ᐅᖃᓚᐅᑎᓯᐅᑏᑦ

You are here

ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᒪᓕᒃᑕᐅᔭᕆᐊᓕᑦ ᖃᓱᔭᐅᕚᓪᓕᖅᑐᑦ ᓴᓪᓕᕐᓂ

ᓄᕕᐱᕆ 19, 2021

ᐱᕙᓪᓕᐊᔪᑦ ᓴᖅᑭᑕᐅᔪᑦ

ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᒪᓕᒃᑕᐅᔭᕆᐊᓕᑦ ᖃᓱᔭᐅᕚᓪᓕᖅᑐᑦ ᓴᓪᓕᕐᓂ

ᐃᖃᓗᐃᑦ, ᓄᓇᕗᑦ (ᓄᕕᐱᕆ 19, 2021) − ᓘᒃᑖᖅ ᒪᐃᑯᓪ ᐹᑐᓴᓐ, ᓄᓇᕗᒻᒥ ᐋᓐᓂᐊᖃᕐᓇᙱᑦᑐᓕᕆᔨᒻᒪᕆᒃ, ᐅᓪᓗᒥ ᑐᓴᖅᑎᑦᑎᖅᑲᐅᕗᖅ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᒪᓕᒃᑕᐅᔭᕆᐊᓕᑦ ᖃᓱᔭᐅᕚᓪᓕᖅᓯᒪᓕᕐᒪᑕ ᓴᓪᓕᕐᓂ.

"ᓴᓪᓕᕐᓂ ᓱᓕ ᓄᕙᕐᔪᐊᕐᓇᖅ-19−ᑖᖅᓯᒪᔪᖃᙱᒻᒪᑦ," ᐅᖃᖅᑐᖅ ᓘᒃᑖᖅ ᐹᑐᓴᓐ. "ᓄᓇᓕᖕᓂ ᑕᖅᑭᓕᒫᖅ ᐅᖓᑖᓂ ᓄᕙᕐᔪᐊᖅᑐᖃᙲᓐᓇᓕᖅᐳᖅ ᐊᒻᒪ ᑕᐃᒃᑯᐊ ᐃᓄᑐᐊᒃᑯᕕᖕᒦᑦᑕᕆᐊᖃᓚᐅᖅᑐᑦ ᓄᕙᕐᔪᐊᕐᓇᖅ ᐱᔾᔪᑎᒋᓪᓗᒍ ᐊᓂᒍᐃᓯᒪᔪᐃᓐᓇᐅᓕᖅᖢᑎᒃ. ᑕᒪᓐᓇ ᐱᔾᔪᑎᒋᓪᓗᒍ, ᐊᑦᑕᕐᓇᕈᓐᓃᖅᐳᖅ ᑭᒡᓕᖃᖅᑎᑕᐅᔪᑦ ᖃᓱᕚᓪᓕᖅᑎᑕᐅᒐᓗᐊᕈᑎᒃ ᓄᓇᓕᖕᓂ. ᑭᒃᑯᓕᒫᑦ ᐃᖅᑲᐃᓯᔪᒪᕙᒃᑲ ᒪᑐᐊᖅᓯᒪᔭᕆᐊᖃᓪᓚᕆᖕᒪᑕ ᓄᓇᓕᓕᒫᓂᑦ.”

ᐃᖅᑲᐃᓯᔪᒪᒋᓪᓗᒋᑦ, ᐃᓕᓐᓂᐊᕐᕖᑦ ᐸᐃᕆᕝᕖᓪᓗ ᒪᑐᐃᖓᕗᑦ. ᒫᓐᓇᑲᐅᑎᒋ ᐱᒋᐊᕐᓗᓂ:

