ᐅᖃᓚᐅᑎᓯᐅᑏᑦ

You are here

ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᒪᓕᖁᔭᐅᔪᑦ ᐊᒃᓱᕉᑕᐅᓗᐊᕌᓗᒍᓐᓃᖅᑐᑦ ᐃᖃᓗᖕᓂ

ᔫᓂ 29, 2021

ᐱᕙᓪᓕᐊᔪᑦ ᓴᖅᑭᑕᐅᔪᑦ

ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᒪᓕᖁᔭᐅᔪᑦ ᐊᒃᓱᕉᑕᐅᓗᐊᕌᓗᒍᓐᓃᖅᑐᑦ ᐃᖃᓗᖕᓂ

ᓄᓇᕗᑦ (ᔫᓂ 29, 2021) - ᐅᓪᓗᒥ, ᓘᒃᑖᖅ ᒪᐃᑯᓪ ᐹᑐᓴᓐ, ᓄᓇᕗᒻᒥ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᖓᔪᖅᑳᖓᑦ, ᑐᓴᖅᑎᑦᑎᖅᑲᐅᕗᖅ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᒪᓕᒋᐊᖃᖅᑎᑕᐅᔪᑦ ᐊᒃᓱᕉᑕᐅᓗᐊᔾᔮᕈᓐᓃᕐᓂᖏᓐᓂᒃ ᐃᖃᓗᖕᓂ, ᐱᒋᐊᕐᓗᒍ ᐅᓪᓗᑐᐃᓐᓇᖅ, ᔪᓚᐃ 2, 2021.

"ᐅᓪᓗᑐᐃᓐᓇᐅᓕᖅᐸᑦ, ᐱᓇᓱᐊᕈᓯᓕᒫᑉ ᐅᖓᑖᓅᕐᓂᐊᓕᕐᒪᑦ ᑕᐃᒪᙵᑦ ᓄᕙᒡᔪᐊᕐᓇᖅ-19−ᖃᖅᑐᖃᓚᐅᖅᑎᓪᓗᒍ ᐃᖃᓗᖕᓂ, ᐅᖃᓚᐅᖅᐳᖅ ᓘᒃᑖᖅ ᐹᑐᓴᓐ. "ᐊᑦᑕᕐᓇᓗᐊᕐᓂᖓ ᖃᐅᔨᓴᖅᑕᐅᕌᓪᓚᓚᐅᖅᑎᓪᓗᒍ, ᐊᑦᑕᕐᓇᕈᓐᓃᕐᒪᑦ ᐊᒃᓱᕉᑎᖃᓗᐊᕈᓐᓃᕋᓗᐊᖅᐸᑕ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᒪᓕᒋᐊᖃᖅᑎᑕᓂᒃ ᓄᓇᓕᐸᐅᔭᕐᒥ."

ᐱᒋᐊᖅᖢᒍ 12:01 ᐅᓐᓄᐊᒃᑯᑦ, ᔪᓚᐃ 2:

  • ᖃᖓᑕᓲᒃᑯᑦ ᓄᒃᑕᖅᐸᒃᑐᑦ ᐃᖃᓗᖕᓄᙵᐅᔪᑦ ᐃᖃᓗᖕᓂᙶᖅᑐᓪᓗ ᓇᐅᑦᑎᖅᓱᖅᑕᐅᓗᐊᕌᓗᔾᔮᔪᓐᓃᖅᑐᑦ.
  • ᐊᓂᑦᑕᐃᓕᒪᑲᑕᔾᔮᔪᓐᓃᖅᖢᑎᒡᓗ ᑕᐃᒃᑯᐊ ᐃᖃᓗᖕᓂᙶᖅᑐᑦ.
  • ᓂᕆᔭᖅᑐᕐᕖᑦ ᐊᒻᒪ ᓚᐃᓴᓐᓯᖃᖅᑐᑦ ᑭᓱᓕᕆᕝᕖᑦ ᒪᒃᐱᑐᐃᓐᓇᕆᐊᖃᖅᐳᑦ 25−ᓂᒃ ᐃᓄᖃᕈᓐᓇᕐᓗᑎᒃ ᐅᕝᕙᓘᓐᓃᑦ 25% ᐃᓐᓄᒍᓐᓇᕐᓂᕆᔭᖓ, ᓇᓕᐊᑐᐃᓐᓇᖅ ᐅᓄᙱᓐᓂᖅᓴᑦ ᒪᓕᒃᑕᐅᓇᔭᖅᖢᑎᒃ. ᐃᙱᑲᑕᒋᐊᖃᙱᑦᑐᑦ ᐊᒻᒪ ᒧᒥᑲᑕᒋᐊᖃᙱᑦᑐᑦ.
  • ᑕᕐᕆᔭᕐᕕᒃ ᒪᒃᐱᑐᐃᓐᓇᕆᐊᖃᖅᐳᖅ 25−ᓄᑦ ᐃᓄᖕᓄᑦ ᐅᕝᕙᓘᓐᓃᑦ 25%−ᒥ ᐃᓐᓄᒍᓐᓇᕐᓂᕆᔭᖓ, ᓇᓕᐊᑐᐃᓐᓇᖅ ᐅᓄᙱᓐᓂᖅᓴᑦ ᒪᓕᒃᑕᐅᓇᔭᖅᖢᓂ.
  • ᐃᓘᑉ ᐃᓗᐊᓂ ᑲᑎᙵᔪᑦ ᐅᓄᖅᓯᒋᐊᕐᓗᑎᒃ ᖁᓕᓄᑦ ᐃᓄᖕᓄᑦ ᐃᒡᓗᒥᐅᖃᑕᐅᔪᑦ ᐃᓚᐅᓗᑎᒃ.
  • ᐃᒡᓘᑉ ᐃᓗᐊᓂ ᑲᑎᙵᖃᑦᑕᖅᑐᑦ 50 ᐅᖓᑖᓃᑦᑕᕆᐊᖃᙱᑉᐳᑦ ᐅᕝᕙᓘᓐᓃᑦ 50-ᐳᓴᓐ ᐃᓐᓄᒍᓐᓇᕐᓂᖓ, ᓇᓕᐊᑐᐃᓐᓇᖅ ᐅᓄᙱᓐᓂᖅᓴᖅ ᒪᓕᒃᑕᐅᓇᔭᖅᖢᓂ.
  • ᓯᓚᒥ ᑲᑎᙵᔪᑦ ᐅᓄᖅᓯᒋᐊᕐᓗᑎᒃ 50−ᓄᑦ ᐃᓄᖕᓄᑦ.
  • ᐃᖃᐃᓕᓴᕐᕕᖕᒥ ᐃᓐᓄᒍᓐᓇᕐᓂᕆᔭᐅᔪᖅ ᐃᖃᐃᓕᓴᕆᐊᖅᓯᒪᔪᓄᑦ 25−ᓂᒃ ᐃᓄᖕᓂᒃ ᐃᓚᒋᐊᖅᑕᐅᔪᓐᓇᖅᓯᓪᓗᑎᒃ ᐅᕝᕙᓘᓐᓃᑦ 50% ᐃᓐᓄᒍᓐᓇᕐᓂᕆᔭᖓ, ᓇᓕᐊᑐᐃᓐᓇᖅ ᐅᓄᙱᓐᓂᖅᓴᖅ ᒪᓕᒃᑕᐅᓇᔭᖅᖢᓂ.
  • ᐳᐃᔾᔪᕌᕐᕖᑦ ᒪᒃᐱᑐᐃᓐᓇᕆᐊᖃᖅᐳᑦ 25-ᓂᒃ ᐃᓄᖃᕈᓐᓇᕐᓗᓂ ᐅᕝᕙᓘᓐᓃᑦ 50%−ᖑᓗᑎᒃ ᐃᓯᕈᓐᓇᖅᑐᑦ, ᓇᓕᐊᑐᐃᓐᓇᖅ ᐅᓄᙱᓐᓂᖅᓴᖅ ᒪᓕᒃᑕᐅᓇᔭᖅᖢᓂ.
  • ᐅᖃᓕᒫᒐᖃᕐᕖᑦ, ᑕᑯᔭᒐᖃᕐᕖᑦ, ᐅᒃᑯᐃᕈᓐᓇᖅᑐᑦ ᐃᓄᖃᕐᓗᑎᒃ 25−ᓂ ᐅᕝᕙᓘᓐᓃᑦ 50 ᐳᓴᓐᑎ ᐃᓄᒋᐊᒍᓐᓇᕐᓂᖓ, ᓇᓕᐊᒃ ᐅᓄᙱᓐᓂᖅᓴᐅᑐᐊᖅᐸᑦ.
  • ᓯᐊᕐᕆᔮᕐᕕᖕᒥ ᐃᓐᓄᒍᓐᓇᕐᓂᕆᔭᖓ ᐅᓄᖅᓯᒋᐊᕈᓐᓇᕐᓗᑎᒃ 50-ᓂᒃ ᐃᓄᖕᓂᒃ ᐅᕝᕙᓘᓐᓃᑦ 50% ᐃᓐᓄᒍᓐᓇᕐᓂᕆᔭᖓ, ᓇᓕᐊᑐᐃᓐᓇᖅ ᐅᓄᙱᓐᓂᖅᓴᐅᑐᐊᖅᐸᑦ, ᐊᒻᒪᓗ ᐅᓄᓛᖃᕐᓗᑎᒃ 50−ᓂᒃ ᖁᙱᐊᕆᐊᖅᑐᖅᑐᓂᒃ.
  • ᐃᖃᓗᖕᓂ ᐊᑯᓂᐅᔪᒃᑯᑦ ᑲᒪᒋᔭᐅᖏᓐᓇᖅᑐᒃᑯᕕᖕᒧᑦ ᐳᓛᕆᐊᕈᒪᔪᑦ ᐳᓛᕆᐊᕈᓐᓇᖅᓯᓗᑎᒃ ᐃᓚᒥᓄᑦ, ᒪᒃᐱᒃᑲᓐᓂᖅᐸᑦ.
  • ᒪᑐᐊᖅᓯᒪᐃᓐᓇᕆᐊᖃᖅᑐᑦ ᑭᓯᐊᓂ, ᑭᓯᐊᓂ ᓂᕆᓕᕌᖓᑕ ᐅᕝᕙᓘᓐᓃᑦ ᐃᒥᓕᕌᖓᑕ.

