ᑕᒪᐅᓇᑐᐃᓐᓇᖅ ᓂᕈᐊᕐᓂᖅ ᐋᖅᑭᒃᑕᐅᕗᖅ ᖁᕐᓗᖅᑑᕐᒧᑦ

ᐱᕙᓪᓕᐊᔪᑦ ᓴᖅᑭᑕᐅᔪᑦ

ᑕᒪᐅᓇᑐᐃᓐᓇᖅ ᓂᕈᐊᕐᓂᖅ ᐋᖅᑭᒃᑕᐅᕗᖅ ᖁᕐᓗᖅᑑᕐᒧᑦ

ᐃᖃᓗᐃᑦ, ᓄᓇᕗᑦ (ᐊᐃᕐᕆᓕ 16, 2020) – ᑕᒪᐅᓇᑐᐃᓐᓇᖅ ᓂᕈᐊᕐᓂᖅ ᖁᕐᓗᖅᑐᕐᒧᑦ ᓂᕈᐊᖅᑕᐅᕕᖓᓄᑦ ᐋᖅᑭᒃᑕᐅᓯᒪᓕᖅᐳᖅ ᐋᒌᓯ 24, 2020-ᒧᑦ, ᒪᓕᒐᓕᐅᖅᑎᐅᓚᐅᖅᑐᖅ ᒪᐃᓚ ᐊᔾᔪᑲᒃ ᑲᒥᙳᐊᖅ ᓄᖅᑲᓚᐅᖅᑎᓪᓗᒍ. ᐊᑕᐅᑦᑎᒃᑰᖃᑎᖃᖅᐳᖅ ᑕᒪᐅᓇᑐᐃᓐᓇᖅ ᓂᕈᐊᕐᓂᐊᖅᑐᓄᑦ ᐅᖃᐅᓯᐅᓚᐅᖅᑐᒥᑦ ᖃᒪᓂ'ᑐᐊᕐᒧᑦ.

“ᓄᕙᒡᔪᐊᕐᓇᖅ−19 ᐊᓯᔾᔩᓯᒪᕐᔪᐊᖅᐳᖅ, ᕿᓚᒥᒻᒪᕆᐊᓗᒃ. ᑕᒪᑦᑕ ᒪᓕᒋᐊᖃᖅᐳᒍᑦ ᐋᓐᓂᐊᕐᕕᐊᓗᖕᒥ ᐊᖓᔪᖅᑳᒻᒪᕆᖕᒧᑦ ᐅᖃᐅᔾᔪᐃᔾᔪᑕᐅᔪᓂᒃ ᐊᒻᒪ ᓄᓇᓕᕗᑦ ᐱᕙᒌᔭᖅᑎᓪᓗᒋᑦ ᓂᕈᐊᕐᓂᕐᒧᑦ ᓄᑖᒥᒃ ᐊᑐᓪᓚᕆᒃᑐᒥᒃ," ᓯᕗᓕᖅᑎ ᔫ ᓴᕕᑲᑖᖅ ᐅᖃᖅᑐᖅ. “ᒪᐃᓚ ᑲᒥᙳᐊᖅ ᖁᔭᓐᓇᒦᖅᐸᕋ ᑕᓪᓕᒪᖓᓐᓂ ᒪᓕᒐᓕᐅᕐᕕᖕᒦᖃᑕᐅᓚᐅᕐᒪᑦ ᓄᓇᕗᒻᒥ ᐊᒻᒪ ᖃᑕᙳᑎᒌᒃ ᖃᓄᐃᙱᑦᑎᐊᖁᕙᒃᑲ ᓯᕗᒻᒧᐊᒃᐸᓪᓕᐊᑎᓪᓗᒋᑦ.” ᓂᕈᐊᕐᓇᐅᑉ ᐅᓪᓗᖓ ᓇᓗᓇᐃᖅᑕᐅᓚᐅᖅᐳᖅ ᓯᕗᓕᖅᑏᑦ ᑲᑎᒪᔨᖏᓐᓂᑦ, ᑲᒥᓯᓇᒧᓪᓗ ᓄᓇᕗᒻᒧᑦ ᓇᓗᓇᐃᖅᓯᑦᑎᐊᓛᖅᖢᓂ ᓇᓗᓇᐃᒃᑯᑕᕐᒥᑦ ᓂᕈᐊᕐᓂᕐᒧᑦ, ᐊᑐᖅᑕᐅᔭᕆᐊᓕᒃ ᑎᑎᕋᖅᓯᒪᔪᒥᑦ 38 ᐊᑖᓂ ᓄᓇᕗᒻᒥ ᓂᕈᐊᕐᓂᕐᒧᑦ ᐱᖁᔭᖓᓂᑦ. ᓂᕈᐊᖅᑐᓕᕆᔨᑦ ᐊᖓᔪᖅᑳᖓ ᑐᓂᓯᓛᖅᐳᖅ ᓂᕈᐊᕐᓂᕐᒧᑦ ᓇᓗᓇᐃᒃᑯᑕᕐᒥᒃ ᔪᓚᐃ 20, 2020−ᒥᑦ. ᓇᓗᓇᐃᔭᖅᓯᒪᔪᓂᑦ ᑐᓴᒐᒃᓴᖅᑕᖃᓛᖅᑐᖅ ᓂᕈᐊᒐᒃᓴᓕᐊᖑᔪᑦ ᓴᖅᑭᑕᐅᓛᖅᑐᑦ ᓄᓇᕗᒻᒥ ᓂᕈᐊᖅᑐᓕᕆᔨᒃᑯᓐᓂᑦ ᐊᐅᔭᐅᓕᖅᐸᑦ.

###

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:

ᑲᐃᑦ ᒪᒡᓚᐅᑦ
ᐱᕙᓪᓕᔪᓄᑦ ᑎᑎᕋᖅᑎ ᓯᕗᓕᖅᑎ ᓴᕕᑲᑖᕐᒧᑦ
867-975-5059
867-222-5763
@email