ᐅᖃᓚᐅᑎᓯᐅᑏᑦ

You are here

13-ᓂᒃ ᓄᑖᓂᑦ ᓄᕙᕐᔪᐊᕐᓇᖅ-19−ᒧᑦ ᐋᓐᓂᐊᓕᖅᑐᖃᖅᐳᖅ ᐊᕐᕕᐊᓂ

ᔭᓐᓄᐊᓕ 24, 2021

ᓴᖅᑭᑕᐅᑲᐅᑎᒋᔭᕆᐊᓕᒃ

13-ᓂᒃ ᓄᑖᓂᑦ ᓄᕙᕐᔪᐊᕐᓇᖅ-19−ᒧᑦ ᐋᓐᓂᐊᓕᖅᑐᖃᖅᐳᖅ ᐊᕐᕕᐊᓂ

ᐃᖃᓗᐃᑦ, ᓄᓇᕗᑦ (ᔮᓄᐊᕆ 24, 2021) ᐅᓪᓗᒥ, ᓄᓇᕗᒻᒥ 13-ᓂᒃ ᓄᕙᒃᔪᐊᕐᓇᖅ-19−ᑖᖅᑐᖃᖅᓯᒪᓕᕐᒥᔪᖅ, ᑕᒪᕐᒥᒃ ᐊᕐᕕᐊᕐᒦᖦᖢᑎᒃ. 15-ᖑᕗᑦ ᒫᓐᓇ ᓇᓗᓇᐃᖅᑕᐅᓯᒪᔪᑦ ᓄᕙᒡᔪᐊᕐᓇᒧᑦ ᓄᓇᕗᒻᒥ.

“ᐋᓐᓂᐊᓕᖅᑐᑦ ᐅᓄᖅᓯᑳᓪᓚᒃᑐᑦ ᖃᓄᐃᓕᐅᕈᑎᒋᔪᒪᓪᓗᒋᑦ ᒫᓐᓇᑲᐅᑎᒋ, ᐋᓐᓂᐊᖅᑐᓕᕆᔨᒃᑯᓐᓄᑦ ᑭᒡᓕᖃᖅᑎᑕᐅᔪᑦ ᐊᕐᕕᐊᓂ ᐱᒋᐊᖅᑎᑕᐅᒃᑲᓐᓂᖅᐳᑦ," ᓘᒃᑖᖅ ᒪᐃᑯᓪ ᐹᑐᓴᓐ ᐅᖃᖅᑐᖅ, ᓄᓇᕗᒻᒥ ᐋᓐᓂᐊᖃᕐᓇᙱᑦᑐᓕᕆᔨᒻᒪᕆᒃ. “ᐊᕐᕕᐊᓕᐊᖃᑦᑕᖅᑐᑦ ᐊᕐᕕᐊᒥᙶᖃᑦᑕᖅᑐᓪᓗ ᐊᔪᓕᖅᑎᑕᐅᕗᑦ. ᐃᓕᓐᓂᐊᕐᕖᑦ ᒪᑐᔭᐅᕗᑦ, ᑲᑎᙵᑎᑕᐅᕙᒃᑐᑦ ᑕᒪᕐᒥᑦᑎᐊᖅ ᐱᒻᒪᕆᐅᙱᑦᑐᓪᓗ ᐱᔨᑦᑎᕋᖅᑕᐅᔾᔪᑎᑦ ᓄᖅᑲᖅᑎᑕᐅᕗᑦ. ᐃᓪᓗᒥᐅᖃᑎᒌᑐᐊᑦ ᑲᑎᙵᔪᓐᓇᖅᓯᕗᑦ ᑕᓪᓕᒪᒃᑲᓐᓃᓪᓗ ᐃᓄᐃᑦ ᑲᑎᙵᖃᑕᐅᔪᓐᓇᖅᐳᑦ ᑐᐊᕕᕐᓇᖅᑐᓄᑦ ᑭᓯᐊᓂ. ᓱᓕ ᒪᑐᐊᖅᓯᒪᔭᕆᐊᖃᓪᓚᕆᒃᐳᑦ.”

