ᓯᕗᓕᖅᑎ ᐅᖃᐅᓯᖃᖅᐳᖅ ᐃᓂᑖᖅᑎᑦᑎᓂᕐᒥᓂᒃ ᓄᓇᕗᑦ ᒐᕙᒪᖓᓂ ᖁᑦᑎᒃᑐᒦᓐᓂᖅᓴᒥᒃ ᐊᐅᓚᑦᑎᔨᒥᒃ

ᐱᕙᓪᓕᐊᔪᑦ ᓴᖅᑭᑕᑦ

ᓴᖅᑭᑕᐅᑲᐅᑎᒋᔭᕆᐊᓕᒃ

ᓯᕗᓕᖅᑎ ᐅᖃᐅᓯᖃᖅᐳᖅ ᐃᓂᑖᖅᑎᑦᑎᓂᕐᒥᓂᒃ ᓄᓇᕗᑦ ᒐᕙᒪᖓᓂ ᖁᑦᑎᒃᑐᒦᓐᓂᖅᓴᒥᒃ ᐊᐅᓚᑦᑎᔨᒥᒃ

ᐃᖃᓗᐃᑦ, ᓄᓇᕗᑦ (ᐊᐃᕐᕆᓕ 26, 2019) – ᓯᕗᓕᖅᑎ ᔫ ᓴᕕᑲᑖᖅ ᐅᖃᐅᓯᖃᖅᓯᒪᓕᖅᐳᖅ ᐃᓂᑖᖅᑎᑦᑎᓂᕐᒥᓂᒃ ᐆᒥᖓ, ᔨᒥ ᓅᐳᓪ ᓄᖃᖅᖠᖅ, ᒥᓂᔅᑕᐅᒃ ᐊᕙᑎᓕᕆᔨᒃᑯᓐᓄᑦ ᑐᒡᓕᕆᓂᐊᓕᖅᖢᓂᐅᒃ, ᑕᒪᓐᓇᓗ ᐊᑐᓕᖅᓂᐊᖅᖢᓂ ᒪᐃ 13, 2019−ᒥ.

“ᔨᒥ ᐃᑲᔪᓪᓚᕆᖃᑦᑕᖅᓯᒪᕗᖅ ᓄᓇᕗᑦ ᒐᕙᒪᖓᓄᑦ ᐊᔾᔨᒌᙱᑦᑐᓂ ᐱᓕᕆᐊᒃᓴᕆᖃᑦᑕᖅᓯᒪᔭᒥᓂ, ᐅᓇ ᐃᓚᒋᔭᐅᓪᓗᓂ, ᖃᖓᑦᑎᐊᓵᖑᓛᖅ ᐃᓂᒋᓚᐅᖅᑕᖓ ᑐᑭᒧᐊᖅᑎᑦᑎᔨᒋᔭᐅᓪᓗᓂ ᑐᐊᕕᕐᓇᖅᑐᖅᑕᖃᓕᖅᑎᓪᓗᒍ ᐊᐅᓚᑦᑎᓂᕐᒧᑦ ᐱᔨᑦᑎᕋᕐᓂᕆᔭᐅᕙᒃᑐᓂ. ᐱᓕᕆᓪᓚᕆᖃᑦᑕᖅᓯᒪᓂᖓ ᐆᒪᔪᓂᒃ ᓄᖑᕋᐃᓗᐊᖅᑕᐃᓕᒪᑎᑦᑎᓂᕐᒥᒃ ᐊᕙᑎᒧᓪᓗ ᐊᑐᖅᑎᑦᑎᓪᓚᕆᒃᐸᖕᓂᕐᒥᒃ ᐱᔪᒥᓇᕈᑎᒋᓪᓚᕆᒃᐹ ᓯᕗᓕᖅᑎᐅᖃᑕᐅᓂᐊᕐᓗᓂ ᐊᕙᑎᓕᕆᔨᒃᑯᓐᓂ. ᓂᕆᐅᒋᔭᖃᑦᑎᐊᖅᐳᖓ ᐱᓕᕆᖃᑎᖃᑦᑎᐊᖃᑦᑕᕐᓂᐊᕐᓂᕐᒥᒃ ᔨᒥᒥᒃ ᓇᓗᙱᑦᑎᐊᕈᒪᓂᕐᒧᑦ ᑲᒪᒋᔭᐅᑦᑎᐊᕐᓗᓂ ᐱᕙᓪᓕᐊᑎᑦᑎᓇᔭᕐᓂᕐᒥᒃ, ᐊᑕᐅᑦᑎᒃᑰᖃᑎᖃᖅᐸᒡᓗᓂ ᑲᔪᓯᑎᑕᐅᓂᐅᔪᓐᓇᖅᑐᓂᒃ ᑲᒪᒋᔭᖃᕐᓂᕐᓗ ᓯᕗᓪᓕᖅᐸᐅᔾᔭᐅᓯᒪᐃᓐᓇᖅᐳᑦ ᒐᕙᒪᑦᑎᓐᓂᑦ," ᑕᐃᒪᓐᓇ ᓴᕕᑲᑖᖅ ᓯᕗᓕᖅᑎᒋᔭᐅᔪᖅ ᒥᓂᔅᑕᕆᔭᐅᔪᕐᓗ ᐊᕙᑎᓕᓂᕐᒧᑦ ᐅᖃᖅᖢᓂ.

