ᐅᖃᓚᐅᑎᓯᐅᑏᑦ

You are here

ᓄᓇᕗᒻᒥᑦ ᐋᓐᓂᐊᕕᓕᐊᖅᑐᕐᓯᐅᑎᑦ

ᓄᓇᕗᑦ ᒐᕙᒪᒃᑯᖏᑦ ᓄᓇᕗᒻᒥᑦ ᐋᓐᓂᐊᕐᕕᓕᐊᖅᑐᕐᓯᐅᑎᑖᕐᑎᑦᑎᓲᖑᕗᑦ ᒪᓕᒃᖢᓂᔾᔪᒃ ᑲᓇᑕᒥ ᖃᓄᐃᙱᑦᑎᐊᕐᓂᕐᒧᑦ ᐱᖁᔭᖓᓐᓂᑦ.

ᓄᓇᕗᒻᒥᑦ ᐋᓐᓂᐊᕐᕕᓕᐊᖅᑐᓯᐅᑎᖏᑦ ᐊᐅᓚᑕᐅᕗᑦ ᓄᓇᕗᒻᒥᑦ ᖃᓄᐃᙱᑦᑎᐊᕐᓂᕐᒧᑦ ᓇᓪᓕᐅᒃᑯᒻᒫᓕᕆᔨᒃᑯᓐᓂᑦ ᖃᖏᕐᖠᓂᖕᒥᑦ ᐊᒻᒪᓗ ᑕᒪᒃᑯᐊ ᑎᑎᕋᖅᑕᐅᑎᑦᑎᓯᒪᔪᑦ ᓄᓇᕗᒻᒥᐅᑦ ᐊᑐᕈᓐᓇᖁᓪᓗᒋᑦ ᐋᓐᓂᐊᕕᐅᑉ ᐱᔨᑦᑎᕋᕈᑎᖏᓐᓂᑦ.

 

ᓄᓇᕗᒻᒥᑦ ᐋᓐᓂᐊᕕᓕᐊᖅᑐᖅᓯᐅᑎ

ᑭᓇᓕᒫᖅ ᑎᑎᕋᖅᑕᐅᑎᑦᑎᓯᒪᔪᖅ ᓄᓇᕗᒻᒥ ᐋᓐᓂᐊᕕᓕᐊᖅᑐᕐᓯᐅᑎᓂ ᑐᓂᔭᐅᖃᑦᑕᕐᐳᑦ ᐋᓐᓂᐊᕕᓕᐊᖅᑐᕐᓯᐅᑎᒥᑦ ᓇᖕᒥᓂᖅ ᓇᐃᓴᐅᑎᓖᑦ 9-ᓂᑦ. ᓄᓇᕗᒻᒥᑦ ᐋᓐᓂᐊᕕᓕᐊᕐᑐᖅᓯᐅᑎᖓ ᓇᓗᓇᐃᕐᓯᔾᔪᑕᐅᖃᑦᑕᕐᐳᖅ ᑖᓐᓇ ᐱᖃᖅᑎᐅᔪᖅ ᐃᓚᓕᐅᑎᓯᒪᓂᖓᓂ ᓄᓇᕗᒻᒥ ᐋᓐᓂᐊᕕᓕᐊᖅᑐᕐᓯᐅᑎᓄᑦ.

ᐋᓐᓂᐊᕕᓕᐊᕐᓂᕐᒧᑦ ᐊᑭᖏᑦ ᐊᑭᓕᕐᑕᐅᔪᓐᓇᖁᓪᓗᒋᑦ, ᑖᒃᑯᐊ ᓇᐃᓴᐅᑎᑦ ᑕᑯᔭᐅᖃᑦᑕᕆᐊᖃᖅᐳᑦ ᐋᓐᓂᐊᕕᖕᓂᑦ ᐊᒻᒪᓗ ᐋᓐᓂᐊᖃᖕᓇᙱᑦᑐᓕᕆᔨᓄ ᐅᕝᕙᓘᓐᓃᑦ ᓘᒃᑖᓂᑦ ᓄᓇᕗᒻᒦᑦᑐᓄᑦ ᐊᒻᒪᓗ ᓯᓚᑖᓃᑦᑐᓄᑦ.

