ᐅᖃᓚᐅᑎᓯᐅᑏᑦ

You are here

ᑲᓇᑕᒥ ᐅᐃᕆᓯᒪᔪᓄᑦ ᐅᔾᔨᕈᓱᒃᑎᑦᑎᓂᕐᒧᑦ ᐱᓇᓱᐊᕈᓯᖅ

ᓄᕕᐱᕆ 22, 2021

ᐃᓄᖕᓄᑦ ᑐᓴᒐᒃᓴᖅ ᒐᕙᒪᒃᑯᓐᓂ

ᑲᓇᑕᒥ ᐅᐃᕆᓯᒪᔪᓄᑦ ᐅᔾᔨᕈᓱᒃᑎᑦᑎᓂᕐᒧᑦ ᐱᓇᓱᐊᕈᓯᖅ

ᓄᓇᕗᒥᐅᑦ ᑐᙵᓱᒃᑎᑕᐅᕗᑦ ᐃᓚᐅᖁᔭᐅᓪᓗᑎᒃ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᐱᓕᕆᑎᑕᐅᑎᓪᓗᒋᑦ ᑲᓇᑕᒥ ᐅᐃᕆᓯᒪᔪᓄᑦ ᐅᔾᔨᕈᓱᒃᑎᑦᑎᓂᕐᒧᑦ ᐱᓇᓱᐊᕈᓯᕐᒥ ᓄᕕᐱᕆ 21-ᒥ ᓄᕕᐱᕆ 27, 2021-ᒧᑦ ᐃᓱᖃᕐᓗᒍ.

ᑕᒪᑐᒪᓂ ᐊᕐᕌᒍᒥ ᐱᔾᔪᑕᐅᓂᐊᖅᑐᖅ ᐅᓇᐅᓂᐊᖅᐳᖅ "ᐊᓯᔾᔨᖅᐸᓪᓕᐊᑎᑦᑎᓂᖅ ᑲᑐᔾᔨᖃᑎᒌᖕᓂᒃᑯᑦ." ᓄᓇᕗᒥᐅᓄᑦ ᐱᕕᖃᕈᑕᐅᓕᒑᖕᒪᑦ ᐃᓕᑦᑎᒃᑲᓐᓂᕈᓐᓇᕐᓗᑎᒃ ᐱᑎᑦᑎᑦᑕᐃᓕᓂᕐᒥᒃ, ᐅᖃᐅᓯᕆᕙᒡᓗᒋᓪᓗ ᑲᒪᒋᔭᐅᓂᖏᑦ ᐊᒻᒪ ᖃᓄᐃᑦᑐᓐᓃᖅᐸᓪᓕᐊᑎᓪᓗᒋᑦ, ᓴᖅᑭᓪᓗᒋᑦ ᐃᓱᒪᒋᔭᐅᔪᒃᓴᑦ ᐊᓯᔾᔨᕈᑕᐅᔪᓐᓇᖅᑐᑦ ᒥᒃᖠᒋᐊᕐᓗᒋᓪᓗ ᑲᙳᓱᓕᕈᑕᐅᔪᓐᓇᖅᑐᑦ ᐋᖓᔮᕐᓇᖅᑐᓂᒃ ᐃᒥᐊᓗᖕᒧᓪᓗ ᐊᑐᖅᑎᓄᑦ.