ᔨᒥ ᐃᓇᖏᖅᓯᕗᖅ ᐃᓂᖃᖅᑎᑕᐅᓚᐅᑲᒃᑐᒥᒃ ᒥᓂᔅᑕᐅᑉ ᑐᒡᓕᐊᓂᒃ ᓯᑏᕙᓐ ᐱᖕᒃᓯᓐ, ᑖᓐᓇᓗ ᑕᓯᐅᖅᓯᓯᒪᓪᓗᓂ ᐱᓕᕆᕝᕕᒋᔭᐅᔪᒥᒃ ᑎᓯᐱᕆ 2018−ᖑᓚᐅᕐᓂᖓᓂᑦ.

“ᖁᔭᒋᔪᒪᕋ ᒥᔅᑕ ᐱᖕᒃᓯᓐ ᓯᕗᓕᖅᑎᐅᖃᑦᑕᖅᓯᒪᓂᖓᓄᑦ ᑲᔪᓰᓐᓇᖅᑐᒥᒡᓗ ᐱᔨᑦᑎᕋᖃᑦᑕᖅᓯᒪᓂᖓᓄᑦ. ᐊᑯᓂᑲᓪᓚᒃ ᐊᔪᙱᓪᓚᕆᖃᑦᑕᖅᓯᒪᔭᖓ ᐊᔪᙱᓐᓂᖃᖃᑦᑕᖅᓯᒪᓂᖓᓗ ᖁᔭᒋᔭᐅᒻᒪᕆᒃᐳᑦ," ᑕᐃᒪᓐᓇ ᓯᕗᓕᖅᑎ ᓴᕕᑲᑖᖅ ᐅᖃᖅᖢᓂ.

###

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:

ᑲᐃᑦ ᒪᒡᓚᐅᑦ
ᐱᕙᓪᓕᐊᔪᓄᑦ ᑎᑎᕋᖅᑎ ᓯᕗᓕᖅᑎ ᔫ ᓴᕕᑲᑖᖅ ᑎᑎᕋᕐᕕᐊᓂ
867-975-5059
867-222-4353
@email
 

ᐱᕙᓪᓕᐊᔪᑦ ᑐᓴᒐᒃᓴᙳᖅᑎᑕᐅᔪᑦ ᐱᔭᐅᔪᓐᓇᖃᑦᑕᖅᑐᑦ ᐃᓄᒃᑎᑑᖓᓗᑎᒃ, ᖃᓪᓗᓈᑎᑐᑦ, ᐃᓄᐃᓐᓇᖅᑐᓐ ᐅᐃᕖᑎᑐᓪᓗ ᐅᕙᓂ, www.gov.nu.ca.
News releases are available in Inuktitut, English, Inuinnaqtun and French on www.gov.nu.ca.
Tuhaqtaghat ittut Inuktitut, Qablunaatitut, Inuinnaqtun Uiviititullu talvani www.gov.nu.ca.
Les communiqués de presse sont disponibles en inuktitut, en anglais, en inuinnaqtun et en français au www.gov.nu.ca.