ᓄᓇᕗᒻᒥᐅᑦ ᓇᐃᓴᐅᑎᒥᓂ ᑕᑯᑎᑦᑎᙱᒃᑯᑎᒃ ᓄᓇᕘᑉ ᓯᓚᑖᓂ ᐋᓐᓂᐊᕕᖕᒧ ᓇᖕᒥᓂᖅ ᐊᑭᓖᔭᕆᐊᖃᑐᐃᓐᓇᕆᐊᖃᖅᑳᕐᐳᑦ ᐅᕝᕙᓘᓐᓃᑦ ᐊᑭᓕᒐᒃᓴᓕᐅᕐᑕᐅᓗᑎᒃ.

ᓇᐃᓴᐅᑎᖃᕐᑎᐅᔪᑦ ᐊᑭᓖᕙᒌᕐᓂᖅᐸᑕ ᐅᕝᕙᓘᓐᓃᑦ ᐊᑭᓕᒐᒃᓴᖅᑖᕐᑎᑕᐅᓐᓂᕐᐸᑕ ᐅᑎᕐᑎᑦᑎᓇᓱᐊᕈᓐᓇᖅᐳᑦ ᓄᓇᕗᒻᒥᑦ ᖃᓄᐃᙱᑦᑎᐊᕐᓂᕐᒧᑦ ᓇᓪᓕᐅᒃᑯᒻᒫᓕᕆᔨᒃᑯᓐᓄ ᐅᓄᖓ ᑐᕌᕈᑖᓄᑦ:

ᓄᓇᕗᒻᒥ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᓇᓪᓕᐅᒃᑯᒫᓕᕆᔨᒃᑯᑦ ᐊᓪᓚᕝᕕᖓ
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ
ᑎᑎᖅᑲᒃᑯᕕᒃ 889
ᑲᖏᖅᖠᓂᖅ, ᓄᓇᕗᑦ
X0C 0G0

ᐅᖄᓚᐅᑖ: (867) 645-8001
ᓱᒃᑲᔪᒃᑯᓪᓘᓐᓃᑦ ᐅᕗᖓ: (867) 645-8092
ᐊᑭᖃᙱᑦᑐᒃᑯᑦ: (800) 661-0833
ᐃᕐᖐᓐᓇᒃᑰᕈᑖ

 

ᐱᔪᓐᓇᕐᑐᑦ

ᐱᔪᓐᓇᕐᑐᑦ
 

  • ᓄᓇᕗᒻᒥᐅᑕᑐᖃᐃᑦ. “ᓄᓇᕗᒻᒥᐅᑕᑐᖃᐃᑦ” ᓄᓇᕗᒻᒦᖏᓐᓇᕐᖢᑎᒃ ᓄᓇᖃᕐᖢᑎᒃ.
  • ᐃᖅᑲᓇᐃᔭᖅᑐᑦ ᐅᕝᕙᓘᓐᓃᑦ ᐃᓕᓐᓂᐊᕐᑐᐃᑦ ᐃᓯᕐᓯᒪᔪᓐᓇᐅᑎᓖᑦ ᐊᕐᕌᒍᒧᑦ ᐊᑕᐅᓯᖕᒧᑦ ᐅᖓᑖᓄᓪᓘᓐᓃᑦ. ᐃᓯᕐᓯᒪᔪᓐᓇᐅᑖ ᑐᕌᕈᑎᖃᕆᐊᓕᒃ ᓄᓇᕗᒻᒥᑦ.



ᐱᔪᓐᓇᙱᑦᑐᑦ

  • ᐳᓚᕋᖅᑏᑦ ᐊᒻᒪ ᐳᓛᕆᐊᖅᓯᒪᔪᑦ ᓄᓇᕗᒻᒧᑦ
  • ᐃᖅᑲᓇᐃᔭᓚᐅᑲᑐᐃᓐᓇᕐᑐᑦ ᑳᓐᑐᓛᖃᖅᖢᑎᒃ ᐊᕐᕌᒎᑉ ᑐᖔᓂ
  • ᐃᓕᓐᓂᐊᕐᑏᑦ ᓄᓇᖃᕐᑐᑦ ᓄᓇᕘᑉ ᐊᓯᐊᓂᑦ
  • ᐃᓄᐃᑦ ᐃᖅᑲᓇᐃᔭᖕᓂᒃᑯᑦ ᐃᓕᓐᓂᐊᕐᓂᒃᑯᓪᓘᓐᓃᑦ ᐃᓯᕈᑎᓖᑦ ᐊᕐᕌᒎᑉ ᑐᖔᓂ
  • ᐃᓄᐃᑦ ᐃᖅᑲᓇᐃᔭᕈᓐᓇᐅᑎᓖᑦ ᐅᕝᕙᓘᓐᓃᑦ ᐃᓕᓐᓂᐊᕐᑎ ᐃᓯᕈᑎᓖᑦ ᐊᕐᕌᒎᑉ ᑐᖔᓂ
  • ᑎᒍᔭᐅᖅᑲᔪᑦ ᐊᓄᓪᓚᒃᓰᕕᖕᓂᑦ

