ᐅᖃᓚᐅᑎᓯᐅᑏᑦ

You are here

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᖓᔪᖅᑳᖓᑦ ᑭᐅᕗᖅ ᐊᖅᓴᕐᓃᑦ ᐃᓕᓐᓂᐊᕐᕕᖕᒥ ᐋᓐᓂᐊᓕᓚᐅᖅᑐᑦ ᐱᔾᔪᑎᒋᓪᓗᒋᑦ

ᔫᓂ 13, 2021

ᐅᖃᐅᓯᐅᔪᖅ

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᖓᔪᖅᑳᖓᑦ ᑭᐅᕗᖅ ᐊᖅᓴᕐᓃᑦ ᐃᓕᓐᓂᐊᕐᕕᖕᒥ ᐋᓐᓂᐊᓕᓚᐅᖅᑐᑦ ᐱᔾᔪᑎᒋᓪᓗᒋᑦ

ᐃᖃᓗᐃᑦ, ᓄᓇᕗᑦ (ᔫᓂ 13, 2021) − ᓘᒃᑖᖅ ᒪᐃᑯᓪ ᐹᑐᓴᓐ, ᓄᓇᕗᒻᒥᐅ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᖓᔪᖅᑳᖓᑦ ᐅᓪᓗᒥ ᐅᑯᓂᖓ ᓴᖅᑭᑦᑎᖅᑲᐅᕗᖅ:

“ᐱᓇᓱᐊᕈᓯᐅᑉ ᓄᕐᖑᐊᓂ, ᖃᐅᔨᓚᐅᕋᑦᑕ ᒪᕐᕉᖕᓂᒃ ᐃᓅᖕᓂᒃ ᓄᕙᒡᔪᐊᕐᓇᖅ-19−ᑖᖅᓯᒪᔫᖕᓂᒃ ᐊᖅᓴᕐᓃᑦ ᐃᓕᓐᓂᐊᕐᕕᖕᒥᙶᓚᐅᖅᑑᖕᓂ ᐃᖃᓗᖕᓂ. ᐅᑯᐊᒃ ᐃᓅᒃ ᐃᓕᓐᓂᐊᖅᑎᓂᒃ B−ᒥᖃᑕᐅᓚᐅᖅᑐᑦ, ᐃᓕᓐᓂᐊᕐᕕᖕᒦᓚᐅᖅᖢᑎᒡᓗ ᓇᒡᒐᔾᔭᐅ, ᔫᓂ 7−ᒥ ᐊᒻᒪ ᐱᖓᔪᐊᑦ, ᔫᓂ 9−ᒥ. ᒪᑐᐊᖅᓯᒪᓚᐅᖅᑑᒐᓗᐊᒃ, ᒪᓕᒃᖢᒍ ᐋᓐᓂᐊᕕᖕᒥ ᒪᓕᒐᓕᐊᖑᓯᒪᔪᖅ ᐃᓕᓐᓂᐊᕐᓇᐅᑎᓪᓗᒍ ᑖᒃᑯᓄᖓ.

