ᐅᖃᓚᐅᑎᓯᐅᑏᑦ

You are here

ᐃᓱᒪᒃᑯᑦ ᖃᓄᐃᖏᑦᑎᐊᕐᓂᖅ ᐱᕕᖃᖅᑎᓪᓗᒍ

ᐊᒃᑐᐸ 18, 2021

ᑭᒃᑯᑐᐃᓐᓇᓄᑦ ᑐᓴᒐᒃᓴᖅ

ᐃᓱᒪᒃᑯᑦ ᖃᓄᐃᖏᑦᑎᐊᕐᓂᖅ ᐱᕕᖃᖅᑎᓪᓗᒍ

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᓄᓇᕗᒻᒥᐅᓂᒃ ᐳᐃᒍᖅᑕᐃᓕᖁᔨᕗᑦ ᐃᓱᒪᒃᑯᑦ ᖃᓄᐃᙱᑦᑎᐊᕐᓂᕐᒥᒃ ᐱᕕᖃᖅᑎᑦᑎᖃᑦᑕᖁᓪᓗᒋᑦ.

ᐃᓱᒪᒃᑯᑦ ᖃᓄᐃᖏᑦᑎᐊᕐᓂᖅ ᐅᕙᑦᑎᓐᓄᓕᒫᖅ ᐊᒃᑐᐃᖃᑦᑕᖅᐳᖅ, ᓇᓂᑐᐃᓐᓇᖅ ᐃᓅᓚᐅᖅᓯᒪᒐᓗᐊᕈᑦᑕ, ᖃᓄᐃᑦᑑᒐᓗᐊᕈᑦᑕ, ᐃᓕᖅᑯᓯᖃᕋᓗᐊᕈᑦᑕᓗ ᐊᒻᒪᓗ ᐱᒻᒪᕆᐅᒋᕗᖅ ᑎᒥᐅᑉ ᖃᓄᐃᙱᓐᓂᖓᑎᑐᑦᑕᐅᖅ. ᐊᑐᓂ ᐃᓄᐃᑦ ᐊᑲᐅᙱᓕᐅᕈᑎᖃᕈᓐᓇᖅᑐᑦ ᐃᓱᒪᒥᒍᑦ ᖃᓄᐃᒍᑎᖃᕐᓂᕐᒧᑦ ᖃᖓᑐᐃᓐᓇᑦᑎᐊᒃᑯᑦ ᐃᓅᓯᕐᒥᓂᑦ ᐊᒻᒪ ᐱᒻᒪᕆᐅᕗᖅ ᖃᐅᔨᒪᓗᒋᑦ ᐃᓄᐃᑦ ᐊᑐᓂ ᐊᔾᔨᒌᙱᑦᑐᑦ ᐊᑐᕐᒪᑕ.

ᓄᕙᕐᔪᐊᕐᓇᖅ-19 ᖃᓂᒪᓐᓇᐅᑎᓪᓗᒍ, ᐊᕐᕌᒎᓵᖅᑐᒥᑦ ᐱᔭᕐᓂᖏᑦᑐᓂᑦ ᐊᒃᓱᕈᕐᓇᖅᑐᓂᑦ ᓴᖅᑭᑎᑦᑎᓯᒪᓵᖅᑐᖅ, ᐃᓕᓐᓂᐊᖅᑎᑦᑎᔾᔪᑕᐅᓪᓗᓂ ᐅᕙᑦᑎᓐᓄᑦ ᐱᒻᒪᕆᐅᓂᖓᓂᒃ ᑲᑎᙵᔭᕆᐊᖃᕐᓂᕗᑦ.

ᐅᕙᑦᑎᓂᒃ ᑕᑎᒋᖃᑦᑕᐅᑎᕙᒃᐳᒍᑦ ᐃᑲᔪᖅᑎᒌᖕᓂᕐᒧᑦ ᐊᒻᒪ ᓴᙱᒃᑎᒋᐊᒃᑲᓐᓂᖁᓪᓗᑕ ᓄᓇᖅᑲᑎᒌᖑᓪᓗᑕ. ᐱᓕᕆᖃᑎᒌᖕᓂᒃᑯᑦ, ᑕᒪᑦᑕ ᓴᖅᑭᔮᕆᐊᖅᑎᑦᑎᒃᑲᓐᓂᕈᓐᓇᖅᑐᒍᑦ ᐃᑲᔪᖅᑐᐃᕐᓂᕐᒥᑦ ᐃᓱᒪᒃᑯᑦ ᖃᓄᐃᖏᑦᑎᐊᕐᓂᕐᒧᑦ ᐊᒻᒪ ᐃᓅᓯᖃᑦᑎᐊᕐᓂᕐᒧᑦ ᐊᔪᙱᑕᑦᑎᓐᓂ ᒪᑯᓂᖓ:

  • ᐃᓄᑦᑎᐊᕙᐅᕙᒡᓗᑕ ᐊᓯᑦᑎᓐᓄᑦ ᐊᒻᒪ ᐃᖅᑲᐅᒪᓇᓱᒃᐸᒡᓗᑕ ᐃᓅᖃᑎᕗᑦ ᐊᒃᓱᕈᕐᓇᖅᑐᓂᒃ ᐱᓕᕆᐊᒃᓴᖃᐅᕐᒪᑕᑦᑕᐅᖅ ᖃᐅᔨᒪᖏᑦᑕᑦᑎᓐᓂᑦ.
  • ᐊᑐᐃᓐᓇᐅᓗᑕ ᑭᓇᑐᐃᓐᓇᖅ ᐅᖃᖃᑎᖃᕆᐊᖃᓕᕌᖓᑦ ᐱᔾᔪᑎᒋᔭᒥᓂᒃ.
  • ᓄᑖᓂᒃ ᐃᓱᒪᒃᓴᖅᓯᐅᕈᑎᖃᐃᓐᓇᖅᐸᒡᓗᑎᑦ ᐃᖅᑲᖅᑐᐃᕙᙱᓪᓗᑎᓪᓗ ᐃᑲᔪᖅᑎᒌᓕᕌᖓᑦᑕ.
  • ᐃᓂᒃᓴᖃᖅᑎᑦᑎᓗᓂ ᐃᓄᖕᓄᑦ ᐊᑦᑕᕐᓇᙱᑦᑐᒦᓐᓂᐊᕐᒪᑕ, ᐃᒃᐱᒋᔭᐅᑦᑎᐊᕐᓗᑎᒃ, ᑐᓴᖅᑕᐅᓗᑎᒡᓗ.
  • ᑲᔪᖏᖅᓴᐃᖃᑎᒌᒡᓗᑕ ᑖᒃᑯᐊ ᐊᒃᓱᕈᕐᓇᖅᑐᒦᑦᑐᑦ ᖃᐅᔨᒋᐊᖅᐸᓪᓗᒋᑦ ᐊᒻᒪ ᐃᖅᑲᐅᒪᓗᑕ ᑲᙳᓇᖅᑑᖏᒻᒪᑦ ᐃᑲᔪᖅᑕᐅᔪᒪᓗᓂ.

ᐃᑲᔪᖅᑕᐅᔭᕆᐊᖃᕈᕕᑦ ᐃᑲᔪᖅᑕᐅᔭᕆᐊᓕᖕᒥᓪᓘᓐᓃᑦ ᖃᐅᔨᒪᒍᕕᑦ, ᐅᖃᓪᓚᖃᑎᖃᕆᑦ ᐱᖃᓐᓇᕆᔭᕐᓄᑦ, ᖃᑕᙳᑎᖕᓄᑦ, ᐃᓕᓴᐃᔨᒧᑦ, ᐃᓅᓯᓕᕆᔨᒧᑦ ᐅᕝᕙᓘᓐᓃᑦ ᐃᓐᓇᕐᒧᑦ. ᐊᑭᖃᙱᑦᑐᖅ, ᑐᓴᖅᑕᐅᔾᔮᙱᑦᑐᓂᑦ ᐃᓱᒪᒧᑦ ᐅᐃᕆᓯᒪᓂᕐᒧᓪᓗ ᐃᑲᔪᖅᑎᖃᖅᐳᑦ ᐋᓐᓂᐊᕕᖕᓂᑦ.

ᑭᓇᐅᓂᕐᓂ ᖃᐅᔨᔭᐅᙱᓪᓗᑎᑦ ᐃᑲᔪᖅᑕᐅᔪᒪᒍᕕᑦ, ᐅᖄᓚᓗᑎᑦ:

  • ᓄᓇᕗᑦ ᑲᒪᑦᑎᐊᖅᑐᖅ ᐅᖄᓚᐅᑖᓄᑦ ᐅᕗᖓ ᐊᑭᖃᖏᑦᑐᖅ 1-800-265-3333 ᐅᕝᕙᓘᓐᓃᑦ
  • 867-979-3333 (ᐊᑐᐃᓐᓇᐅᔪᑦ ᐃᑲᕐᕋᓄᑦ 24−ᓄᑦ).
  • ᐊᒃᓱᕈᕐᓇᖅᑐᓄᑦ ᐱᔨᑦᑎᕋᖅᑎᑦ ᑲᓇᑕᒥ–ᖃᕆᓴᐅᔭᒃᑯᑦ ᐅᖃᖃᑎᖃᕆᑦ www.crisisservicescanada.ca, ᐅᖃᓗᒡᓗᑎᑦ, ᐅᕝᕙᓘᓐᓃᑦ ᐅᖃᓘᑎᕋᓛᒃᑯᑦ ᑎᑎᕋᕐᓗᑎᑦ 1-833-456-4566.
  • ᓱᕈᓯᕐᓄᑦ ᐅᖄᓚᕝᕕᒃᓴᖅ ᐅᕗᖓ 1-800-668-6868, ᑎᑎᕋᕐᓗᑎᑦ ᐅᖄᓚᐅᑎᕋᓛᒃᑯᑦ 'ᐅᖃᖃᑎᖃᕐᓂᖅ' ᐅᕗᖓ 686868, ᐅᕙᓗ ᑎᑎᕋᖃᑦᑕᐅᑎᓗᓯ ᐃᕐᖐᓐᓇ ᑕᑯᒃᓴᐅᔪᒥᑦ ᐅᕙᓂ www.kidshelpphone.ca.

ᑐᐊᕕᕐᓇᖅᑐᒦᓕᕈᕕᑦ ᖃᐅᔨᒪᔭᕐᓂᓪᓘᓐᓃᑦ ᑐᐊᕕᕐᓇᖅᑐᒦᑦᑐᖃᓕᖅᐸᑦ, ᐸᓖᒃᑯᓐᓄᑦ ᐅᖄᓚᓗᑎᑦ, ᐅᕙᓗ ᑖᓐᓇ ᐃᓄᒃ ᐋᓐᓂᐊᕕᔅᓯᓐᓄᕈᑎᓗᒍ ᐅᕝᕙᓘᓐᓃᑦ ᐋᓐᓂᐊᕕᓕᐊᕈᑎᑲᐅᑎᒋᓗᒍ.

###

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:

ᑕᓇᕋᐃ ᓴᒧᕕᐅᓪ
ᑐᓴᒐᒃᓴᓕᕆᔨᓄᑦ ᖃᐅᔨᒪᔨᑕᖅ
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ
867-975-5712
dsommerville1@gov.nu.ca