  • ᓯᓚᒥ ᑲᑎᙵᔪᑦ ᐅᓄᖅᓯᒋᐊᕐᓗᑎᒃ 100−ᓄᑦ ᐃᓄᖕᓄᑦ.
  • ᐃᓘᑉ ᐃᓗᐊᓂ ᑲᑎᙵᔪᑦ ᐅᓄᖅᓯᒋᐊᕐᓗᑎᒃ 15−ᓄᑦ ᐃᓄᖕᓄᑦ, ᐃᒡᓗᒥᐅᖃᑕᐅᔪᑦ ᐃᓚᐅᓗᑎᒃ.
  • ᐃᓄᒋᐊᒃᑐᒃᑯᕕᑦ ᐃᓗᐊᓂ, ᐃᓚᐅᓪᓗᑎᒃ ᑲᑎᒪᕕᑦ ᐱᙳᐊᕐᕕᑦ ᐅᓄᖅᓯᒋᐊᕐᓗᑎᒃ 50−ᓄᑦ ᐃᓄᖕᓄᑦ ᐃᓄᒋᐊᒍᓐᓇᕐᓂᖓᑕ 50 ᐳᓴᖓᓂᓘᓐᓃᑦ.
  • ᐅᖃᓕᒫᒐᖃᕐᕕᑦ, ᑕᑯᔭᒐᖃᕐᕕᑦ ᓱᓕ 25−ᖑᔭᕆᐊᖃᖅᐳᑦ ᐃᓄᐃᑦ ᐅᕝᕙᓘᓐᓃᑦ ᐃᓄᒋᐊᒍᓐᓇᕐᓂᖓᑕ 50−ᐳᓴᖓᓂ, ᑭᓯᐊᓂ ᐳᓚᕋᖅᑎᑦ ᑲᑎᙵᔪᑦ ᓱᓕ ᖁᓕᐅᔪᓐᓇᕐᓂᐊᖅᐳᑦ.
  • ᕿᑎᒡᕖᑦ, ᐃᖃᐃᓕᓴᕐᕖᑦ ᓱᓕ 25−ᖑᔭᕆᐊᖃᖅᐳᑦ ᐃᓄᐃᑦ ᐅᕝᕙᓘᓐᓃᑦ ᐃᓄᒋᐊᒍᓐᓇᕐᓂᖓᑕ 50−ᐳᓴᖓᓂ, ᑭᓯᐊᓂ ᐱᓕᕆᖃᑎᒌᒃᑐᑦ ᓱᓕ ᖁᓕᐅᔪᓐᓇᕐᓂᐊᖅᐳᑦ ᐃᓄᐃᑦ.
  • ᑐᒃᓯᐊᕐᕖᑦ ᐅᓄᖅᓯᒋᐊᖅᑎᑕᐅᔪᑦ 50−ᐅᔪᓐᓇᖅᓯᓪᓗᑎᒃ ᐃᓄᐃᑦ ᐅᕝᕙᓘᓐᓃᑦ ᐃᓐᓄᒍᓐᓇᕐᓂᖓᑕ 50−ᐳᓴᖓᓂ, ᐃᙱᕆᐊᖃᙱᑦᑐᑦ.
  • ᓯᐊᕐᕆᔮᕐᕖᑦ ᓱᓕ 50−ᐅᔭᕆᐊᖃᖅᐳᑦ ᐃᓄᐃᑦ ᐅᕝᕙᓘᓐᓃᑦ ᐃᓄᒋᐊᒍᓐᓇᕐᓂᖓᑕ 50−ᐳᓴᖓᓂ ᐊᒻᒪᓗ 50−ᐅᔪᓐᓇᖅᖢᑎᒃ ᖁᙱᐊᕆᐊᖅᓯᒪᔪᑦ, ᐱᙳᐊᖅᑎᐅᖃᑎᒌᑦ ᑲᔪᓯᔪᓐᓇᖅᑐᑦ.
  • ᓂᕆᕝᕖᑦ ᐱᔪᓐᓇᐅᑎᖃᖅᑎᑕᐅᔪᓪᓗ 50 ᐳᓴᓐᒥ ᐃᓄᖃᕈᓐᓇᖅᓯᕗᑦ. ᐅᓄᓛᖑᓗᒍ ᐊᕐᕕᓂᓖᑦ ᐃᓄᐃᑦ ᐊᑐᓂ ᑭᐳᒦᑦᑐᓐᓇᖅᑐᑦ.
  • ᐃᓅᓯᓕᕆᓂᕐᒧᑦ ᑲᑎᙵᔪᑦ ᐊᕙᑎᐅᔪᓐᓇᖅᓯᔪᑦ ᐃᓄᐃᑦ.
  • ᑲᒪᒋᔭᐅᖏᓐᓇᕆᐊᖃᖅᑐᒃᑯᕖᑦ ᐊᒻᒪᓗ ᐃᓐᓇᒃᑯᕖᑦ ᒪᕐᕉᖕᓂᒃ ᐳᓛᖅᑎᖃᕈᓐᓇᖅᑐᑦ, ᒪᑐᐊᖅᓯᒪᐃᓐᓇᕆᐊᖃᖅᑐᑦ. ᖃᑕᙳᑎᒌᑐᐊᑦ ᑭᓯᐊᓂ.
  • ᒥᕐᙳᐃᖅᓯᕐᕖᑦ ᐊᒻᒪ ᓄᑕᖅᑲᑦ ᑎᓱᕋᕐᕕᖏᑦ ᐅᒃᑯᐃᖓᔪᓐᓇᖅᑐᑦ.

