ᐅᖃᓚᐅᑎᓯᐅᑏᑦ

You are here

ᔭᓄᐊᕆ ᑕᕝᕚᑭᒥᒃ ᐊᑐᓗᐊᖅᑕᐃᓕᒪᑎᑦᑎᓂᕐᒧᑦ ᑕᖅᑭᐅᕗᖅ

ᔭᓐᓄᐊᓕ 13, 2020

ᑭᒃᑯᑐᐃᓐᓇᕐᓄᑦ ᑐᓴᒐᒃᓴᖅ

ᔭᓄᐊᕆ ᑕᕝᕚᑭᒥᒃ ᐊᑐᓗᐊᖅᑕᐃᓕᒪᑎᑦᑎᓂᕐᒧᑦ ᑕᖅᑭᐅᕗᖅ

ᐃᓚᐅᖃᑕᐅᒋᑦ ᐋᓐᓂᐊᖃᖕᓇᙱᑦᑐᓕᕆᔨᒃᑯᓐᓂᑦ ᐃᑲᔪᖅᑐᐃᓗᑎᓪᓗ ᑕᕝᕚᑭᖃᓗᐊᖅᑕᐃᓕᒪᓂᖕᒧᑦ ᑕᖅᑭᐊᓂᑦ! ᐱᔪᓐᓃᖅᑎᑦᑎᓗᓂ ᐊᒃᑐᐊᓂᕆᔭᐅᕙᒃᑐᓂᑦ ᓱᐴᖅᑐᖅᑐᓃᓐᓂᖅ ᐱᔾᔪᑎᒋᔭᐅᓪᓗᐊᑕᖅᑐᖅ ᐱᔪᓐᓃᖅᑎᑦᑎᕚᓪᓕᕐᓂᕐᒧᑦ ᑕᕝᕚᑭᒥᖔᕐᑐᓂᑦ.

ᓱᐴᖅᑐᖅᑐᓃᓐᓂᖅ ᓯᒡᒐᓖᕐᓂᑦ ᐃᑭᑦᑎᓂᕐᒥᖔᕐᑐᖅ ᐊᒻᒪᓗ ᓱᐱᔭᐅᓗᓂ ᓱᐴᖅᑐᖅᐸᒃᑐᒥᑦ. ᑐᖁᓐᓇᖅᑐᑦ ᑕᕝᕚᑭᐅ ᐳᔪᖓᓂᖔᕐᑐᑦ ᓂᐱᙵᓕᖃᑦᑕᖅᑐᑦ ᐊᑭᓐᓇᒥᑦ, ᐃᒡᓗᒥᐅᑎᓄᑦ, ᓇᑎᕋᕐᓄᑦ ᐊᒻᒪᓗ ᐊᓐᓄᕌᓄᑦ ᑎᐱᖃᐃᓐᓇᓕᔭᖦᖢᑎᒃ. ᐳᔪᖅ ᐊᒻᒪᓗ ᐃᓚᐅᕐᕈᑎᒃᓴᑦ ᐊᒥᐊᒃᑯᖏᑦ ᐊᓐᓂᐊᓕᕈᑕᐅᔪᓐᓇᖅᑐᖅ ᓄᑕᖃᓄᖅ, ᓯᖓᐃᔪᓄᑦ, ᐃᓐᓇᕐᓄᑦ ᐊᒻᒪᓗ ᐆᒻᒪᓯᕆᕙᒃᑐᓄᑦ ᐳᕙᒡᓗᒃᐸᑐᓄᓘᓐᓃᑦ.

ᓴᐳᑎᓗᒋᑦ ᓄᑕᖃᑦ ᐊᒻᒪᓗ ᓄᓇᓖᑦ ᐊᖏᕐᕋᖏᑦ, ᓄᓇᒃᑰᕈᑏᑦ ᐊᒻᒪᓗ ᐊᒪᐅᑏᑦ ᓱᐴᖅᑐᕐᕕᐅᖃᑦᑕᖏᓪᓗᑎᑦ. ᐅᖓᓯᒃᑎᒋᔭᕆᐊᖃᕐᐳᑎᑦ ᖁᓕᐅᖏᓪᓗᐊᕐᑐᒥᑦ ᒦᑕᔅᒥᑦ ᐃᓯᕐᕕᐅᔪᓂᑦ ᑭᒃᑯᑐᐃᓐᓇᕐᓂᑦ ᐃᖃᓇᐃᔭᕐᕕᖕᓂᑦ ᐃᑭᑦᑎᓚᐅᖏᓐᓂᕐᓂᑦ. ᐋᓐᓂᕐᕖᑦ ᐃᓂᖓᓂ, ᐸᐃᕆᕝᕖᑦ, ᐃᓕᓐᓂᐊᕐᕖᑦ ᐊᒻᒪᓗ ᐱᙳᐊᕐᕕᐅᕙᒃᑐᓂᑦ ᓱᐴᖅᑐᖅᑐᖃᕆᐊᖃᖏᑦᐳᖅ. ᓈᒻᒪᑐᒨᑐᐃᓐᓇᐅᖏᑦᑐᖅ. ᒪᓕᒐᐅᒋᕗᖅ.

