ᐅᖃᓚᐅᑎᓯᐅᑏᑦ

You are here

ᐃᓅᓯᖃᑦᑎᐊᕐᓂᕐᒧᑦ ᑐᖅᑲᖅᑕᕐᕕᒃ ᑮᓇᐅᔭᖅᑖᕈᒪᔪᓂᑦ ᑐᒃᓯᕋᐅᑎᓕᐅᖁᔨᔪᑦ

ᒫᑦᓯ 02, 2021

ᒐᕙᒪᒃᑯᓐᓂ ᐃᓄᖕᓄᑦ ᑐᓴᒐᒃᓴᖅ

ᐃᓅᓯᖃᑦᑎᐊᕐᓂᕐᒧᑦ ᑐᖅᑲᖅᑕᕐᕕᒃ ᑮᓇᐅᔭᖅᑖᕈᒪᔪᓂᑦ ᑐᒃᓯᕋᐅᑎᓕᐅᖁᔨᔪᑦ

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐃᓅᓯᖃᑦᑎᐊᕐᓂᕐᒧᑦ ᑐᖅᑲᖅᑕᕐᕕᐊ ᑮᓇᐅᔭᖅᑖᕈᒪᔪᓂᑦ ᑐᒃᓯᕋᐅᑎᓕᐅᖁᔨᓕᖅᐳᑦ ᐃᒻᒥᓃᖅᑕᐃᓕᒪᓂᕐᒧᑦ ᐱᓕᕆᐊᖑᔪᓄᑦ ᑐᕌᖓᔪᓂᒃ 2020−2021 ᐊᕐᕌᒍᖓᓂ.

ᑮᓇᐅᔭᓕᐅᕋᓱᐊᖅᑎᐅᙱᑦᑐᑦ ᑲᑐᔾᔨᖃᑎᒌᑦ ᓄᓇᓕᖕᓂᓪᓗ ᒐᕙᒪᒋᔭᐅᔪᑦ ᓄᓇᕗᒻᒥ ᑮᓇᐅᔭᓂᒃ ᑐᒃᓯᕋᐅᑎᓂᒃ ᑐᓂᓯᖁᔭᐅᕗᑦ ᓄᓇᓕᖕᓂᙶᖅᑐᓂᒃ ᐱᓕᕆᐊᒃᓴᓂ ᐃᒻᒥᓃᖅᑕᐃᓕᓂᕐᒧᑦ, ᐊᑲᐅᓂᖅᓴᒃᑰᕆᐊᖅᑎᑦᑎᓂᕐᒧᑦ ᐊᒻᒪ ᐊᓂᒍᖅᓯᒪᓕᖅᑎᓪᓗᒍ ᐱᔾᔪᑎᖃᓪᓗᐊᑕᖅᑐᓂᒃ.

ᓄᕙᒡᔪᐊᕐᓇᖅ-19 ᐱᔾᔪᑕᐅᓪᓗᓂ, ᐱᓇᔪᖕᓂᐊᖅᑐᑦ ᑐᓂᓯᖁᔭᐅᕗᑦ ᑐᒃᓯᕋᐅᑎᓂᒃ ᒪᓕᒡᓗᑎᒃ ᒫᓐᓇᒧᑦ ᐃᓅᖃᑎᒌᑦ ᐅᖓᓯᒌᒋᐊᖃᖅᑐᑦ ᒪᓕᒐᖏᓐᓂ. ᑖᒃᑯᐊ ᐃᓚᖃᕈᓐᓇᖅᑐᑦ ᑐᒃᓯᕋᐅᑎᓂᒃ ᖃᕆᑕᐅᔭᒃᑯᑦ ᐱᓕᕆᐊᒃᓴᕆᔭᐅᔪᓂᒃ, ᐅᕝᕙᓘᓐᓃᑦ ᐱᓕᕆᐊᓂᒃ ᐊᑐᓕᖅᑎᑕᐅᔪᓐᓇᖅᑐᓂᒃ ᒪᓕᑦᑎᐊᖏᓐᓇᕐᓗᒋᑦ ᐃᓅᖃᑎᒌᑦ ᐅᖓᓯᒌᒋᐊᖃᖅᑐᑦ ᑲᑎᙵᓂᐊᕌᖓᑕᓗ.

ᐃᓅᓯᖃᑦᑎᐊᕐᓂᕐᒧᑦ ᑐᖅᑲᖅᑕᕐᕕᒃ ᐃᓚᐅᖁᔨᑦᑎᐊᖅᑑᒐᓗᐊᑦ ᓇᓗᓇᖅᑐᒃᑰᖅᑎᓪᓗᑕ, ᓄᓇᓕᖕᓂ ᐱᓕᕆᐊᒃᓴᑦ ᖃᓄᐃᓕᐅᖅᑕᐅᓂᐊᖅᑐᓪᓗ ᐱᓕᕆᐊᖑᐃᓐᓇᕈᓐᓇᕐᓂᐊᕐᒪᑕ ᐃᑲᔫᑎᒃᓴᓄᑦ ᐱᔭᕆᐊᖃᖅᑕᖏᓐᓄᑦ.

