ᓄᕙᒡᔪᐊᕐᓇᖅ-19 ᓄᓇᕗᑦ ᒐᕙᒪᖓᓂ ᓴᖅᑭᑕᐅᔪᑦ - ᐅᑐᐱᕆ 5, 2020
ᓄᕙᒡᔪᐊᕐᓇᖅ-19 ᓄᓇᕗᑦ ᒐᕙᒪᖓᓂ ᓴᖅᑭᑕᐅᔪᑦ
ᓱᓕ ᓇᓗᓇᐃᖅᑕᐅᔪᖃᖅᓯᒪᙱᑦᑐᖅ ᐱᖃᕋᓱᒋᔭᐅᔪᓂᒡᓘᓪᓃᑦ ᓄᕙᒡᔪᐊᕐᓇᖅ-19−ᒥᒃ ᓄᓇᕗᒻᒥ.
ᑲᑎᖦᖢᒋᑦ ᐃᓄᐃᑦ ᒫᓐᓇᒧᑦ ᑎᑭᖦᖢᒍ ᖃᐅᔨᓴᖅᑕᐅᓯᒪᓕᖅᑐᑦ 3108-ᖑᓕᖅᐳᑦ. 541-ᖑᓪᓗᑎᒃ ᐃᓄᐃᑦ ᒫᓐᓇ ᖃᐅᔨᓴᖅᑕᐅᔪᑦ. ᑭᓱᒧᑦ ᑕᐃᒪᐃᔾᔪᑎᖃᓕᕐᒪᖔᑦ ᕼᐆᑉ ᐲ ᐅᔭᕋᖕᓂᐊᕐᕕᖕᒥ ᓱᓕ ᓇᓗᓇᐃᖅᑕᐅᙱᑦᑐᖅ.
ᕼᐆᑉ ᐲ ᐅᔭᕋᖕᓂᐊᕐᕕᖕᒥ ᖃᓂᒻᒪᒍᑕᐅᕙᓪᓕᐊᔫᑉ ᒥᒃᓵᓄᑦ ᑐᓴᒐᒃᓴᑦ:
- ᓇᓗᓇᐃᖅᑕᐅᔪᖃᒃᑲᓐᓂᓚᐅᖅᑎᓪᓗᒍ ᖃᐅᔨᓴᖅᑕᐅᔪᒥᒃ ᖃᓪᓗᓈᓂ ᑲᓇᑕᒥ ᖃᐅᔨᓴᕐᕕᐊᓂ, ᒫᓐᓇ 9−ᖑᓕᖅᑐᑦ ᓄᕙᕐᔪᐊᕐᓇᖅ-19−ᒥ ᐱᖃᕐᓂᕋᖅᑕᐅᔪᑦ ᕼᐆᑉ ᐲ ᐅᔭᕋᖕᓂᐊᕐᕕᖕᒥ.
- ᑎᓴᒪᒃᑲᓐᓃᑦ ᐱᖃᕋᓱᒋᔭᐅᔪᑦ ᓇᓗᓇᐃᖅᑕᐅᓚᐅᖅᐳᑦ ᖃᐅᔨᓴᖅᑕᐅᔾᔪᑎᖏᓐᓂᒡᓗ ᐅᑕᕿᓕᖅᖢᑎᒃ.
- ᖁᓕᓪᓗ ᒪᕐᕉᒡᓗ ᓱᓕ ᐃᓄᑐᐊᒃᑯᕕᖕᒦᑦᑐᑦ.
- ᐊᐅᓪᓚᕆᐊᖃᓪᓚᕆᙱᑦᑐᑦ ᑕᒪᕐᒥᑦᑎᐊᖅ ᓄᖅᑲᖅᑎᑕᐅᓚᐅᕆᕗᑦ ᐅᔭᕋᖕᓂᐊᕐᕕᓕᐊᕐᓂᐊᖅᑐᑦ ᐅᔭᕋᖕᓂᐊᕐᕕᖕᒥᙶᖅᑐᓪᓗ.
