ᐅᖃᓚᐅᑎᓯᐅᑏᑦ

You are here

International Polar Bear Forum

ᑎᓯᐱᕆ 09, 2013

ᑐᓴᒐᒃᓴᖅ ᓴᖅᑭᑕᖅ ᓴᖅᑭᑕᐅᑲᐅᑎᒋᔭᕆᐊᓕᒃ

ᓄᓇᕐᔪᐊᕐᒥ ᓇᓄᕐᓂᒃ ᑲᑎᒪᔾᔪᑎᖃᕐᓂᖅ

ᐃᖃᓗᐃᑦ, ᓄᓇᕗᑦ (ᑎᓯᐱᕆ 9, 2013) – ᓄᓇᕘᒥ ᒐᕙᒪᒃᑯᑦ ᖁᕕᐊᓱᒻᒪᕆᒃᐳᑦ ᐱᔪᒥᒍᓱᖕᓂᖓᑦ ᐃᓄᐃᑦ ᐃᓚᐅᓂᐊᕐᓂᕐᒧᑦ ᐱᒻᒪᕆᐅᔪᒧᑦ ᐱᓕᕆᐊᒃᓴᐅᔪᒧᑦ ᓄᓇᕐᔪᐊᕐᒥ ᐅᖃᐅᓯᖃᕐᓂᐊᖅᑐᓂ ᓇᓄᐃᑦ ᓴᐳᔾᔭᐅᓯᒪᔭᕆᐊᖃᕐᓂᖏᓐᓄᑦ ᐱᓇᓱᐊᕈᓯᐅᓚᐅᖅᑐᒥ ᑲᑎᒪᔪᓂ ᕌᓯᐊᒥ.

“ᑖᓐᓇ ᓯᕗᓪᓕᖅᐹᖑᖃᓯᐅᑎᔪᖅ ᐃᓕᖅᑯᓯᒃᑯᑦ ᓄᓇᒧᑦ ᖃᐅᔨᒪᓂᐅᔪᓂᒃ ᐃᓕᓴᖅᓯᓯᒪᕗᑦ ᐊᒻᒪᓗ ᓇᓗᓇᐃᖅᖢᑎᒃ ᓄᓇᕐᔪᐊᕐᒥ ᑕᑯᒃᓴᐅᓪᓗᓂ ᖃᐅᔨᓂᕆᔭᐅᔪᑎᒍᑦ ᖃᐅᔨᒪᔾᔪᑎᖃᕐᓂᐊᖅᑎᓪᓗᒋᑦ ᐊᐅᓚᑦᑎᓂᕐᒧᑦ ᐃᓱᒪᓕᐅᕈᑕᐅᔭᕆᐊᓕᖕᓂᒃ,” ᐅᖃᖅᑐᖅ ᓯᕗᓕᖅᑎ ᐲᑕ ᑕᑉᑑᓇ. “ᖁᕕᐊᓲᑎᒋᑦᑎᐊᖅᐸᕋ ᑕᑯᓪᓗᒍ ᐊᒃᓱᕉᑎᒋᓯᒪᔭᕗᑦ ᐱᕚᓕᖅᑎᑦᑎᓇᓱᖕᓂᕐᒧᑦ ᐃᓄᐃᑦ ᐃᓱᒪᔪᓯᖏᓐᓂᒃ ᓇᓄᐃᑦ ᐱᓪᓗᒋᑦ ᓴᐳᔾᔭᐅᓯᒪᔭᕆᐊᖃᕐᓂᖏᑦ ᐃᓚᓕᐅᔾᔭᐅᓯᒪᖕᒪᑕ ᓄᓇᕐᔪᐊᕐᒥ ᐱᓕᕆᖃᑎᒋᔭᑦᑎᓐᓄᑦ.”

