ᐅᖃᓚᐅᑎᓯᐅᑏᑦ

You are here

ᐃᒥᒐᕈᓐᓃᕆᑦ!

ᕕᕝᕗᐊᓕ 12, 2019

ᑭᒃᑯᑐᐃᓐᓇᓄᑦ ᑐᓴᒐᒃᓴᖅ

ᐃᒥᒐᕈᓐᓃᕆᑦ!

ᐅᑭᐅᑕᒫᑦ ᓄᓇᕗᒻᒥ ᐃᓕᓐᓂᐊᕐᕖᑦ ᑲᔪᓯᑎᑦᑎᕙᒃᐳᑦ ᐃᒪᐃᑦᑐᒥᒃ, ᐃᒥᒐᕈᓐᓃᕆᑦ ᐱᓕᕆᐊᖑᔪᒥᒃ ᐃᑲᔪᕈᒪᓪᓗᒋᑦ ᐃᓕᓐᓂᐊᖅᑏᑦ ᐃᓕᑦᑎᕙᓪᓕᐊᓂᕐᒥᒃ ᐊᑐᕈᓐᓴᕐᓂᕐᒥᒃ ᓂᕿᑦᑎᐊᕙᖕᓂ ᐃᒥᑦᑎᐊᕙᖕᓂᒡᓗ ᓂᕈᐊᕆᔭᐅᕙᒃᑐᓂᒃ. ᐃᒥᒐᑦᑎᐊᕙᐅᙱᑦᑐᑦ ᓲᕐᓗ ᖃᓛᖅᑐᓖᑦ ᐃᒥᒐᐃᑦ, ᓰᕐᓇᖅᑐᒥᙶᖅᑐᑦ ᐃᒥᒐᐃᑦ, ᓂᓚᓖᖅ ᐆᒻᒪᕆᒃᓯᔪᒪᓂᕐᒧᓪᓗ ᐃᒥᖅᑕᐅᕙᒃᑐᑦ ᓯᐅᕋᐅᔮᖅᑐᓕᓪᓛᓘᕗᑦ. ᓯᐅᕋᐅᔮᖅᑐᖅᑑᒪᓗᐊᕐᓂᖅ ᓴᖅᑭᑎᑦᑎᔪᓐᓇᖅᐳᖅ ᑎᒥᒃᑯᑦ ᐊᑲᐅᙱᓕᐅᕈᑎᒋᔭᐅᔪᓂᒃ ᑭᒃᑯᑐᐃᓐᓇᑦᑎᐊᓄᑦ!

ᓯᐅᕋᐅᔮᖅᑐᖓ ᐋᓯᑦ−ᖓᓗ ᑕᒃᑯᓇᓂ ᐃᒥᒐᕐᓂ ᐱᓕᕆᖃᑎᖃᖅᐸᒃᐳᑦ ᖁᐱᕐᕈᕋᓛᓂᒃ ᖃᓂᑦᑎᓐᓃᑦᑐᓂᒃ ᐊᖏᒡᓕᒋᐊᖅᑎᑦᑎᕙᒃᖢᑎᒃ ᑭᒍᑏᑦ ᐊᐅᓂᖅᑖᖅᐸᓪᓕᐊᕙᖕᓂᖏᓐᓂᒃ. ᐃᒪᖅ ᐱᐅᓛᖑᕗᖅ ᓂᕈᐊᕆᓂᐊᕐᓗᒍ ᐃᒥᕈᒍᓐᓃᖅᑎᑦᑎᓂᐊᕐᓗᓂ ᓄᑕᖅᑲᓄᑦ ᐃᓐᓇᕐᓄᓪᓗ.

ᑕᒪᑐᒪᓂ ᐊᕐᕌᒍᒥ ᖁᕕᐊᓱᖃᑎᒋᕙᕗᑦ ᒪᕐᕉᒃ ᓄᓇᕗᒻᒥ ᐃᓕᓐᓂᐊᕐᕖᒃ ᐱᓇᔪᒃᓯᒪᓂᖏᖕᓄᑦ ᖃᓄᐃᙱᓐᓂᖅᓴᓂᒃ ᐃᓕᑦᑎᕙᓪᓕᐊᓂᕐᒧᑦ ᐃᓂᒋᔭᐅᔪᓐᓇᖅᑐᓂᒃ. ᖄᒃᑲᓐᓂᐊᒍᑦ ᐊᕐᕌᒍᑕᒫᑦ ᐃᒥᒐᕈᓐᓃᕆᑦᒧᑦ ᐱᓕᕆᐊᖑᕙᒃᑐᑦ, ᖁᕐᓗᖅᑐᕐᒥ ᖁᑦᑎᖕᓂᖅᓴᓄᑦ ᐃᓕᓐᓂᐊᕐᕕᒃ ᐊᒻᒪᓗ ᑑᒑᓕᒃ ᖁᑦᑎᒃᑐᒦᓐᓂᖅᓴᕐᓄᑦ ᐃᓕᓐᓂᐊᕐᕕᒃ ᓇᐅᔮᓂ ᐃᑲᔪᖅᑐᐃᖃᑦᑕᖅᓯᒪᕗᒃ ᐃᓕᓐᓂᐊᖅᑎᒥᓂᒃ ᐃᓕᓐᓂᐊᕐᓇᓕᒫᒥ ᐃᒪᐃᓕᐅᖅᖢᑎᒃ.