- ᐃᖅᑲᓇᐃᔭᕆᐊᖃᓪᓚᕆᒃᑐᑦ ᓱᓕ ᐱᓕᕆᔭᕆᐊᖃᖅᑐᑦ ᐃᖅᑲᓇᐃᔭᖅᑎᐅᖃᑎᖏᑦ ᐊᑦᑕᕐᓇᙱᑦᑐᒦᖁᓪᓗᒋᑦ, ᓱᓕ ᐃᖅᑲᓇᐃᔭᖅᐳᑦ ᑭᓯᐊᓂ ᐃᓇᖏᖅᑕᐅᒃᐸᑕ. ᑕᐃᒃᑯᐊ ᐃᖅᑲᓇᐃᔭᖅᑎᑦ ᐊᑐᖅᑕᐅᔭᕆᐊᖃᓪᓚᕆᒃᑐᓂᒃ ᒪᓕᒃᐳᑦ ᐅᐸᒃᑕᐅᔭᕆᐊᖃᙱᖦᖢᑎᒃ ᑕᐃᑲᓃᑦᑐᓂᒃ, ᒪᑐᐊᖅᓯᒪᔭᕆᐊᖃᖅᖢᑎᒡᓗ. ᐃᖅᑲᓇᐃᔭᖅᑏᑦ ᖃᓂᒪᑲᑕᓕᖅᑐᑦ ᐃᓄᑑᔭᕆᐊᖃᓯᑲᐅᑎᒋᖃᑦᑕᕐᓂᐊᖅᐳᑦ.
ᓄᓇᕗᑦ ᐊᑐᕐᓂᐊᖅᑕᖓ: ᐊᑐᖁᔭᐅᔪᑦ ᐊᓯᔾᔨᖅᑐᑦ
ᓄᓇᕗᑦ ᒐᕙᒪᒃᑯᑦ ᐱᐅᓯᒋᐊᖅᑎᑦᑎᓇᓱᐃᓐᓇᖅᑎᓪᓗᒋᑦ ᓄᓇᕗᑦ ᐊᑐᕐᓂᐊᖅᑕᖓᓂᒃ, ᐋᓐᓂᐊᖃᕐᓇᙱᑦᑐᓕᕆᔨᒻᒪᕆᒃ, ᕿᒥᕐᕈᓚᐅᖅᖢᓂ ᒫᓐᓇ ᓄᕙᕐᔪᐊᕐᓇᖅ-19 ᐅᓗᕆᐊᓇᑐᐃᓐᓇᕆᐊᖃᕐᓂᖓᓂ ᓄᓇᕗᒥ ᓄᓇᓕᖏᓐᓂ, ᐅᑯᓂᖓ ᐊᑐᖁᔭᐅᔪᓂᒃ ᐊᓯᔾᔩᓯᒪᓕᖅᐳᖅ ᑭᒃᑯᑐᐃᓐᓇᓄᑦ ᖃᓄᐃᙱᑦᑐᓄᑦ ᐅᔾᔨᖅᓱᕈᑎᓂᒃ. ᐅᑯᐊ ᓄᑖᑦ ᐅᔾᔨᓱᕈᑏᑦ 12:01−ᒥ ᐅᓐᓄᐊᒃᑯᑦ ᐊᑐᓯᒋᐊᕐᓂᐊᖅᑐᑦ ᑲᓇᖕᓇᐅᑉ ᖃᐅᔨᓴᐅᑎᖓᒍᑦ ᓇᒡᒐᔾᔭ, ᐅᒃᑑᐱᕆ 5, 2020.
ᓂᕿᓕᕆᔨᓄᑦ ᐊᑐᓕᖅᑎᑕᐅᔪᑦ
- ᓂᕿᓕᕆᔨᓕᒫᑦ ᐊᑐᓕᖅᑎᑕᐅᔪᑦ ᓄᓇᕗᒻᒥ ᒪᒃᐱᖅᑕᐅᕙᓪᓕᐊᑐᐃᓐᓇᕆᐊᓖᑦ ᑭᒡᓕᓕᐅᖅᑕᐅᓯᒪᓗᑎᒃ ᓂᕆᕝᕖᑦ, ᐊᒡᔭᖅᑕᐅᕙᒃᑐᑦ, ᐊᒻᒪᓗ ᑎᑭᓴᐃᕝᕕᐅᕙᒃᑐᑦ ᐅᑯᓇᓂ.