ᑭᒡᒐᖅᑐᖅᑏᑦ ᓄᓇᕘᒥ ᒐᕙᒪᒃᑯᓐᓂᑦ, ᐃᓚᒋᔭᐅᖃᑕᐅᓪᓗᓂ ᐊᕙᑎᓪᓕᕆᔨᒃᑯᑦ ᒥᓂᔅᑕᖓᑦ ᔮᓂ ᒪᐃᒃ, ᐊᐅᓪᓚᓚᐅᖅᑐᑦ ᐅᓛᓯᐊᒥᐅᓄᑦ ᐃᓚᒋᔭᐅᓪᓗᑎᒃ ᑲᓇᑕᒥᐅᓂᑦ ᑭᒡᒐᖅᑐᖅᑎᐅᔪᓂᒃ ᑕᐃᑯᖓ ᓄᓇᕐᔪᐊᕐᒥ ᓇᓄᐃᑦ ᑲᑎᒪᔾᔪᑕᐅᑎᓪᓗᒋᑦ ᒫᔅᑲᐅᒥ ᑕᒪᑐᒪᓂ ᐱᓇᓱᐊᕈᓯᐅᔪᒥ. ᑖᓐᓇ ᑲᑎᒪᓂᐅᔪᖅ ᐃᖅᑲᐅᒪᔾᔪᑕᐅᖕᒪᑦ 40-ᑎᒋᓕᖅᑖᓄᑦ ᓇᓪᓕᐅᓐᓂᖅᓯᐅᕈᑦᑎᖃᖅᑐᑦ ᐊᑎᓕᐅᖅᑕᐅᓚᐅᖅᓯᒪᓂᐊᓄᑦ 1973-ᒥ ᐊᖏᖃᑎᒌᒍᑕᐅᓂᑯ ᑲᑎᒪᔾᔪᑕᐅᓚᐅᖅᓯᒪᓂᖓᑦ ᓇᓄᐃᑦ.

1973-ᒥ ᐊᖏᖃᑎᒌᒍᑎᕕᓂᖅ ᓴᐳᔾᔨᓯᒪᔭᕆᐊᖃᕐᓂᕐᒧᑦ ᓇᓄᕐᓂᒃ ᐊᑎᓕᐅᖅᑕᐅᓚᐅᖅᓯᒪᖕᒪᑦ ᑕᓪᓕᒪᐅᔪᓂᑦ ᐅᑭᐅᖅᑕᖅᑐᒥᐅᓂᑦ –ᑲᓇᑕ-ᒥ, Norway-ᒥ, Denmark-ᒥ (ᑲᓛᖦᖠᒥᐅᓂ), ᐅᓛᓯᐊᒥ, ᐊᒻᒪᓗ ᐊᒥᐊᓕᑲᒥᐅᓂ, ᑕᒪᕐᒥᑦᑎᐊᕐᓗ ᑲᒪᒋᔭᒃᓴᖃᖅᑐᐃᓐᓇᐅᓪᓗᑎᒃ ᐊᐅᓚᑦᑎᔪᓐᓇᕆᐊᖃᕐᓂᕐᒧᑦ ᓄᓇᕐᔪᐊᕐᒥ 19-ᖑᔪᓄᑦ ᐅᓄᕐᓂᐅᔪᑦ ᓇᓄᖁᑎᖏᓐᓂᒃ. ᐊᖏᖃᑎᒌᒍᑦ ᓴᖅᑭᑦᑎᓚᐅᖅᓯᒪᖕᒪᑦ ᐊᑐᖅᑕᐅᖃᑦᑕᕐᓂᐊᖅᑐᒥᒃ ᓄᓇᕐᔪᐊᕐᒥ ᐊᐅᓚᑦᑎᓂᕐᒧᑦ ᓴᐳᔾᔨᓯᒪᔭᕆᐊᖃᕐᓂᕐᒧᑦ ᐊᑐᓗᐊᖁᔨᙱᓐᓂᕐᒧᑦ ᐱᓕᕆᓂᐅᓇᔭᖅᑐᓂᒃ ᓴᐳᔾᔨᓯᒪᔪᒪᓪᓗᑎᒃ ᓇᓄᕐᓂᒃ ᐊᒻᒪᓗ ᐅᑭᐅᖅᑕᖅᑐᒥ ᐃᓂᒋᕙᒃᑕᖏᓐᓂᒃ, ᐊᒻᒪᓗ ᐃᑲᔪᕐᓗᒋᑦ ᓇᓄᐃᑦ ᖃᔅᓯᐅᓂᖏᑦ ᐅᓄᖅᓯᑎᒋᐊᕋᓱᒡᓗᒋᑦ ᐊᑦᑎᒃᑐᒦᓚᐅᖅᑐᑦ 1960-ᖏᓐᓂ 10,000-ᖑᓚᐅᖅᓯᒪᔪᑦ ᓇᓄᐃᑦ ᒫᓐᓇᐅᔪᖅ 25,000-ᖑᓕᖅᑐᑦ.

