You are here

Alexandra Beaumier's Story

ᐅᓂᒃᑳᕋ, ᐃᓅᓯᕋ, ᖃᓄᖅ ᐅᖓᓯᒃᑐᒥᑦ ᓄᓇᓕᖕᓂᑦ ᐋᓐᓂᐊᓯᐅᑎᙳᓚᐅᕐᒪᖔᑦ ᓄᓇᕗᒻᒥᑦ. 

ᐱᒋᐊᓚᐅᕐᓯᒪᔪᖅ ᒪᒃᑯᒃᑎᓪᓗᖓ ᓈᓚᒃᐸᒃᖢᖓ ᐊᒥᓱᓂ ᐅᓂᑳᓂ ᐊᑖᑕᑦᑎᐊᓐᓂ ᐊᐅᓪᓚᖃᑦᑕᓚᐅᕐᓯᒪᔪᖅ ᓄᓇᕐᔪᐊᒥᑦ ᐊᒥᓱᓄᓪᓗ ᐅᖓᓯᒃᑐᓄᑦ ᓄᓇᓕᖕᓄᐊᕐᐸᓚᐅᕐᖢᓂ. ᐃᖅᑲᐅᒪᔪᖓ ᐅᑎᕌᖓᒥ ᓄᓇᓕᖕᒥᐅᓂ ᓴᓇᐅᒐᓂ ᑐᓐᓂᖅᑯᑎᑖᕐᐸᒃᖢᓂ ᐊᒥᓱᐊᓗᖕᓂᓪᓗ ᐅᓂᒃᑳᒃᓴᖃᕐᐸᒃᖢᓂ ᐃᓄᑦᑎᐊᕚᓗᖕᓂ ᑕᑯᕙᓚᐅᕐᑕᒥᓂᒃ. 

ᐃᓅᓯᕆᔪᒪᓚᐅᕐᐸᕋ ᐱᐅᔪᐊᓗᐃᑦ ᐊᑐᖃᑦᑕᓚᐅᕐᑕᖏᑦ. ᖃᐅᔨᒐᒥ ᐊᓕᐊᓇᐃᒋᔭᒻᒪᕆᒃᑲ ᐊᐅᓪᓚᕐᐸᒃᖢᓂ ᐅᓂᒃᑳᑦ ᐊᑖᑕᑦᑎᐊᒪ, ᐊᑖᑕᒐ ᓯᓐᓇᒃᓴᐅᑎᓂ ᐅᓂᒃᑳᖃᑦᑕᓕᓚᐅᕐᐳᖅ ᐃᓗᐊᖅᓴᐃᔨᒥ ᐊᐅᓪᓚᖃᑦᑕᕐᑐᒥ ᐅᖓᓯᒃᑐᐊᓗᖕᒧᑦ ᓇᒃᓴᕐᖢᓂ ᐃᓅᓕᓴᐅᑎᓂ ᐅᖓᓯᒃᑐᓄ ᓄᓇᓕᖕᓄᑦ. ᐅᓐᓄᑕᒫᑦ ᐊᔾᔨᒌᙱᑦᑐᓂ ᐅᓂᒃᑳᖃᑦᑕᓚᐅᕐᐳᖅ ᔭᐃᓐ ᐃᓗᐊᖅᓴᐃᔨ ᐊᐅᓪᓚᕐᐸᒃᖢᓂ ᓇᐹᖅᑐᖃᐅᕐᑐᓄᑦ, ᑕᕆᐅᕐᔪᐊᒃᑯᑦ, ᐃᒪᖃᙱᑦᑐᐊᓗᒃᑯᑦ ᖁᐊᕌᓗᒃᑯᓪᓗ ᓄᓇᒃᑯ ᐅᑭᐅᖅᑕᖅᑐᒥᑦ. ᖃᐅᔨᒪᓇᓂ, ᐊᑐᕐᑕᖏᑦ ᒪᒃᑯᒃᖢᓂ ᐊᕐᓇᐅᓪᓗᓂ ᐱᔪᒪᒻᒪᕆᓕᓚᐅᕐᐳᖓ ᐃᖅᑲᓇᐃᔭᕐᓗᖓ ᐅᖓᓯᒃᑐᒥᑦ.  