- ᐃᒃᓯᕚᕈᓐᓇᖅᑐᑦ 75−ᐳᓴᓐ ᐅᖓᑖᓃᙱᓪᓗᑎᒃ ᐃᒃᓯᕚᕈᓐᓇᖅᑎᑕᐅᒐᔪᒃᑐᓂᑦ.
- ᐅᖓᓯᒌᒋᐊᖃᔭᖅᑐᑦ ᒪᕐᕉᖕᓂᑦ ᒦᑕᓂᑦ (2 ᒦᑕᔅ) ᐅᖓᓯᒌᒡᓗᑎᒃ ᑭᐳᐃᑦ ᐊᒻᒪᓗ ᐃᓄᐃᑦ ᑐᑭᓕᕇᒃᑐᑦ ᐅᑕᕿᔪᑦ ᑎᑭᓵᒥᓂᒃ ᐅᕝᕙᓘᓐᓃᑦ ᐱᔨᑦᑎᕋᖅᑕᐅᑎᓪᓗᒋᑦ ᓂᐅᕕᕐᑎᖓᓂᑦ.
- 6−ᓂᑦ ᐃᓄᒋᐊᒃᑎᒋᔭᕆᐊᓕᒃ ᐃᒃᓯᕚᖅᑐᑦ ᐅᕝᕙᓘᓐᓃᑦ ᑲᑎᖓᑦᑕᐃᓕᒪᓗᑎᒃ ᑭᐴ ᖃᓂᒋᔮᓂ.
- ᓂᕿᓕᕆᔨᓄᑦ ᐊᑐᓕᖅᑎᑕᐅᔪᑦ ᓴᖅᑭᑎᑦᓯᒍᓐᓇᖅᑐᑦ ᓇᖕᒥᓂᖅ ᐃᑲᕐᕋᖏᓐᓂᑦ ᐱᓕᕆᕝᕕᐅᔪᒥ, ᑎᑭᓴᐃᕕᐅᖃᑦᑕᖅᑐᑦ ᓂᕆᔭᒃᓴᐃᓪᓗ ᐊᒡᔭᖅᑐᖅᑕᐅᓂᖏᓐᓄᑦ.
ᐱᔪᓐᓇᐅᑎᖃᕐᑐᑦ ᓇᖕᒥᓂᕆᔭᐅᔪᓄᑦ
- ᑕᒪᕐᒥᒃ ᐱᔪᓐᓇᐅᑎᖃᖅᑎᐅᔪᑦ ᒪᑐᐃᕈᓐᓇᖅᑐᑦ ᓇᖕᒥᓂᕆᔭᐅᔪᑦ ᐃᑲᕐᕋᕆᒐᔪᒃᑕᖏᓐᓂᑦ, ᐱᔭᕆᐊᖃᖅᐸᑕ ᐱᔪᓐᓇᐅᑎᖏᓐᓄᑦ ᖃᓄᐃᓕᖓᓂᖏᓐᓄᑦ, ᐅᑯᓇᓂ.
- ᐃᒃᓯᕚᕈᓐᓇᖅᑐᑦ 75−ᐳᓴᓐ ᐅᖓᑖᓃᙱᓪᓗᑎᒃ ᐃᒃᓯᕚᕈᓐᓇᖅᑎᑕᐅᒐᔪᒃᑐᓂᑦ.
- ᐅᖓᓯᒌᒋᐊᖃᔭᖅᑐᑦ ᒪᕐᕈᖕᓂᑦ ᒦᑕᓂᑦ (2 ᒦᑕᔅ) ᐅᖓᓯᒌᒡᓗᑎᒃ ᑭᐳᐃᑦ ᐊᒻᒪᓗ ᐃᓄᐃᑦ ᑐᑭᓕᕇᒃᑐᑦ ᐅᑕᕿᔪᑦ ᑎᑭᓵᒥᓂᒃ, ᔭᐸᒥᓂᒃ ᐊᐃᒃᖠᖅᓯᒪᔪᑦ, ᐊᒻᒪ ᐱᐊᑖᕋᓱᒃᑐᑦ.
