You are here

Nicole Wilcox's Story

ᓂᑰᓪ ᕕᐅᓪᑳᒃᔅ−ᖑᔪᖓ ᐃᖃᓗᒃᑑᑦᑎᐊᕐᒥᐅᑕᐅᓪᓗᖓ, ᐃᓗᐊᖅᓴᐃᔨᐅᔪᖓ Dalhousie ᓯᓚᑦᑐᖅᓴᕐᕕᒡᔪᐊᕐᒥ ᐊᓂᒍᐃᓚᐅᖅᓯᒪᓪᓗᖓ ᕼᐋᓕᕙᒃᔅ−ᒥ. 


ᐊᑯᓂᐅᓗᐊᙱᑦᑐᖅ ᐋᓐᓂᐊᕕᖕᒥ ᐃᓗᐊᖅᓴᐃᔨᐅᓂᕋᖅᑕᐅᓕᓚᐅᖅᓯᒪᕗᖓ.


ᓄᓇᕗᒻᒥ ᐱᕈᖅᓴᓪᓗᖓ ᐃᓕᓴᖅᑕᐅᓚᐅᖅᓯᒪᕗᖓ ᖁᙱᐊᕐᓂᒃᑯᑦ ᐅᖃᐅᔾᔭᐅᖃᑦᑕᕐᓂᒃᑯᓪᓘᓐᓃᑦ ᓇᓗᓇᐃᔭᑦᑎᐊᖅᓯᒪᔪᓂᒃ ᐊᖓᔪᖅᑳᓐᓄᑦ ᐃᓅᖃᑎᑦᑎᓐᓄᑦ ᐃᑲᔪᕆᐊᖃᕐᓂᑦᑎᓐᓂᒃ. ᐃᑲᔪᕈᓐᓇᑐᐊᕌᖓᑦᑕ, ᐃᑲᔪᕆᐊᖃᖃᑦᑕᓚᐅᖅᓯᒪᒐᑦᑕ. 
ᓱᒃᑲᓴᖅᑎᓪᓗᒍ ᑎᓴᒪᖓᓐᓄᐊᕐᓗᖓ ᐊᒻᒪ ᑭᖑᓪᓕᖅᐹᖑᓪᓗᓂ ᐅᑭᐅᕐᒥ ᐃᓕᓐᓂᐊᖅᑎᓪᓗᖓ ᐃᓗᐊᖅᓴᐃᔨᙳᕈᒪᑦᑎᐊᖅᖢᖓᓗ ᑕᐃᔅᓱᒪᓂ ᖃᖓᓕᒫᖅ ᐱᓕᕆᐊᕆᔪᒪᓕᖅᖢᒍ. ᐊᕐᕌᒎᑉ ᐃᓱᓕᓕᖅᑎᓪᓗᒍ, ᐃᓕᓐᓂᐊᖃᑎᒃᑲ ᐊᓕᐊᓇᐃᒍᓱᑦᑎᐊᖅᖢᑕ ᐅᖃᓪᓚᓚᐅᖅᓯᒪᒐᑦᑕ ᑭᖑᓪᓕᖅᐹᒥ ᓇᓂ ᐃᓂᑖᖅᑎᑕᐅᔪᒪᓇᔭᕐᒪᖔᑦᑕ, ᑐᒃᓯᕋᐅᑎᕗᑦ ᐊᒻᒪ ᓂᕆᐅᒋᔭᕗᑦ. ᐊᖏᖅᑕᐅᓚᐅᖅᓯᒪᕗᖓ ᐱᐊᓂᖕᓂᐊᕐᓗᒍ ᑭᖑᓪᓕᖅᐹᒥ ᐃᓂᑖᖅᑎᑕᐅᓂᕋ ᓄᓇᓐᓂ ᐃᖃᓗᒃᑑᑦᑎᐊᖅ, ᓄᓇᕗᒻᒥ! ᐊᓕᐊᓇᐃᒍᓱᑦᑎᐊᓚᐅᖅᐳᖓ, ᖁᓱᓪᓗᖓ, ᐊᐱᖅᑯᑎᒃᓴᖃᐅᕐᔪᐊᖅᖢᖓᓗ ᐃᓱᒪᒃᑯᑦ. ᓄᓇᖅᑲᑎᒌᑦ ᖃᓄᐃᒃᓴᔾᔮᙱᒃᑲᓗᐊᖅᐳᖅᑲᐃ ᐃᓗᐊᖅᓴᐃᔨᒋᔭᐅᒐᓗᐊᕈᒪ? ᐃᓗᐊᖅᓴᕈᓐᓇᕋᔭᕋᒃᑭᑦ ᐃᓄᐃᑦ ᐱᕈᖅᓴᖃᑎᒋᓚᐅᖅᓯᒪᔭᒃᑲ? 


