ᓄᓇᕐᔪᐊᕐᒥ ᑎᖑᒡᓗᖕᓇᕐᒧᑦ ᐅᓪᓗᖅ 2019
ᒐᕙᒪᒃᑯᓐᓂ ᐃᓄᖕᓄᑦ ᑐᓴᒐᒃᓴᖅ
ᓄᓇᕐᔪᐊᕐᒥ ᑎᖑᒡᓗᖕᓇᕐᒧᑦ ᐅᓪᓗᖅ 2019
ᓄᓇᕐᔪᐊᕐᒥ ᑎᖑᒡᓗᖕᓇᒧᑦ ᐅᓪᓗᖅ ᐊᕐᕌᒍᑕᒫᑦ ᐅᓪᓗᕆᔭᐅᓲᖑᕗᑦ ᔪᓚᐃ 28-ᒥ ᐅᔾᔨᕆᔭᐅᓕᖅᑎᓐᓇᓱᒃᖢᒍ ᑎᓕᐅᖅᖢᒋᓪᓗ ᐃᓄᐃᑦ ᖃᐅᔨᓴᖅᑕᐅᖁᓪᓗᒋᑦ ᐃᓗᐊᖅᓴᖅᑕᐅᖁᓪᓗᒋᓪᓘᓐᓃᑦ. ᐃᒪᓐᓇ ᐅᓄᕋᓱᒋᔭᐅᕗᑦ 600,000 ᑲᓇᑕᒥᐅᑦ ᑎᖑᒡᓗᒃᑐᑦ ᖃᔅᓯᑲᓪᓚᐃᓪᓗ ᖃᐅᔨᒪᙱᑦᑐᑦ ᑎᖑᒡᓗᒃᑲᓗᐊᕐᒪᖔᑕ. (https://www.catie.ca/en/whd).
ᑎᖑᒡᓗᖕᓇᖅ B ᐊᒻᒪ C ᐊᔾᔨᒌᙱᒃᑲᓗᐊᖅᑎᓪᓗᒋᒃ ᐋᓐᓂᐊᕆᔭᐅᓲᓂᒃ ᐊᐃᑦᑐᕐᓘᑕᐅᔪᓐᓇᖅᐳᑦ ᐊᔾᔨᒌᐸᓗᒃᑯᑦ ᐃᒪᐃᓕᐅᕐᓂᒃᑯᑦ:
- ᓴᐳᔾᔨᔾᔪᑎᒃᓴᓂᒃ ᐊᑐᙱᖦᖢᓂ ᖃᓂᒃᑯᑦ, ᐃᑎᒃᑯᑦ, ᐅᕝᕙᓘᓐᓃᑦ ᐅᑦᑐᒃᑯᑦ ᓄᓕᐊᕐᓂᒃᑯᑦ;
- ᐋᖓᔮᕐᓇᖅᑐᓂᒃ ᐊᑐᖅᑕᐅᓲᓂᒃ ᐊᑐᖃᑎᖃᕐᓂᒃᑯᑦ;
- ᓴᓗᒻᒪᖅᓴᖅᓯᒪᙱᑦᑐᓂᒃ ᑲᑭᓂᓕᖅᓱᖅᑕᐅᔪᓄᑦ ᐅᕝᕙᓘᓐᓃᑦ ᑎᒥᖏᑦᑎᒍᑦ ᐳᑐᔭᐅᔾᔪᑎᓄᑦ;
- ᐊᐅᖕᒥᑦ ᐊᐅᖕᒧᑦ ᐊᐅᓕᖅᓱᖅᑕᐅᔪᓄᑦ;
- ᐃᒡᓗᒥ ᑭᓱᑦ ᐊᑕᐅᓯᐅᙱᑦᑐᒧᑦ ᐃᓄᖕᒧᑦ ᐊᑐᖅᑕᐅᓲᑦ ᓲᕐᓗ ᑭᒍᑎᓯᐅᑎᑦ ᐅᕝᕙᓘᓐᓃᑦ ᐅᙲᔭᐅᑎᑦ (ᑎᖑᒡᓗᖕᓇᖅ B), ᐊᒻᒪ
- ᐃᕐᓂᐊᖑᑎᓪᓗᒋᑦ.
ᑎᖑᒡᓗᒃᑐᑦ ᒪᐃᓪᓕᕈᓐᓇᖅᐳᑦ ᑎᖑᒃᑯᑦ ᐱᐅᔪᓐᓃᖅᑎᑦᑎᔪᓐᓇᖅᖢᑎᒡᓗ ᑎᖑᖕᒦᑦᑐᑦ ᐃᔭᕈᕙᐅᔭᕐᓂᒃ ᖃᖓᙳᖅᐸᓪᓕᐊᑎᓪᓗᒍ ᐃᓗᐊᖅᓴᖅᑕᐅᙲᓐᓇᖅᐸᑦ. ᖃᐅᔨᔾᔪᑕᐅᔪᓐᓇᖅᑐᑦ ᑎᖑᒡᓗᒃᑐᓄᑦ ᐅᔾᔨᕆᔭᐅᙱᓴᐃᓐᓇᕈᓐᓇᖅᑐᑦ ᑭᓯᐊᓂ ᐃᒪᐃᑦᑐᓐᓇᖅᑐᑦ:
- ᑕᖃᖓᓗᑎᒃ, ᓄᑭᑭᓪᓗᑎᒃ.
- ᑳᑲᑕᙱᓪᓗᑎᒃ, ᓂᕐᕆᕐᓗᓕᕐᓗᑎᒃ.
- ᖁᖅᓱᖅᑎᓪᓗᑎᒃ ᐅᕕᓂᖏᑦ ᐃᔨᖏᓪᓘᓐᓃᑦ.