- 6−ᓂᑦ ᐃᓄᒋᐊᒃᑎᒋᔭᕆᐊᓕᒃ ᐃᒃᓯᕚᖅᑐᑦ ᐅᕝᕙᓘᓐᓃᑦ ᑲᑎᖓᑦᑕᐃᓕᒪᓗᑎᒃ ᑭᐴ ᖃᓂᒋᔮᓂ.
ᑐᑭᓯᓇᖅᓯᑎᒃᑲᓐᓂᕐᓗᒍ, ᐅᑯᐊ ᐊᑐᖁᔭᐅᔪᑦ ᒪᓕᒃᑕᐅᔾᔮᙱᑦᑐᑦ ᐃᖃᓗᖕᓂ ᕕᐊᑖᕐᕕᖕᒥ ᐅᐊᐃᓂᑖᕐᕕᖕᒥᓪᓗ ᐊᓯᓕᒫᖏᓐᓂᒡᓗ ᐃᒥᐊᓗᒃᑖᕐᕕᖕᓂ ᐊᐅᓚᑕᐅᔪᓂᒃ ᓄᓇᕗᒻᒥ ᐃᒥᐊᓗᓕᕆᔨᒃᑯᓐᓂ ᓱᕐᕋᖕᓇᖅᑐᓕᕆᔨᒃᑯᓪᓗ ᑲᑎᒪᔨᖏᓐᓂᒃ.
ᐱᙳᐊᖅᑐᓕᕆᓂᖅ, ᑭᐱᙳᐃᔭᕐᓂᖅ, ᐊᒻᒪ ᓄᓇᓕᖕᓂ ᑲᑎᙵᕙᒃᑐᑦ:
- ᐅᖃᓕᒫᒐᖃᕐᕖᑦ, ᑕᑯᔭᒐᖃᕐᕖᑦ, ᐊᒻᒪ ᖁᙱᐊᕆᐊᕐᕖᑦ ᐃᑲᕐᕋᕆᕙᒃᑕᒥᓂᒃ ᒪᑐᐃᖓᑐᐃᓐᓇᕆᐊᓖᑦ ᐅᑯᓇᓂ:
- ᑲᑎᖦᖢᒋᑦ ᐃᓯᖅᑐᑦ 50-ᐳᓴᓐ ᐅᖓᑖᓃᑦᑐᓐᓇᙱᑦᑐᑦ ᐃᒡᓗᕈᓯᕐᒥ ᐃᓯᕈᓐᓇᖅᑎᑕᐅᔪᓂᑦ.
- ᐱᙳᐊᕐᕖᑦ, ᐃᖃᐃᓕᓴᕐᕖᑦ, ᐅᓇᑕᖅᑐᒃᓴᙳᐊᓄᑦ ᐅᐸᒃᑕᐅᕝᕖᑦ, ᑭᐱᙳᐃᔭᕐᕖᑦ, ᐊᒻᒪ ᐃᒻᒥᒃᑯᑦ ᐃᖃᐃᓕᓴᕐᕖᑦ ᐅᒃᑯᐃᖓᔪᓐᓇᖅᑐᑦ ᐃᓄᖕᓄᑦ ᐃᖃᐃᓕᓴᕈᒪᔪᓄᑦ, ᑲᑎᙵᔪᓄᑦ ᐃᖃᐃᓕᓴᖅᑐᓄᑦ, ᒪᒃᑯᒃᑐᓄᑦ ᑲᑎᙵᑎᑕᐅᔪᓄᑦ, ᐅᓇᑕᖅᑐᒃᓴᙳᐊᓄᑦ ᐊᒻᒪ ᑭᐱᙳᐃᔭᖅᑎᑕᐅᔪᓄᑦ ᐅᑯᓇᓂ:
- ᑲᑎᖦᖢᒋᑦ ᐃᓄᖃᕈᓐᓇᖅᑐᑦ ᐃᒡᓗᕈᓯᕐᒥ ᐊᑕᐅᓯᕐᒥᒃ 25 ᐃᓄᐃᑦ ᐅᖓᑖᓅᕈᓐᓇᙱᑦᑐᑦ ᐅᕝᕙᓘᓐᓃᑦ ᐃᓄᖃᕈᓐᓇᕐᓂᖓᑕ 50−ᐳᓴᓐᖓᓄᑦ.