ᐃᓕᓴᐃᔨᒐ ᐃᐅᕆᓐ ᐃᖃᓗᒃᑑᑦᑎᐊᒦᓚᐅᖅᓯᒪᙱᓐᓇᓐᓄᒃ ᐊᑯᓂᕈᓗᒃ ᐅᖅᓱᖅᑑᓕᐊᖅᑎᓪᓗᓄᒃ ᐃᑲᔪᕆᐊᖅᖢᒋᑦ ᐃᓗᐊᖅᓴᐃᔨᑭᒃᓴᖅᑐᑦ ᓄᑕᕋᓛᑦ ᓄᕙᒡᔪᐊᑲᑕᒃᑎᓪᓗᒋᑦ. ᐅᓐᓄᐊᒃᑯᑦ ᐊᒻᒪ ᐅᓪᓘᔅᓲᔭᖃᑦᑕᖅᑐᑦ ᖁᕕᐊᒋᑦᑎᐊᓕᓚᐅᖅᑕᒃᑲ ᐃᓅᖃᑎᒃᑲ ᐃᑲᔪᕈᓐᓇᖅᓯᓪᓗᒋᑦ ᐃᑲᔪᖅᑕᐅᒋᐊᖃᕌᖓᑕ. ᖃᓄᓕᒫᑦᑎᐊᖅ ᓈᒻᒪᒋᓚᐅᖅᑕᕋ! ᐊᖓᔪᖅᑳᓐᓄᑦ ᐅᖃᐅᔾᔭᐅᕙᒃᖢᖓ ᐃᓅᖃᑎᑦᑎᓐᓂᒃ ᐃᑲᔪᕆᐊᖃᓲᖑᓂᑦᑎᓐᓂᒃ ᖃᖓᓕᒫᑦᑎᐊᖅ ᐃᑲᔪᖅᑕᐅᒋᐊᖃᖅᑎᓪᓗᒋᑦ, ᐃᓗᐊᖅᓴᕐᓗᒋᑦ ᐃᓗᐊᖅᓴᖅᑕᐅᒋᐊᓕᑦ ᓄᑕᕋᓛᖑᒐᓗᐊᖅᐸᑕ, ᑲᐱᕙᒡᓗᒋᑦ ᑲᐱᔭᐅᒋᐊᖃᕌᖓᑕ ᓴᐳᑎᓗᒋᑦ ᖃᓂᒻᒪᓯᕐᓄᑦ, ᖃᐅᔨᓴᑦᑎᐊᖅᐸᒡᓗᒋᑦ, ᐊᐅᖏᖅᐸᒡᓗᒋᑦ, ᐃᓪᓕᐊᑉ ᐹᖓᓂᑦ ᐊᓪᓚᖅᓯᕙᒡᓗᖓ, ᐊᓯᖏᓪᓗ. ᑖᒃᑯᓇᓂ ᐱᓕᕆᖃᑕᐅᒋᐊᖃᖅᑰᔨᑦᑎᐊᓕᓚᐅᕋᒪ. 


ᐃᓗᐊᖅᓴᐃᔨᙳᕆᐅᖅᑎᓪᓗᖓ ᐊᓂᒍᐃᓵᖅᓯᒪᑎᓪᓗᖓ ᓄᓇᕗᒻᒥ ᐱᕕᖃᓕᓚᐅᖅᐳᖓ ᐃᓕᓴᐃᒋᐊᒃᓴᖅ ᑭᓇᒥᒃᑭᐊᖅ ᐅᑭᐅᓕᒫᕐᒧᑦ. ᐃᐅᕆᓐᓗ ᐅᕙᖓᓗ ᐃᓗᐊᖅᓴᐃᔨᐅᓚᐅᖅᐳᒍᒃ ᐱᖓᓱᓂᒃ ᕿᑎᕐᒥᐅᑦ ᓄᓇᓕᖏᓐᓂᒃ ᐊᑕᐅᑦᑎᒃᑰᖅᑕᖅᖢᓄᒃ ᐃᓕᑦᑎᕐᔪᐊᓚᐅᖅᓯᒪᓪᓗᖓᓗ ᑕᐃᔅᓱᒪᓂ ᕿᓚᒥᒻᒪᕆᑯᓗᒃ. ᐃᑲᕐᕋᒐᓵᓗᖕᓄᑦ ᐅᖃᐅᓯᕆᔪᓐᓇᖅᑰᖅᑕᒃᑲ ᖃᐅᔨᕈᓘᔭᖃᑦᑕᖅᓯᒪᔮᓗᒃᑲ.