ᑕᐃᒃᑯᐊ ᐃᓄᐃᑦ ᑕᒪᕐᒥᒃ ᖃᓂᒪᖅᑰᔨᙱᑦᑐᑦ, ᖃᓄᐃᙱᖦᖢᑎᒃ ᐃᓄᑑᔭᕆᐊᖃᖅᑎᑕᐅᓪᓗᑎᒡᓗ. ᑲᑎᙵᖃᑦᑕᖅᑐᑦ ᐅᓄᖅᑐᑦ ᐃᒡᓗᒥᐅᖃᑎᒌᖑᖃᑦᑕᖅᐳᑦ. ᐊᐃᑦᑐᖅᑕᐅᓯᒪᑐᐃᓐᓇᕆᐊᓖᑦ ᖃᐅᔨᓴᖅᑕᐅᖏᓐᓇᖅᐳᑦ, ᐱᓕᕆᕙᓪᓕᐊᓪᓗᑎᒡᓗ ᖃᐅᔨᓇᓱᒃᖢᑎᒃ ᖃᓂᒻᒪᒃᑐᑦ ᖃᓄᖅ ᐊᒃᑐᐊᖃᑦᑕᐅᑎᖕᒪᖔᑕ.

ᓄᓇᕗᒻᒥ ᑐᐊᕕᕐᓇᖅᑐᓕᕆᔨᑦ ᖃᕆᓴᐅᔭᒃᑯᑦ ᐃᑲᔪᖅᑐᐃᕗᑦ ᓄᓇᓕᖕᓂ ᐋᓐᓂᐊᕐᕕᐅᑉ ᐱᓕᕆᔨᖏᓐᓂᒃ ᐃᑲᔪᖅᑐᐃᒃᑲᓐᓂᕐᓂᐊᖅᑐᓂᒡᓗ ᐊᕐᕕᐊᓄᐊᖅᑐᖃᕐᓂᐊᖅᖢᓂ ᐃᑲᕐᕋᑦ 48 ᐊᑐᖅᑎᓪᓗᒋᑦ. ᑭᓇᑐᐃᓐᓇᖅ ᐊᕐᕕᐊᓄᑦ ᓂᐅᕐᕈᓚᐅᖅᑐᖅ ᐊᕐᕕᐊᓂᙶᓚᐅᖅᑐᕐᓗ ᔮᓄᐊᕆ 19-ᒥ ᐱᒋᐊᕐᓗᓂ ᐃᓄᖕᓄᑦ ᐊᒃᑐᐊᑲᑕᖁᔭᐅᙱᑦᑐᑦ ᓇᖕᒥᓂᕐᓗ−ᖃᐅᔨᓴᖁᔭᐅᓪᓗᑎᒃ ᖃᓂᒻᒪᒃᐸᓪᓕᐊᖕᒪᖔᑦ. ᐋᓐᓂᐊᕐᕕᖓᓄᑦᑕᐅᖅ ᖃᐅᔨᒋᐊᖁᔭᐅᔪᑦ ᐅᕝᕙᓘᓐᓃᑦ ᐃᖃᓗᖕᓂ ᐅᖁᒪᐃᓐᓂᕐᓂᐊᕐᕕᖓᓄᑦ, ᓄᓇᓕᐸᐅᔭᒦᑉᐸᑕ, ᐃᑲᔪᖅᑕᐅᖁᓪᓗᒋᑦ ᐊᒃᑐᖅᑕᐅᓯᒪᑐᐃᓐᓇᕆᐊᓕᖕᓂᒃ ᖃᐅᔨᓴᖅᑕᐅᑎᓪᓗᒋᑦ ᓇᐅᑦᑎᖅᓱᖅᐸᓪᓕᐊᑎᓪᓗᒋᓪᓗ.