- ᕼᐋᒪᓚᒃᑯᑦ ᓯᐊᕐᕆᔮᕐᕕᖏᑦ ᐅᒃᑯᐃᖓᔪᓐᓇᖅᑐᑦ ᐃᓄᖕᓄᑦ ᐃᖃᐃᓕᓴᕈᒪᔪᓄᑦ, ᐃᖃᐃᓕᓴᖅᑎᑦᑎᔪᓄᑦ, ᐊᒻᒪ ᑭᐱᙳᐃᖅᔭᖅᑎᑦᑎᔪᓄᑦ, ᐃᒪᐃᓪᓗᑎᒃ:
- ᑲᑎᖦᖢᒋᑦ ᐃᓯᖅᓯᒪᔪᑦ ᐱᙳᐊᕐᕕᖓᓂ, ᐅᑯᐊᓗ ᐱᓕᕆᖃᑕᐅᔪᑦ ᐃᖅᑲᓇᐃᔭᖅᑎᓪᓗ ᖄᖏᐅᑎᔭᕆᐊᖃᙱᑦᑐᑦ ᖃᓂᓐᓂᖅᓴᒧᑦ 50 ᐃᓄᐃᑦ ᐅᕝᕙᓘᓐᓃᑦ 50-ᐳᓴᓐ ᐃᓄᖃᕈᓐᓇᖅᑎᑕᐅᔪᑦ ᐊᑐᓂ ᐃᒡᓗᕈᓯᕐᓂ.
- ᑲᑎᓪᓗᒋᑦ ᖁᙱᐊᖅᑎᑦ ᐅᓄᕐᓂᖏᑦ 50 ᐅᖓᑖᓃᙱᓪᓗᑎᒃ.
ᑲᑎᙵᖃᑦᑕᖅᑐᑦ:
- ᒥᕐᖑᐃᖅᓯᕐᕕᖕᒥ ᐃᒡᓗᖁᑎᒋᔭᐅᔪᑦ ᐅᒃᑯᐃᖓᔪᓐᓇᖅᓯᔪᑦ.
- ᐸᖅᑭᔭᐅᔅᓲᔭᖅᑐᑦ, ᑲᒪᒋᔭᐅᖏᓐᓇᕆᐊᓖᑦ, ᐋᓐᓂᐊᕐᕕᓕᐊᖅᑐᓪᓗ ᑐᔪᕐᒥᕕᖕᒦᑦᑐᑦ ᒪᕐᕉᖕᓂᒃ ᐅᒡᓚᖅᑕᐅᔪᓐᓇᖅᑐᑦ ᐊᑕᐅᑦᑎᒃᑯᑦ ᖃᑕᙳᑎᒥᓂᒃ; ᐅᒡᓚᖅᑐᑦ ᒪᑐᐊᖅᓯᒪᔭᕆᐊᖃᖅᑐᑦ ᑮᓇᖓᓘᓐᓃᑦ ᒪᑐᐊᖅᓯᒪᓗᓂ.
- ᓯᓚᒥ ᑲᑎᙵᕙᒃᑐᑦ ᐅᓄᖅᓯᒋᐊᖅᑕᐅᕗᑦ 100−ᔪᓐᓇᖅᓯᓪᓗᑎᒃ, ᖃᓂᒌᓗᐊᖅᑕᐃᓕᓗᑎᒃ.
- ᑕᑯᔭᒐᖃᕐᕕᖕᒥ, ᐅᖃᓕᒫᒐᖃᕐᕕᖕᒥ ᐊᒻᒪ ᖁᙱᐊᕆᐊᕐᕕᖕᒥ ᑲᑎᑉᐸᒃᑐᑦ: 25-ᖑᓗᑎᒃ ᐃᓄᐃᑦ ᐅᕝᕙᓘᓐᓃᑦ ᐃᓐᓄᒍᓐᓇᕐᓂᖓᑕ 50-ᐳᓴᓐᖓᓂ.