ᐃᓗᐊᖅᓴᐃᔨᙳᕆᐅᖅᓴᕐᕕᖕᒥ ᐱᕙᒌᔭᖅᑕᐅᔪᓐᓇᓚᐅᙱᑉᐳᖓ ᐅᑭᐅᖅᑕᖅᑐᒥ ᐃᓗᐊᖅᓴᐃᔨᐅᓂᕐᒧᑦ. ᐃᓂᖅᑎᖅᑕᐅᓚᐅᖅᓯᒪᕗᖓ ᐃᖃᓗᒃᑑᑦᑎᐊᒧᑦ ᓱᓕ ᓅᓚᐅᙱᑎᓪᓗᖓ, ᓂᕆᐅᖕᓂᖃᑦᑎᐊᓚᐅᖅᐳᖓᓗ ᐅᑎᓚᐅᖅᓯᒪᓛᕐᒪᖔᕐᒪ ᖃᓄᓗᒃᑖᕐᓗ ᑭᓱᓗᒃᑖᑦ ᖃᓄᐃᙱᑦᑎᐊᕐᓗᑎᒃ. ᐱᕙᒌᔭᖅᓯᒪᓚᐅᙱᑉᐳᖓᓕ ᓂᕆᐅᓇᙱᑦᑐᓄᑦ, ᓂᕆᐅᓇᙱᑦᑐᒃᑯᓪᓗ ᐃᓅᔪᓐᓃᑳᓪᓚᒃᑐᑦ ᐃᓅᓯᓕᒫᓐᓄᑦ ᖃᐅᔨᒪᓚᐅᖅᓯᒪᔭᒃᑲ. ᐱᕙᒌᔭᖅᓯᒪᓚᐅᙱᓚᖓ ᐅᓪᓗᒐᓴᕐᓂᒃ ᐋᓐᓂᐊᕕᖕᒦᑉᐸᒡᓗᖓ ᐃᖅᑲᓇᐃᔭᕐᓗᖓ ᐊᒻᒪ ᑎᑎᕋᖅᐸᓪᓕᐊᓗᖓ, ᖃᐅᔨᒪᓇᓱᑦᑎᐊᕐᓗᒋᑦ ᐊᐅᓕᖅᓱᖅᑕᐅᔾᔪᑏᑦ ᑎᑭᓴᖅᑕᐅᓯᒪᒐᓗᐊᕐᒪᖔᑕ, ᐱᐊᓂᒃᐸᒡᓗᒋᓪᓗ ᓘᒃᑖᓂᒃ ᐊᓯᒥᖕᓄᑦ ᑐᓐᓂᖅᑯᑕᐅᔪᑦ ᐊᒻᒪ ᑐᒃᓯᕋᐅᑕᐅᓯᒪᔪᑦ, ᐅᖃᓗᒡᕕᐅᑦᑎᖅᐸᒡᓗᖓ ᐅᖃᓗᒡᕕᐅᑦᑎᙱᒃᑳᖓᒪ ᐃᑲᔪᕈᓐᓇᖅᑐᓕᒫᓪᓗ ᐃᑲᔪᖅᑎᑉᐸᒡᓗᒋᑦ ᑐᐊᕕᕐᓇᖅᑐᖅᑕᖃᓕᕌᖓᑦ.  