  • ᐃᓕᓐᓂᐊᕐᕕᒃᑎᒃ ᐃᒥᒐᕐᕕᐅᔭᕆᐊᖃᕈᓐᓃᖅᑎᖦᖢᒍ ᐊᒻᒪᓗ/ᐅᕝᕙᓗᓃᑦ ᓂᕿᑦᑎᐊᕙᐅᙱᑦᑐᓂᒃ ᐱᑕᖃᑎᑦᑎᕙᙱᖦᖢᑎᒃ;
  • ᐊᑐᖅᖢᑎᒃ ᖃᓄᐃᙱᑦᑎᐊᕐᓂᕐᒧᑦ ᐃᓕᖅᑯᓯᕆᔭᐅᕙᒃᑐᓂᒃ;
  • ᐱᑎᑦᑎᕙᒃᖢᑎᒃ ᐃᓕᓐᓂᐊᖅᑎᑦᑎᓂᕐᒥᒃ ᓂᕿᑦᑎᐊᕙᖕᓄᑦ ᐃᒪᑦᑎᐊᓚᖕᓄᓪᓗ;
  • ᐃᒪᕐᒥᒃ ᐊᑐᖅᑕᐅᔪᓐᓇᖅᑎᑦᑎᑦᑎᐊᖅᖢᑎᒃ; ᐊᒻᒪᓗ
  • ᒪᓂᒪᑎᑦᑎᓪᓗᑎᒃ ᑕᒧᓗᒐᒃᓴᑦᑎᐊᕙᖕᓂᒃ.

ᖁᔭᓐᓇᒦᖅᑕᐅᕗᑦ ᑕᒪᕐᒥᑦᑎᐊᖅ ᐃᓕᓐᓂᐊᕐᕕᓕᒫᑦ ᐊᒃᓱᕈᖅᖢᑎᒃ ᐱᓕᕆᖃᑦᑕᓚᐅᕐᓂᖏᓐᓄᑦ ᓂᕈᐊᕆᔭᖃᕐᓂᕐᒧᒃ ᐱᐅᓂᖅᓴᓂᒃ ᐊᔪᕐᓇᙱᓐᓂᖅᓴᒥᒡᓗ ᓂᕈᐊᕆᔭᖃᕈᓐᓇᕐᓂᖏᓐᓄᑦ ᐃᓕᓐᓂᐊᖅᑏᑦ. ᓂᕆᐅᒋᔭᖃᑦᑎᐊᖅᐳᒍᑦ ᑐᓴᕐᓂᐊᕐᓂᕐᒥᒃ ᑲᔪᓯᓂᖃᑦᑎᐊᖅᑐᒻᒪᕆᖕᓂᒃ ᐃᒥᒐᕈᓐᓃᕐᓂᕐᒧᑦ ᐱᓕᕆᐊᖑᔪᓂᒃ ᐃᓕᓐᓂᐊᕐᕕᖕᓂ ᑕᒪᑐᒪᓂ ᐊᕐᕌᒍᒥ.

ᑐᓴᖅᑐᖃᒃᑲᓐᓂᕈᒪᒃᐸᑦ ᓂᕈᐊᕆᔭᖃᕐᓂᐊᕐᓗᓂ ᖃᓄᐃᙱᑦᑎᐊᕈᑕᐅᔪᓐᓇᖅᑐᓂᒃ, ᑕᑯᔭᖅᑐᕐᓗᒍ ᓄᓇᕗᑦ ᒐᕙᒪᖓᑕ ᖃᓄᐃᙱᑦᑎᐊᖅᑐᒥᒃ ᐃᓅᓯᖃᕈᓐᓇᕐᓂᕐᒧᑦ ᐃᓂᒋᔭᐅᔪᖅ.

###

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:

ᓴᐃᕋ ᐋᕐᓯᓅ
ᑐᓴᒐᒃᓴᓕᕆᔨᓄᑦ ᖃᐅᔨᒪᔨᑕᖅ
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ
867-975-5949
sarsenault@gov.nu.ca