ᐅᖃᓚᐅᑎᓯᐅᑏᑦ

You are here

ᓄᓇᕗᑦ 1,500 ᑕᓐᔅ-ᑲᓐᓂᕐᓂᒃ ᖃᓕᕋᓕᒃᑲᓐᓂᕈᓐᓇᖅᓯᔪᑦ

ᓄᕕᐱᕆ 15, 2013

ᑐᓴᒐᒃᓴᑦ ᓴᖅᑭᑕᐅᔪᑦ

ᓴᖅᑭᑕᐅᑲᐅᑎᒋᔭᕆᐊᓕᒃ

ᓄᓇᕗᑦ 1,500 ᑕᓐᔅ-ᑲᓐᓂᕐᓂᒃ ᖃᓕᕋᓕᒃᑲᓐᓂᕈᓐᓇᖅᓯᔪᑦ

ᐃᖃᓗᐃᑦ, ᓄᓇᕗᑦ (ᓄᕕᐱᕆ 15, 2013) – ᓄᓇᕗᑦ ᒐᕙᒪᖓ (GN) ᑐᙵᓵᕆᕗᑦ ᑐᓴᒐᒃᓴᒥ ᖃᔅᓯᓂ ᐱᔪᓐᓇᕐᓂᖅ (TAC) ᑲᓛᖠᒥᐅᑦ ᓇᑕᕐᓇᖁᑎᖏᓐᓂ (ᖃᓕᕋᓕᒃ) ᐊᒡᒍᖅᓯᒪᓂᒃᑯ 0A-ᒥ, ᕿᑭᖅᑖᓘᑉ ᓯᒡᔭᖅᐸᓯᐊᓂ ᐅᐊᖕᓇᖓᓂ ᑲᓇᖕᓇᖅᐸᓯᐊᓂ, ᐃᓚᒋᐊᖅᑕᐅᓯᒪᓕᖅᑐᖅ 6,500 ᑕᓐᔅ-ᖑᓚᐅᖅᑐᖅ 8,000 ᑕᓐᔅ-ᖑᓕᖅᑐᖅ 2014 ᐊᕐᕌᒍᖓᓄᑦ. 1,500 ᑕᓐᔅ-ᓂ ᐃᓚᒋᐊᕐᓂᖅ ᐊᑕᖏᕐᓗᓂ ᑐᓐᓂᖅᑯᑕᐅᓂᐊᖅᑐᖅ ᓄᓇᕗᒻᒥᐅ ᐃᖃᓗᒐᓱᒃᑎᖏᓐᓄ.

"ᖁᕕᐊᓱᒻᒪᕆᒃᐳᒍ ᐃᒪᕐᒥᐅᑕᓕᕆᔨᒃᑯᑦ (DFO) ᓄᓇᕗᒻᒧ 100%-ᒥ ᐃᓚᒋᐊᖅᓯᖕᒪᑕ ᖃᓕᕋᓕᒃᑕᐅᔪᓐᓇᖅᑐᓂ ᐊᒡᒍᖅᓯᒪᓂᒃᑯ 0A-ᒥ," ᐅᖃᖅᑐᖅ ᐅᐱᓐᓇᖅᑐᖅ ᔭᐃᒥᓯ ᐋᕆᐊᖅ, ᒥᓂᔅᑕ ᐊᕙᑎᓕᕆᔨᒃᑯᓐᓄ. "ᑖᓐᓇ ᐊᖏᒡᓕᒋᐊᑲᓪᓚᒃᐳᖅ ᓄᓇᕘᒻᒧᓪᓗ ᐊᑑᑎᑦᑎᐊᖏᓐᓇᕐᓂᐊᖅᖢᓂ ᑕᒪᑐᒧᖓ ᐱᒻᒪᕆᐅᔪᒥ ᖃᓂᑦᑐᒥᓪᓗ ᐊᑐᒐᒃᓴᒧ."

