Havaktingit

You are here

Minista Ell tuhaqtitivaktuq allanguqtirutikhangit talvani Nunavut Pivalliayuliqiyikkut Kuapuraisin Katimayiingit

Iipu 27, 2015

Tuhaqtauyukhaq 

Minista Ell tuhaqtitivaktuq allanguqtirutikhangit talvani Nunavut Pivalliayuliqiyikkut Kuapuraisin Katimayiingit 

IQALUIT, Nunavut (Qitiqauyaqvia 27, 2015) – Monica Ell, Ministauyuq munagiyuq Nunavut Pivalliayuliqiyikkut Kuapuraisinik (NDC), uplumi tuhaqtitivaktuq allanguqtirutikharnik talvani kuapuraisingit katimayiiyukharnik. 

Donald Havioyak (Kugluktukmin), Zacharias Kunuk (Igloolikmin) John Mainlu (Ikaluktutiakmin) tikuaqtaufaaqmiyut katimayiimun talvani NDC-kutni. Tamangnik ilauniaqtun pingahunik ukiunik. 

Elizabeth Kingston (Iqalungnin), Malaya M. Rheaume (Ottawamin), John Ningark Sr. (Kugaarukmin), Kolola Pitsiulak (Kimmirutmin) Sakiasie Sowdlooapiklu (Pangnirtungmin) tikuaktaulihaaqhimayut katimayiinun talvani NDC-kutni, ilauniaqtun pingahunik ukiunik. 

Donald Havioyak ikhivautauliqtuq NDC-kutni, aulaniaqtuq Qiqaiyaqvia 9, 2015mi. 

“Tikuaktauvingit nallautiqhimayut Nunavutingni aviktauninganiitun inuugaingitlu,” uqallaktuq Minsita Ell. “Tamangnik katimayiit ilauyut qaritiniaqtun avaliqangitunik ayuittiagiikhimayainik kuapuraisinun, ihuaqhaiqyumiqtitihimaaqhugit pidjutikharnik ihumaliugiangat ihuaqtumik ikayuutigiyaangat maniliurutikharnik pivalliadjutingnik nunaqyuaptingni.” 

Ilaunikkut talvuuna, Jerry Ell (Iqaluit) aulaniaqtuq aulapkainirmi kuapuraisini Qiqaiyarluarviami 2015mi. 

Minista Ell quviahuutikharnik aituiyuq aulahimaaqtunik katimayiinun ilauyunik Nancy Karetak Lindell (Arviamin), Chris Rudd (Kangiqlinirmin), David Alagalak (Arviatmin), Louie Kamookaklu (Urhuqtuurmin) talvuuna akhuqnaqtun aituihimaaqpaktangit kuapuraisimun. 

### 

Tuhaqtitiliqiyiingit Hivayaqlugu: 

Matthew Illaszewicz 
Atanguyaq, Tuhaqtitiliqiyikkutni 
Pivalliayuliqiyikkut Ingilrayuliqiyitkullu 
867-975-7818 
millaszewicz@gov.nu.ca 

 

Hivuani Kangiqhidjutit 

Nunavut Pivalliayuliqiyikkut Kuapuraisingit 

Nunavut Pivalliayuliqiyikkut Kuapuraisingit (NDC-kut) nunaqyuaptingni kuapuraisinguyuq havaktakhangit malikhautingni havagiangat havaaqhangit pidjutiqaqnahuaqhutiklu havagvingni havagiangat havaktukharnik maniliugiangatlu Nunavunmiunun, tapkualuaq mikiyut nunalaangit; aulatitiyaangat angikliyumirutikharnik nunalaani havagviingit; atuqhimaaquyaangat maniliurutikharnik ayungnairutikharniklu. 

Talvuuna tamna Nunavut Pivalliayuliqiyikkut Kuapuraisin Maligaq, katimayiiyut tikuaktauvaktun pingahunik ukiunganik Maligaliuqtitiunin (Kamisinauyuq Ataniqarvingmi Katimayiingit) talvuuna atuqtitiyukharnik Ministanganin Pivalliayuliqiyikkut Ingilrayuliqiyikkutlu. 

Tikkuaktauyut: 

Donald Havioyak Kugluktukmi Ilauvaktuq niguaqtaupluni talvani Maligaliuryuarvingmi 1999mi 2004mun. Talvaniitiluni Ministauvaktuq Pitquhiliqiyikkutni. Angiyuqaanguvakturlu Kitikmeot Inuit Katidjutiliqiyikkutni 2005mi 2008mun. Mista Havioyak havakhimaaqtuq hadja nunalaani ilauqatigiikhimaaqtunik havaktiuyuq tapkuninga MMG-kutni Uyaraqhiuqtunun. Qaritiyuq ilitamingnik nunalaani katitiqvikharnik kavamatkuni hanaqidjutikharnik, aulanikkut talvuuna Maligaliuqtiuvakhuni malrungniklu qulliinik ukiunganik havakpaktainik talvani kavamatkuni havaktiluni aulanikkut pivalliayuliqiyikkut, maniliqinikkut titiqiqidjutingnik havaktiuyukharnik ayuiqhautiluniklu. 