ᖃᔅᓯᑲᓪᓛᓗᖕᓂᒃ ᐱᐅᔪᓂᒃ ᖃᐅᔨᔪᖃᖃᑦᑕᖅᓯᒪᓕᖅᑐᖅ ᓲᕐᓗ ᑐᑭᓯᐊᓂᖅᓴᐅᓕᕐᓗᒋᑦ ᐅᖃᐅᓯᐅᖅᑲᐅᔪᑦ ᐃᓄᒃᑎᑐᑦ ᑐᓵᔨᖃᙱᒃᑲᓗᐊᕐᓗᑎᒃ. ᐊᓯᖏᓐᓂᒃ ᓄᓇᓕᖕᓂ ᑐᙵᓱᒃᑎᑕᐅᑲᑕᖕᓂᖅ ᐃᒪᐃᓕᑲᑕᒃᑎᓪᓗᒋᑦ "ᐆ', ᐃᓅᓪᓗᑎᑦ ᐃᓗᐊᖅᓴᐃᔨᐊᐃᓐᓅᔪᑎᑦ!" ᐃᑲᔪᕈᓐᓇᓚᐅᖅᐸᒃᑲ ᐃᓄᐃᑦ ᑐᑭᓯᕚᓪᓕᕐᓗᑎᒃ ᒪᒥᔪᐃᑦᑐᓂᒃ ᐋᓐᓂᐊᓂᒃ, ᑐᑭᓯᔪᓐᓇᓚᐅᖅᐸᒃᑲᓗ ᐃᓄᐃᑦ ᐃᓅᖃᑎᒋᒐᒃᑭᑦ ᖃᓪᓗᓈᓂᑦ ᑐᑭᓯᔭᐅᓇᔭᙱᑦᑐᑦ ᑐᑭᓯᐊᓚᐅᖅᑕᒃᑲ. ᐃᓕᓴᐃᔨᒐ ᐃᓛᓐᓂᒃᑯᑦ ᐃᓱᒪᖃᑦᑕᓚᐅᖅᐳᖅ ᐋᓐᓂᐊᕕᓕᐊᖅᓯᒪᔪᑦ ᐅᖃᓪᓛᓂᖕᒪᖔᑕ ᐅᕝᕙᓘᓐᓃᑦ ᐃᓄᒃᑎᑐᑦ ᐅᖃᓪᓚᒡᕕᐅᑎᓪᓗᖓ ᑖᒃᑯᓇᙵᑦ ᑐᑭᓯᐊᙱᓐᓇᓱᒋᔭᐅᕙᒃᖢᖓ, ᖃᐅᔨᒫᓂᓚᐅᖅᑕᒃᑲ ᐅᖃᓪᓚᒃᑎᓪᓗᒋᑦ ᓂᐸᖏᓚᐅᑲᑐᐃᓐᓇᖅᑐᑦ ᐅᖃᓪᓚᒃᑲᓐᓂᕐᓂᐊᓗᐊᕐᓂᑯᒧᑦ. ᐋᓐᓂᐊᕕᓕᐊᖅᓯᒪᔪᒥᒃ ᐅᓂᒃᑳᕐᕕᐅᓪᓗᓂ ᐅᓂᒃᑳᖅᑎᑦᑎᐊᖅᖢᒋᓪᓗ ᐱᒻᒪᕆᐊᓘᖕᒪᑦ. ᐃᓕᑕᖅᓯᔪᓐᓇᖅᓯᓚᐅᕋᒪ ᐊᐱᖅᑯᑕᐅᒃᑲᓐᓂᕐᓂᐊᖅᑐᒧᑦ ᑭᐅᑐᐃᓐᓇᕆᐊᖃᙱᓐᓂᖏᓐᓂᒃ.


ᑕᖅᑮᑦ 9 ᐊᓂᒍᓚᐅᙱᓐᓂᖏᓐᓂᒃ, ᐅᔾᔨᕈᓱᓕᓚᐅᖅᐳᖓ ᐱᑐᐃᓐᓇᕆᐊᖃᙱᓐᓂᓐᓂ ᓱᓕ ᓄᓇᓕᖕᓂ ᐃᓗᐊᖅᓴᐃᔨᓄᑦ ᐱᓕᕆᐊᖑᕙᒃᑐᓂᒃ. ᖃᐅᔨᒫᓂᓚᐅᙱᓐᓇᒪ ᖃᐅᔨᒪᔪᓂᒃ ᐃᓂᖅᑎᕈᑕᐅᖃᑦᑕᓚᐅᖅᑐᓂᒃ ᐅᕙᓐᓄᑦ. ᐃᒪᐃᑦᑐᒪᓕᓚᐅᖅᐳᖓ ᐃᖅᑲᓇᐃᔭᖅᑎᐅᓚᐅᑲᑐᐃᓐᓇᕐᓂᕋ ᐊᑲᕐᕉᑎᒋᔪᒪᓕᖅᖢᒍ ᓄᓇᓕᖕᓂ ᐃᓗᐊᖅᓴᐃᔨᐅᓗᖓ ᕼᐋᓕᕚᒃᔅ−ᒧᓪᓗ ᐅᑎᕐᓗᖓ ᐃᓕᓐᓂᐊᕆᐊᒃᑲᓐᓂᓕᕐᓗᖓ. ᐊᐱᖅᓱᖅᑕᐅᓚᐅᖅᓯᒪᕗᖓ ᑯᐄᓐ ᕕᒃᑑᕆᐊ ᐃᓗᐊᖅᓴᐃᔨᓄᑦ ᑎᓕᓯᔾᔪᑎᖏᓐᓂᒃ ᐊᒻᒪ, ᖃᐅᔨᒫᓂᙱᖦᖢᖓ ᖃᓄᐃᓕᐅᕐᓂᐊᓕᕋᓗᐊᕐᒪᖔᕐᒪ, ᐃᖅᑲᓇᐃᔮᖅᑖᖅᑎᑕᐅᒋᐊᕋᒪ ᐊᖏᕈᑎᒋᓚᐅᖅᓯᒪᔭᕋ. ᓱᓕ ᑐᑭᓯᑎᑕᐅᕚᓪᓕᕐᓂᖅ ᐱᐊᓂᙱᓗᐊᓱᖔᕐᔪᒃᖢᒍ ᖃᐅᔨᓕᓚᐅᖅᐳᖓ ᕿᓂᖅᑕᓐᓂᒃ ᓇᓂᓯᓂᕐᓂᒃ. ᐃᖅᑲᓇᐃᔮᒃᓴᖅ ᐊᔪᙱᑕᕋ ᐃᖅᑲᓇᐃᔮᕆᔅᓲᔭᕐᓗᒍᓗ ᐃᓅᖃᑎᓐᓂᒃ ᐃᑲᔪᕐᓂᐊᓕᖅᑎᓪᓗᖓ, ᐅᓂᒃᑳᖏᑦ ᓈᓚᒃᐸᒡᓗᒋᑦ ᐊᓯᖏᑦᑎᒍᑦ ᑐᑭᓯᓇᓱᒋᐊᖃᙱᖦᖢᖓ ᐅᕝᕙᓘᓐᓃᑦ ᐃᑲᕐᕋᓄᑦ 12-ᓄᑦ ᐃᖅᑲᓇᐃᔭᖅᐸᓕᕐᓗᖓ ᐋᓐᓂᐊᕕᒃᓱᓐᓂᓛᕿᕙᒃᖢᖓ ᐃᖅᑲᓇᐃᔭᕐᓇᐅᔪᓐᓃᕌᖓᑦ.


