ᑲᓇᐃᑎᐊᓐ ᓄᐊᑦ ᐊᒻᒪᓗ ᕘᔅ ᐃᐅᕐ ᑲᑎᒃᐳᒃ

ᐅᖃᐅᓯᐅᔪᖅ

ᑲᓇᐃᑎᐊᓐ ᓄᐊᑦ ᐊᒻᒪᓗ ᕘᔅ ᐃᐅᕐ ᑲᑎᒃᐳᒃ

ᒥᓂᔅᑕᕆᔭᐅᔪᖅ ᐱᕙᓪᓕᐊᔪᓕᕆᔨᒃᑯᓐᓄᑦ ᐃᖏᕐᕋᔪᓕᕆᔨᒃᑯᓐᓄᓪᓗ ᑕᐃᕕᑦ ᐊᕿᐊᕈᖅ ᐅᓪᓗᒥ ᐆᒥᖓ ᐅᖃᐅᓯᕐᒥᒃ ᓴᖅᑭᑎᑦᑎᖅᑲᐅᕗᖅ:

“ᐃᖏᕐᕋᔪᓕᕆᔨᒃᑯᑦ ᑲᓇᑕᒥ ᐊᑭᑦᑐᕋᐅᑎᔪᖃᖅᐸᖕᓂᖓᓄᓪᓗ ᐱᓕᕆᕝᕕᒋᔭᐅᕙᒃᑐᖅ ᐱᔭᕇᖅᓯᓯᒪᓕᖅᐴᒃ ᑭᒃᑯᑐᐃᓐᓇᓄᑦ ᐃᓱᒪᒋᔭᐅᕙᖕᓂᖓᓄᑦ ᕿᒥᕐᕈᐊᒃᑲᓐᓂᖅᑕᒥᓂᒃ ᑲᑎᑦᑐᒪᓂᕆᔭᐅᔪᒥᒃ ᐅᑯᖕᓄᙵ, ᕘᔅᑦ ᐃᐅᕐ ᐊᒻᒪᓗ ᑲᓇᐃᑎᐊᓐᓄᐊᑦ, ᐋᖅᑭᒃᓯᒪᓕᖅᑎᑦᑎᓯᒪᓕᖅᖢᑎᒡᓗ ᑕᒪᓐᓇ ᑲᔪᓯᖁᓪᓗᒍ. ᑕᒪᓐᓇ ᐅᖃᐅᓯᐅᕌᓪᓚᓚᐅᖅᑎᓪᓗᒍ, ᓄᓇᕗᑦ ᒐᕙᒪᖓ ᐅᔾᔨᖅᓱᐃᓐᓇᖅᐳᑦ ᓇᐅᑦᑎᖅᓱᖅᓯᔪᒪᓪᓗᑎᒡᓗ ᑕᒪᑐᒥᖓ ᑲᑎᓐᓂᕆᔭᐅᔪᒥᒃ ᓇᐅᑦᑎᖅᓱᕐᕕᒋᓪᓚᕆᒡᓗᒍᓗ.

