Havaktingit

You are here

Nunavut Kavamatkut unalu WAG (Winnipeg-mi Hanauyanik Qunngiaqvik) akhuurhaqtait Inuit hanaugait Winnipeg-mi

mii 25, 2016

Tuhaqtitauyukhaq 

Nunavut Kavamatkut unalu WAG (Winnipeg-mi Hanauyanik Qunngiaqvik) akhuurhaqtait Inuit hanaugait Winnipeg-mi 

Winnipeg, Manitoba, (May 25, 2016) – Nunavut Kavamatkut (GN), uvuuna Nunavut Pivalliatjutikhalirinirmut Kuapuriisingatigut (NDC), ikayuqtut nutaamik niuviqvikhamik havaqatigiplugit Winnipeg Hanauganik Qunngiaqvik (WAG) akhuurhainikkut niuvrutinikkullu Inuit hanaugainnik. Angmaqtirniaqtuq June 25, WAG@The Forks nayurviqarniaqtuq uvani Johnston Terminal-mi uvani The Forks Winnipeg-mi, Manitoba. 

“Nunavut Kavamat quviahuktuq paannaariigutigamikku una Winnipeg Hanaganik Qunngiaqvik,” uqaqtuq Nunavutip Minista Pivalliayuliqiyikkut Ingilrayuliqiyikkullu Monica Ell-Kanayuk. “Una niuviqvikhaq tuniyuiq aallamik pitjutikhamik ayuittunun hanauyayuktunun niuvrutiyaamiknik quvianaqtuni hanauyainnik. Una akhuurhaqtiyuummiqait Nunavunmiun hanauyaqtit piliurnikkut nakuuqpiaqtunik hanauyanik niuvaanikkullu hanauyamiknik tamaani Kanadami, taimaatut pipkaiyuq ilauqpiammiaqyuummirnirniklu Inuit hanaugainni pitquhiinnilu.” 

GN-kut tuniniaqtaa NDC-kut imaatut $75,000 atauhirmi ukiumi pingahunun ukiunun akhuurhaitjutikkut Nunavunmiunnik hanauyaqtinik. NDC-kut maniliurutauniarhimatjutaa ilitturipkaqtiyuummirniaqtuq hauyaqtinik, angikliyuummiqtirlugu hanauyani niuvirnirnik, piliurnikkullu amigaitqiyauyunik uuktuqvikhanik Ukiuqtaqtuni hanauyaqtinun, angiklihaqtipkaqyummiqtirlugu maniliurnikkut hulaqutimi uumani quvianaqpiaqtumik hanauyarnirmi. 

“Una pinahuni-ukiuqaqtumi piniarhimatjuti ikayurniaqtuq aallanik maniliurutikhanik uuktuqvikhanik Nunavunmiutanun hanauyaqtiinnun nanminiriyauyununlu havakvinun,” uqaqtuq NDC Atannguyaq Darrin Nichol. 

WAG@The Forks piqarniaqtuq aallakkiinnik niuviqtakhanik haunauyaliurhimayuniklu. Nutaaq niuviqvikhaq piqarniaqtuq quviagiyatqiyauyuni katitirhimayuni atauhiinauvaktuni, algakkut-piliurhimayut takunnaqtut uvani WAG Niuvvaavikmi. Inuit hanauyait, taapkuallu Itqiliit Métis-lu hanauyaqpaktait, tahamaniinniaqtut haniani pinniqutini, uplumiutaninlu Kanadamin hanauyainni aallaniklu. 

“Uplumi tuhaqtitauniata atauhiinnauyuq naunaitkutauyuq qanuqtun hanauyarnikkut pitquhikkullu ilauqpiaqtuk piangaiyarnikkut pivallialiurnirmi,” uqaqtuq Dr. Stephen Borys, WAG Aulapkaiyi Atannguyalluarlu. “Pipkainikkut WAG-gup naunaitkutaani uumunga ilauyumun Manitoba-m takuyaqtuqtauraanginnaqtumi, WAG@The Forks piliurniaqtuq nutaanik piyumayunik Inuit hanauyanik pipkaqtillunilu aquiyumayunik Ukiuqtaqtumun. Quviahuktugut paannarigaptigit Nunavut Kavamatkut akhuurhainikkut Inuit hanauyainnik pipkainikkullu Winnipeg aullauvigiyauyuq Ukiuqtaqtumun.” 

GN-kut NDC-kullu ikayurutia uumunga WAG@The Forks-mut pitjutiyuq miitiqatigiiknirnin mighaagut Inuit Art Centre-min uvanilu havagutaani WAG pivaktuq akhuurhainikkut Inuit hanaugainni piangaiyarnikkullu pivallialiurnirni. 

WAG pihimayaat pihimatjutigiplugit nunaryuami angitqiyauniqaqtumik inungnin katitiqhimayunik uplumiutanik Inuit hanaugainnik. Piqarhuni avatquhimyunik 13,000 ilikkuuqtunik, katitirhimaniq pitjutiyuq nappaanik takuyaqtukviup tamatkiutihimayuni hanauyainni katitiqhimayuni. Taamna Inuit Art Centre pipkaqtinniaqtaa una angiyuq pitquhikkut aturutikhaq atuqtauvakluni inungni quyaginnaq ukiuqaqtuni aallakkiikniklu pitquhiqaqtunik. 

Takulugu wag.ca ukununga nutaangutqiyauyunun ilitturipkaitjutinun, maliklutalu uvani Twitter-mi (@wag_ca), Facebook-mi (wag.ca) uvanilu Instagram-mi (@wag_ca). Maliklugu Nunavut Kavamatkut uvani Twitter-mi (@GovofNunavut), Facebook-mi (GovofNunavut) takuluguluunniit gov.nu.ca. Takuyaaqtallu Nunavut Pivalliatjutikhaliurnirmut Kuapuriisingat uvani ndcorp.nu.ca

### 

Tuhaqtipkainikkut Uqaqatigivikhat:

Matthew Illaszewicz 
Atannguyaq, Tuhaqtitauyukhanik 
Pivalliayuliqiyikkut Ingilrayuliqiyikkullu 
Nunavut Kavamat 
867-975-7818 
millaszewicz@gov.nu.ca 

Darrin Nichol 
Atannguyaq 
Nunavut Pivalliatjutikhaliurnirmut Kuapuriisingat 
(867) 645-3170 
darrin@ndcorp.nu.ca 

Catherine Maksymiuk 
Atannguyaq, Tuhaapkainikkut Niuvrutiliqinikkullu 
Winnipeg Art Gallery 
204-789-1767 
Media-Manager@wag.ca