ᑯᐄᓐ ᕕᒃᑑᕆᐊ ᐃᓗᐊᖅᓴᐃᔨᓄᑦ ᑎᓕᓯᔾᔪᑎᖏᑦ ᐊᑐᓚᐅᖅᐸᒃᑲ ᐅᑭᐅᓄᑦ ᑎᓴᒪᑦ ᓇᑉᐸᕐᓗ ᐃᓗᐊᖅᓴᐃᔨᑖᕈᒪᓪᓗᑎᒃ ᐃᖅᑲᓇᐃᔮᒃᓴᒥᒃ ᓴᖅᑭᑦᑐᖃᖅᑎᓪᓗᒍ ᐃᖃᓗᒃᑑᑦᑎᐊᖅ, ᓄᓇᕗᒻᒥ.  ᐃᓱᒪᓯᑲᐅᑎᒋᓚᐅᖅᓯᒪᕗᖓ ᐊᑲᐅᔪᒻᒪᕆᐊᓘᓇᓱᒋᓪᓗᒍ ᐅᕙᓐᓄᑦ ᓄᓇᓐᓄᑦ ᐅᑎᕐᓗᖓ ᐃᓗᐊᖅᓴᐃᔨᒋᔭᐅᓕᕐᓗᖓᓗ. ᐱᓇᔪᓚᐅᖅᓯᒪᕗᖓ, ᐊᐱᖅᓱᖅᑕᐅᓚᐅᖅᓯᒪᕗᖓ, ᐃᖅᑲᓇᐃᔮᖅᑖᖅᑎᑕᐅᒐᒪᓗ ᐊᖏᓚᐅᖅᖢᒍ − ᓄᓇᒋᓚᐅᖅᑕᓐᓄᑦ ᐅᑎᖅᖢᖓ ᐊᐃᑉᐸᕋ ᐱᖃᑎᒋᓪᓗᒍ ᒪᕐᕉᖕᓂᓪᓗ ᕿᒻᒥᓕᔭᖅᖢᑕ ᓄᓇᕐᔪᐊᕐᒥ ᖃᓂᒻᒪᒃᐸᓪᓕᐊᔪᑦ ᐅᓄᖅᓯᕙᓪᓕᐊᔪᒻᒪᕆᐅᑎᓪᓗᒋᑦ. ᖁᕕᐊᒋᑦᑎᐊᖏᓐᓇᖅᑕᕋ ᖃᖓᓕᒫᖅ ᓄᓇᓕᖕᓂ ᐃᓗᐊᖅᓴᐃᔨᒋᔭᐅᓕᖅᑎᓪᓗᖓ ᓄᓇᓐᓂ, ᐃᑲᔪᖅᖢᒋᑦ ᐃᓅᖃᑎᒃᑲ ᐃᑲᔪᕈᒪᕙᓚᐅᖅᑕᒃᑲ.