ᐅᐊᑦᓯᔨᒥᒃ ᓇᓗᓇᐃᖅᑕᐅᔪᖃᖅᑐᖅ ᓄᕙᔾᔪᐊᕐᓇᖅ 19-ᖃᕐᓂᖓᓂᒃ ᐋᑐᕚᒥ ᐃᓄᑑᕕᐅᖃᑦᑕᖅᑐᒥ ᑐᔪᕐᒥᕕᒻᒥ
ᐱᕙᓪᓕᐊᔪᑦ ᑐᓴᕋᑦᓴᑦ
ᐅᐊᑦᓯᔨᒥᒃ ᓇᓗᓇᐃᖅᑕᐅᔪᖃᖅᑐᖅ ᓄᕙᔾᔪᐊᕐᓇᖅ 19-ᖃᕐᓂᖓᓂᒃ ᐋᑐᕚᒥ ᐃᓄᑑᕕᐅᖃᑦᑕᖅᑐᒥ ᑐᔪᕐᒥᕕᒻᒥ
ᐃᖃᓗᐃᑦ, ᓄᓇᕗᑦ (ᐊᒋᓯ 26, 2020) – ᐋᑐᕙᒥ ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ ᖃᐅᔨᒃᑲᐃᓯᒪᓕᖅᑐᑦ ᓄᓇᕗᑦ ᒐᕙᒪᒃᑯᖏᓐᓂᒃ ᐃᓄᑑᕕᐅᖃᑦᑕᖅᑐᒥ ᑐᔪᕐᒥᕕᒻᒥ ᐃᖅᑲᓇᐃᔭᖅᑎᒥᒃ Residence Inn ᑐᔪᕐᒥᕕᒻᒥ Walkley Road ᐋᑐᕙᒥ, ᐃᓚᖓᓐᓂ ᓄᓇᕗᒻᒥᐅᓄᑦ ᐃᓄᑑᕕᐅᖃᑦᑕᕆᐊᓕᒻᒥ ᑐᔪᕐᒥᕕᖓᓂ, ᓇᓗᓇᐃᖅᑕᐅᓯᒪᓕᖅᑐᖅ ᓄᕙᔾᔪᐊᕐᓇᖅᑐᖃᕐᓂᖓᓂᒃ 19-ᒥᒃ.
“ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ ᕿᓚᒥᐅᔪᒃᑯᑦ ᐱᓕᕆᖃᑎᖃᖅᑐᑦ ᐋᑐᕙᒥ ᐋᓐᓂᐊᖃᕐᓇᖏᑦᑐᓕᕆᔨᒃᑯᖏᓐᓂᒃ ᓇᓗᓇᐃᔭᐃᒐᓱᐊᖅᑐᑎᒃ ᑕᒪᒃᑮᓐᓂᒃ ᑲᑎᔭᒥᓂᖏᓐᓂᒃ Residence Inn ᑐᔪᕐᒥᕕᖓᓂ ᐊᓯᖏᓐᓂᓪᓗ ᑲᑎᔭᐅᔪᒥᓂᕐᓂᒃ ᓄᓇᕗᒻᒥ.” ᐅᖃᖅᓯᒪᔪᖅ ᓘᑦᑖᖅ ᒪᐃᑯᓪ ᐸᑐᓴᓐ, ᓄᓇᕗᒻᒥ ᐋᓐᓂᐊᖃᕐᓇᖏᑦᑐᓕᕆᔨᒻᒪᕆᒃ. “ᒫᓐᓇᐅᔪᖅ ᖃᐅᔨᒐᓱᐊᖅᑐᒍᑦ ᐅᓗᕆᐊᓇᖅᑐᒦᑦᑐᒥᓂᕐᓂᒃ, ᑕᐃᒪᐃᑦᑐᖃᕐᓂᖅᑲᑦ, ᓄᓇᕗᒻᒥᐅᓂᒃ ᐱᒋᐊᕐᓂᐊᓕᖅᑐᑕ ᑲᑎᔭᒥᓂᖏᓐᓂᒃ ᓇᓗᓇᐃᔭᐃᓂᕐᒧᑦ ᓄᓇᕗᒻᒥ ᑕᐃᒪᐃᒋᐊᖃᕈᑦᑕ.”