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐱᓕᕆᕐᔪᐊᖅᓯᒪᔪᑦ ᖃᐅᔨᓇᓱᒃᖢᑎᒃ ᐊᑦᑕᕐᓇᑐᐃᓐᓇᕆᐊᓕᖕᓂᓪᓗ ᓯᐊᒻᒪᒃᑎᖅᑕᐅᑐᐃᓐᓇᕆᐊᓕᖕᓂᒃ ᖃᓂᒻᒪᓯᕐᒥᒃ. ᐱᓕᕆᖃᑎᒋᓪᓗᒋᑦ ᐃᓕᓐᓂᐊᖅᑐᓕᕆᔨᒃᑯᑦ, ᖃᐅᔨᓯᒪᓕᖅᑐᒍᑦ ᐊᖅᓴᕐᓃᑦ ᐃᓕᓐᓂᐊᕐᕕᒃ ᒪᒃᐱᖅᓯᒪᐃᓐᓇᕈᓐᓇᕐᓂᖓᓂᒃ ᓇᒡᒐᔾᔭᐅᒥ, ᔫᓂ 14−ᒥ ᐃᓕᓐᓂᐊᖃᑎᒌᑦ A ᐃᓕᓐᓂᐊᖅᑎᓄᑦ. ᐊᓪᓚᕐᕕᐅᕌᕐᔪᒡᓗᑎᒃ ᐃᓕᓐᓂᐊᕐᕕᐊᕈᓯᕐᒦᑦᑐᑦ ᖃᐅᔨᒋᐊᕐᕕᐅᔪᓪᓗ ᑖᒃᑯᓇᙵᑦ ᐱᔾᔪᑕᐅᔫᖕᓂᑦ ᐃᓕᓐᓂᐊᖃᑎᒌᑦ B−ᒦᑦᑐᑦ ᖃᐅᒃᐸᑦ ᖃᐅᔨᓴᖅᑕᐅᓛᖅᑐᑦ, ᖃᐅᔨᓴᕈᑕᐅᔪᑦ ᐅᓪᓘᑉ ᐃᓚᖓᓐᓂ ᖃᐅᔨᓇᖅᓯᓗᑎᒃ. ᐃᓕᓐᓂᐊᕐᕕᖕᒥ ᒪᓂᒪᔪᐃᓐᓇᓕᒫᑦ ᐊᓪᓚᕈᔾᔭᑯᓗᐃᑦ ᐅᑎᖅᐸᑕ ᑕᒪᕐᒥᒡᓗ ᓄᕙᒡᔪᐊᕐᓇᙱᓐᓂᕋᐃᓗᑎᒃ, ᐃᓕᓐᓂᐊᖃᑎᒌᑦ B−ᒥ ᐃᓕᓐᓂᐊᕐᕕᖕᒧᑦ ᐅᑎᕈᓐᓇᓛᖅᑐᑦ ᐊᐃᑉᐱᕐᒥ. ᓇᓕᐊᑐᐃᓐᓇᖅ ᖃᐅᔨᓴᖅᑕᐅᔾᔪᑎᑦ ᐅᑎᖅᐸᑕ ᓇᒡᒐᔾᔭᒥ ᓄᕙᒡᔪᐊᕐᓇᕐᓂᕋᐃᓗᑎᒡᓗ, ᖃᐅᔨᓴᒃᑲᓐᓂᓛᖅᑕᕗᑦ ᐃᓕᓐᓂᐊᕐᕕᒃ ᒪᒃᐱᒃᑲᓐᓂᕈᓐᓇᓛᕐᒪᖔᑦ ᐊᐃᑉᐹᓂ.

ᒫᓐᓇᒃᑯᑦ, ᐊᑦᑕᕐᓇᕐᓂᖓ ᐊᑦᑎᒃᑐᒦᓐᓇᓱᒋᔭᐅᔪᖅ ᐃᖃᓗᖕᓂᑦ ᐊᓯᖏᓐᓂᒃ ᐃᓕᓐᓂᐊᕐᕕᖕᓂ ᐊᑐᓕᖁᔨᕗᒍᓪᓗ ᒪᒃᐱᖅᓯᒪᐃᓐᓇᖁᓪᓗᒋᑦ ᓇᓃᓐᓂᖓ 3-ᒦᑎᓪᓗᒍ ᒪᓕᒃᑕᐅᓗᑎᒡᓗ ᐋᖅᑭᒃᑕᐅᓯᒪᔪᑦ ᒪᓕᒃᑕᐅᒋᐊᓕᑦ. ᓂᕆᐅᒋᔭᖃᙱᒻᒥᔪᒍᑦ ᐊᓯᔾᔨᖅᑐᖃᕋᔭᕐᒪᖔᑦ ᐸᐃᕆᕕᖕᓄᑦ ᒪᒃᐱᖅᓯᒪᐃᓐᓇᖅᑎᑕᐅᔪᓄᑦ.