ᖃᓄᐃᓕᐅᕐᓂᐅᔪᑦ ᑮᓇᐅᔭᖃᖅᑎᑕᐅᔪᓐᓇᖅᑐᑦ ᐅᑯᐊ, ᑖᒃᑯᐊᑐᐊᖑᙱᖦᖢᑎᒡᓗ:
• ᖃᓄᖅᑑᕈᑎᒃᓴᓄᑦ ᐸᕐᓇᐅᑎᑦ;
• ᖃᐅᔨᓴᕐᓂᖅ ᐃᓅᓯᖃᑦᑎᐊᕐᓂᕐᒧᑦ ᓴᖅᑭᔮᖅᑎᑦᑎᓂᕐᒧᑦ ᐊᒃᑐᐊᓂᓕᖕᓂᒃ;
• ᓄᓇᓕᖕᓂ ᐱᓕᒻᒪᒃᓴᐃᓂᖅ;
• ᐃᓅᖃᑎᒌᑦ ᐃᒃᐱᒍᓱᖕᓂᖏᓐᓂᒃ ᐃᓕᓐᓂᐊᖅᑎᑦᑎᓂᖅ;
• ᐊᑭᑐᔫᑎᓄᑦ ᐸᕐᓇᐅᑎᑦ;
• ᖃᓄᐃᓕᐅᓯᑳᓪᓚᒃᐸᒃᑐᓂᒃ ᐱᑕᖃᙱᓐᓂᖅᓴᐅᑎᑦᑎᓇᓱᖕᓂᖅ;
• ᐃᑲᔪᖅᑐᐃᓂᖅ ᑐᓴᐅᒪᖃᑎᒌᖕᓂᕐᒥᒃ; ᐊᒻᒪᓗ
• ᐊᓯᖏᑦ ᐃᓱᒪᒋᔭᐅᑦᑎᐊᖅᓯᒪᔪᑦ ᐃᒻᒥᓃᖅᑕᐃᓕᑎᑦᑎᓂᕐᒧᑦ ᐃᓅᓯᖃᑦᑎᐊᕐᓂᕐᒧᑦ ᐱᓕᕆᐊᖑᕙᓪᓕᐊᔪᑦ.

ᐊᑕᐅᓯᕐᒥᑦ ᑐᒃᓯᕋᖅᑐᑦ ᐊᔾᔨᒌᙱᑦᑐᓄᑦ ᐱᓕᕆᐊᒃᓴᓄᑦ ᑎᓕᐅᖅᑕᐅᕗᑦ ᓄᓇᓕᖕᓂ ᐱᔭᐅᔭᕆᐊᓖᑦ ᒪᓕᒡᓗᒋᑦ. ᑐᒃᓯᕋᐅᑎᒋᔭᐅᔪᑦ ᐃᓱᓕᕝᕕᒃᓴᖃᙱᑐᑦ ᑐᓂᔭᐅᔪᓐᓇᖅᖢᑎᒡᓗ 2021−2022 ᐊᕐᕌᒍᒋᔭᐅᔪᑦ ᐊᑐᖅᑎᓪᓗᒋᑦ ᑮᓇᐅᔭᖅᑖᕆᔭᐅᔪᓐᓇᖅᑐᑦ ᑭᓯᐊᓂ ᓄᖑᑉᐸᑕ.
ᑐᑭᓯᒋᐊᒃᑲᓐᓂᕈᒪᒍᔅᓯ ᖃᐅᔨᒋᐊᕈᓐᓇᖅᐳᓯ ᐅᕗᖓ inuusivutanninaqtuq@gov.nu.ca ᐅᕝᕙᓘᓐᓃᑦ ᐅᕗᙵᕐᓗᓯ https://www.gov.nu.ca/iu/aanniaqangnanngittulirijikku/information/inuusi....

ᐊᑏ ᐱᓕᕆᖃᑎᒌᓚᐅᖅᑕ ᐃᓅᓯᕐᒥ ᐃᒻᒥᓃᖅᑕᐃᓕᓂᕐᒧᑦ. ᐃᓅᓯᕗᑦ ᐊᓐᓂᓇᖅᑐᖅ, ᑲᑎᙵᔾᔪᑎᒋᕙᕗᑦ ᐃᓅᓯᓕᒫᑦᑎᓐᓄᑦ!

###

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:

ᑕᓇᕋᐃ ᓴᒧᕕᐅᓪ
ᑐᓴᒐᒃᓴᓕᕆᔨᓄᑦ ᖃᐅᔨᒪᔨᑕᖅ
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ
867-975-5712
dsommerville1@gov.nu.ca