ᐅᖃᓚᐅᑎᓯᐅᑏᑦ

You are here

ᓄᓇᕗᒻᒥᐅᑦ ᐱᓕᕆᐊᖃᓕᖅᐳᑦ ᑐᐊᕕᕐᓇᓪᓚᕆᒃᑐᓄᑦ ᐃᑲᔪᖅᓯᓇᓱᒍᑕᐅᔪᓄᑦ ᐱᓕᐲᓐ-ᓂ

ᓄᕕᐱᕆ 18, 2013

ᐱᕙᓪᓕᐊᔪᖅ ᓴᖅᑭᑎᑕᐅᔪᖅ

ᓴᖅᑭᑎᑕᐅᓯᑲᐅᑎᒋᔭᕆᐊᓕᒃ

ᓄᓇᕗᒻᒥᐅᑦ ᐱᓕᕆᐊᖃᓕᖅᐳᑦ ᑐᐊᕕᕐᓇᓪᓚᕆᒃᑐᓄᑦ ᐃᑲᔪᖅᓯᓇᓱᒍᑕᐅᔪᓄᑦ ᐱᓕᐲᓐ-ᓂ

ᐃᖃᓗᐃᑦ, ᓄᓇᕗᑦ (ᓄᕕᐱᕆ 18, 2013) – ᓄᓇᕗᑦ ᒐᕙᒪᖓ ᐱᓕᕆᐊᖃᓕᖅᐳᖅ ᑐᐊᕕᕐᓇᓪᓚᕆᒃᑐᓄᑦ ᐃᑲᔪᖅᓯᓇᓱᒍᑕᐅᔪᓄᑦ ᐃᑲᔪᕈᑕᐅᔪᓄᓪᓗ ᐱᔭᐅᔭᕆᐊᖃᖅᑐᓄᑦ ᑕᐃᒃᑯᓄᖓ ᐊᒃᑐᖅᑕᐅᔪᓄᑦ ᐊᓄᕌᖅᔪᐊᖅᑐᖃᒻᒪᕆᓚᐅᖅᑎᓪᓗᒍ ᐱᓕᐲᓐ-ᓂ ᓄᕕᐱᕆ 8, 2013- ᖑᑎᓪᓗᒍ.

ᓄᓇᕗᑦ ᒐᕙᒪᖓ ᑐᓂᓯᓂᐊᖅᑐᑦ $25,000-ᓂᑦ ᐅᑯᓄᖓ, Canadian Red Cross - ᐊᓄᕌᖅᔪᐊᖅᑐᖃᓚᐅᖅᑎᓪᓗᒍ ᕼᐊᐃᔮᓐ-ᒥ ᑮᓇᐅᔭᖁᑎᒋᔭᐅᔪᓄᑦ ᑐᐊᕕᕐᓇᓪᓚᕆᒃᑐᓄᑦ ᐃᑲᔪᖅᓯᓇᓱᒍᑕᐅᔪᓄᑦ ᐱᓕᐲᓐ-ᓂ.

“ᑖᓐᓇ ᐱᕐᕈᓗᐊᕿᓐᓇᓪᓚᕆᒃᑐᐊᓘᕗᖅ ᐊᖏᔪᒻᒪᕆᐊᓗᖕᒥᒡᓗ ᐊᒃᑐᖅᓯᓪᓗᓂ ᐃᓄᒋᔭᐅᔪᓂᒃ ᐱᓕᐲᓐ-ᓂ,” ᓯᕗᓕᖅᑎ ᐄᕙ ᐋᕆᐊᒃ ᑕᐃᒪᓐᓇ ᐅᖃᖅᖢᓂ. “ᓄᓇᕗᒻᒥᐅᑕᐅᓪᓗᑕ, ᑕᐃᒪᑐᖅ ᑖᒃᑯᐊ ᑐᓐᓂᖅᑯᑕᐅᔪᑦ ᐃᑲᔪᕐᓂᐊᖅᐳᑦ ᐱᓕᐲᓐ-ᒥᐅᓂᒃ ᐃᑲᔪᖅᑕᐅᔭᕆᐊᖃᒻᒪᕆᓕᖅᑎᓪᓗᒋᑦ.”

ᓄᓇᕗᒻᒥᐅᑦ ᑭᐅᓯᓚᐅᖅᐳᑦ ᐃᑲᔪᖅᑕᐅᔪᒪᓂᕆᔭᐅᔪᒧᑦ ᐃᑲᔪᕐᓂᕐᒧᓪᓗ 2004-ᖑᑎᓪᓗᒍ ᐊᐃᓯᐊᒥ ᒪᓕᒡᔪᐊᖅᑕᖃᓚᐅᖅᑎᓪᓗᒍ 2010-ᒥᓗ ᓄᓇ ᓴᔪᒃᐱᓪᓚᓚᐅᖅᑎᓪᓗᒍ ᕼᐊᐃᑎᒥ. ᐊᒻᒪᐃᓛᒃᑲᓐᓂᖅᑕᐅᖅ, ᓄᓇᕗᒻᒥᐅᑦ ᑕᑯᒃᓴᐅᑎᑦᑎᓕᕆᕗᑦ ᑐᓂᓯᔪᓐᓇᑦᑎᐊᖅᐸᖕᓂᕐᒥᓂᒃ ᐃᒃᐱᒍᓱᑦᑎᐊᖅᐸᖕᓂᕐᒥᓂᒡᓗ ᐱᓕᐲᓐ-ᒥᐅᓄᑦ ᐊᒃᑐᖅᑕᐅᔪᓄᑦ ᑕᒪᑐᒧᖓ ᐱᕐᕈᓗᐊᕿᕐᔪᐊᕐᓂᕐᒧᑦ.

“ᓄᓇᕗᒻᒥᐅᑦ ᓇᑭᙶᕈᓘᔭᖅᓯᒪᔪᓂᒃ ᐃᓄᖃᖅᐳᖅ, ᐃᓚᒋᔭᐅᓪᓗᑎᒃ ᐅᓄᖅᓯᕙᓪᓕᐊᔪᑦ ᐱᓕᐲᓐ-ᒥᐅᑦ,” ᑕᐃᒪᓐᓇ ᓂᕈᐊᖅᑕᐅᓵᖅᑐᖅ ᓯᕗᓕᖅᑎᐅᓂᐊᓕᖅᖢᓂ, ᐲᑕ ᑕᑉᑑᓇ ᐅᖃᖅᖢᓂ. “ᒪᓕᒃᖢᒋᑦ ᒪᓕᒃᑕᐅᕙᒃᑐᑦ ᐅᑯᓇᓂ, ᐃᓄᐃᑦ ᖃᐅᔨᒪᔭᑐᖃᖏᑦ, ᐃᑲᔪᖅᑐᐃᔪᒪᕗᒍᑦ ᓄᓇᓕᒡᔪᐊᒥᐅᓂᒃ ᐃᑲᔪᖅᑕᐅᔭᕆᐊᖃᓕᖅᑐᓂᒃ ᐊᔪᕐᓇᖅᑐᖅᓯᐅᓪᓚᕆᒃᓯᒪᓕᖅᑎᓪᓗᒋᑦ.”

ᐱᕙᓪᓕᐊᔪᓄᑦ ᖃᐅᔨᒋᐊᕐᕕᒃᓴᖅ:

ᐹᒻ ᑰᓪᑐ
ᑐᑭᒧᐊᖅᑎᑦᑎᔨ ᑐᓴᐅᒪᑎᑦᑎᓂᕐᒧᑦ ᒐᕙᒪᓕᕆᔨᒃᑯᑦ
867-975-6049
Pcoulter2@gov.nu.ca