ᓱᕐᕋᖕᓇᖅᑐᓂᒃ ᐊᑐᕐᓗᒃᐸᒃᖢᓂ ᐊᔪᕐᓇᖅᑐᖅᓯᐅᕐᓇᖅᖢᑎᒃ ᐱᔾᔪᑎᑖᕆᔭᐅᓲᖑᖕᒪᑕ ᐱᓕᕆᐊᕆᔅᓲᔭᕐᓗᒋᓪᓗ ᑭᓯᐊᓂ ᐋᖅᑭᑕᐃᓐᓇᕈᓐᓇᖅᐸᒃᖢᑎᒃ ᐊᓯᔾᔨᖅᓯᔪᒪᓗᓂ ᓯᕗᓂᒃᓴᑦᑎᐊᕙᖕᒥᒃ ᐃᓄᖕᓄᑦ ᓱᕐᕋᖕᓇᖅᑐᖅᑑᒪᕙᒃᑐᓄᑦ. ᐊᔪᓕᕈᑎᖃᖅᓯᒪᔪᓄᑦ ᐃᖅᑲᓇᐃᔭᖅᑎᑦ, ᐃᓱᒪᓕᕆᔨᑦ, ᐃᓗᐊᖅᓴᐃᔨᑦ, ᖃᐅᔨᓴᖅᑎᑦ, ᐊᑐᐊᒐᓕᐅᖅᑎᑦ, ᐃᓐᓇᐃᑦ, ᐱᖃᓐᓇᕇᑦ, ᐃᓚᒌᑦ ᐊᒻᒪ ᐃᓄᐃᑦ ᐃᒡᓗᒥᐅᖃᑎᓖᑦ ᓱᕐᕋᖕᓇᖅᑑᒪᕙᒃᑐᓂᒃ, ᑕᒪᕐᒥᒃ ᐱᔭᐅᒋᐊᖃᕐᒪᑕ ᑲᑐᔾᔨᓗᑎᒃ ᐱᓕᕆᔪᓐᓇᖁᓪᓗᒋᑦ ᐊᓯᔾᔨᖅᓰᓂᐊᖅᑎᓪᓗᒋᑦ.

ᐃᓘᓐᓇᑕ ᐱᓕᕆᔪᓐᓇᕋᑦᑕ ᐃᑲᔪᖅᓱᕐᓗᒋᑦ ᐃᓄᐃᑦ ᓱᕐᕋᖕᓇᖅᑐᓂᒃ ᐊᑐᕐᓂᕐᓗᒃᐸᒃᑐᑦ ᐊᔪᕈᓐᓃᖅᓴᐅᑎᒋᕙᒡᓗᒋᑦ ᐱᑦᑎᐊᕐᓂᖅ, ᑲᒪᑦᑎᐊᕐᓂᖅ ᐊᒻᒪ ᑐᑭᓯᐊᖃᑦᑕᐅᑎᓂᖅ ᐃᓅᖃᑎᒥᒃ. ᐱᕙᓪᓕᐊᑎᓪᓗᒋᑦ ᐊᒻᒪ ᐃᖏᕐᕋᑏᓐᓇᕐᓗᒋᑦ ᐃᑲᔪᖅᓱᐃᑦᑎᐊᖅᑐᑦ ᓄᓇᓖᑦ ᐃᑲᔪᕈᓐᓇᖅᐳᑦ ᐃᓄᖕᓄᑦ ᐃᓅᓯᖏᓐᓄᑦ ᐅᐃᕆᓯᒪᔾᔪᑎᖏᓐᓂᒃ ᓄᖅᑲᕈᓐᓇᐃᓪᓕᔪᓄᑦ ᐊᔪᕐᓇᙱᓐᓂᖅᓴᐅᓕᖅᑎᓪᓗᒋᑦ ᐊᐱᖅᑯᑎᒋᒋᐊᒃᓴᖅ, ᐃᑲᔪᖅᑕᐅᔭᕆᐊᒃᓴᕐᓗ.

