ᐅᖃᓚᐅᑎᓯᐅᑏᑦ

You are here

ᒥᓂᔅᑕᒨᖓᔪᑦ

ᓯᕗᓕᖅᑎᐅᖃᑕᐅᔪᖅ ᔮᓐ ᒪᐃᓐ

ᔮᓐ ᒪᐃᓐ ᓂᕈᐊᖅᑕᐅᓕᖅᑭᔪᔪᖅ ᐃᓕᔭᐅᑐᐃᓐᓇᖅᑐᓂ ᑭᒡᒐᑐᕐᓂᐊᕐᓗᓂ ᐊᕐᕕᐊᑦ ᐅᐊᓐᓇᖓᓂᒃ ᑎᑭᕋᕐᔪᐊᒥᓪᓗ 6−ᖓᓐᓂ ᓄᓇᕗᑦ ᒪᓕᒐᓕᐅᕐᕕᐅᑉ.

ᔮᓐ ᒪᐃᓐ ᓂᕈᐊᖅᑕᐅᔪᒻᒥᔪᖅ ᓯᕗᓕᖅᑎᑦ ᑲᑎᒪᔨᖏᓐᓄᑦ ᓅᕕᐱᕆ 17, 2021ᒥ, ᓂᕈᐊᕐᓂᖃᖅᑎᓪᓗᒋᑦ ᓯᕗᓕᖅᑎᑦᓴᓂᒃ. ᐊᖏᖅᑎᑕᐅᓕᓚᐅᖅᑐᖅ ᐃᓂᒥᓄᑦ ᓅᕕᐱᕆ 19, 2021ᒥ. ᑭᒡᒐᑐᐃᓂᐊᓕᖅᑐᖅ ᓯᕗᓕᖅᑎᒋᔭᐅᓗᓂ ᐋᓐᓂᐊᖃᕐᓇᖏᑦᑐᓕᕆᔨᒃᑯᓐᓄᑦ.

ᔮᓐ ᒪᐃᓐᓯᕗᓂᐊᓂ ᒪᓕᒐᓕᐅᖅᑎᑐᐃᓐᓇᐅᓚᐅᖅᑐᖅ ᑕᓪᓕᒪᖓᓐᓂ ᒪᓕᒐᓕᐅᕐᕕᐅᑉ, ᐃᒃᓯᕙᐅᑕᐅᕙᓚᐅᖅᑐᓂ ᑲᑎᒪᔨᕋᓛᓄᑦ ᒪᓕᒐᓕᕆᓂᕐᒥᒃ, ᐃᒃᓯᕙᐅᑕᐅᓪᓗᓂᓗ ᕿᒥᕐᕈᒋᐊᒃᑲᓐᓂᓂᕐᒧᑦ ᒐᕙᒪᒃᑯᑦ ᐊᐅᓚᓂᖏᓐᓂᒃ ᐊᒻᒪᓗ ᖃᓄᐃᑦᑐᑦᓴᐅᓂᖏᓐᓂᒃ ᐊᒻᒪᓗ ᐃᒃᓯᕙᐅᑕᐅᒋᓪᓗᓂ ᑲᑎᒪᔨᑐᐃᓐᓇᐃᑦ ᑲᑎᒪᔨᖏᓐᓂ.