ᒥᓂᔅᑕᐃᑦ ᐊᒻᒪᓗ ᐊᓯᖏᑦ ᐃᓚᐅᖃᑕᐅᔪᑦ ᑕᓪᓕᒪᓂᙶᖅᓯᒪᔪᑦ ᓄᓇᓂᑦ ᐊᑎᓕᐅᖃᑕᐅᓯᒪᔪᓂ, ᐅᕝᕙᓘᓐᓂᑦ ᓇᓄᖃᕐᓂᐅᔪᓂ ᓄᓇᕐᔪᐊᓂ”, ᑲᑎᓚᐅᕐᒪᑕ ᑕᒪᑐᒪᓂ ᐱᓇᓱᐊᕈᓯᕐᒥ ᑕᑯᓇᒃᑲᓐᓂᕋᓱᒃᖢᑎᒃ ᐱᓕᕆᐊᕆᑦᑎᐊᕐᓂᐊᓚᐅᖅᓯᒪᔭᕐᒥᖕᓂᒃ 1973-ᒥ ᐊᖏᖃᑎᒌᒍᑎᐅᔪᒧᑦ ᐊᒻᒪᓗ ᖃᐅᔨᖃᑦᑕᐅᑎᓗᑎᒃ ᓄᑖᓂᒃ ᖃᓄᐃᓕᐅᕈᑕᐅᔪᒪᔪᓂᒃ ᐃᑲᔪᕈᒪᓂᕐᒧᑦ ᓯᕗᓂᒃᓴᒥ ᐊᐅᓚᑦᑎᓂᐅᓇᔭᖅᑐᓄᑦ ᐃᓱᒫᓘᑕᐅᔪᓂᒃ, ᓲᕐᓗ ᓯᓚᐅᑉ

ᐊᓯᔾᔨᖅᐸᓪᓕᐊᓂᐊ, ᐱᕋᔭᖕᓂᒃᑯᑦ ᓂᐅᕐᕈᑎᖃᖅᐸᒃᑐᑦ, ᐊᒻᒪᓗ ᐱᕚᓪᓕᖅᑎᓐᓇᓱᒡᓗᒍ ᐃᑲᔫᑎᒃᓴᐅᔪᓐᓇᖅᑐᑦ ᐱᕙᓕᐊᓂᐅᔪᓐᓇᖅᑐᒃᑯᑦ. ᒫᓇᓕᓴᙳᖅᑎᓯᒪᔪᒥᒃ ᓇᓗᓇᐃᕈᑎᒥᒃ ᐊᑎᓕᐅᓚᐅᖅᑐᑦ ᐱᓕᕆᖃᑎᒌᒃᑐᑦ, ᐃᓕᓴᖅᓯᓪᓗᑎᒃ ᐱᔭᕆᐊᖃᖅᑐᒥᒃ ᓄᓇᕐᔪᐊᕐᒥ ᑲᑐᔾᔨᖃᑎᒌᒃᑲᓐᓂᕆᐊᖃᕐᓂᕐᒧᑦ ᐊᒻᒪᓗ ᑕᑯᒃᓴᕈᖅᑎᒃᑲᓐᓂᖅᖢᒍ ᐱᒻᒪᕆᐅᓂᐊ ᓇᓄᐃᑦ ᐱᔾᔪᑕᐅᓂᖓ ᐃᓄᖕᓂᑦ ᐊᒻᒪᓗ ᐃᓕᖅᑯᓯᒃᑯᑦ ᖃᓄᐃᖁᔨᙱᓐᓂᕐᒧᑦ ᓄᓇᖃᖅᑳᖅᓯᒪᔪᓂᒃ ᐅᑭᐅᖅᑕᖅᑐᒥᐅᓂᒃ.

