Havaktingit

You are here

Hivuliqti, Ministat iniqtiqtaa Kitikmeonmi Aquiniq

mii 05, 2010

IQALUIT, Nunavut (May 4, 2010) – Hivuliqti Eva Aariak havaqataillu iniqtiqtaa aquinirmiknik Kitikmeonmi uvani havainirmi, aquivakhutik Kugaarukmut, Taloyoakmut, Urhuqtuumut, Kugluktukmut, Iqaluktuuttiamullu. Hivuliqti, ilauyut Minista Peter Taptuna, Minista Keith Peterson unalu Minista Daniel Shewchuk, miitiqatigivagait haamlatkut, pulaaqpakhugit Nunavut Kavamatkut havakviit ilauvaghutiklu nunallaani miitirniinni. 



“Kavamapta havaqutaa, Tamapta/ᑕᒪᑦᑕ: Hivunighaliurniq Atauttikkut, naunaiyaqpiarhimayuq uumani havangnirnik ukunani uqaqatigiingnikkut atatahimanikkut nunallaaptikni,” uqaqtuq Hivuliqti Aariak. “Quvianaqpiaqtuq uqaqatigiyaamik amigaittut aquiniptikni tuhaayaamilu ikayurnirnik, uqautinik pitquiniklu nunalingmiutanit,” uqaqtuq Hivuliqti Aariak.



“Taimaa Pingahua Maligaliurvik aullaqtirmat Nunavunmiunungauvaktugut kangirhiyumaplutat qanuqtut kavamanga inninganik,” uqaqtuq Tukliq Hivuliqti Ministauyuqlu Pivalliayuliqiyikkut Ingilrayuliqiyitkunnilu Peter Taptuna. “Piyuq uumanga Qanukkanniq, taamna Nunavut Kavamatkut unniutiutjutaa, inuit pitquyaatigut atatjutiqaqupluta nunallaaptiknut. Uumani aquinirmi taimailiuqtugut nalaagaarhimaniaqtavut uqarvigilugillu Nunavunmiut.”



"Quvianaqtuq aquivigiyaami Kitikmeonmi nunallaat naalaghuni uqautigiplunilu ihumaginirnik hakugigharutighanik maligaliqitjutiptiknik aallaniklu kavamatkunnit piniarhimatjutinik, uqaqtuq Minista Maligaliqinikkut Keith Peterson. "Quviahuktugut Nunavunmiut uqarhimayait ikayurutimiknik ukununga aularaanginnaqtunik turaarutinik pitquhikkut nunallaaninlu pitjutinik maligaliqinirnut."



“Hivulliuruti uppiriniq kavamaptiknut una Piliriqatigiinniq, imaaluunniit havaqatigiingniq uvunga atauttinit piyumanirmut.” uqaqtuq Minista Avatiliqiyikkut, Havaktuliqiyikkut unalu Minista Munariyalik Nunavunmi Ilihariaqpaalivikmut, Daniel Shewchuk. “Havagiami nakuuyumik, atatjutiqarhimayughauyugut nunallaaptingnut, taimaatut kangirhimayaaptikni nunallaani ihumagiyaunirnik ittuniklu.” 



Aquivaktut Kitikmeotmi uvanga April 29 – May 3. Katimavighaa Maligaliuqviup Nunavunmi aullaqtirniaqtuq June 1, 2010.



Aallanik Ilitturipkaitjutighanik Uqaqatigilugu: 



Emily Woods 

Tuhagakhanik Titiraqtinga 

Havakvia Hivuliqtiup 

(867) 975-5059 

ewoods@gov.nu.ca 





Matthew Illaszewicz 

Atannguyaq, Tuhaqtipkainikkut 

Pivalliayuliqiyikkut Ingilrayuliqiyitkunnilu

(867) 975-7818

millaszewicz@gov.nu.ca