ᑐᑭᓯᒋᐊᒃᑲᓐᓂᕈᒪᒍᔅᓯ ᐊᑐᐃᓐᓇᐅᖃᑦᑕᕐᓂᐊᖅᑐᑦ ᐱᕙᓪᓕᐊᔪᓂᒃ ᓄᑖᙳᕆᐊᖅᓯᒪᔪᑦ ᐱᖓᑦᓯᕐᒥ, ᔫᓂ 30, 11:00-ᒧᐊᖅᐸᑦ ᐅᓪᓛᒃᑯᑦ.

ᑭᓇᑐᐃᓐᓇᖅ ᐅᐸᒍᑎᓯᒪᓚᐅᕋᓱᒋᔪᖅ ᓄᕙᒡᔪᐊᕐᓇᖅ-19−ᓕᖕᒧᑦ ᐅᖄᓚᖁᔭᐅᕗᑦ ᓄᕙᒡᔪᐊᕐᓇᒧᑦ ᐅᖄᓚᕝᕕᖕᒧᑦ, 1-888-975-8601−ᒧᑦ 10−ᒥᑦ ᐅᓪᓛᒃᑯᑦ 6−ᒧᑦ ᑎᑭᓪᓗᒍ ᐅᓐᓄᒃᑯᑦ ᑲᓇᖕᓇᒥ, ᑐᓴᖅᑎᑦᑎᑲᐅᑎᒋᓗᑎᒡᓘᓐᓃᑦ ᓄᓇᓕᖕᓂ ᐋᓐᓂᐊᕕᖓᓄᑦ, ᐊᓂᑦᑕᐃᓕᓯᑲᐅᑎᒋᓗᑎᒡᓗ ᐊᖏᕐᕋᒥᓂ ᐅᓪᓗᓄᑦ 14-ᓄᑦ. ᐋᓐᓂᐊᕕᓕᐊᖅᑕᐃᓕᒋᑦ.

ᓄᑖᖑᓛᑦ ᑐᓴᒐᒃᓴᑦ ᑕᑯᔪᒪᒍᕕᒋᑦ, ᐅᑯᐊᓗ ᖃᔅᓯᐅᓂᖏᑦ ᐊᓂᒍᐃᔪᑦ ᐊᒻᒪ ᓇᓗᓇᐃᖅᑕᐅᓯᒪᔪᑦ ᐱᖃᕐᓂᖏᓐᓂ ᓄᓇᓕᒃᑎᒍᑦ, ᐅᕗᙵᕐᓗᑎᑦ: https://www.gov.nu.ca

###

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:

ᑯᕆᔅ ᐴᒡᓕᐊ
ᐊᐅᓚᑦᑎᔨᐅᓚᐅᑲᒃᑐᖅ ᑐᓴᐅᒪᔪᓕᕆᔨᒃᑯᓐᓂ
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ
867-975-5949
cpuglia@gov.nu.ca