ᔫᓂ 2013-ᖑᑎᓪᓗᒍ, ᐊᑦᓛᓐᑎᒃᒥᐅᑦ ᐃᖃᓗᓕᕆᔨᒃᑯᖏᑦᑕ (NAFO) ᖃᐅᔨᓴᖅᑐᓕᕆᓂᕐᒧ ᑲᑎᒪᔨᖏ ᐅᓄᖅᓯᒋᐊᖁᔨᓚᐅᖅᐳᑦ ᖃᔅᓯᓂ ᐱᔭᐅᔪᓐᓇᖅᑐᓂᒃ (TAC) ᖃᓕᕋᓕᖕᓂ ᑕᒪᐃᓐᓄ ᐊᒡᒍᖅᓯᒪᓂᖅ 0A ᐊᒻᒪᓗ 0B-ᒥ, ᐃᓂᖃᖅᖢᓂ ᐊᒡᒍᖅᓯᒪᓂᐅᑉ 0A ᓂᒋᖓᓂ. ᐊᑐᖅᖢᒍ ᖃᐅᔨᓴᖅᑕᐅᓂᑰᑉ ᖃᓄᐃᓕᖓᑦᑎᐊᕐᓂᖏᑦ ᐊᒻᒪᓗ ᐃᖃᓗᖕᓂᑭᑲᑕᒃᑐᑦ, ᐃᓚᒋᐊᖅᓯᓂᖅ 1,500 ᑕᓐᔅ-ᓂ ᐊᑐᓕᖁᔭᐅᓚᐅᖅᐳᖅ ᐊᒡᒍᖅᓯᒪᓂᖓᒍ 0A-ᒥ 2014 ᐊᕐᕌᒍᖓᓄ.

ᖃᓂᒋᔭᐅᔪᑐᐊᖑᓪᓗᓂ ᓄᓇᕗᑦ ᐃᖃᓗᒐᓱᖕᓂᖅ ᐊᒡᒍᖅᓯᒪᓂᖓᓂ 0A-ᒥ, ᓄᓇᕗᑦ ᐸᐸᑦᑏᓐᓇᕐᓂᐊᖅᑐᖅ 100%-ᖏᓐᓂ ᐃᖃᓗᒃᑕᐅᔪᓐᓇᖅᑐᓂ. ᑭᓯᐊᓂᓕ, ᐊᒡᒍᖅᓯᒪᓂᖓᓂ 0B-ᒥ, ᓄᓇᕗᑦ ᒥᑭᓐᓂᖅᓴᒥ ᐱᖃᖃᑕᐅᕗᖅ, 2,850 ᑕᓐᔅ-ᓂ ᐱᔪᓐᓇᖅᑐᖅ 7,000 ᑕᓐᔅ-ᖏᓐᓂ.

"ᖁᕕᐊᓱᒻᒪᕆᒃᑲᓗᐊᖅᑎᓪᓗᑕ ᒫᓐᓇ ᐊᖏᒡᓕᒋᐊᖅᑕᐅᔪᒧ ᓄᓇᕗᑦ 73%-ᐸᓗᖏᓐᓂ ᐱᖃᓕᕐᓂᐊᖅᑐᖅ ᖃᓕᕋᓕᒃᑕᐅᔪᓐᓇᖅᑐᓂ, ᐱᐅᓯᒋᐊᖅᑏᓐᓇᕋᓱᐊᖅᐸᕗᑦ ᐱᒋᔭᕗᑦ 0B-ᒥ ᐃᖃᓗᒃᑕᐅᔪᓐᓇᖅᑐᑦ ᐊᖏᒡᓕᒋᐊᕋᓱᐊᖅᖢᑎᒍᓗ ᐱᒋᔭᕗᑦ ᓈᒻᒪᖕᓂᖅᓴᒧ 85-90%-ᒧ," ᐅᖃᖅᑐᖅ ᒥᓂᔅᑕ ᐋᕆᐊᖅ.

ᓄᓇᕗᑦ ᒐᕙᒪᒃᑯ ᐱᓕᕆᖃᑎᖃᐃᓐᓇᕐᓂᐊᖅᑐᑦ ᐊᒥᓱᓂᒃ ᑎᒥᐅᔪᓂ, ᐃᓚᐅᓪᓗᓂ ᐊᑦᓛᓐᑎᒃ ᐃᖃᓗᓕᕆᔨᒃᑯᖏᑦ ᐊᒻᒪ ᐃᒪᕐᒥᐅᑕᓕᕆᔨᒃᑯᑦ, ᓄᓇᕗᒻᒥᐅᓄ ᐊᑑᑎᑦᑎᐊᖏᓐᓇᖁᓪᓗᒍ ᐃᖃᓗᒐᓱᑲᓪᓚᒍᓐᓇᖅᑕᑦᑎᓐᓄ.

 

ᑐᓴᒐᒃᓴᒧ ᑐᑭᓯᒋᐊᕐᕕᒃ:

ᑕᐃᓗ ᕌᔅ

ᐊᐅᓚᑦᑎᔨᐅᓚᐅᑲᒃᑐᖅ ᑐᓴᒐᒃᓴᓕᕆᓂᕐᒧ

ᐊᕙᑎᓕᕆᔨᒃᑯᑦ

867-975-7720

Tross1@gov.nu.ca