- ᐅᕕᓂᕐᓗᓕᕐᓗᑎᒃ.
- ᐃᑎᕈᖏᑦ ᖁᖅᓱᕐᔪᐊᓕᓗᕐᑎᒃ.
- ᐆᓇᑲᑕᒡᓗᑎᒃ/ᐆᑎᓐᓇᑲᑕᒡᓗᑎᒃ.
ᑎᑎᖑᒡᓗᖕᒪᖔᑦ ᖃᐅᔨᓴᖅᑕᐅᓲᑦ ᐊᐅᖏᖅᑕᐅᓪᓗᑎᒃ ᐋᓐᓂᐊᕕᖕᓂ. ᑲᐴᑎᑕᖃᖅᑐᖅ ᑎᖑᒡᓗᖕᓇᖅ B−ᒧᑦ ᐊᒻᒪ ᓄᓇᕗᒻᒥᐅᑦ ᑎᓕᐅᖅᑕᐅᕗᑦ ᕿᒥᕐᕈᖁᔭᐅᓪᓗᑎᒃ ᑲᐱᔭᐅᓂᕆᖃᑦᑕᖅᑕᖏᑦ ᖃᓄᐃᓕᖓᖕᒪᖔᑕ ᐃᓗᐊᖅᓴᐃᔨᒋᔭᖅ ᖃᐅᔨᖃᑎᒋᓗᒍ ᓄᓇᖏᓐᓂᒃ ᑲᐱᔭᐅᒋᐊᖃᕐᓂᓕᒫᖏᓪᓗ ᓈᒻᒪᒃᑐᒦᑎᑦᑕᐃᓐᓇᕆᓗᒋᑦ.
ᐊᓯᖏᑦ ᐱᐅᓯᐅᔪᓐᓇᖅᑐᑦ ᓄᓇᕗᒥᐅᓄᑦ ᓯᐊᒻᒪᒃᑎᖅᑕᐃᓕᒪᓗᒍ ᑎᖑᒡᓗᖕᓇᖅ ᐊᓯᖏᓪᓗ ᓄᓕᐊᕐᓂᒃᑯᑦ ᖁᐱᕐᕆᔾᔪᑕᐅᓲᑦ (STIs) ᐅᑯᐊᖑᕗᑦ:
- ᐅᓲᑉ ᐴᖏᓐᓂᒃ ᐊᑐᖅᐸᒡᓗᓯ ᐅᕝᕙᓘᓐᓃᑦ ᓴᐳᔾᔨᔾᔪᑎᓂᒃ. ᐅᓲᑉ ᐴᖏᑦ ᐊᒻᒪ ᐱᐊᒃᓯᓕᕈᑏᑦ ᐊᑭᖃᙱᖦᖢᑎᒃ ᐱᔭᒃᓴᐅᔪᑦ ᐋᓐᓂᐊᕕᖕᓂᑦ ᐊᓯᖏᓐᓂᒡᓗ ᓄᓇᓕᖕᓂ ᐱᑖᕐᕕᖕᓂᑦ ᓄᓇᕗᒻᒥ.
- ᖃᐅᔨᓴᖅᑕᐅᒐᔪᒡᓗᓯ ᓄᓕᐊᕐᓂᒃᑯᑦ ᖁᐱᕐᕆᓯᒪᙱᒃᑲᓗᐊᕐᒪᖔᑦ ᓄᓕᐊᖃᑎᖃᕆᐊᓚᐅᙱᓐᓂᔅᓯᓐᓂᒃ ᐊᐃᑉᐸᖅᑖᓵᔅᓯᓐᓂᒃ(ᑦ). ᖃᐅᔨᓴᖅᑕᐅᕙᒡᓗᓯ ᐃᕝᕕᓪᓘᓐᓃᑦ ᐊᐃᑉᐸᐃᓪᓘᓐᓃᑦ(ᐸᑎᓪᓘᓐᓃᑦ) ᓄᓕᐊᑲᑕᒃᑳᖓᔅᓯ ᐊᓯᔅᓯᓐᓂᒃ. ᖃᐅᔨᓴᖅᑕᐅᕙᒡᓗᓯ ᐅᓲᑉ ᐴᖓᓂ ᐊᑐᓚᐅᕋᓗᐊᕈᔅᓯ.
ᑐᑭᓯᒋᐊᒃᑲᓐᓂᕈᒪᒍᕕᑦ, ᐅᕗᙵᐅᓗᑎᑦ https://www.irespectmyself.ca/.
###
ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:
ᕗᐃᓐᑎ ᕼᐊᓗᓇᓐ
ᑐᓴᒐᒃᓴᓕᕆᔨᒻᒪᕆᒃ
ᒐᕙᒪᓕᕆᔨᒃᑯᑦ
867-975-6048
@email
ᐱᕙᓪᓕᐊᔪᑦ ᑐᓴᒐᒃᓴᙳᖅᑎᑕᐅᔪᑦ ᐱᔭᐅᔪᓐᓇᖃᑦᑕᖅᑐᑦ ᐃᓄᒃᑎᑑᖓᓗᑎᒃ, ᖃᓪᓗᓈᑎᑐᑦ, ᐃᓄᐃᓐᓇᖅᑐᓐ ᐅᐃᕖᑎᑐᓪᓗ ᐅᕙᓂ, www.gov.nu.ca
News releases are available in Inuktitut, English, Inuinnaqtun and French on www.gov.nu.ca.
Tuhaqtaghat ittut Inuktitut, Qablunaatitut, Inuinnaqtun Uiviititullu talvani www.gov.nu.ca.
Les communiqués de presse sont disponibles en inuktitut, en anglais, en inuinnaqtun et en français au www.gov.nu.ca.
ᑐᓴᒐᒃᓴᓕᕆᔨᒃᑯᑦ