You are here

Alexandra Beaumier's Story

Unipkara, inujuhira, qanuq ahiqpani munakhiguriamnik Nunavumi. 

Tamat aulaqtigiaqtuq aqnaruhiuvluga nalakhugit amigaitut unipkagit atatataima aulaqhimayup hilaqyuami pulaqhimavlugilu amihut ahiqpani nunagiyauyut. Itkaumayaga utiktilugug nunagiyauyunit hanahimayunik pihimaniqhuni aitutikhaminik amigaijuaqtulu unipkat ukuniga tamainik nakuuqpiaqtunik inuknik takuhimayaminik. 

Inuujutigiyumayara piniqpiaqtut aulaaruhiit. Takugami kanuraluk piqpagiyutimnik tamainik aulaarutini unipkaat atatatiama uqauhiit uvaptiknut, aapaga unipkaliqhimayuq hinakhautinik unipkaanik munaqhimik aulaqpaktunik ugahiktumut nakhaqhuni uniagakhamik havautiqaqtumik ugahiktunut nunagiyauyunut. Unutuaraagat alagayuq aularuhiq utakhiyaatigut Jane una munaqhi aulaqtilugu napaaqturiaktukut, takyukut, immailrutigut nunaqyuanik qiqumayukulu nunakut ukiuqtaqtumi. Qauyimahimaitumik, ukua atuhimayut aqnaruhiutiluga piyutigiyara havaliriamni ahiqmani nunami.  

Ukiuraaluit aniguqhimayut, aqualiqtuga, malikhugilu amihut apqutikhak tikuaqhiyutimni munaqhiuliriamni. Aulaqtiriaqnigani havaara qauyimainaqtuga havagumavluga ahiqpani nunami; aqliguhuliqpaktuga aginiganik munaqhiujutit Ukiuqtaqtumi. Aqnaruhiuyuga uiqagitumik amamauyuga talvuna aulalimagitugalu ahiqpanut talva iluliqtuqtara pivaliayutitka munaqhit ayuruirutainik qauyimayainiklu pilaaliriamni ahiqpani munaqhiuliriami qagugu. Taiguaqtatka amihut titiraqhimayut makpiraalu uqauhiuyut munaqhinik havaktunik ugahiktumi taaktiugitutiklu. 

Qauyimayuga talva piyumayara havauhiriyaagani. 

Havakhimayuga ICU-mi ER-milu amihuni ukiuni pivaliahimayugalu ayuruirutinik hapiruiqpaliavlugalu uvamni munaqhiuyaamni. Talva qanurilivut – iqnira ukiuqaliqmat ilituriyugalu pivikhara naamaliqmat munariyaagani tautuktuuyaqtatka inuujuhimnilu iniqtigakhat. Pivikhaqaliqtuga hivumut aulavaliayaamni aulaqtiriaqlugulu nutaaq inuujuhikhara ahiqpani munaqhiuyaamni. Hapiraluaqhuga kihiani upihimainaqtuga. Hivuani havaktitauyuq havakviuyumik Quebec-mit ayuqiqtuqmanga siksini saniuniqni aulaqhimayuga hivuliqmi havaakhitaunimnik Kugluktumut qanituani siksit ukiut taja. Quvianaqtut!!!! Ipiralaiqhimayara!! 

Munaqhiuhimayuga amihuni nunagiyauyuni humiliqaa Nunavumi kihiani piqpagiliqhimayara Kitikmiut ihumaliuqhugalu ilauliriamini inutiaguyuni ilariini aqliknaqtunik munaqhinik, talva ilauliqhimayuga Kavamani Nunavumi unalu naingigigitara taimainiganik. Uqatialaaqtuga naamagikpiaqhugu ayuginimni una havaaq alianaqmat ikayuqtuutautiaqmalu atuqtakhaq. Inuujuhira Nunavumi nuutqaqhimagituq nauvalianigini ayuiqpaliaginaqtugalu munaqhiuvluga, ayuqiqtuivluga, hivuliqhuqhugalu. 

Ahiqpani munaqhiuyaami amihunik akhuurutiqaqtuq. Amigainiqhani ayauqniaraatit kiklikhaqnut, kihiani atautikut alianaqpiaqtuq havaariyaagani atuqhimayamnik 20-ni ukiuni munaqhiuyaamni.  Ublutuaraagat pivikhaqatiaqtuga quyavlugalu pivikhaqariamni munariagani Inuit, munariagani nutaqat, iniqniuyut, ilagiyauluga ilitpalialugalu ukunanga nunagiyauyunit. Munaqhiuyaamni Nunavumi agiklivaliayutigiyara ublutuaraagat, ilitpaktugalu uvamnik aalaniklu, uqaqatiqaqhugalu aqliknaqtunik inuknik umatimniiginaqniaqtunik taimuva. Piqpagiyara munaqhiuyaami Nunavumi