ᓇᕿᓪᓕ ᒪᐅᓇ ᑕᑯᓂᐊᕐᓗᒋᑦ ᑭᓱᓂᑦ ᓄᓇᕘᒥ ᐊᓐᓂᐊᖃᓐᓇᖏᑦᑐᓕᕆᔨᒃᑯᑦ ᓇᓪᓕᐅᒃᑯᒫᖏᑦ ᐋᓐᓂᐊᕕᓕᐊᖅᑐᓄᑦ ᐱᑎᑦᑎᔪᓐᓇᕐᒪᖔᑕ ᐋᓐᓂᐊᕕᒃᑯᑦ ᐊᐅᓪᓚᖅᑐᓄᑦ ᐊᒻᒪ ᖃᓄᖅ ᐅᑎᖅᑎᑦᑎᕕᔅᓴᐅᒪᖔᖅ.

 

ᐊᑭᓕᐅᑕᐅᔪᓐᓇᖅᑐᑦ

ᓄᓇᕗᒻᒥᑦ ᐋᓐᓂᐊᕕᓕᐊᖅᑐᕐᓯᐅᑎᑦ ᐊᑭᓕᐅᑕᐅᔾᔪᑕᐅᖃᑦᑕᕐᐳᑦ ᓘᒃᑖᓄᑦ ᐊᒻᒪᓗ ᐋᓐᓂᐊᕕᖕᒥᑦ ᐱᔨᑦᑎᕈᑎᓄᑦ.

 

ᓘᒃᑖᓄᑦ ᐱᔨᑦᑎᕋᐅᑏᑦ

ᓄᓇᕗᒻᒥ ᐋᓐᓂᐊᕕᓕᐊᖅᑐᕐᓯᐅᑎᑦ ᐊᑭᓖᔾᔪᑕᐅᓲᖑᕗᑦ ᑕᑯᓗᓂ ᓘᒃᑕᒥ ᓇᓗᓇᐃᒃᑯᑕᓕᖕᒥᑦ ᓯᓚᑦᑐᓴᕐᕕᖕᒥᙶᕐᓯᒪᔪᓂ ᓘᒃᑖᓄᑦ ᐊᒻᒪᓗ ᐱᓚᑦᑐᐃᔨᓄᑦ ᑲᓇᑕᒥᑦ.


ᓘᒃᑖᒥ ᑕᑯᔭᐅᓗᓂ ᐊᑭᓕᕐᑕᐅᔪᓐᓇᕐᑐᑦ

  • ᖃᐅᔨᓴᖅᑕᐅᓂᖕᒧᑦ ᐊᒻᒪᓗ ᐃᓅᓕᓴᖅᑕᐅᓂᖕᒧᑦ ᐋᓐᓂᐊᒥᑦ ᐊᒻᒪᓗ ᐋᓐᓂᕐᓯᒪᒍᓂ
  • ᐱᓚᒃᑕᐅᓗᓂ, ᐃᒃᐱᖕᓂᐊᔪᓐᓃᖅᑎᑕᐅᓃᑦ ᐊᒻᒪᓗ ᐱᓚᒃᑐᐃᔨᐅᑉ ᐃᑲᔪᖅᑎᖏᓐᓄᑦ, ᐱᔭᕆᐊᖃᕌᖓᒥ
  • ᓇᔾᔨᔪᓕᕆᓃᑦ, ᐃᕐᓂᓚᐅᖅᑳᕋᓂ ᐊᒻᒪᓗ ᐃᓅᓯᒪᓕᕐᑎᓪᓗᒍ
  • ᐃᔨᑦ ᖃᐅᔨᓴᖅᑕᐅᓂᖏᑦ, ᐃᓅᓕᓴᖅᑕᐅᓂᖅ ᐊᒻᒪᓗ ᐊᐅᓚᑕᐅᓃᑦ ᐃᔨᓕᕆᔨᒻᒪᕆᖕᒧᑦ

ᐃᓱᖃᑐᐃᓐᓇᕆᐊᓖᑦ ᐊᒻᒪᓗ ᐊᔪᖕᓇᑐᐃᓐᓇᕆᐊᓖᑦ.

