ᖁᓕᑦ ᓄᑖᑦ ᓄᕙᔾᔪᐊᕐᓇᖅ 19-ᑖᖅᓯᒪᔪ ᓄᓇᕗᒻᒥ
ᐱᕙᓪᓕᐊᔪᑦ ᑐᓴᕋᑦᓴᑦ
ᖁᓕᑦ ᓄᑖᑦ ᓄᕙᔾᔪᐊᕐᓇᖅ 19-ᑖᖅᓯᒪᔪ ᓄᓇᕗᒻᒥ
ᐃᖃᓗᐃᑦ, ᓄᓇᕗᑦ (ᓄᕕᐱᕆ 20, 2020) − ᐅᓪᓗᒥ, ᓄᓇᕗᒻᒥ ᑲᑎᓕᒫᖅᑐᒋᑦ 84 ᓇᓗᓇᐃᖅᑕᐅᓯᒪᔪᑦ ᓄᕙᔾᔪᐊᕐᓇᖅ 19-ᑖᖅᓯᒪᔪᑦ. ᐊᑕᐅᓯᖅ ᓄᑖᖅ ᓇᓗᓇᐃᖅᑕᐅᓯᒪᔪᖅ ᐊᕐᕕᐊᓂ, ᓄᓇᖓᓐᓂ ᑲᑎᓕᒫᖅᑐᒋᑦ ᓄᕙᔾᔪᐊᕐᓇᖅᑖᖅᓯᒪᔪᑦ 58. ᐱᖓᓱᑦ ᓄᑖᑦ ᓇᓗᓇᐃᖅᑕᐅᓯᒪᔪᖃᖅᑐᖅ ᑎᑭᕋᕐᔪᐊᕐᒥ ᓄᓇᖓᓐᓂ ᑲᑎᓕᒫᖅᑐᒋᑦ ᓇᓗᓇᐃᖅᑕᐅᓯᒪᔪᑦ 11. ᑲᖏᖅᖠᓂᕐᒥ 6 ᖄᒃᑲᓐᓂᖓᒍᑦ ᓄᕙᔾᔪᐊᕐᓇᖅᑖᖅᓯᒪᔪᑦ, ᑲᑎᓕᒫᖅᑐᒋᑦ ᓄᓇᖓᓐᓂ ᓄᕙᔾᔪᐊᕐᓇᖅᑖᖅᓯᒪᔪᑦ 13. ᐊᓯᔾᔨᖅᓯᒪᙱᑦᑐᑦ ᓄᕙᔾᔪᐊᕐᓇᖅᑐᓖᑦ ᓴᓂᑭᓗᐊᕐᒥ.
“ᓱᓕ ᓇᓗᓇᐃᖅᑕᐅᓯᒪᙱᑦᑐᖅ ᓄᓇᓕᓐᓂ ᓯᐊᕐᒪᐸᓪᓕᐊᓂᖓᓂᒃ ᓴᓂᑭᓗᐊᕐᒥ, ᑲᖏᖅᖠᓂᕐᒥ ᑎᑭᕋᕐᔪᐊᒥᓗ. ᐱᓇᓱᐊᕈᓯᐅᑉ ᓄᙳᐊᓅᖅᐸᓪᓕᐊᑎᓪᓗᑕ, ᐱᒻᒪᕆᐅᕗᖅ ᓄᓇᕗᒻᒥᐅᑦ ᐳᓛᕆᐊᑦᑕᐃᓕᒋᐊᖃᕐᓂᖏᑦ, ᓴᙱᔪᒥᒃ ᐃᓅᖃᑎᒌᑦ ᖃᓂᒌᓗᐊᑦᑕᐃᓕᑦᓯᐊᕐᓗᑎᒃ ᒪᑐᐊᖅᓯᒪᖃᑦᑕᕐᓗᑎᓪᓗ ᐊᓂᓂᐊᑐᐊᕈᑎᒃ ᐊᖏᕐᕋᒥᓐᓂᒃ. ᐊᖏᖅᑐᒋᑦ 84 ᓄᕙᔾᔪᐊᕐᓇᖅᑖᖅᓯᒪᔪᑦ ᐊᓂᑦᑕᐃᓕᑎᑕᐅᔪᑦ ᐃᓘᓐᓇᑎᓪᓗ ᖃᓄᐃᒐᑎᒃ. ᓱᓕ ᑲᑎᔭᒥᓂᐅᔪᓂᒃ ᖃᐅᔨᓴᖅᐸᓪᓕᐊᔪᒍᑦ ᐊᑦᑐᖅᑕᐅᓯᒪᔪᓕᒫᓂ ᓄᓇᓕᓐᓂ ᖃᐅᔨᓴᖅᐸᓪᓕᐊᖏᓐᓇᖅᑐᑕᓗ ᐃᓘᓐᓇᑎᖏᓐᓂᒃ ᐊᓂᑦᑕᐃᓕᑎᑕᐅᔪᓂᒃ ᖃᓄᐃᑦᑕᐃᓕᖁᓪᓗᒋᑦ,” ᐅᖃᖅᓯᒪᔪᖅ ᓘᑦᑖᖅ ᒪᐃᑯᓪ ᐸᑐᓴᓐ, ᓄᓇᕗᒻᒥ ᐋᓐᓂᐊᖃᕐᓇᖏᑦᑐᓕᕆᔨᒻᒪᕆᒃ.
