ᐅᖃᓚᐅᑎᓯᐅᑏᑦ

You are here

ᐅᒥᐊᕐᓄᑦ ᑐᓚᑦᑕᕐᕕᒃ ᒪᑐᐃᖅᑕᐅᓂᖓ ᐸᓐᓂᖅᑑᒥ

ᓯᑎᐱᕆ 18, 2013

 ᐱᕙᓪᓕᐊᔪᖅ ᓴᖅᑭᑕᑦ

ᓴᖅᑭᑕᐅᑲᐅᑎᒋᔭᕆᐊᓖᑦ

ᐅᒥᐊᕐᓄᑦ ᑐᓚᑦᑕᕐᕕᒃ ᒪᑐᐃᖅᑕᐅᓂᖓ ᐸᓐᓂᖅᑑᒥ

ᐃᖃᓗᐃᑦ, ᓄᓇᕗᑦ (ᓯᑎᐱᕆ 18, 2013) – ᓄᓇᕘᑉ ᓯᕗᓕᖅᑎᖓ ᐄᕙ ᐋᕆᐊᒃ ᐊᒻᒪ ᐲᑕ ᑕᑉᑑᓇ, ᒥᓂᔅᑕᕆᔭᐅᔪᖅ ᐱᕙᓪᓕᐊᔪᓕᕆᔨᒃᑯᓐᓄᑦ ᐃᖏᕐᕋᔪᓕᕆᔨᒃᑯᓐᓄᓗ, ᐅᐱᒍᓱᒃᐴᒃ ᐸᓐᓂᖅᑑᕐᒥᐅᑕᓂᑦ ᐅᒥᐊᕐᓄᑦ ᑐᓚᑦᑕᕐᕕᑦᑖᓵᖓᓂ ᐅᓪᓗᒥᐅᔪᖅ.

"ᐱᔭᕇᖅᑕᐅᓂᖓ ᐊᑐᕆᐊᖃᓪᓚᕆᑦᓯᒪᔪᖅ ᐱᓕᕆᐊᕆᔭᐅᓚᐅᖅᑐᖅ ᐊᑑᑎᖃᑦᓯᐊᕐᓂᐊᖅᑐᖅ ᑮᓇᐅᔭᓕᐅᕐᓂᕐᒧᑦ ᐸᓐᓂᖅᑑᑉ ᕼᐋᒻᒪᓚᖓᓄᑦ," ᓯᕗᓕᖅᑎ ᐋᕆᐊᒃ ᐅᖃᖅᑐᖅ. "ᑐᙵᓴᐃᕗᒍᑦ ᑲᓇᑕᐅᑉ ᒐᕙᒪᖓᑕ ᑮᓇᐅᔭᖃᖅᑎᓐᓂᖓ ᐱᓕᕆᐊᖑᔪᒧᑦ ᐊᑏᑑᖅ ᑖᓐᓇ ᑐᓚᑦᑕᕐᕕᐅᔪᖅ ᐸᓐᓂᖅᑑᒥ ᐱᒋᐊᕈᑕᐅᓕᕐᓕ ᐃᒪᕐᒥᐅᑕᓄᑦ ᓴᓇᔭᐅᕙᓪᓕᐊᓂᐊᖅᑐᓄᑦ ᑲᓇᑕᐅᑉ ᐅᑭᐅᖅᑕᖅᑐᖓᑕ ᐃᓱᐊᓂ ᐃᓱᐊᓄ."

ᑖᓐᓇ ᐅᒥᐊᕐᓄᑦ ᑐᓚᑦᑕᕐᕕᐅᔪᖅ ᐱᐅᓯᒋᐊᑎᑦᓯᒻᒪᕆᓐᓂᐊᖅᑐᖅ ᐊᑦᑕᕐᓇᖅᑕᐃᓕᒪᓂᕐᒥᑦ ᓄᓇᓕᖕᒥ ᐊᖑᓇᓱᒃᑏᑦ, ᐃᖃᓪᓕᐊᖅᑏᑦ ᐊᒻᒪ ᐳᓚᕋᖅᑐᓕᕆᓂᕐᒧᑦ ᐊᐅᓚᑦᑎᔩᑦ ᑐᓚᕐᕕᖃᑦᑎᐊᕐᓂᐊᓕᕐᒪᑕ ᓄᓇᓕᖓᓂ.