 


ᓘᒃᑖᒥ ᑕᑯᔭᐅᓗᓂ ᐊᑭᓕᕐᑕᐅᔪᓐᓇᙱᑦᑐᑦ
 

  • ᐊᕐᕌᒍᑕᒫᑦ ᖃᐅᔨᓴᖅᑕᐅᓃᑦ ᐅᑭᐅᓖᑦ 10 ᐊᒻᒪ 65 ᐊᑯᕐᖓᓐᓂᑦ
  • ᐱᐅᓯᒋᐊᖕᓂᖕᒧᑦ ᐱᓚᒃᑕᐅᓃᑦ
  • ᐆᖅᑐᕈᑎᑐᐃᓐᓇᖕᓄᑦ
  • ᐄᔭᒐᐃᑦ
  • ᖃᐅᔨᓴᖅᑕᐅᖁᔭᐅᓂᑯᐃᑦ ᐱᖓᔪᖓᑦᑎᒍᑦ ᐅᑯᓄᖓ: ᐃᓕᓐᓂᐊᕐᐸᒌᔭᖕᓂᐊᕐᑐᑯᓗᖕᓄᑦ ᐅᕝᕙᓘᓐᓃᑦ ᐋᓐᓂᐊᓯᐅᑎᓄᑦ ᓇᓪᓕᐅᒃᑯᒻᒫᑦ, ᓂᕿᓕᕆᔨᓄᑦ ᐅᕝᕙᓘᓐᓃᑦ ᐊᖁᑦᑐᓐᓇᐅᑎᑖᕈᑎᒃᓴᒧᑦ ᖃᐅᔨᓴᖅᑕᐅᓂᖅ ᐅᕝᕙᓘᓐᓃᑦ ᓯᓚᕐᔪᐊᒥ ᓇᒧᙵᐅᑲᑕᒍᓐᓇᐅᑎᒧ ᐅᕝᕙᓘᓐᓃᑦ ᐃᖅᑲᓇᐃᔭᖕᓂᐊᕐᓂᖕᒧᑦ, ᑕᐃᒪᐃᑦᑐᓄᑦ.
  • ᐃᔨᓕᕆᔭᐅᓂᕐᓄᑦ
  • ᑭᒍᑎᓕᕆᔭᐅᔾᔪᑎᑦ ᐊᓯᖏᑦ ᐊᒡᓕᕈᖓ ᓱᕋᒃᓯᒪᒃᐸᑦ ᐅᕝᕙᓘᓐᓃᑦ ᖃᓂᒻᒪᓯᐅᒍᓂ
  • ᕿᒥᕐᓗᓕᕆᔭᐅᓂᕐᓄᑦ, ᐃᓅᓕᓴᐅᑎᓪᓛᑦᑖᑑᒪᓂᖕᓄᑦ, ᐃᓯᒐᓕᕆᐅᓂᕐᓄᑦ, ᓴᐅᓂᐅᖕᓄᓪᓗ ᓄᑭᓕᕆᔭᐅᓂᖕᓄᑦ
  • ᐃᖃᐃᓕᓴᖕᑕᐅᓂᖕᓄᑦ, ᐅᖃᕆᐅᖅᓴᔭᐅᓂᖕᓄᑦ ᐊᒻᒪᓗ ᐃᓱᒪᓕᕆᔭᐅᓂᖕᓄᑦ ᐋᓐᓂᐊᕕᖕᓂᑦ ᓇᓪᓕᐅᒃᑯᒻᒫᖃᙱᑦᑐᓂᑦ
  • ᓇᓕᐊᖕᓄᑦ ᐱᔨᑦᑎᕋᖅᑎᐅᔪᓄᑦ ᐱᔪᓐᓇᕐᑕᖏᓐᓄᑦ ᒪᓕᒐᓕᐊᖑᓯᒪᔪᑎᒍᑦ, ᓲᕐᓗ ᐃᖅᑲᓇᐃᔭᖅᑎᓄᑦ ᓇᓪᓕᐅᒃᑯᒻᒫᓕᕆᓂᖕᒧᑦ ᐱᖁᔭᖅ, ᐋᓐᓂᐊᖃᖕᓇᙱᑦᑐᓕᕆᓂᖕᒧᑦ ᐃᓄᓕᒫᓄᑦ ᐱᖁᔭᖅ ᐅᕝᕙᓘᓐᓃᑦ ᐃᓅᓕᓴᐅᑕᐅᔪ ᐱᔨᑦᑎᕐᓂᕕᓂᐊᓄᑦ ᐅᓇᑕᖅᑐᑦᑕᓄᑦ