- 100 ᐃᓄᐃᑦ ᐅᕝᕙᓘᓐᓃᑦ 75-ᐳᓴᓐ ᐃᓐᓄᒍᓐᓇᖅᑎᑕᐅᔪᑦ ᐃᒡᓗᕈᓯᕐᒥ ᓂᖅᑐᐃᔭᖅᑐᖅᑐᑦ, ᑲᑎᒪᔭᖅᑐᖅᑐᑦ ᐋᖅᑭᒃᑕᐅᓪᓗᑎᒃ ᒐᕙᒪᒃᑯᓐᓂ, ᐃᓄᐃᑦ ᑲᑐᔾᔨᖃᑎᒌᓂᑦ, ᐊᒻᒪ ᐃᓄᖕᓄᑦ ᒐᕙᒪᐅᔪᑦ ᐱᓕᕆᕝᕕᓐᓂᒃ, ᑲᑎᒪᕝᕖᑦ, ᐱᙳᐊᕐᕖᑦ ᐊᒻᒪ ᑲᑎᒪᕝᕕᐅᓂᐊᖅᑐᒥᒃ ᐊᑐᖅᑐᐊᖅᑕᐅᕙᒃᑐᑦ, ᑕᕐᕆᔭᕐᕖᓪᓗ.
- 75-ᐳᓴᓐᐃᓐᓄᒍᓐᓇᖅᑎᑕᐅᔪᑦ ᓂᕆᕝᕖᑦ ᐊᒻᒪ ᐱᔪᓐᓇᐅᑎᖃᖅᑐᑦ ᐃᒥᐊᓗᒃᑖᕐᕕᖕᓄᑦ ᐋᖅᑭᒃᑕᐅᔪᑦ.
- ᐃᒡᓘᑉ ᐃᓗᐊᓂ ᑲᑎᙵᕙᒃᑐᑦ: ᑲᑎᖦᖢᒋᑦ ᐃᓯᖅᓯᒪᔪᑦ 15-ᒧᑦ ᑎᑭᓪᓗᒍ ᐃᓄᐃᑦ.
ᒪᑐᐊᖅᓯᒪᔾᔪᑏᑦ:
- ᐊᐅᓪᓚᖃᑦᑕᖅᑐᑦ ᐱᖃᑕᐅᙱᖦᖢᑎᒃ ᒪᑐᐊᖅᓯᒪᔭᕆᐊᖃᖅᐳᑦ ᐅᕝᕙᓘᓐᓃᑦ ᑮᓇᖓ ᒪᑐᐊᖅᓯᒪᕙᒡᓗᓂ ᐅᓪᓗᑦ 14 ᓄᓇᕗᒻᒦᓕᓵᖅᑎᓪᓗᒋᑦ ᐃᓄᒋᐊᒃᑯᕕᖕᒦᓕᑐᐊᕈᑎᒃ.
- ᐊᐅᓪᓚᖃᑦᑕᖅᑐᑦ ᐱᖃᑕᐅᙱᖦᖢᑎᒃ ᒪᕐᕉᖕᓂ ᐅᑭᐅᖃᙱᑦᑐᑦ, ᐊᒻᒪ ᐅᑭᐅᓖᑦ ᒪᕐᕉᖕᓂᑦ−ᑎᓴᒪᓄᑦ ᒪᑐᐊᖅᓯᒪᔪᓐᓇᙱᑦᑐᑦ ᐱᖃᓯᐅᔾᔭᐅᙱᑦᑐᑦ.
- ᐊᐅᓪᓚᖃᑦᑕᖅᑐᑦ ᐱᖃᑕᐅᙱᖦᖢᑎᒃ ᐃᓂᖃᖅᑎᑕᐅᔭᕆᐊᓖᑦ ᐃᓄᐃᑦ ᐱᔪᓐᓇᐅᑎᖓᑕ ᐱᖁᔭᖓ ᒪᓕᒃᖢᒍ ᒪᑐᐊᖅᓯᒪᔭᕆᐊᓕᖕᓄᑦ ᐱᖃᑕᐅᒋᐊᖃᙱᑦᑐᑦ.