“ᖃᐅᔨᑎᑦᑎᔪᒪᓪᓗᖓ ᖁᔭᓕᑦᑎᐊᕐᓂᓐᓂᒃ ᐅᓛᓯᐊᒥᐅᑦ ᑲᑐᔾᔨᖃᑎᒌᖏᑦ ᐊᐅᓚᑦᑎᓚᐅᕐᓂᖏᓐᓄᑦ ᑖᔅᓱᒥᖓ ᐱᒻᒪᕆᐊᓘᔪᒥᒃ ᖃᓄᐃᓕᐅᕐᓂᐅᔪᒥᒃ, ᐊᒻᒪᓗ ᐃᓚᒋᔭᕗᑦ ᐃᓚᐅᖃᑕᐅᔪᑦ ᑲᓇᑕᒥᑦ ᐊᒻᒪᓗ ᐃᓚᒐᓂᑦ ᑲᓇᑕᐅᑉ ᖃᓂᒋᔭᖓᓂ ᓄᓇᖃᖅᑐᑦᑕᐅᑦ ᐃᓚᐅᑦᑎᐊᓚᐅᕐᓂᖏᓐᓄᑦ ᑲᒪᒋᔭᖃᕋᓱᐊᖅᑎᓪᓗᒋᑦ ᓇᓄᐃᑦ ᐊᐅᓚᑕᐅᔪᓐᓇᕐᓂᖏᓐᓄᑦ,”ᐅᖃᖅᑐᖅ ᒥᓂᔅᑕ ᒪᐃᒃ. “ᓇᓄᐃᑦ ᐃᓕᓴᖅᓯᔪᓐᓇᙱᒻᒪᑕ ᒐᕙᒪᑯᑦ ᑭᒡᓕᖁᑎᖏᓐᓂᒃ ᓄᓇᑎᒍᑦ. ᑕᒪᑦᑕ ᑲᒪᒋᔭᒃᓴᐅᖃᐅᕋᑦᑕ ᑲᔪᓯᓂᖃᑦᑎᐊᕈᓐᓇᖅᑐᒃᑯᑦ ᐊᒻᒪᓗ ᑲᔪᓯᑦᑎᐊᖅᑐᒃᑯᑦ ᐊᐅᓚᑦᑎᔪᓐᓇᕐᓂᕐᒥᒃ ᓄᓇᕐᔪᐊᑉ ᓇᓄᖁᑎᖏᓐᓂᒃ.”

ᓄᓇᕘᒥ ᒐᕙᒪᒃᑯᑦ ᐊᒻᒪᓗ ᐱᓕᕆᖃᑎᒋᔭᖏᑦ, ᐃᓚᒋᖃᓯᐅᑎᓪᓗᒋᑦ ᐊᕙᑎᓕᕆᔨᒃᑯᑦ ᑲᓇᑕᒧᑦ, ᐃᓄᐃᑦ ᑕᐱᕇᑦ ᑲᓇᑕᒥ, ᐃᓄᕕᐊᓗᐃᑦ ᓂᕐᔪᑎᓄᑦ ᑲᑎᒪᔨᖏᑦ. ᓄᓇᕗᑦ ᑐᙵᕕᒃ ᑎᒥᖁᑖ, ᓄᓇᑦᓯᐊᕐᒧᑦ ᒐᕙᒪᒃᑯᑦ, ᒪᑭᕕᒃ ᑯᐊᐳᕇᓴᒃᑯᑦ, ᓄᓇᑦᓯᐊᕗᑦ ᒐᕙᒪᒃᑯᖏᓪᓗ, ᐱᓕᕆᑦᑎᐊᕐᓂᐊᕐᓂᕋᖅᐳᑦ ᑲᔪᓯᑎᑦᑎᐊᕐᓗᒍ ᐊᐅᓚᑦᑎᔪᓐᓇᕐᓂᖅ ᓇᓄᕐᓂᒃ.

ᑐᓴᒐᒃᓴᒧᑦ ᖃᐅᔨᒋᐊᕐᕕᐅᔪᓐᓇᖅᑐᖅ:

ᑕᐃᓗ ᕌᔅ

ᐊᐅᓚᑦᑎᔨᐅᓚᐅᑲᒃᑐᖅ ᑐᓴᒐᒃᓴᓕᕆᓂᕐᒧᑦ

ᐊᕙᑎᓕᕆᔨᒃᑯᑦ

tross1@gov.nu.ca

867-975-7720

###