ᐋᑐᕙᒥ ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ ᖃᐅᔨᒃᑲᐃᓯᒪᔪᑦ ᓄᓇᕗᑦ ᒐᕙᒪᒃᑯᖏᓐᓂᒃ ᓇᓗᓇᐃᖅᑕᐅᓯᒪᔪᖅ ᖃᐅᔨᓴᖅᑕᐅᒍᑎᒥᓂᖓ ᐊᒋᓯ 26-ᒥᒃ ᓇᓗᓇᐃᕐᕕᐅᓯᒪᓪᓗᑎᓪᓗ ᐃᖅᑲᓇᐃᔭᖅᑎ ᐊᐃᑦᑐᕐᓗᐃᒍᓐᓇᖅᑐᒥᓂᐅᓂᖓᓂᒃ ᐃᖅᑲᓇᐃᔭᖅᑎᓪᓗᒍ ᐊᒋᓯ 16, 17, 18 ᐊᒻᒪᓗ 19-ᒥ. ᓄᓇᕗᑦ ᒐᕙᒪᒃᑯᖏᑕ ᐋᓐᓂᐊᖃᕐᓇᖏᑦᑐᓕᕆᔨᒃᑯᖏᑦ ᓇᓗᓇᐃᔭᐃᒐᓱᐊᖅᑐᑦ ᑲᑎᔭᐅᔪᒥᓂᕐᓂᒃ ᐃᖅᑲᓇᐃᔭᖅᑎᒧᑦ ᑐᔪᕐᒥᔪᓂᓪᓗ ᐃᓄᑑᒋᐊᖃᖅᑎᑕᐅᔪᓂᒃ ᑕᐃᒃᑯᓇᓂ ᐅᓪᓗᖏᓐᓂ. ᐃᖅᑲᓇᐃᔭᖅᑏᑦ ᐃᓄᑑᕕᐅᒋᐊᓕᒻᒥᒃ ᑐᔪᕐᒥᕕᒻᒥ ᐊᑐᐃᓐᓇᕆᐊᖃᖃᑦᑕᖅᓯᒪᔪᑦ ᒪᑐᐊᓂᒃ ᐃᖅᑲᓇᐃᔭᖅᑎᓪᓗᒋᑦ, ᐃᑲᔪᕐᓂᖃᕋᔭᕐᖓᑦ ᐊᐃᑦᑐᕐᓘᑕᐅᑦᑕᐃᒍᓐᓇᕐᓂᖓᓂᒃ.
“ᐅᖃᖃᑎᖃᖅᑐᒍᑦ ᐋᑐᕙᒥ ᐋᓐᓂᐊᖃᕐᓇᖏᑦᑐᓕᕆᔨᒃᑯᓐᓂᒃ ᑖᓐᓇ ᓇᓗᓇᐃᖅᑕᐅᓯᒪᔪᖅ ᓄᕙᔾᔪᐊᕐᓇᖅᑖᖅᓯᒪᓂᖓᓂᒃ ᑕᐃᒃᑯᓄᖓ ᐅᑎᕆᐊᓕᓐᓄᑦ ᐊᖏᕐᕋᒥᓐᓄᑦ ᐅᓪᓗᒐᓚᐅᓂᐊᖅᑐᓂ ᐊᐅᓪᓚᕆᐊᖃᔾᔭᙱᒻᒪᖔᑕ ᐃᓄᑑᕕᐅᔪᒥᒃ ᓇᓗᓇᐃᖅᑕᐅᓚᐅᙱᓐᓂᖏᓐᓂ ᑲᑎᔭᖃᖅᑐᒥᓂᐅᓂᖏᓐᓂᒃ ᓇᓗᓇᐃᖅᑕᐅᓚᐅᙱᓐᓂᖏᓐᓂᓗ ᓄᕙᔾᔪᐊᕐᓇᖅᑐᖃᙱᓐᓂᖏᓐᓂᒃ,” ᐅᖃᖅᓯᒪᔪᖅ ᔪᐊᔾ ᕼᐃᒃᔅ, ᒥᓂᔅᑕ ᐋᓐᓂᐊᖃᕐᓇᖏᑦᑐᓕᕆᔨᒃᑯᓐᓄᑦ. “ᐃᓱᒪᓕᐅᕈᑎᖃᓛᖅᑐᒍᖅ ᒪᓕᑦᑕᐅᓗᑎᒃ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐅᖃᐅᔾᔭᐅᒋᐊᕈᑎᐅᔪᑦ ᖃᓄᐃᓕᒋᐊᕈᑎᖃᕐᓗᑕᓗ ᑭᒃᑯᓕᒫᑦ ᐅᓗᕆᐊᓇᖅᑐᒦᓕᖁᓇᒋᑦ.”
ᓄᓇᕗᒻᒥᐅᑦ ᐃᓄᑑᕕᐅᒋᐊᓕᒻᒥ ᑐᔪᕐᒥᕕᒻᒦᓐᓂᖅᑲᑕ ᐊᑯᓐᓂᖓᓂ ᐊᒋᓯ 16 ᐊᒻᒪᓗ 19 Residence Inn ᑐᔪᕐᒥᕕᒻᒥ ᐋᑐᕙᒥ ᐅᑎᖅᓯᒪᓕᕐᓗᑎᓪᓗ ᐊᖏᕐᕋᒥᓐᓄᑦ ᓄᓇᕗᒻᒥ ᑎᓕᔭᐅᕗᑦ ᐅᔾᔨᖅᓱᑦᓯᐊᖁᓪᓗᒋᑦ ᖃᓄᐃᒍᑎᖃᓕᕐᒪᖔᕐᒥᒃ ᓄᕙᔾᔪᐊᕐᓇᖅ 19-ᒥᒃ. ᐊᑐᓕᖁᔭᐅᔪᖅ ᑕᐃᒃᑯᐊ ᑐᔪᕐᒥᕕᒻᒦᑦᑐᒥᓃᑦ ᐊᓯᐊᒎᕐᕕᖃᙱᑦᑐᒥᒃ ᐃᓅᖃᑎᒥᓐᓂᒃ ᖃᓂᒋᔭᖃᓗᐊᑦᑕᐃᓕᒋᐊᖃᕐᓂᖏᓐᓂᒃ.