ᓱᓕ ᓄᕙᒡᔪᐊᕐᓇᒧᑦ ᑲᐴᑎᑦ ᐊᕐᕕᐊᓂ ᐊᑐᐃᓐᓇᐅᕗᑦ. ᐋᓐᓂᐊᕕᖕᒧᑦ ᖃᐅᔨᒋᐊᕐᓗᑎᑦ ᐃᓂᒃᓴᓕᐅᕈᓐᓇᖅᐳᑎᑦ.

“ᖃᐅᔨᒪᔪᖓ ᓄᓇᕗᒻᒥᐅᑦ ᐊᒃᓱᕈᖅᖢᑎᒃ ᐱᓕᕆᖃᑦᑕᖅᓯᒪᖕᒪᑕ ᑕᐃᒪᙵᑦ ᖃᓂᒪᑲᑕᓕᓚᐅᖅᑎᓪᓗᒋᑦ, ᐱᓗᐊᖅᑐᒥ ᑕᖅᑮ ᒪᕐᕉᒃ ᐊᓂᒍᖅᑐᓂᑦ. ᑭᓯᐊᓂᓕ, ᓄᕙᒡᔪᐊᕐᓇᖅ ᑕᒪᑐᒥᖓ ᓱᖁᑕᐅᒃᓴᓗᐊᙱᒻᒪᑦ. ᓴᙱᔫᖏᓐᓇᕆᐊᖃᖅᐳᒍᑦ, ᐅᔾᔨᖅᓱᑦᑎᐊᕐᓂᖅᓴᐅᓗᑕ ᐃᒃᐱᒍᓱᑦᑎᐊᕐᓂᖅᓴᐅᓗᑕᓗ ᑕᐃᒪᙵᓂᑦ," ᓯᕗᓕᖅᑎ ᔫ ᓴᕕᑲᑖᖅ ᐅᖃᖅᑐᖅ. “ᐊᕐᕕᐊᕐᒥᐅᑦ ᑕᑯᒃᓴᐅᑎᑦᑏᓐᓇᐅᔭᖅᐳᑦ ᓴᐱᓕᖅᓴᕋᐃᙱᓐᓂᖏᓐᓂᒃ ᐋᖅᑭᒋᐊᕈᓐᓇᕐᓂᖏᓐᓂᒡᓗ. ᓄᓇᖅᑲᑎᓕᒫᒃᑲ ᐅᐱᒋᕙᒃᑲ, ᐊᐱᕆᕙᒃᑲᓗ ᐅᔾᔨᖅᓱᑦᑎᐊᕆᐊᓪᓚᒃᑲᓐᓂᖁᓪᓗᒋᑦ. ᐳᓛᕆᐊᑲᑕᙱᓪᓗᓯ ᐊᒻᒪ ᐊᖏᕐᕋᖅᓯᒪᐃᓐᓇᕐᓗᓯ ᐊᔪᕐᓇᙱᓐᓂᓕᒫᖓᓂ. ᓴᙱᓂᖃᑦᑎᐊᖁᕙᔅᓯ ᓂᕆᐅᖕᓂᖃᕐᓗᓯᓗ.”

ᑭᓇᑐᐃᓐᓇᖅ ᐊᐃᑦᑐᖅᑕᐅᓯᒪᓇᓱᒋᒃᐸᑦ ᓄᕙᒡᔪᐊᕐᓇᖅ-19−ᓕᖕᒧᑦ ᐅᖄᓚᖁᔭᐅᕗᖅ ᓄᕙᒡᔪᐊᕐᓇᖅ−19 ᐅᖄᓚᕝᕕᖓᓄᑦ ᐅᕗᖓ 1-888-975-8601 10:00−ᒥᑦ ᐅᓪᓛᒃᑯᑦ ᐱᒋᐊᕐᓗᓂ 6:00−ᒧᐊᕋᓱᖕᓂᖓᓄᑦ ᐅᓐᓄᒃᑯᑦ. ᕿᑭᖅᑖᓗᖕᒥᐅᑦ ᖃᐅᔨᓴᐅᑎᖓᒍᑦ, ᑐᓴᖅᑎᑦᑎᑲᐅᑎᒋᓗᓂᓘᓐᓃᑦ ᓄᓇᓕᖕᓂ ᐋᓐᓂᐊᕕᖓᓂ, ᐃᒡᓗᒥᓂᓪᓗ ᐊᓂᑦᑕᐃᓕᒪᓯᑲᐅᑎᒋᓗᓂ ᐅᓪᓗᓄᑦ 14−ᓄᑦ. ᐋᓐᓂᐊᕕᓕᐊᖅᑕᐃᓕᓗᑎᑦ ᓇᖕᒥᓂᖅ.