ᐱᖃᓯᐅᑎᑎᓗᒋᑦ ᑕᕝᕚᑭᑐᖏᔾᔪᒥᓂᕐᒧᑦ ᑕᕿᕐᒧᑦ, ᑲᓇᑕᓕᒫᒥᑦ ᓱᐳᖅᑐᕆᐊᖃᖏᓐᓂᒃᒧᑦ ᐱᓇᓱᐊᕈᓯᖅ (NWSW) ᐱᒋᐊᕐᓂᐊᕐᑐᖅ ᔭᓄᐊᕆ 19−ᒥᑦ 25−ᒧᑦ 2020−ᒥᑦ.

ᓱᐴᖅᑐᖃᑦᑕᕈᓐᓃᕐᓂᖅ ᐱᐅᓛᖑᕗᖅ ᐱᐅᓯᕚᓪᓕᕐᓂᕐᒧᑦ ᑎᒥᒃᑯᑦ. ᐅᖃᐅᔾᔪᖅᑕᐅᓗᓂ ᐃᑲᔪᖅᑐᖅᑕᐅᓂᖅ ᓄᖅᑲᕐᓂᕐᒧᓪᓗ ᐃᓗᐊᖅᓴᐅᑎᒋᔭᐅᕙᒃᑐᑦ ᒪᕐᕈᐃᓕᑎᑦᑎᕙᒃᐳᑦ ᑲᔪᓯᓂᖃᑦᑎᐊᖅᑐᒃᑯᑦ ᓄᖅᑲᕋᔭᕐᓂᕐᒥᒃ ᑕᕝᕚᑭᒥᒃ ᐊᑐᖅᐸᖕᓂᕆᔭᐅᔪᒥᒃ. ᐅᖃᖃᑎᖃᕐᓗᑎᑦ ᐃᓗᐊᖅᓴᐃᔨᔅᓯᓐᓂᑦ ᐅᖄᓚᓗᑎᓪᓘᓐᓃᑦ ᓄᓇᕗᒻᒥᑦ ᓄᖅᑲᖕᓂᖕᒧᑦ ᐅᖄᓚᕕᐊᓄ ᖃᖓᑕᐃᓐᓇᖅ ᐅᕗᖓ 1-866-368-7848. ᐄᔭᒐᐃᑦ ᐱᔪᓃᖅᑎᑦᑎᕚᓪᓕᕐᓇᖅᑐᑦ ᐅᐃᕆᓯᒪᔪᓄᑦ ᖀᕐᓕᖅᑐᓄᓘᓐᓃᑦ, ᓲᕐᓗ ᓂᑯᑏᓐᒧᑦ ᓂᐱᑦᑕᖅᑐᓂᑦ, ᑕᒧᐊᑦᑐᐊᓂᑦ ᐊᒻᒪᓗ ᓂᐅᖅᑎᒐᒃᓴᑦ, ᐊᑐᐃᓐᓇᐅᔪᑦ ᐊᑭᖃᖏᑦᑐᒥᑦ ᐋᓐᓂᐊᕐᕕᔅᓯᓐᓂᑦ ᐅᕝᕙᓘᓐᓃᑦ ᐃᔭᒐᖅᑖᕐᕕᔅᓯᓐᓂᑦ.

ᖃᐅᔨᒋᐊᕆᑦ ᑕᕚᑭ ᑕᕝᕙᓂ ᐃᓂᒃᓴᖃᙱᓚᖅ Facebook−ᑯᑦ ᑐᑭᓯᒋᐊᕈᒪᒍᕕᑦ ᑕᕿᐅᔪᒥᑦ ᖃᓄᐃᓕᐅᖅᑕᐅᓂᐊᕐᑐᓂᑦ ᑕᕝᕚᑭᑐᖅᑕᐃᓕᒪᓂᕐᒧᑦ ᐱᓕᕆᔭᐅᓂᐊᕐᑐᓂᑦ ᓄᓇᓕᔅᓯᓪᓂᑦ. ᑐᑭᓯᒋᐊᒃᑲᓐᓂᕈᒪᒍᕕᑦ ᐊᑐᓗᐊᙱᓐᓂᕐᒥᒃ ᓄᖅᑲᖕᓂᕐᒥᒡᓘᓐᓃᑦ ᑕᕝᕚᑭᒥᒃ, ᐅᕗᙵᐅᓗᑎᑦ, www.nuquits.ca.

###

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:

ᑯᕆᔅ ᐴᒡᓕᐊ
ᑐᓴᒐᒃᓴᓕᕆᔨᓄᑦ ᖃᐅᔨᒪᔨᑕᖅ
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ
867-975-5762
cpuglia@gov.nu.ca