- ᐊᐅᓪᓚᖃᑦᑕᖅᑐᑦ ᐱᖃᑕᐅᙱᖦᖢᑎᒃ ᒪᑐᐊᒥᓂᒃ ᐲᖅᓯᔪᓐᓇᖅᐳᑦ ᓂᕆᓂᐊᓕᕈᑎᒃ ᐃᒥᕐᓂᐊᓕᕈᑎᒃ ᐃᓄᒋᐊᒃᑐᒃᑯᕕᖕᓂ.
ᑖᔅᓱᒥᖓ ᐊᑐᖁᔭᐅᔪᒥᒃ ᒪᓕᙱᑦᑐᑦ ᓱᕋᐃᓂᕋᖅᑕᐅᓇᔭᖅᐳᑦ ᐊᑐᖁᔨᔾᔪᑎᒥᒃ ᐱᖁᔭᕐᒥ ᓴᖅᑭᑎᑕᐅᓯᒪᔪᑦ ᐊᑭᓖᑎᑕᐅᑐᐃᓐᓇᕆᐊᖃᖅᖢᓂᓗ ᐱᖁᔭᖅ ᒪᓕᒃᖢᒍ, ᐅᑯᐊᓗ ᐱᖃᓯᐅᔾᔭᐅᑐᐃᓐᓇᕆᐊᓖᑦ:
- $575−ᒥᒃ ᐊᑭᓖᑎᑕᐅᓗᑎᒃ ᐃᓄᖕᓄᑦ; ᐊᒻᒪ
- $2875−ᒥᒃ ᐊᑭᓖᑎᑕᐅᓗᑎᒃ ᑲᑐᔾᔨᖃᑎᒌᒡᕖᑦ.
ᐃᓚᒋᔭᐅᓪᓗᓂ ᓄᓇᕗᑦ ᒐᕙᒪᖓᑕ ᐱᓇᔪᖕᓂᕆᔭᖓᓄᑦ ᓴᐳᔾᔨᓯᒪᔪᒪᓪᓗᑎᒃ ᓄᓇᕗᒻᒥᐅᓂᒃ ᖁᐋᖅᓵᕐᓇᖅᑐᒧᑦ ᓄᕙᒡᔪᐊᕐᓇᖅ-19−ᒧᑦ, ᓄᓇᕗᑦ ᒐᕙᒪᖓᑕ ᐱᓕᕆᕝᕕᒋᑦ ᐅᑯᓂᖓ ᐊᑐᓕᖅᑎᑦᑎᓯᒪᕗᑦ:
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐱᔨᑦᑎᕋᐅᑎᖏᑦ
ᐃᓄᑐᐊᒃᑯᕕᖕᒦᑦᑐᑦ ᐅᓄᕐᓂᖏᑦ
ᑲᑎᖦᖢᒋᑦ (ᑕᒪᕐᒥᑦᑎᐊᖅ ᐃᓄᑐᐊᒃᑯᕕᖕᒦᑦᑐᑦ) | |
ᐊᐅᓪᓚᖅᓯᒪᔫᑉ ᖃᓄᐃᑦᑑᓂᖓ | ᑐᔪᕐᒥᑎᑕᐅᔪᑦ ᐊᓂᑦᑕᐃᓕᒪᔪᓂ ᐅᑐᐱᕆ 2-ᒥᑦ ᐱᒋᐊᖅᖢᓂ |
ᐋᓐᓂᐊᕐᕕᓕᐊᖅᑐᑦ | 366 |
ᑭᒃᑯᑐᐃᓐᓇᑦ | 398 |
ᑲᑎᖦᖢᒋᑦ | 764 |
ᐊᐅᓪᓚᖅᐸᒃᑐᑦ ᐅᑎᖅᑎᑕᐅᓂᖏᓐᓄᑦ ᖃᓄᐃᓕᖓᓂᖏᑦ:
ᐅᓪᓗᖅ ᐊᐅᓪᓚᕐᕕᒃᓴᖓ | ᖃᔅᓯᐅᓂᖏᑦ ᐊᐅᓪᓚᕐᓂᐊᖅᑐᑦ ᐃᓄᑐᐊᒃᑯᕕᖕᒦᑦᑐᑦ |
ᐅᑐᐱᕆ 1 | 64 |
ᐅᑐᐱᕆ 2 | 47 |
ᐅᑐᐱᕆ 3 | 0 |
ᐅᑐᐱᕆ 4 | 28 |
ᐅᑐᐱᕆ5 | 127 |
ᑲᑎᖦᖢᒋᑦ | 266 |
ᐃᖅᑲᓇᐃᔭᕆᐊᖃᓪᓚᕆᒃᑐᑦ ᑐᒃᓯᕋᖅᑕᐅᔪᑦ
ᐅᑐᐱᕆ 1−ᒥ ᐱᒋᐊᖅᖢᓂ, 6615−ᓂᒃ ᑐᒃᓯᕋᖅᓯᒪᔪᖃᖅᐳᖅ, 3174−ᖑᓪᓗᑎᒃ ᐃᖅᑲᓇᐃᔭᕆᐊᖃᓪᓚᕆᒃᑐᓂᒃ ᑐᒃᓯᕋᕈᑕᐅᔪᑦ.
