ᑕᐅᕗᖓᐃᓐᓇᖅ ᖁᐃᖅᓱᕐᓂᖅ ᓴᓂᑭᓗᐊᕐᒥᑦ ᐊᓂᒍᖅᑐᖅ
ᑭᒃᑯᑐᐃᓐᓇᕐᓄᑦ ᑐᓴᕋᔅᓴᖅ ᐋᓐᓂᐊᓇᐅᑉ ᒥᔅᓵᓄᑦ
ᑕᐅᕗᖓᐃᓐᓇᖅ ᖁᐃᖅᓱᕐᓂᖅ ᓴᓂᑭᓗᐊᕐᒥᑦ ᐊᓂᒍᖅᑐᖅ
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᓇᓗᓇᐃᖅᓯᕗᑦ ᑕᐅᕗᖓᐃᓐᓇᖅ ᖁᐃᖅᓱᕐᓂᖅ ᓴᓂᑭᓗᐊᕐᒥᑦ ᐊᓂᒍᖅᑐᖅ.
ᑭᓇᑐᐃᓐᓇᖅ ᓄᕙᓕᕈᓐᓇᖅᐳᑦ ᖁᐃᖅᓱᕐᔪᐊᕐᓇᖅᑐᒥ (ᑕᐅᕗᖓᐃᓐᓇᖅ ᖁᐃᖅᓱᕐᓂᖅ), ᑭᓯᐊᓂ ᓄᑕᖅᑲᑦ ᐊᑦᑕᕐᓇᕐᑐᒦᓐᓂᖅᓴᐅᕙᒃᐳᑦ ᐅᑭᐅᖅᑖᖅᓯᒪᖏᑦᑐᑦ ᓱᓕ.
ᖁᐃᖅᓱᕐᔪᐊᕐᓇᖅᑐᖅ ᐃᒡᒋᐊᕐᓗᓕᕐᓇᖅᑐᖅ ᐳᕙᒃᑯᓪᓗ ᐋᓐᓂᐊᕐᓇᖅᖢᓂ ᐊᒻᒪ ᐊᐃᑦᑐᕐᓘᑕᐅᓴᕋᐃᓐᓇᖅᖢᓂ ᐃᓄᖕᒧᑦ. ᐋᓐᓂᐊᕈᕕᑦ ᕿᑐᕐᖓᐃᓪᓘᓐᓃᑦ ᐋᓐᓂᐊᕈᓂ, ᐊᖏᕐᕋᖅᓯᒪᑐᐃᓐᓇᕐᓂᐊᖅᐳᓯ ᐊᒻᒪ ᐃᓄᖕᓄᐊᑲᑕᙱᓪᓗᓯ ᑭᓯᐊᓂ ᐋᓐᓂᐊᑲᑕᒍᓐᓃᕈᕕᑦ. ᑕᐃᒫᒃ ᖃᓂᒪᓐᓇᒥᒃ ᐊᐃᑦᑐᕐᓗᐃᖏᓐᓂᖅᓴᐅᓂᐊᖅᐳᓯ.