ᓄᑖᖑᓛᑦ ᑐᓴᒐᒃᓴᑦ ᑕᑯᔪᒪᒍᕕᒋᑦ, ᐅᑯᐊᓗ ᖃᔅᓯᐅᓂᖏᑦ ᐊᓂᒍᐃᔪᑦ ᐊᒻᒪ ᓇᓗᓇᐃᖅᑕᐅᓯᒪᔪᑦ ᐱᖃᕐᓂᖏᓐᓂ ᓄᓇᓕᒃᑎᒍᑦ, ᐅᕗᙵᕐᓗᑎᑦ:

https://www.gov.nu.ca/health/information/covid-19-novel-coronavirus. 

ᓄᑖᖑᓛᑦ ᑐᓴᒐᒃᓴᑦ ᑕᑯᔪᒪᒍᕕᒋᑦ ᒫᓐᓇᓗ ᐋᓐᓂᐊᖅᑐᓕᕆᔨᒃᑯᓐᓂ ᑭᒡᓕᖃᖅᑎᑕᐅᔪᑦ, ᐅᕗᙵᕐᓗᓯ: https://www.gov.nu.ca/health/information/nunavuts-path 

ᓄᑖᖑᓛᑦ ᑐᓴᒐᒃᓴᐃᑦ ᑕᑯᔪᒪᒍᕕᒋᑦ ᓄᓇᕗᒻᒥ ᓄᕙᒡᔪᐊᕐᓇᖅ−19 ᐋᓐᓂᐊᓕᕇᒃᑯᑎᒧᑦ ᐱᓕᕆᐊᖑᔪᓄᑦ, ᐅᕗᙵᕐᓗᑎᑦ www.gov.nu.ca/health/information/covid-19-vaccination

ᓄᑖᙳᕆᐊᖅᓯᒪᔪᓂᒃ ᓴᖅᑭᑎᑦᑎᓂᐊᖅᐳᑦ ᐱᕙᓪᓕᐊᔪᓂᑦ ᑐᓴᖅᑎᑦᑎᔪᖃᓕᖅᐸᑦ ᖃᐅᒃᐸᑦ ᓇᒡᒐᔾᔭᒥ, ᔮᓄᐊᕆ 25. ᖃᐅᔨᓴᐅᑦ ᖃᔅᓯᒧᐊᖅᐸᑦ ᐊᒻᒪ ᐱᕙᓪᓕᐊᔪᑦ ᐃᓗᓕᖏᑦ ᐅᖃᐅᓯᐅᓂᐊᖅᐳᑦ ᓯᕗᓂᐊᒍᑦ.

###

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:

ᑲᐃᑦ ᒪᒡᓚᐅᑦ
ᐱᕙᓪᓕᐊᔪᓄᑦ ᑎᑎᕋᖅᑎ ᓯᕗᓕᖅᑎ ᓴᕕᑲᑖᕐᒧᑦ
867-975-5059
cmacleod@gov.nu.ca 

ᑯᕆᔅ ᐴᒡᓕᐊ
ᐊᐅᓚᑦᑎᔨᐅᑲᐃᓐᓇᖅᑐᖅ, ᑐᓴᐅᒪᔪᓕᕆᔨᓄᑦ
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ
867-975-5949
cpuglia@gov.nu.ca