ᑕᒪᑐᒪᓂ ᕿᒥᕐᕈᐊᕐᓂᕆᔭᐅᔪᒥ, ᓄᓇᕗᑦ ᒐᕙᒪᒃᑯᖏᑦ ᐃᓚᐅᑎᑦᑎᓚᐅᖅᐳᑦ ᐊᐅᓚᑦᑎᔨᒋᔭᐅᕙᒃᑐᓂᒃ ᑕᑯᑎᑦᑎᔪᒪᓪᓗᑎᒃ ᖃᓄᖅ ᐊᑐᓪᓚᕆᒋᐊᖃᐸᖕᓂᖏᓐᓂᒃ ᓄᓇᕗᒻᒥᐅᑦ ᑕᒪᑐᒧᖓ ᖃᖓᑕᓂᕆᔭᐅᕙᒃᑐᒧᑦ ᐋᓐᓂᐊᕕᓕᐊᕐᓗᑎᒃ, ᓇᖕᒥᓂᖅ ᓇᒧᙵᐅᓗᑎᒃ, ᖃᐅᑕᒫᖅ ᐊᑐᖅᑕᐅᔭᕆᐊᖃᐸᒃᑐᓄᑦ, ᑎᑭᑕᐅᔪᖃᖅᐸᖕᓂᖓᓄᓪᓗ ᐊᑐᖅᑕᐅᓪᓚᕆᒃᐸᒃᑐᓂᒃ, ᐱᒻᒪᕆᐊᓗᖕᓂᒃ ᐱᔨᑦᑎᕋᕐᓂᕆᔭᐅᔪᓂᒃ. ᐃᓱᒪᒥᐅᑕᕆᓪᓗᒍ ᑕᒪᓐᓇ ᐃᓱᒪᒋᔭᒃᓴᖅ ᐱᒻᒪᕆᐊᓘᓂᖓᓄᑦ ᓄᓇᕗᒻᒧᑦ, ᓄᓇᕗᑦ ᒐᕙᒪᒃᑯᖏᑦ ᐊᐱᕆᓚᐅᖅᐳᑦ ᑐᑦᑕᕐᕕᒋᔭᐅᔪᓂᒃ ᐊᑐᖁᓪᓗᒋᑦ ᐱᔪᓐᓇᕐᓂᓕᒫᒥᓂᒃ ᓇᓗᙱᑦᑎᐊᕈᒪᓂᕐᒧᑦ ᐊᒃᑐᖅᓯᓂᕆᔭᐅᔪᑦ ᓇᒧᙵᐅᕙᓪᓕᓂᐅᕙᒃᑐᓄᑦ, ᐊᑭᖏᓐᓄᑦ ᖃᖓᒃᑰᕐᓂᕆᔭᖏᓐᓄᓪᓗ ᒥᑭᓛᖑᓈᖅᑐᒃᑰᖅᑎᑕᐅᒐᓗᐊᕐᒪᖔᑕ. ᓄᓇᕗᑦ ᒐᕙᒪᒃᑯᖏᑦᑕᐅᖅ ᐊᐱᕆᔾᔪᑎᖃᖅᓯᒪᒋᕗᑦ ᓇᐅᑦᑎᖅᓱᖅᑕᐅᑦᑎᐊᓪᓚᕆᖁᓪᓗᒋᑦ ᐊᐅᓚᓂᕆᔭᐅᔪᑦ ᑖᒃᑯᐊᒃ ᑲᑎᐊᓂᒃᓯᒪᓕᖅᐸᑎᒃ, ᓇᓗᙱᑦᑎᐊᕈᒪᓂᕐᒧᑦ ᑕᒪᕐᒥᑦᑎᐊᖅ ᒪᓕᑦᑕᐅᔭᕆᐊᓖᑦ ᖃᓄᐃᓕᖓᔭᕆᐊᓖᓪᓗ ᐊᑐᖅᑕᐅᑦᑎᐊᕋᓗᐊᕐᒪᖔᑕ.

ᑲᔪᓰᓐᓇᕐᓂᐊᖅᐳᒍᑦ ᐱᓇᔪᐃᓐᓇᕐᓂᕆᔭᑦᑎᓐᓂᒃ ᐱᓯᒪᓕᕈᒪᓂᕐᒧᑦ ᐊᑐᖅᑕᐅᑦᑎᐊᕈᓐᓇᖅᑐᒥᒃ, ᐊᑭᑐᓗᐊᙱᑦᑐᒥᒃ ᒐᕙᒪᒃᑯᑦ ᑎᖕᒥᓲᕐᒧᑦ ᐱᔨᑦᑎᕋᖅᑕᐅᓂᕆᓇᔭᖅᑕᖏᑦ ᓄᓇᕗᒻᒧᑦ, ᓄᖅᑲᖓᑐᐃᓐᓇᔾᔮᙱᖢᑕᓗ ᐃᓱᒫᓗᒋᔭᒃᑎᓐᓂᒃ ᐅᖃᐅᓯᖃᖃᑦᑕᕐᓂᐊᖅᖢᑕ ᑕᑯᒍᑦᑕ ᐱᐅᔪᓐᓃᖅᐸᓪᓕᐊᓂᖏᓐᓂᒃ ᐱᔨᑦᑎᕋᕐᓂᐅᕙᒃᑐᑦ ᓄᓇᓕᑦᑎᓐᓄᒃ."

###

ᑐᓴᒐᒃᓴᓕᕆᔨᑦ:

ᒫᑎᐅ ᐃᓛᓯᕗᐃᒃᔅ
ᐊᐅᓚᑦᑎᔨ, ᑐᓴᒐᒃᓴᓕᕆᔨᒃᑯᓐᓄᑦ
ᐱᕙᓪᓕᐊᔪᓕᕆᔨᒃᑯᑦ ᐃᖏᕐᕋᔪᓕᕆᔨᒃᑯᓪᓗ
867-975-7818
@email