ᓱᒃᑲᓕᓚᐅᕐᐳᖅ, ᐃᓐᓇᕈᖅᖢᖓ ᐊᒥᓱᓄᐊᕐᓯᒪᓕᕐᖢᖓᓗ ᑭᓯᐊᓂ ᐃᓗᐊᖅᓴᐃᔨᙳᕈᒪᓕᕋᒪ. ᐃᖅᑲᓇᐃᔭᓕᓵᕐᑎᓪᓗᖓ, ᖃᐅᔨᒪᐃᓐᓇᐅᔭᓚᐅᕐᓯᒪᔪᖓ ᐃᖅᑲᓇᐃᔭᕈᒪᓪᓗᖓ ᐅᖓᓯᒃᑐᒥᑦ; ᐱᐅᒋᑦᑎᐊᓚᐅᕋᒃᑯ ᐊᖏᓂᖓ ᐱᓕᕆᐊᑉ ᐅᑭᐅᖅᑕᖅᑐᒥᑦ. ᒪᒃᑯᒃᖢᖓ ᕿᑐᕐᖓᖃᕐᖢᖓ ᐃᓄᑑᓪᓗᖓ ᑕᐃᒃᓱᒪᓂ ᐊᐅᓪᓚᕈᓐᓇᕐᓇᖓᓗ ᐅᖓᓯᒃᑐᒧᑦ ᓇᖕᒪᒃᑕᕋ ᐃᓗᓪᓕᕐᓱᓕᕐᖢᒍ ᐊᔪᙱᓐᓂᕐᓂ ᖃᐅᔨᒪᓂᖕᓂᓪᓗ ᐅᖓᓯᒃᑐᒥ ᐃᓗᐊᒃᓴᐃᔨᐅᔪᓐᓇᓛᖁᓪᓗᖓ ᖃᖓᐅᓕᕐᐸᑦ. ᐅᖃᓕᒪᖃᑦᑕᓚᐅᕐᐳᖓ ᐅᓂᒃᑳᓂ ᐅᖃᓕᒫᒐᓂᓪᓗ ᐃᓗᐊᕐᓴᐃᔨᑦ ᒥᒃᓵᓄ ᐅᖓᓯᒃᑐᒥ ᐃᖅᑲᓇᐃᔭᖃᑦᑕᓚᐅᕐᑐᓂ ᓘᒃᑖᖅᑕᖃᙱᖦᖢᓂ. 

ᖃᐅᔨᒫᓂᓚᐅᕐᑐᖓ ᖃᓄᐃᓕᐅᕈᒪᖕᒪᖔᕐᒪ. 

ᐃᖅᑲᓇᐃᔭᓚᐅᕐᓯᒪᕗᖓ ᐋᓐᓂᐊᓪᓚᕆᒃᑐᒃᑯᕕᖕᒥᑦ ᑐᐊᕕᖕᓇᖅᑐᒃᑯᕕᖕᒥᓪᓗ ᐊᕐᕌᒍᓄᑦ ᐊᒥᓱᓄᑦ ᐊᔪᕈᓐᓃᖅᐸᓪᓕᐊᖏᓐᓇᕐᖢᖓᓗ ᑯᓱᔪᓐᓃᕐᐹᓪᓕᕐᖢᖓᓗ ᐃᓗᐊᖅᓴᐃᔨᐅᓂᖕᒥᑦ. ᑕᐃᒪᐅᓕᕐᐳᖅ − ᐃᕐᓂᕋ ᐅᑭᐅᖅᑯᕐᑐᓕᕐᖢᓂ ᖃᐅᔨᓪᓗᖓᓗ ᑲᒪᒋᔭᕆᐊᓕᕐᑕᒃᑲ ᐱᔪᒪᖃᑦᑕᕐᑕᒃᑲ ᐃᓅᓯᓐᓂᓪᓗ ᑐᕌᕈᒪᔭᒃᑲ. ᑲᔪᓯᓐᓇᕐᓯᓚᐅᕐᐳᖅ ᐅᕙᓐᓄᑦ ᐱᒋᐊᓕᕐᓗᖓᓗ ᓄᑖᒥ ᐅᖓᓯᒃᑐᒥᑦ ᐃᓗᐊᖅᓴᐃᔨᐅᓂᖕᒥᑦ. ᑲᑉᐱᐊᓱᓚᐅᕋᓗᐊᕐᑐᖓ ᑭᓯᐊᓂᓕᑦᑕᐃᖅ ᐊᓕᐊᓇᐃᒍᓱᒃᖢᖓ. ᐱᒋᐊᕐᓂᐊᓂ ᐃᖅᑲᓇᐃᔮᖅᑖᖅᑎᑕᐅᓚᐅᕐᐳᖓ ᑐᑦᑕᕕᐅᔪᒥ ᑯᐸᐃᒃᒥ ᐱᓕᒻᒪᒃᓴᕐᑕᐅᓪᓗᖓ ᐱᓇᓱᐊᕈᓯᓄᑦ 6 ᐊᐅᓪᓚᕐᖢᖓᓗ ᓯᕗᓪᓕᖅᐹᖅᑎᐊᒥ ᑳᓐᑐᓛᓐᓄ ᖁᕐᓗᖅᑐᖅᒧ ᐊᕐᕌᒍᑦ 6−ᖑᑲᓴᓕᕐᑐᑦ ᒫᓐᓇ. ᐊᓕᐊᓇᐃᑦᑐᒻᒪᕆᐊᓘᓚᐅᕐᑐᖅ!!!! ᐅᐃᕆᖦᖢᖓ!! 