ᖃᓄᐃᒍᑎᐅᒍᓐᓇᖅᑐᑦ ᓄᕙᔾᔪᐊᕐᓇᖅ 19-ᒧᑦ ᐃᓚᒋᔭᐅᓪᓗᑎᒃ ᐆᑎᕐᓇᕐᓂᖅ, ᖁᐃᖅᓱᖃᑦᑕᕐᓂᖅ ᐅᕝᕙᓘᓐᓃᑦ ᐃᐱᓂᐊᖃᑦᑕᕐᓂᖅ. ᓄᓇᕗᒻᒥᐅᑦ ᐃᖅᑲᐃᑎᑕᐅᕗᑦ ᐃᓅᖃᑎᒥᓂᒃ ᖃᓂᑦᓴᓗᐊᖃᑦᑕᖁᓇᒋᑦ, ᐊᒡᒐᒥᓂᒃ ᐅᐊᓴᐃᓐᓇᖃᑦᑕᕐᓗᑎᒃ, ᐊᖏᕐᕋᖅᓯᒪᑐᐃᓐᓇᕐᓗᑎᓪᓗ ᖃᓄᐃᒍᑎᖃᕈᑎᒃ. ᑭᓇᑐᐃᓐᓇᖅ ᑲᑎᔭᖃᖅᑐᒥᓂᐅᓱᕆᒍᓂ ᓄᕙᔾᔪᐊᕐᓇᖅ 19-ᒧᑦ ᐅᖄᓚᒋᐊᓕᒃ ᓄᕙᔾᔪᐊᕐᓇᖅ ᐅᖓᓯᑦᑐᒥᒃ ᐅᖄᓚᕕᒻᒧᑦ 1-888-975-8601 ᐊᑯᓐᓂᖓᓂ 10 ᐅᓪᓛᓴᒃᑯᑦ ᐊᒻᒪᓗ 6 ᐅᓐᓄᓴᒃᑯᑦ ᑲᓇᓐᓇᐅᑉ ᓯᕿᕐᖑᔭᖓᒍᑦ, ᖃᐅᔨᒃᑲᐃᑦᓴᐅᑎᒋᓗᑎᓪᓘᓐᓃᑦ ᓄᓇᒥᓐᓂ ᐋᓐᓂᐊᕐᕕᖓᓄᑦ ᒫᓐᓇᑲᐅᑎᒋ, ᒫᓐᓇᑲᐅᑎᒋᓗ ᐊᓂᑦᑕᐃᓕᓕᕐᓗᑎᒃ ᐊᖏᕐᕋᒥᓐᓂ ᐅᓪᓗᓂᒃ 14-ᓂᒃ.
ᐃᓄᑑᕕᐅᒋᐊᓕᒻᒥ ᑐᔪᕐᒥᕕᒻᒦᑦᑐᑦ ᖃᐅᔨᒃᑲᖅᑕᐅᓯᒪᓕᖅᑐᑦ ᖃᓄᐃᒍᑕᐅᔪᓂᒃ ᑐᓴᖅᑎᑕᐅᒋᐊᖅᓯᒪᓪᓗᑎᓪᓗ ᓄᓇᕗᒻᒥ ᑲᑎᔭᐅᔪᒥᓂᕐᓂᒃ. ᑐᑭᓯᒋᐊᖅᑎᑕᐅᒃᑲᓐᓂᓛᖅᑐᑦ ᐱᕙᓪᓕᐊᔪᓕᕆᔨᓂᒃ ᑐᓴᖅᑎᑦᓯᒋᐊᓕᖅᑲᑕ ᖃᐅᑉᐸᑦ, ᓇᓗᓇᐃᔭᖅᑕᐅᒋᐊᒃᑲᓐᓂᓛᖅᑐᖅ.
###
ᐱᕙᓪᓕᐊᔪᓕᕆᔨᓄᑦ ᖃᐅᔨᒋᐊᕐᕕᑦᓴᖅ:
ᑯᕆᔅ ᐳᓕᐊ
ᑐᓴᕋᑦᓴᓕᕆᓂᕐᒧᑦ ᐊᐅᓚᑦᓯᔨᐅᑲᐃᓐᓇᖅᑐᖅ
ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ
867-975-5949
@email