ᑐᒃᓯᕋᕈᑕᐅᓯᒪᔪᑦ ᖃᓄᐃᓕᖓᓂᖏᑦ | # | % |
ᐊᖏᖅᑕᐅᓯᒪᔪᑦ (ᐅᑯᐊᖑᕗᑦ ᐱᒻᒪᕆᐊᓗᐃᑦ ᐱᒻᒪᕆᐅᓗᐊᙱᑦᑐᓪᓗ) | 4666 | 69.8% |
ᐊᖏᕐᑕᐅᙱᑦᑐᑦ | 264 | 4.0% |
ᐅᑕᖅᑭᔪᑦ | 110 | 1.6% |
ᐊᐅᓪᓚᕐᕕᐅᔪᓐᓇᖅᑐᑦ ᐊᑐᖅᑕᐅᒐᔪᒃᑐᓄᑦ ᐊᖏᖅᑕᐅᔪᑦ | 1642 | 24.6% |
ᑲᑎᖦᖢᒋᑦ | 6682 | 100% |
ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᑦ
ᑐᒃᓯᕋᐅᑎᑦ ᐅᑭᐅᖅᑕᖅᑐᒧᐊᕈᒪᔪᓄᑦ ᐃᒡᓗᓕᐅᕆᐊᖅᑐᖅᑐᓄᑦ ᐱᓕᕆᐊᒃᓴᓄᑦ ᐅᕝᕙᓘᓐᓃᑦ ᓄᓇᕗᒻᒧᑦ ᐊᐅᓪᓚᕈᒪᔪᓄᑦ ᐃᒡᓗᓕᐅᕆᐊᖅᑐᖅᑐᓄᑦ ᐱᓕᕆᐊᒃᓴᓄᑦ, ᐃᕐᙲᓐᓈᖅᑕᐅᒃᑯᑦ ᓇᓂᔭᐅᔪᓐᓇᖅᐳᖅ ᐅᕙᓂ, @email
ᐃᒡᓗᓕᐅᖅᑏᑦ ᐊᓂᒍᐃᔪᑦ ᐃᓄᑐᐊᒃᑯᕕᖕᒥ ᒫᓐᓇᒧᑦ ᑎᑭᖦᖢᒍ: 1674
ᓄᓇᕗᒻᒥᐅᓂ ᖃᓄᐃᙱᑦᑎᐊᖅᑎᑦᑎᓇᓱᒡᓗᑕ ᑕᒪᑦᑕ ᑲᒪᒋᔭᒃᓴᕆᔭᕗᑦ! ᐳᐃᒍᖅᑕᐃᓕᒋᑦ: ᐊᒡᒐᑎᑦ ᐊᓪᓕᕋᐃᓪᓗ ᐅᐊᓴᖃᑦᑕᕐᓗᒋᑦ, ᖃᓂᒌᓗᐊᖅᑕᐃᓕᕙᒡᓗᓯ, ᐃᖢᐊᖅᓴᐃᔨᓄᑦ ᐅᖃᐅᔾᔪᐃᔾᔪᑕᐅᔪᓂᑦ ᓈᓚᒃᐸᒡᓗᓯ, ᐊᖏᕐᕋᖅᓯᒪᐃᓐᓇᕐᓗᑕᓗ ᖃᓂᒪᒍᑦᑕ.