Zacharias Kunuk ilitagiyaunginaqtuq havakyuaqtamingni iniqtiqhimayaingit aulatitivakhunilu angiyuqaanguvakhunilu talvani Igloolik Isuma Productionsni, Kanatam hivulliqpaanguyuq Inuinaq nanminigiyaingit piksasuuliuktuliqiyi havagviqaqtuq. Akimavakhunilu tapfuminga Camera d’Or at Cannes-nik 2001mi aituqtauvakhunilu qaffiuyunik allanik piksasuuliuliqiyiingit aituutikharnik. Mista Kunuk Atuqtauhimadjutiqaqtuq talvanga Ilitagihidjutikharnik Kanatami pihimayuqlu Nangadjutikharnik Taaktingit Maligaliqinikkut ilihairutiryuanganik talvanga Trent Universitymin. Ilihimattiaqhimayuqlu piksasuuliuliqiyunik havagviinik akhuqnaqtuqlu inuk katimayiinun ilihimagami atuquinagamilu hanaqidjutikharnik uvani havagviani ikayugiangat Nunavunmiutat. 

John Main inuuhimaagaaqpaktuq Nunavunmi qaritiniaqtuq allatqiinik hanaqidjutikharnik, havagvingnilu uqaudjiniaqtuq tuhaqtitiliqidjutikharnik ayuittiagiikhimayuq havaagigaluamingnun talvani Kitikmeot Kuapuraisikkutni havagpaktaini pivalliadjutikhaliqinikkut havaktiuvaktuq, kingulirmi havaagigaluaqmini talvani Hamilaatkutni Arviatmi nunalaani pivalliayuliqiivakhuni, atanguyauvakhunilu nunalaani uyaraqhiuqtuliqiyikkutni havakhimaaqtuni, CBC-kunilu TV-kut uqaqtiuvakhuni. 

Elizabeth Kingston,Nunavunmi nunaqaliqtuq nainik ukiunganik, iniqtihimaaqpakhuni ataniqtuinikkut havakpaktainik atanguyangnik havaanganik, tuhaqtitiliqivakhunilu, kaantulaanik titiqiqivakhunilu kavamanmi maniliukhimangituniklu havagviinik. Havakhimaaqtuq hadja atanguyaupluni talvani Nunatsiaqmi Nunavunmilu Katimayiuyuvakhunilu Uyaraqhiuqviuyunik. Katimayiini ilauvakhuni talvani Nunamiutanik Pitquhingnittanik, Nunatsiarmi Nunavunmi Aanniqtailinirmun Akiliuhiaqtaaqviqaqtutlu Nunalipauyarmi Iqalungni. 

Malaya M. Rheaume qaritiniaqtuq akhuqnaqtunik ayuittiagiikhimayainiklu titiqiqidjutiliqiyaangat, hanaqidjutikharnik auladjutikharnik upalungairutikharnik, tautuktitihimaaqhunilu niuviqtauyukharnik, kavamaliqidjutingniklu taima sikstiinik ukiunganik havakhimayainik talvani Nunasi Kuapuraisikkutni, hadja havakhimaaqtuq aulapkaiyiupluni/maniliqinikkutlu titiraqtiupluni. Angiyuqaanguyuqlu talvani Tungasuvvingat Inuit Ottawami katimayiini, katimayiivakhunilu talvani NorTerra Inc.-mi, Larga Kivalliqmi, Uqsuq Kuapuraisimilu Yellowknife Inuit Katimayiimilu. 

John Ningark Sr. ilauvaktuq Maligaliuqivingmi Nunavunmi Nunatsiarmilu. Qairtiniaqtuq atanguyaliqinikkut ilihimayainik saivantiinik ukiunganik atanguyauvakhunilu hamilaatkutnilu talvani Kugaarukmi siksiniklu atanguyauvakhunilu talvani Koomiut Kuapkuni. Mista Ningark havaguikhimalaliqtuq. 

Kolola Pitsiulak qaritiniaqtuq titiqiqidjutingnik ayuittiagiikhimayainik talvanga tuani fainik ukiunganik havakpaktainik talvani qaffiuyunik havakpaktainik talvani Kimmirutmi Igluliqiyikkutni Nunavut Igluliqiyiryuakkutnilu. Havakhimaaqtuq hadja atanguyauyuq talvani Mayukalik Anguniaqtuliqiyikkutni. Ilauvakhuni katimayiinik talvani Ukiuktaqtuni Kuapiliqiyunik, Anguniaqtuliqiyikkutnilu Hamilaatkunilu. 

Sakiasie Sowdlooapik qaritiyuq thatinik ukiunganik nunalaani havagvingnun havaamingnin Minnguikviliqiyunik Kanatami Nunavut Kavamangit Havagviangit Avatiliqiyikkutni. Aituqtauvaktuqlu talvanga Quin Kivgaangit Jubilee-nik Aitutikhainik Havadjaginnikkut Nunalaani Hivulliqtiupluni aulanikkut talvuuna havakhimaaqpaktamingnik akhuqhuni qaffiuyunik nunalaangini, nunavunmi nunataarutingni, havagvikyuangitlu katimayiingit katimayiitlu ilauyut: Cumberland Sound 

Iqaliqiyutkutni, Baffin Iqaliqiyutkutni, Baffin Iqaliqiyutkutni Katimayuarutmi, Atuqtuarvik Kuapuraisirmi, Kakivak Katimayiitmi, Baffin Havagvingni Pivalliayuliqiyikkut Kuapuraisingitni, Nunavut Katimaviingit Nunalaangitni, Qikiqtani Inuit Katimaviini, Hamilaatkutni talvani Pangnirtung-mi, Pangnirtung Igluliqiyikkutni, Pangnirtung Anguniaqtuliqiyikkutnilu.