ᖃᐅᔨᔭᐅᓴᕋᐃᓪᓗᓂ ᐋᓐᓂᐊᔾᔪᑎᖓᓂᑦ ᐊᒻᒪ ᐃᓅᓕᓴᐅᑎᓅᖅᑎᑕᐅᓗᓂ ᐱᒻᒪᕆᐅᔪᖅ. ᓄᓇᓕᔅᓯᓐᓂᑦ ᐋᓐᓂᐊᕕᓕᐊᕐᓗᓯ ᖃᐅᔨᓴᖅᑕᐅᔭᖅᑐᕐᓗᓯ ᐋᓐᓂᐊᓯᐅᖅᑎᓄᑦ ᑭᓇᑐᐃᓐᓇᖅ ᐃᓪᓗᒻᒥᐅᖃᑎᓯᓘᓐᓃᑦ ᐃᒪᐃᑉᐸᑕ ᖃᐅᔨᔾᔪᑕᐅᔪᓐᓇᖅᑐᓂᑦ:
- ᖁᐃᖅᓱᖃᑦᑕᖅᑐᑦ ᐱᓇᓱᐊᕈᓯᑦ ᐱᖓᓱᑦ ᐅᖓᑖᓂ;
- ᖁᐃᖅᓱᖅᑎᓪᓗᒍ ᐊᒻᒪ ᓂᐱᒧᑦ ᑭᖑᓂᖓᒍᑦ ᓂᐱᑕᖃᖅᐸᑦ ᐊᔾᔨᐅᓐᖏᑦᑐᒥᑦ ᓲᕐᓗ "ᐆᑉ";
- ᐊᓂᕐᓂᑭᓪᓗᑎᑦ;
- ᒥᕆᐊᖃᑦᑕᖅᑲᑦ ᖁᐃᖅᓱᓚᐅᖅᑎᓪᓗᒍ;
- ᐅᓐᓄᐊᒃᑯᑦ ᖁᐃᖅᓱᕐᓂᖅᓴᐅᖃᑦᑕᕐᓗᓂ; ᐅᕝᕙᓘᓐᓃᑦ
- ᐆᓇᕐᓂᖓ ᖁᕙᓯᓗᐊᓕᖅᐸᑦ (39°C ᐊᒻᒪ ᖁᑦᑎᓐᓂᖅᓴᒥᒃ) ᐅᓪᓗᑦ ᐱᖓᓱᑦ ᖄᖏᐅᑎᓯᒪᓕᕋᓗᐊᖅᑎᓪᓗᒍ.
ᖁᐃᖅᓱᕐᔪᐊᕐᓇᖅᑐᒥᑦ ᓄᕙᖕᓇᒥᑦ ᐊᐃᑦᑐᖅᑕᐅᑦᑕᐃᓕᒪᔪᓐᓇᖅᐳᑎᑦ ᑲᐱᔭᐅᓗᑎᑦ ᐋᓐᓂᐊᓕᕇᒃᑯᑎᓕᖕᒧᑦ. ᐃᓄᐃᑦ ᑐᑭᓯᒋᐊᕆᐊᓖᑦ ᐋᓐᓂᐊᓕᕇᒃᑯᑎᒧᑦ ᑲᐱᔭᐅᕕᒃᓴᖏᓐᓄᑦ ᐊᙳᒻᒪᑎᒐᓗᐊᕐᒪᖔᑕ. ᐃᒫᑦᑕᐅᖅ ᐱᔾᔭᐃᖅᓯᒪᔪᓐᓇᖅᑐᑦ:
- ᐊᒡᒐᑎᑦ ᐃᕐᕈᖅᑐᒪᓚᐃᓐᓇᕐᓗᒋᑦ;
- ᖁᐃᖅᓱᕐᓗᑎᑦ ᐃᕝᕕᑦ ᐊᐃᖓᓄᑦ ᐅᕙᓗ ᑲᒃᑭᐅᑎᔅᓴᒧᑦ; ᐊᒻᒪ
- ᓂᕆᔭᑎᑦ, ᐃᒥᖅᑕᑎᑦ ᐊᒥᖅᑳᖅᐸᙱᓪᓗᒋᑦ, ᓂᕆᔾᔪᑎᑎᑦ ᐅᕙᓗ ᑭᒍᑎᓯᐅᑎᑎᑦ ᐊᓯᖕᓄᑦ ᐊᑐᖅᑕᐅᑎᑦᑕᐃᓕᓗᒋᑦ.
ᖁᐃᖅᓱᕐᔪᐊᕐᓇᖅᑐᒧᑦ ᓄᕙᖕᓇᐅᑉ ᒥᒃᓵᓄᑦ ᑐᑭᓯᒋᐊᒃᑲᓐᓂᕈᒪᓐᓂᕈᕕᑦ ᐅᑯᐊ ᐅᖃᓕᒫᕈᓐᓇᖅᑕᑎᑦ ᐅᕙᓂ ᖁᐃᖅᓱᑰᔨᓐᓇᖅᑑᑉ ᖃᓄᐃᑦᑑᓂᖓᐊᑐᐃᓐᓇᔪᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐃᑭᐊᖅᑭᕕᖓᓂ.
###
ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:
ᑕᓇᕋᐃ ᓴᒧᕕᐅᓪ
ᑐᓴᒐᒃᓴᓕᕆᔩᑦ ᑐᑭᒧᐊᒃᑎᑦᑎᔨᖓ
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ
867-975-5712
@email