ᓄᕕᐱᕆ 19-ᒧᓄᑦ, 119 ᖃᐅᔨᓴᖅᑕᐅᓯᒪᔪᑦ ᓴᓂᑭᓗᐊᕐᒥ ᓄᕙᔾᔪᐊᕐᓇᖅᑐᖃᙱᑦᑐᑦ. ᑲᖏᖅᖠᓂᕐᒥ, 110 ᖃᐅᔨᓴᖅᑕᐅᓯᒪᔪᑦ ᓄᕙᔾᔪᐊᕐᓇᖅᑐᖃᙱᑦᑐᑦ. ᐊᕐᕕᐊᓂ ᖃᐅᔨᓴᖅᑕᐅᓯᒪᔪᑦ 137 ᓄᕙᔾᔪᐊᕐᓇᖅᑐᖃᙱᑦᑐᑦ. ᖃᐅᔨᓴᖅᑕᐅᓯᒪᔪᑦ ᑎᑭᕋᕐᔪᐊᒥ 21 ᓄᕙᔾᔪᐊᕐᓇᖅᑐᖃᙱᑦᑐᑦ.
ᑭᓇᑐᐃᓐᓇᖅ ᖃᓂᒋᔭᖃᖅᑐᒥᓂᐅᓱᕆᒍᓂ ᓄᕙᔾᔪᐊᕐᓇᖅ 19-ᓕᒻᒧᑦ ᐅᖄᓚᖁᔭᐅᔪᖅ ᓄᕙᔾᔪᐊᕐᓇᐅᑉ ᒥᑦᓵᓄᑦ ᐅᖃᓚᕕᒻᒧᑦ 1-888-975-8601 ᐊᑯᓐᓂᖏᓐᓂ 10 ᐅᓪᓛᓴᒃᑯᑦ ᐊᒻᒪᓗ 6 ᐅᓐᓄᓴᒃᑯᑦ, ᖃᐅᔨᒃᑲᐃᑦᓴᐅᑎᒋᓗᑎᓪᓘᓐᓃᑦ ᓄᓇᓕᓐᓂ ᐋᓐᓂᐊᕐᕕᖓᓄᑦ, ᐊᓂᑦᑕᐃᓕᑦᓴᐅᑎᒋᓕᕐᓗᑎᓪᓗ ᐊᖏᕐᕋᒥᓐᓂᒃ ᐅᓪᓗᓂᒃ 14-ᓂᒃ. ᐅᐸᒍᑎᑦᑕᐃᓕᓗᑎᒃ ᐋᓐᓂᐊᕐᕕᒻᒧᑦ.
ᓄᑖᖑᓂᖅᐹᓂᒃ ᑐᑭᓯᒋᐊᖃᑦᑕᕈᒪᒍᕕᑦ ᐃᑲᔫᑎᑦᓴᐃᓪᓗ ᒥᑦᓵᓄᑦ ᓄᕙᔾᔪᐊᕐᓇᖅ 19 ᓄᓇᕗᒻᒥ, ᐅᕗᖓᕐᓗᑎᑦ: https://www.gov.nu.ca/health/information/covid-19-novel-coronavirus
ᓄᑖᖑᓂᖅᐹᓂᒃ ᑐᑭᓯᒋᐊᖃᑦᑕᕈᒪᒍᕕᑦ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᒪᓕᑦᑕᐅᒋᐊᓕᓐᓂᒃ, ᐅᕗᖓᕐᓗᑎᑦ: https://www.gov.nu.ca/health/information/nunavuts-path
ᑐᓴᖅᑎᑦᓯᒋᐊᓚᖓᔪᑦ ᐱᕙᓪᓕᐊᔪᓕᕆᔨᓂᒃ ᖃᐅᔨᒃᑲᐃᓕᖅᑲᑕ 11:00 ᐅᓪᓛᓴᒃᑯᑦ ᑲᓇᓐᓇᕐᒥ ᓯᕿᕐᖑᔭᖓᒍᑦ, ᐅᓪᓗᒥ, ᓄᕕᐱᕆ 20.
###
ᐱᕙᓪᓕᐊᔪᓕᕆᔨᓄᑦ ᖃᐅᔨᒋᐊᕐᕕᑦᓵᒃ:
ᑲᐃᑦ ᒪᒃᓚᐅᑦ
ᐱᕙᓪᓕᐊᔪᓕᕆᓂᕐᒧᑦ ᑎᑎᕋᖅᑎ ᓯᕗᓕᖅᑎ ᓴᕕᖃᑖᕐᒧᑦ
867-975-5059
@email
ᑯᕆᔅ ᐳᓕᐊ
ᑐᓴᕋᑦᓴᓕᕆᓂᕐᒧᑦ ᐊᐅᓚᑦᓯᔨᐅᑲᐃᓐᓇᖅᑐᖅ
ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ
867-975-5949
@email