You are here

​ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐃᓕᓐᓂᐊᖅᑎᓄᑦ ᐃᑲᔫᑎᒥᒃ ᓴᖅᑭᑦᑎᕗᑦ ᓴᕚᓇ ᐱᑯᔭᒃ ᐃᖅᑲᐅᒪᔭᐅᓪᓗᓂ

ᓯᑎᐱᕆ 21, 2022

ᐅᖃᐅᓯᐅᔪᖅ
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐃᓕᓐᓂᐊᖅᑎᓄᑦ ᐃᑲᔫᑎᒥᒃ ᓴᖅᑭᑦᑎᕗᑦ ᓴᕚᓇ ᐱᑯᔭᒃ ᐃᖅᑲᐅᒪᔭᐅᓪᓗᓂ

ᓄᓇᕗᓕᒫᒥ (ᓯᑎᐱᕆ 21, 2022) ᓄᓇᕗᒻᒥ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᒥᓂᔅᑕᖓ, ᔮᓐ ᒪᐃᓐ, ᐅᓪᓗᒥ ᐅᖃᐅᓯᖃᖅᐳᖅ ᐅᑯᓂᖓ:

"ᖁᕕᐊᓱᙱᓪᓚᕆᓚᐅᖅᐳᖓ ᑐᓴᕋᒪ ᐃᓄᐊᖅᑕᐅᓚᐅᖅᑐᒥᒃ ᓴᕚᓇ  ᐱᑯᔭᖕᒥᑦ, ᒪᒃᑯᒃᑐᑯᓗᒃ ᓴᓂᕋᔭᖕᒥᐅᑕᖅ. ᓴᕚᓇ ᐃᓅᔪᓐᓃᖅᑎᓪᓗᒍ ᐊᓯᐅᔨᕐᔪᐊᖅᐳᑦ ᖃᑕᙳᑎᖏᑦ, ᐱᖃᓐᓇᕆᔭᖏᑦ, ᓄᓇᖅᑲᑎᙱᑦ ᐊᒻᒪ ᓲᖃᐃᒻᒪ ᓄᓇᕗᒻᒥᐅᓕᒫᑦ.

ᓴᕚᓇ ᐋᑐᕚᒧᑦ ᓅᓚᐅᖅᐳᖅ ᐃᓕᓐᓂᐊᕆᐊᖅᖢᓂ ᐃᖢᐊᖅᓴᐃᔨᙳᕆᐅᖅᓴᓂᐊᖅᖢᓂ, ᐃᑲᔫᑕᐅᓪᓚᕆᒐᔭᓚᐅᖅᑐᖅ ᓄᓇᕗᒻᒥᐅᓄᑦ. ᓯᕗᓂᐊᒍᑦ, ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᐃᖅᑲᓇᐃᔭᖃᑦᑕᓚᐅᖅᑐᖅ ᐊᐅᔭᒃᑯᑦ ᐃᓕᓐᓂᐊᖅᑎᐅᓪᓗᓂ 2017−ᒥ, 2018−ᒥ 2019−ᒥᓗ.

ᓴᕚᓇ ᐃᔾᔪᐊᒐᒃᓴᑦᑎᐊᕙᐅᓚᐅᖅᑐᖅ ᐃᓄᑦᑎᐊᕙᐅᓪᓗᓂ ᐃᒃᐱᒍᓱᑦᑎᐊᖅᖢᓂᓗ.  ᐃᓚᒥᓂᒃ ᐊᒃᓱᐊᓗᒃ ᑲᒪᑦᑎᐊᓚᐅᖅᑐᖅ ᐊᓯᒥᓂᒡᓗ ᖃᓄᐃᙱᑦᑎᐊᖁᔨᓪᓗᓂ. ᑖᓐᓇ ᐊᑲᐅᓂᖅᓴᒨᕋᓱᓚᐅᖅᑐᖅ ᓄᓇᕗᒻᒥ ᐃᑲᔪᕈᒪᓪᓗᓂ ᐊᑲᐅᓂᖅᓴᒦᓕᖁᓪᓗᒋᑦ.

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐅᕙᖓᓗ ᓴᕚᓇᐅᑉ ᐃᓅᔪᓐᓃᕐᓂᖓ ᐊᑑᑎᖃᙱᓪᓗᓂ ᐱᖁᙱᑕᕗᑦ. ᐃᒪᓐᓇᖔᕐᓕ, ᐃᖅᑲᐅᒪᔭᐅᓂᖓ ᑲᔪᖏᖅᓴᐃᔾᔪᑕᐅᖁᕙᕗᑦ ᐱᔪᒃᓯᔾᔪᑕᐅᒃᑲᓐᓂᕐᓗᓂᓗ ᐅᓄᒃᑲᓐᓂᖅᑐᓄᑦ ᒪᒃᑯᒃᑐᓄᑦ ᓄᓇᕗᒻᒥᐅᓂᑦ ᐃᖢᐊᖅᓴᐃᔨᙳᕆᐅᖅᓴᔪᒪᔪᓂᑦ.

ᑕᒪᓐᓇ ᐱᔾᔪᑎᒋᓪᓗᒍ, ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᕐᕌᒍᑕᒫ $5,000 ᐃᓕᓐᓂᐊᕈᑎᒃᓴᓂᒃ ᑐᓐᓂᖅᑯᑎᖃᕐᓂᐊᖅᐳᑦ ᓴᕚᓇᒥᑦ ᐊᑎᖃᖅᑐᒥᑦ ᐊᑕᐅᓯᕐᒧᑦ ᓄᓇᕗᒻᒥ ᐃᓅᓪᓗᓂ ᐃᓕᓐᓂᐊᖅᑎᒧᑦ ᐃᖢᐊᖅᓴᐃᔨᙳᕆᐅᖅᓴᓂᕐᒧᑦ ᐃᓕᓐᓂᐊᕐᓂᐊᖅᑐᒥᑦ.

ᐃᒃᐱᒍᓱᖃᑎᒋᑦᑎᐊᖅᐸᒃᑲ ᓴᕚᓇᐅᑉ ᐃᓚᖏᑦ ᓄᓇᖅᑲᑎᖏᓪᓗ. ᑖᓐᓇ ᒥᑭᑦᑑᒐᓗᐊᖅ ᐱᓕᕆᐊᖑᑎᑕᐅᔪᖅ ᐊᑎᖓ ᐊᑐᖅᖢᒍ ᐃᑲᔫᑕᐅᖁᒐᓗᐊᖅᐸᕋ ᒪᒥᓴᖅᐸᓪᓕᐊᓂᕐᒧᑦ. ᒪ'ᓇ,"

###

ᑐᓴᒐᒃᓴᓂᑦ ᖃᐅᔨᒋᐊᕐᕕᒃᓴᖅ:

ᑯᕆᔅ ᐴᒡᓕᐊ
ᑐᓴᒐᒃᓴᓕᕆᔨᓄᑦ ᐊᐅᓚᑦᑎᔨ
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ
867-975-5949
cpuglia@gov.nu.ca