 

ᐋᓐᓂᐊᕕᖕᒥᑦ ᐱᔨᑦᑎᕋᐅᑎᑦ

ᓄᓇᕗᒻᒥᑦ ᐋᓐᓂᐊᕕᓕᐊᖅᑐᖅᓯᐅᑏᑦ ᐊᑭᓖᔾᔪᑕᐅᕙᒃᐳᑦ ᐃᓚᐃᓐᓇᙱᓐᓂᒃ ᐋᓐᓂᐊᕕᖕᓂᑦ ᐱᔨᑦᑎᕋᐅᑕᐅᔪᓂᑦ ᐋᓐᓂᐊᕕᖕᒦᑦᑐᖃᕐᑎᓪᓗᒍ ᐅᕝᕙᓘᓐᓃᑦ ᐅᓂᒃᓯᒪᓇᓂ ᐱᔨᑦᑎᕐᑕᐅᒐᔪᒃᑯᓂ.



ᐋᓐᓂᐊᕕᖕᒥᑦ ᐱᔨᑦᑎᕐᑕᐅᓪᓗᓂ ᐊᑭᓕᕐᑕᐅᓲᑦ
 

  • ᐱᑐᐃᓐᓇᐅᔪᖅ ᐊᑦᑕᕐᓇᖅᑐᒃᑯᕕᖕᒥᑦ ᐊᑭᖓ
  • ᐋᓐᓂᐊᓯᐅᑎᓕᕆᔭᐅᓂᑯᐃᑦ, ᐱᔨᑦᑎᕐᑕᐅᓯᒪᒑᖓᑕ ᐋᓐᓂᐊᕕᖕᒥᑦ
  • ᖃᐅᔨᓴᖅᑕᐅᔾᔪᑏᑦ, ᐊᔾᔨᓕᐅᕆᓂᕐᓄᑦ ᐊᒻᒪᓗ ᑕᕐᕋᓕᕆᔭᐅᓂᕐᓄᑦ ᐊᒻᒪᓗ ᑐᓵᔨᐅᓂᕐᓄᑦ
  • ᐄᔭᒐᐃᑦ ᓘᒃᑖᓂᑦ ᐊᑐᖁᔭᐅᔪᐃᑦ ᐊᒻᒪᓗ ᐋᓐᓂᐊᕕᖕᒥᑦ ᐄᔭᒐᖅᑕᐅᓪᓗᑎᒃ
  • ᐱᓚᒃᑐᐃᕕᒃ ᐊᑐᕐᑕᐅᓂᖓᓄᑦ, ᑲᑎᒪᕝᕕᐅᔪᒥᑦ, ᐊᒻᒪᓗ ᐃᒃᐱᖕᓂᐊᓇᙱᑦᑐᓕᕆᔭᐅᓂᕐᓄᑦ ᐊᑐᕐᑕᐅᔭᕆᐊᓖᑦ ᖃᐅᔨᓇᓱᐊᕈᑕᐅᓂᖕᓄᑦ ᐊᒻᒪᓗ ᐃᓅᓕᓴᖅᑕᐅᓂᕐᓄᑦ, ᐃᓚᓕᐅᑎᓪᓗᑎᒃ ᐱᖁᑏᑦ ᐊᑐᕐᑕᐅᔭᕆᐊᓖᑦ
  • ᓄᖑᓴᐃᓂᕐᓄᑦ ᐃᓅᓕᓴᐅᑏᑦ, ᐱᓕᒻᒪᒃᓴᔭᐅᓂᖕᒧᑦ, ᐊᒻᒪᓗ ᐃᖃᐃᓕᓴᕐᑕᐅᓂᖕᓄᑦ ᐱᔨᑦᑎᕐᑕᐅᒑᖓᒥᒃ ᓇᓪᓕᐅᒃᑯᒻᒫᖃᕐᑐᒧᑦ ᐋᓐᓂᐊᕕᖕᓄᑦ


ᐃᓱᖃᕐᑐᐃᑦ ᐊᒻᒪᓗ ᐱᑎᑕᐅᔪᓐᓇᙱᑐᐃᓐᓇᕆᐊᖃᖅᑐᑦ.
 