ᔮᓐ ᒪᐃᓐ ᐱᕈᖅᓴᓂᑰᔪᖅ ᐊᕐᕕᐊᓂ. ᐱᐊᓂᒃᑲᒥ ᐃᓕᓐᓂᐊᕐᕕᐊᓗᖕᒥ, ᐃᓕᓐᓂᐊᕆᐊᓚᐅᖅᓯᒪᔪᖅ ᓚᐅᓐ ᐋᓕᓴᓐ ᐃᓕᓴᕐᕕᔾᔪᐊᖓᓂ (Mount Allison University), ᐱᐊᓂᒃᖢᓂ 2002ᒥ ᐃᓕᑕᕆᔭᐅᔾᔪᑎᒥᒃ ᑮᓇᐅᔭᓕᐅᕈᑎᒃᓴᓕᕆᓂᕐᒥᒃ. ᔮᓐ ᒪᐃᓐ ᑲᓇᑕᐅᑉ ᓯᓚᑖᓂ ᐃᓕᓐᓂᐊᖅᓯᒪᓂᖓ ᐱᖃᓯᐅᑎᓯᒪᔪᖅ ᐃᓕᓐᓂᐊᕐᓇᒥ ᐋᔅᓗ, ᓄᐊᐅᐃ-ᒥ, ᐊᒻᒪᓗ ᐱᓕᒻᒪᓴᒃᓯᓐᓈᖅᖢᓂ ᓄᓇᕐᔪᐊᕐᒥ ᑲᑐᔾᔨᖃᑎᒌᒃᑯᑦ ᑎᒥᖁᑎᖓᓐᓂ ᐃᓕᓐᓂᐊᕐᓂᕐᒧᑦ, ᖃᐅᔨᓴᓐᓂᕐᒧᓪᓗ ᐊᒻᒪ ᐃᓕᖅᑯᓯᓕᕆᓂᕐᒧᑦ ᐱᐅᕆᔅ, ᕗᕌᓐᓯᒥ.
ᔮᓐ ᒪᐃᓐ ᐃᖅᑲᓇᐃᔮᖃᖃᑦᑕᕐᓂᑰᔪᖅ. ᑏᕖᒃᑯᑦ ᐱᕙᓪᓕᐊᔪᓕᕆᔨᐅᓯᒪᓪᓗᓂ ᓰᐲᓰ−ᑯᓐᓂ ᐅᑭᐅᖅᑕᖅᑐᒥ, ᐱᕙᓪᓕᐊᔪᓕᕆᔨᐅᓯᒪᓪᓗᓂᓗ ᐊᕐᕕᐊᑦ ᕼᐋᒻᓚᒃᑯᖏᓐᓂ ᐊᒻᒪᓗ ᐊᕕᑦᑐᖅᓯᒪᓂᕐᒥ ᐱᔭᑦᓴᓕᕆᔨᐅᓪᓗᓂ ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᖓᓐᓄᑦ, ᓂᕈᐊᖅᑕᐅᓚᐅᕋᓂ ᓱᓕ, ᔮᓐ ᒪᐃᓐ ᓇᒻᒥᓂᖁᑎᖃᓚᐅᖅᓯᒪᔪᖅ ᐱᕙᓪᓕᐊᔪᓕᕆᓂᕐᒧᑦ ᐅᖃᐅᔾᔨᒋᐊᖅᑎᐅᓪᓗᓂ.

ᔮᓐ ᒪᐃᓐ ᐊᖏᔪᖅᑳᕆᔭᐅᓯᒪᒻᒥᔪᖅ ᑭᕙᓪᓕᕐᒥ ᓇᒻᒥᓂᖁᑎᖃᖅᑐᐃᑦ ᑲᑐᔾᔨᖃᑎᒌᒃᑯᓐᓂ ᐊᒻᒪᓄᓗ ᑲᑎᒪᔨᐅᖃᑕᐅᓂᑰᓪᓗᓂ ᓄᓇᕗᑦ ᐱᕙᓪᓕᐊᔪᓕᕆᐱᓂᕐᒧᑦ ᑯᐊᐸᕇᓴᒃᑯᓐᓂ. ᔮᓐ ᒪᐃᓐ ᐱᓇᓱᒻᒪᕆᓐᓂᑰᔪᖅ ᐊᑭᓕᖅᓱᖅᑕᐅᒐᓂ ᐃᓄᒻᒪᕆᑦ ᓂᔾᔭᐅᓯᔭᓐᓂᕐᒧᑦ ᑲᑎᓐᓂᐅᕙᑦᑐᒥᒪ ᐊᕐᕕᐊᓂᓗ ᑕᕐᕆᔭᐅᓯᓕᕆᔨᖏᓐᓂ, ᕼᐅᕙᒎᖅ ᓈᓚᐅᓯᓕᕆᔨᓄᑦ ᐊᒻᒪᓗ ᐅᕕᒃᑲᐃᑦ ᕼᐋᑭᖅᑎᖏᓐᓄᑦ ᐊᕐᕕᐊᓂ ᖃᒪᓂᑦᑐᐊᕐᒥᓗ.

ᔮᓐ ᐊᒻᒪᓗ ᐊᒫ ᒪᐃᓐ ᕿᑐᕐᖓᖃᖅᑑᒃ ᐊᒡᒐᔅᑕᔅ, ᒪᐃᕝ ᐊᒻᒪᓗ ᐅᑎᓐ. ᔮᓐ ᒪᐃᓐ ᐱᒃᑯᒋᔭᖃᖅᑐᖅ ᐊᖑᓇᓱᓐᓂᕐᒥᒃ, ᐃᖃᓗᒐᓱᓐᓂᒥᓪᓗ, ᓄᑦᑕᓂᕐᒥᒃ ᐊᒻᒪᓗ ᐱᓐᖑᐊᖅᑎᐅᓂᕐᒥᒃ.