ᑭᓇᑐᐃᓐᓇᖅ ᓄᕙᕐᔪᐊᕐᓇᖅ-19−ᒧᑦ ᖃᓂᒪᑲᑕᓕᕈᓂ ᐅᖄᓚᖁᔭᐅᕗᖅ ᓄᕙᕐᔪᐊᕐᓇᖅ−19 ᐅᖄᓚᕝᕕᖓᓄᑦ. 1-888-975-8601−ᒧᑦ 10−ᒥ ᐅᓪᓛᒃᑯᑦ ᐱᒋᐊᕐᓗᓂ 6−ᒧᐊᕋᓱᖕᓂᖓᓄᑦ ᐅᓐᓄᒃᑯᑦ ᑲᓇᖕᓇᐅᑉ ᖃᐅᔨᓴᐅᑎᖓ ᒪᓕᒡᓗᒍ ᐅᕝᕙᓘᓐᓃᑦ ᐋᓐᓂᐊᕐᕕᖕᒥᓄᑦ ᑐᓴᖅᑎᑦᑎᑲᐅᑎᒋᓗᓂ ᐅᖃᓘᑎᒃᑯᑦ. ᓇᖕᒥᓂᖅ ᐋᓐᓂᐊᕕᓕᐊᖅᑕᐃᓕᒋᑦ.

ᓄᕙᕐᔪᐊᕐᓇᖅ-19 ᑲᐴᑎᑦ ᐊᒻᒪ ᐋᓐᓂᐊᓕᕇᒃᑯᑎᒃᑲᓐᓃᑦ ᐊᑐᐃᓐᓇᐅᕗᑦ ᓄᓇᕗᒻᒥᐅᓕᒫᓄᑦ 12-ᒥ ᐅᖓᑖᓄᓪᓗ ᐅᑭᐅᓕᖕᓄᑦ. ᐋᓐᓂᐊᕐᕕᓯᓐᓄᑦ ᖃᐅᔨᒋᐊᕐᓗᑎᑦ ᐃᓂᒃᓴᓕᐅᕈᒪᒍᕕᑦ. ᐃᖃᓗᐃᑦ ᐅᖁᒪᐃᓐᓂᕐᓂᐊᕕᖓ ᑲᐱᔭᐅᔭᖅᑐᕈᓐᓇᖅᐳᑦ ᐃᓯᑐᐃᓐᓇᕐᓗᑎᒃ ᕙᐃᓱᒧ (Pfizer) (ᐊᕌᒍᓖᑦ 12-ᒥ 17-ᒧ) ᐱᖓᔪᐊᓂ 9:30-ᒥ ᐅᓪᓛᒃᑯᑦ 11:30-ᒧᑦ ᐊᒻᒪᓗ 1:15 ᐅᓐᓄᓴᒃᑯᑦ 4:30-ᒧᑦ ᐅᓐᓄᓴᒃᑯᑦ ᐃᓯᑐᐃᓐᓇᕐᓗᓂ ᒪᑑᓇᒧ (Moderna) (18-ᓂ ᐅᖓᑖᓄ ᐊᕌᒍᓖᑦ) ᑲᐱᔭᐅᖃᑦᑕᖅᐳᑦ ᓇᒡᒐᔾᔭᒥ ᐅᓪᓗᑐᐃᓐᓇᕐᒧᑦ 9:30-ᒥ ᐅᓪᓛᒃᑯᑦ 11:30-ᒧᑦ ᐊᒻᒪᓗ 1:15 ᐅᓐᓄᓴᒃᑯᑦ 4:30-ᒧᑦ.

ᓄᑖᙳᓛᒥᒃ ᑐᓴᒐᒃᓴᓂᒃ ᑕᑯᔪᒪᒍᕕᑦ ᓄᕙᒡᔪᐊᕐᓇᖅ-19 ᒥᒃᓵᓄᑦ ᓄᓇᕗᒻᒥ, ᐅᕗᙵᕐᓗᑎᑦ: https://www.gov.nu.ca/

###

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:

ᑯᕆᔅ ᐴᒡᓕᐊ
ᐊᐅᓚᑦᑎᔨᐅᑲᐃᓐᓇᖅᑐᖅ, ᑐᓴᐅᒪᔪᓕᕆᔨᓄᑦ
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ
867-975-5949
cpuglia@gov.nu.ca