ᐋᓐᓂᐊᕕᖕᒥᑦ ᐱᔨᑦᑎᕐᑕᐅᓪᓗᓂ ᐊᑭᓕᕐᑕᐅᕙᙱᑦᑐᑦ
 

  • ᐋᓐᓂᐊᕕᖕᒦᔾᔪᑏᑦ ᐱᑐᐃᓐᓇᐅᑉ ᐅᖓᑖᓅᕈᑕᐅᔪᑦ ᓇᖕᒥᓂᖅ ᐅᕝᕙᓘᓐᓃᑦ ᓇᖕᒥᓂᕐᓚᐅᔭᑎᑐᑦ ᐃᒡᓗᕈᓯᐅᔪᑦ
  • ᐋᓐᓂᐊᕕᒃᑯᑦ ᐱᔭᕆᐊᖃᙱᑦᑐᑦ, ᓲᕐᓗ ᐱᐅᓴᐅᑎᑐᐃᓐᓇᐃᑦ
  • ᐆᒃᑐᕋᐅᑎᑐᐃᓐᓇᕐᓄᑦ
  • ᑐᐊᕕᖕᓇᖅᑐᒃᑰᕈᑎᑦ ᓄᓇᓯᐅᑎᒃᑯᑦ (ᑭᓯᐊᓂ ᐋᓐᓂᐊᕕᖕᒥᑦ ᐋᓐᓂᐊᕕᖕᒧᙵᐅᒍᓂ)
  • ᑭᒍᑎᓕᕆᔭᐅᓃᑦ, ᑭᓯᐊᓂ ᐊᒡᓕᕈᖓ ᓱᕋᒃᓯᒪᒃᐸᑦ ᐅᕝᕙᓘᓐᓃᑦ ᖃᓂᒻᒪᓯᐅᒍᓂ
  • ᐃᒥᐊᓗᖕᒧᑦ ᐋᖓᔮᖕᓇᖅᑐᓄᓪᓗ ᐃᑲᔪᖅᑕᐅᔾᔪᑏᑦ

 

ᖃᖓᑦᑕᐅᑎᓕᕐᑕᐅᕙᖕᓂᖅ ᐋᓐᓂᐊᕕᓕᐊᖕᓂᖕᓄᑦ

ᓘᒃᑖᒧᑦ, ᐋᓐᓂᐊᓯᐅᑎᒧᑦ, ᑭᒍᑎᓕᕆᔨᒧᓪᓘᓐᓃᑦ ᐅᕝᕙᓘᓐᓃᑦ ᐊᓯᖏᓐᓂᑦ ᐋᓐᓂᐊᖃᖕᓇᙱᑦᑐᓕᕆᔨᓄᑦ ᐊᐅᓪᓚᕆᐊᖃᕆᔭᐅᒍᕕᑦ ᐋᓐᓂᐊᕕᓕᐊᕆᐊᖃᕐᓗᑎᑦ, ᖃᖓᑦᑕᐅᓯᖅᑕᐅᔪᓐᓇᑐᐃᓐᓇᕆᐊᖃᖅᐳᑎᑦ.

ᓄᓇᕗᒻᒥᑦ ᐋᓐᓂᐊᕕᓕᐊᖅᑐᕐᓯᐅᑎᐊᓄᑦ ᖃᖓᑦᑕᐅᓯᕐᑕᐅᔪᓐᓇᕐᐳᑎᑦ $250.00-ᒥᑦ ᐊᑭᑭᒃᓕᒋᐊᕐᓯᒪᓗᓂ ᐅᑎᒧᓪᓗ (ᐊᑭᓕᐅᑕᐅᖃᑕᐅᔪᖅ) ᓄᓇᖕᓂᑦ ᖃᓂᓛᒧᑦ ᐋᓐᓂᐊᕕᖕᒧᑦ ᐃᓅᓕᓴᐃᕝᕕᖃᕐᑐᓄᑦ.

ᐅᕘᓇ ᓇᕿᓪᓗᒍ ᑐᑭᓯᒋᐊᕈᑎᒃᓴᓄᑦ ᖃᖓᑦᑕᐅᑎᓕᕐᑕᐅᕙᖕᓂᕐᓄᑦ ᐋᓐᓂᐊᕕᓕᐊᖕᓂᖕᓄᑦ

 

ᓄᓇᕗᒻᒥ ᐋᓐᓂᐊᕐᕕᓕᐊᕈᓐᓇᐅᑏᑦ ᐊᓯᐅᔨᒍᕕᐅᒃ ᐅᕘᓇ ᓇᕿᓪᓗᒍ.