ᐃᓗᐊᖅᓴᐃᔨᐅᓯᒪᕗᖓ ᐊᒥᓱᓂ ᓄᓇᓕᖕᓂᑦ ᓄᓇᕗᒻᒥᑦ ᑭᓯᐊᓂ ᐊᓕᐊᓇᐃᒋᓗᐊᓚᐅᕐᑕᕋᓕ ᕿᑎᕐᒥᐅᑦ ᑕᐅᕙᖕᓂᖕᒥᐅᑕᐅᔪᒪᓕᕐᖢᖓᓗ ᐱᐅᔪᒻᒪᕆᐊᓗᖕᓄᑦ ᐃᓚᒌᓄᑦ ᐃᓗᐊᖅᓴᐃᔨᑦᑎᐊᕙᒻᒪᕆᐊᓗᖕᓄᑦ, ᐃᓚᐅᖃᑕᐅᓕᕐᖢᖓ ᓄᓇᕗᑦ ᒐᕙᒪᒃᑯᖏᓐᓄᑦ ᐅᒡᒍᐊᕆᓚᐅᕐᓇᒍᓗ. ᓱᓕᓗᖓ ᐅᖃᕈᓐᓇᖅᑐᖓ ᖁᕕᐊᓱᒻᒪᕆᒃᐳᖓ ᐃᖅᑲᓇᐃᔭᖅᑎᒻᒪᕆᐅᓪᓗᖓ ᐅᓇ ᐃᖅᑲᓇᐃᔮᖅ ᖁᕕᐊᓇᖅᑐᒻᒪᕆᐊᓘᖕᒪᑦ ᐃᓗᐃᑦᑑᓕᖅᑰᔨᓐᓇᕐᐸᒃᖢᓂᓗ. ᐃᓅᓯᕋ ᓄᓇᕗᒻᒥᑦ ᓄᖅᑲᓚᐅᕐᓯᒪᙱᓚᖅ ᐊᓯᔾᔨᕐᐸᓪᓕᐊᓂᖕᒥᑦ ᐱᕈᖅᐸᓪᓕᐊᖏᓐᓇᕐᖢᖓᓗ ᐃᓗᐊᖅᓴᐃᔨᐅᓪᓗᖓ, ᐅᖃᕐᕕᐅᔪᓐᓇᕐᓗᖓ, ᓯᕗᓕᖅᑎᐅᓗᖓᓗ. 

ᐅᖓᓯᒃᑐᒥ ᐋᓐᓂᐊᓯᐅᑎᐅᓪᓗᓂ ᐊᒥᓱᓂ ᐊᒃᓱᕈᕐᓇᖅᑐᖅᑕᓕᒃ. ᐃᓛᓐᓂᒃᑯᑦ ᐊᒃᓱᕈᕐᓇᕐᑐᖅ, ᑭᓯᐊᓂᓕᑦᑕᐅᖅ ᖁᕕᐊᓇᒻᒪᕆᑐᐊᓘᓯᒪᔪᖅ ᐃᖅᑲᓇᐃᔮᕋ ᐊᑐᕐᓯᒪᔭᕋ ᐊᕐᕌᒍᓄᑦ 20-ᓄᑦ ᐃᓗᐊᖅᓴᐃᔨᐅᓪᓗᖓ.  ᖃᐅᑕᒫᑦ ᐱᕕᖃᕐᑎᑕᐅᖏᓐᓇᕐᐳᖓ ᖁᔭᓕᓪᓗᖓᓗ ᐱᕕᖃᕈᓐᓇᕋᒪ ᑲᒪᔪᓐᓇᖁᓪᓗᖓ ᐃᓄᖕᓂᑦ, ᓄᑕᖅᑲᓂ, ᐃᓐᓇᕐᓂᖅ, ᐃᓚᒋᔭᐅᓗᖓ ᐃᓕᑉᐸᓪᓕᐊᓗᖓᓗ ᐅᑯᓇᙵᑦ ᓄᓇᓕᖕᓂᑦ. ᐃᓗᐊᖅᓴᐃᔨᐅᓂᖅ ᓄᓇᕗᒻᒥᑦ ᐱᕈᖅᐸᓪᓕᐊᓐᓇᕐᐳᖅ ᖃᐅᑕᒫᑦ, ᐃᓕᑉᐸᓪᓕᐊᕙᒃᐳᖓ ᐅᕙᓐᓂᑦ ᐊᓯᓐᓂᓪᓗ, ᖃᐅᔨᓯᒪᓪᓗᖓᓗ ᐃᓄᑦᑎᐊᕙᒻᒪᕆᐊᓗᖕᓂᑦ ᐆᒻᒪᑎᓐᓃᖏᓐᓇᐅᔭᕐᓂᐊᕐᑐᑦ ᐃᓱᐊᓄ. ᖁᕕᐊᒋᒻᒪᕆᒃᑕᕋ ᐋᓐᓂᐊᓯᐅᑎᐅᓂᖅ ᓄᓇᕗᒻᒥᑦ.