Havaktingit

You are here

Kaanataup Ukiuqtaqturmiutanga Igluqpaa angmaumaliqtuq

Januali 14, 2010

VAANKUUVAMI, British Columbia-mi (January 14, 2010) 



Kaanataup Ukiuqtaqtumiutanga Igluqpanga angamaqtat ukkuannga ublumi Vaankuuvami. Akhuurutauyuq naunaitkutaq ihumaliuqtamiknik atuliqtitaugiami pingahuuyut Ukiuqtaqtumiutat avikturhimaninngit Vaankuuvami 2010 Ukiuqtaqtumi Ulapqivingani, pipkaitjutauniaqtuq inuit naunaiyarumagumik nunagiyamikni, pulaarviuninnga maniliurninganiklu nunavunmi tautupkaigiamiklu Ukiuqtaqtumiutanik hanaugaliurniit mirhuqningillu. 



Hivuliqtiuyut Nunavunmit, Nunatsiarmit Yuukaanmillu quviahuutigiliqtaat ublumi angmaqtirininnganik tamainnut Kaanatamiutanut pulaariamikni Ukiuqtaqtumiutaq uumani 602 West Hastings Apqutigiyangani talvani Vaankuuvami 2010 Ulapqipkailiqqata unalu Timimitigut Ayurhautilgit Ukiumi Ulapqipkaininngit April 2010mut.



“Kaanataup Ukiuqtaqtumiutanga Igluqpanga pinniqpiaqtuq pulaarviuyuq taimaa tautuktipkaigiaptikni Kaanataup Ukiuqtaqtuninngit nunaryuaptiknut,” uqaqtuq Nunavut Hivuliqtinga Eva Aariak. “Tamaita quuliuyut tautuktipkaiyut talvani inniaqtut tuhaagiaptikni tautugiaptiknilu unipkaaptiknik, aatlatqiituqlu pitquhivut ilitquhivullu ulapqiutikput inuknut qainahuaqtunut Vaankuuvami 2010 Ulapqipkailiqqata unalu Timimitigut Ayurhautilgit Ukiumi Ulapqipkaininngit.”



“Ukiuqtaqtuq piqaryuarhuni uqariikhimayunik piinarialaqihimaninnginniklu pulaaqtunut, maniliuqtunut talvunnga nuulihaaqtunullu,” uqaqtuq Nunatsiap Hivuliqtinga Floyd Roland. “Tuhaqtipkaiyumayavut tamna unipkaaq nunaryuamut uumunngalu Kaanataup Ukiuqtaqtumiutanga Igluqpanga talvani ittuq nutqaqtigiyaugiami inuknut naunaiyarumayut qanuqtut Ukiuqtaqtuq humik tuniyukhaq.”



Kaanataup Ukiuqtaqtumiutanga Igluqpanga piqaqtuq taigualiurvikmik naalautikkuurvikmiklu, tunngavinga aatjikutaliurhimayurlu arhalianguanik qiplaraaqtuq igalaamit. Angiyurlu inuksuk nappaqtiqhimayuq Nunavuutim Kamisinaugaluanganit Peter Irniq tautuknaqtuq haniani ukkuap pulaaqtunut. Iluani naunaipkainiaqtut nunagiyamikni, pulaarviuninnga maniliurninganiklu Kaanatap Ukiuqtaqtumininnganik . 



“Yuukaankut ilautjutininnga uumani Kaanataup Ukiuqtaqtumiutanga Igluqpanga uumani 2010 Ulapqipkailiqqata unalu Timimitigut Ayurhautilgit Ukiumi Ulapqipkaininngit arlinngarutauyuq,” uqaqtuq Yuukaan Hivuliqtinga Dennis Fentie. “Una pulaarviuyuq pipkaitjutiginiaqtaik Yuukanmiutat pipkaitjutauniaqtuq Yuukanmiutat tamainnilu ukiuqtaqturmiutat havaqatigiingit naunairiamikni Ukiuqtaqturmi Kaanatamiutat inuuhingit, pitquhingit, aullaarutingit, havaangit maniliurutinginniklu.”



Kaanataup Ukiuqtaqtumiutanga Igluqpanga tautuktipkainiaqtuq niuvrutigilutiklu Ukiuqtaqtuqmiutanik hanaugaliurniq mirhuqnikou inuknut. Piksassuuqtiplutiklu, maniliurniq pulaarniqlu talvani pulaarviuyumi. Avikturhimaninngillu qunngiaqtukhamiklu tautuktipkainiaqtut Ukiuqtaqtumik ubluqaliqqata quviahuutigipkailiqqata Tallimiunmi Santimut uumani February 19mit 21mut, 2010.



Kavamauyut pingahuuyunit avikturhimayunit talvani ittut ublumi angmaqtilirmata Vaankuuvami Nangariyauyumit Peter Taptuna, Nunavunmi Ministauyuq Pivalliayuliqiyikkunnut unalu Hivuliqtiup Tuglia, Nangariyauyuq Bob McLeod, Nunatsiarmut Ministauyuq Hanayauhimayunut, Pulaarniqmut Maniliurninnganullu unalu Nangariyauyuq Elaine Taylor, Yuukaanmut Ministauyuq Pulaarniqmut Pitquhirmullu Hivuliqtiup Tugliangatalu.



###



Taiguarnikkut naalautikkullu tuhaqtipkainikkut naunairumaguffi, hivayarlugu:



Matthew Illaszewicz

Nunavut Kavamangani

867-975-7818

867-222-0122 cell 

millaszewicz@gov.nu.ca 



Andrew Matthews

Nunatsiap Kavamangani 

867-669-2302

andrew_matthews@gov.nt.ca 



Roxanne Vallevand

Yuukaap Kavamangani

867-633-7949

Roxanne.vallevand@gov.yk.ca