"ᐊᖏᓂᖅᓴᐃᑦ ᐅᒥᐊᑦ ᑐᓚᖃᑦᑕᕈᓐᓇᕐᓂᐊᓕᖅᑐᑦ ᐸᓐᓂᖅᑑᒥ ᓴᐳᔾᔭᐅᓯᒪᓗᑎᑦ ᐊᓄᕆᒥᑦ ᐅᓕᓐᓂᐅᕙᑦᑐᓂᓪᓗ. ᑕᐃᒪᐃᓐᓂᖓᓄᑦ ᓱᒃᑲᓂᖅᓴᒥᑦ ᓂᐅᕋᐃᖃᑦᑕᕈᓐᓇᕐᓂᐊᓕᖅᑐᑦ ᐃᖃᓗᒃᑕᒥᓂᖏᓐᓂ ᐊᒻᒪ ᐊᖏᓂᖅᓴᒥᑦ ᓄᓇᓕᖓᓂᙶᖅᑐᖃᓕᕐᓗᓂ," ᐅᖃᖅᑐᖅ ᒥᓂᔅᑕᕆᔭᐅᔪᖅ ᐱᕙᓪᓕᐊᔪᓕᕆᔨᒃᑯᓐᓄᑦ ᐃᖏᕐᕋᔪᓕᕆᔨᒃᑯᓐᓄᓗ, ᐲᑕ ᑕᑉᑑᓇ.

1,000 ᐅᖓᑖᓂᕋᓗᐊᖅᑎᓪᓗᒋᑦ ᐅᒥᐊᖑᔪᑦ ᑲᓇᑕᐅᑉ ᑲᓇᖕᓇᑉᐸᓯᖓᓂ ᐅᐊᓕᓂᑉᐸᓯᖓᓂᓗ ᐃᒪᕕᖏᓐᓂᒃ, ᐸᓐᓂᖅᑑᖅ ᑐᓚᑦᑕᕐᕕᑐᐊᖑᔪᖅ ᑲᓇᑕᐅᑉ ᑕᑭᓂᖅᐹᖓᓂ ᐃᒪᕕᖓᓂ. "ᓄᓇᕗᑦ ᒐᕙᒪᖓ ᑲᔪᓯᓂᖃᕐᓂᐊᖅᑐᑦ ᐋᖅᑭᒋᐊᕈᑎᒃᓴᐅᔪᓐᓇᖅᑐᓂᑦ ᐃᒪᕐᒨᖓᔪᓂᑦ ᐊᑦᑕᕐᓇᖅᑕᐃᓕᒪᓂᕐᒨᑦ, ᐃᑲᔪᖅᓱᐃᓂᕐᒥᑦ ᑮᓇᐅᔭᓕᐅᕐᓂᕐᒧᑦ ᐊᒻᒪ ᑲᓇᑕ ᒪᓕᑦᑎᐊᕐᓂᖅᓴᐅᓂᐊᕐᒪᑕ ᐊᑐᕆᐊᖃᖅᑕᒥᓂ ᐅᑭᐅᖅᑕᖅᑑᑉ ᑲᑎᒪᔨᖏᓐᓄᑦ ᐊᖏᖅᓯᒪᓂᖏᑦ ᕿᓂᖅᑎᐅᓂᕐᒧᑦ ᐊᒻᒪ ᑭᓂᖅᑐᓂᑦ ᑯᕕᔪᖃᕐᓂᕐᒧᑦ," ᓯᕗᓕᖅᑎ ᐋᕆᐊᒃ ᐅᖃᖅᑐᖅ.

###

ᐱᕙᓪᓕᐊᔪᓄᑦ ᖃᐅᔨᒋᐊᕐᕕᒃ:

ᐄᒪᓕ ᕗᑦᔅ

ᑐᓴᒐᒃᓴᓕᕆᔨ ᓯᕗᓕᖅᑎᐅᑉ ᑎᑎᕋᕐᕕᖓᓂ

ᓄᓇᕗᑦ ᒐᕙᒪᖓ

ᐅᖄᓚᐅᑎᖓ: (867) 975-5059

ᖃᕆᓴᐅᔭᒃᑰᕈᑎᖓ: ewoods@gov.nu.ca