳᓚᕋᖅᑐᓕᕆᓂᕐᒥᒃ ᓇᓗᓇᕈᓐᓃᖅᑎᑕᐅᓪᓗᐊᕐᒪᑦ ᑐᑭᓯᓇᖅᑐᒥᑦ ᐃᓄᐃᑦ ᑐᓴᐅᒪᖃᑦᑕᐅᑎᕙᒡᓗᑎᒃ, ᐃᓅᖃᑎᖃᕈᓐᓇᑦᑎᐊᕐᓗᑎᒃ ᐊᒻ ᓄᓇᓕᖕᓂ ᐃᑲᔫᑕᐅᔪᓐᓇᕐᓗᓂ.
ᐊᓕᐊᓇᐃᒍᓱᒃᐳᒍᑦ ᐊᑎᓕᐅᖃᑕᐅᔪᓐᓇᕋᑦᑕ ᑎᑎᕋᖅᓯᒪᔪᑎᒍᑦ ᑐᑭᓯᐅᒪᖃᑦᑕᐅᑎᓂᕐᒥᒃ ᓄᓇᕗᑦ ᒐᕙᒪᒃᑯᓐᓂ ᓂᕆᐅᒃᐳᒍᓪᓗ ᐱᓕᕆᖃᑎᒌᒃᐸᓪᓕᐊᓂᐊᕐᓂᑦᑎᓐᓂᒃ ᐊᔾᔨᒌᙱᑦᑐᓂᑦ ᐱᓕᕆᐊᖑᕙᓪᓕᐊᔪᓂᑦ.”
ᐅᑭᐅᖅᑕᖅᑐᒥ ᓄᒃᑕᖅᑎᑦ ᐅᒥᐊᕐᔪᐊᒃᑯᑦ ᐊᐅᓚᑦᑎᔨᖏᑦ ᓄᓇᕐᔪᐊᓕᒫᒥ ᑲᑐᔾᔨᖃᑎᒌᖑᕗᑦ ᑭᒡᒐᖅᑐᐃᓪᓗᑎᒃ ᐅᒥᐊᕐᔪᐊᒃᑯᑦ ᐊᐅᓚᑦᑎᔨᓕᒫᑲᓴᖕᓂᑦ ᓄᓇᕗᒻᒧᑦ ᐳᓚᕋᖅᐸᒃᑐᓂᑦ.
###
ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:
ᒫᑎᐅ ᐃᓛᓯᕗᐃᒃᔅ
ᐊᐅᓚᑦᑎᔨ, ᑐᓴᒐᒃᓴᓕᕆᔨᒃᑯᓐᓄᑦ
ᐱᕙᓪᓕᐊᔪᓕᕆᔨᒃᑯᑦ ᐃᖏᕐᕋᔪᓕᕆᔨᒃᑯᓪᓗ
ᓄᓇᕗᒻᒥ ᒐᕙᒪᒃᑯᑦ
867-975-7818
867-222-0122 (ᐅᖃᓘᑎᕋᓛᖅ)
@email
ᕗᕆᒡ ᔪᐊᔭᓐᓴᓐ
ᑐᑭᒧᐊᖅᑎᑦᑎᔨᒻᒪᕆᒃ
ᑲᑐᔾᔨᖃᑎᒌᑦ ᐅᑭᐅᖅᑕᖅᑐᒥ ᓄᒃᑕᖅᑎᑦ ᐅᒥᐊᕐᔪᐊᒃᑯᑦ ᐊᐅᓚᑦᑎᔨᖏᓐᓄᑦ
0047 913 90 554
@email