ᖃᐅᔨᒫᓂᒃᑲᓗᐊᖅᑐᖓ ᓇᓗᓇᖅᑐᒦᓐᓂᖏᓐᓂᒃ ᐊᖓᔪᖅᑳᕆᔭᐅᔪᑦ, ᐃᓕᓐᓂᐊᖅᑎᑦ, ᐊᒻᒪ ᐃᖅᑲᓇᐃᔭᖅᑎᑦ, ᑐᑭᓯᐊᕗᖓᓗ ᐱᖏᒐᒍᑎᒋᔭᔅᓯᓐᓂᒃ. ᑭᓯᐊᓂ, ᖃᐅᔨᕙᓪᓕᐊᑎᓪᓗᑕ ᓄᕙᒡᔪᐊᕐᓇᖅ-19−ᒥ, ᖃᐅᔨᒪᓇᓱᒋᐊᖃᕋᑦᑕ ᒪᑐᓯᒪᔭᕆᐊᖃᓕᖅᐸᒃᑐᓂᒃ ᐊᒻᒪ ᓯᕗᒻᒧᑦ ᐃᖏᕐᕋᓇᓱᐊᕐᓂᕐᒥᒃ ᓄᑖᓂᒃ ᓈᒻᒪᒃᑐᓂᒃ ᑐᙵᕕᖃᖅᑐᓂᒃ ᑭᖑᓪᓕᕐᒥ ᖃᐅᔨᔭᐅᕙᓪᓕᐊᔪᑦ ᒪᓕᒡᓗᒋᑦ.

Pfizer ᑲᐱᔭᐅᕝᕖᑦ ᓄᓇᕗᒥᐅᓄᑦ ᐅᑭᐅᓕᖕᓄᑦ 12-17−ᒧᑦ ᐱᒋᐊᓛᖅᑐᑦ ᐱᓇᓱᐊᕈᓯᕆᓛᖅᑕᑦᑎᓐᓂ, ᑎᓕᐅᖅᐸᒃᑲᓗ ᐊᖓᔪᖅᑳᕆᔭᐅᔪᓕᒫᑦ ᐸᖅᑭᔨᒋᔭᐅᔪᓕᒫᓪᓗ ᐃᓂᒃᓴᓕᐅᖅᓯᑲᑕᖁᓪᓗᒋᑦ ᒪᒃᑯᒃᑐᖁᑎᑎᒃ ᐃᓯᒥᐊᕐᓗᑎᒡᓗ ᑲᐱᔭᐅᔭᖅᑐᕈᓐᓇᖅᖢᑎᒃ ᐃᖃᓗᖕᓂ. ᓄᕙᒡᔪᐊᕐᓇᖅ-19−ᒧᑦ ᑲᐴᑎᑦ ᐊᓯᔾᔨᕈᑕᐅᖕᒪᑕ, ᐱᕕᖃᕈᑎᒋᓂᐊᖅᖢᑎᒍᓪᓗ ᐊᓂᒍᕈᓐᓇᕐᓗᑎᒍᑦ ᓯᐊᒻᒪᒃᐸᓪᓕᐊᔪᑦ ᓯᕗᒻᒧᑦ ᐃᖏᕐᕋᑎᓪᓗᑕ. ᐱᓕᕆᖃᑕᐅᒋᑦ ᑲᐱᔭᐅᖃᑕᐅᓗᑎᓪᓗ."

###

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:

ᑯᕆᔅ ᐴᒡᓕᐊ
ᐊᐅᓚᑦᑎᔨᐅᑲᐃᓐᓇᖅᑐᖅ, ᑐᓴᐅᒪᔪᓕᕆᔨᓄᑦ
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ
867-975-5949
cpuglia@gov.nu.ca