ᐃᑲᔪᖅᑐᖅᑕᐅᔭᕆᐊᖃᕈᕕᑦ ᐃᑲᔪᖅᑕᐅᔭᕆᐊᓕᖕᒥᓪᓘᓐᓃᑦ ᖃᐅᔨᒪᔭᖃᕈᕕᑦ ᓱᕐᕋᖕᓇᖅᑐᓂᒃ ᐊᑐᕐᓂᕐᓘᑎᒋᕙᒃᑕᒥᓂᒃ ᓄᖅᑲᕋᓱᒃᑐᓂᒃ, ᐅᖃᓗᒃᐸᒡᓗᓯ ᐅᕝᕙᓘᓐᓃᑦ ᐋᓐᓂᐊᕕᓕᐊᖅᐸᒡᓗᓯ, ᐅᖃᖃᑎᖃᕐᓗᓯᓘᓐᓃᑦ ᐱᖃᓐᓇᕆᔭᔅᓯᓐᓄᑦ, ᐃᓚᖕᓄᑦ, ᐃᓐᓇᕐᒧᑦ ᐅᕝᕙᓘᓐᓃᑦ ᐃᓅᓯᖃᑦᑎᐊᖅᑐᓕᕆᔨᒧᑦ. ᐃᓅᓯᓕᕆᔭᐅᓐᓇᖅᑐᖅ "ᐅᖁᒪᐃᑦᑐᖅᓯᐅᕈᑎᑎᒃ ᐅᖃᐅᓯᕆᕙᒡᓗᒋᑦ" ᐱᓕᕆᐊᖅᑎᒍᑦ. ᖃᐅᔨᒋᐊᕐᕕᒋᔪᓐᓇᖅᑕᓯ ᐱᓕᕆᐊᒃᓴᓕᕆᔨᓄᑦ ᑲᒪᔨ ᐅᕗᖓ ᐅᖄᓚᕝᕕᒋᓗᒍ 867-975-5367, ᐊᑭᖃᙱᑦᑐᒃᑯᑦ ᐅᕗᖓ 1-888-648-0070 ᐅᕝᕙᓘᓐᓃᑦ ᐃᕐᖐᓐᓈᖅᑕᐅᒃᑯᑦ ᐅᕗᖓ ᑎᑎᕋᕐᓗᓯ healing@gov.nu.ca.

ᒪᒥᓴᕐᓂᒃᒧᑦ ᐊᑐᖅᑕᐅᔪᓐᓇᖅᑐᓂᒃ ᐱᑕᖃᖅᑐᖅ ᐋᖅᑭᒃᐸᓪᓕᐊᓂᕐᒧᓪᓗ. ᐃᕝᕕᓪᓘᓐᓃᑦ ᑭᓇᒥᒡᓘᓐᓃᑦ ᖃᐅᔨᒪᔭᕐᓂᒃ ᐊᒃᓱᕈᖅᑐᖃᖅᐸᑦ, ᐳᐃᒍᖅᑕᐃᓕᒋᑦ ᐃᓄᑑᙱᓐᓂᕐᓂᒃ. ᑭᓇᐅᓂᕐᓂ ᖃᐅᔨᔭᐅᙱᓪᓗᑎᑦ ᐃᑲᔪᖅᑕᐅᔪᒪᒍᕕᑦ, ᖃᐅᔨᒋᐊᕈᓐᓇᕐᒥᔪᑎᑦ:

  • ᓄᓇᕗᒻᒥ ᑲᒪᑦᓯᐊᖅᑐᑦ ᐅᖃᓘᑎᖓᓄᑦ (ᐃᑲᕐᕋᓄᑦ 24−ᓄᑦ ᐅᖄᓚᕝᕕᒃᓴᖅ, ᐱᓇᓱᐊᕈᓯᓕᒫᖅ) ᐅᕗᖓ 867-979-3333 ᐅᕝᕙᓘᓐᓃᑦ ᐊᑭᖃᙱᑦᑐᒧᑦ 1-800-265-3333;
  • ᐃᖅᑭᓕᖕᓄᑦ ᐃᓕᓐᓂᐊᕆᐊᖅᐸᓚᐅᖅᓯᒪᔪᓄᑦ ᐋᓐᓂᐊᖃᖅᑕᐃᓕᒪᓂᕐᒧᑦ ᐱᓕᕆᐊᑦ:
    • ᑲᓇᑕᒥ ᐊᒃᓱᕈᕐᓇᖅᑐᖅᓯᐅᖅᑐᓄᑦ ᐅᖄᓚᕝᕕᒃ ᐊᑭᖃᙱᑦᑐᖅ ᓈᓴᐅᑎᓕᒃ 1-866-925-4419 (ᐅᖄᓚᕝᕕᒋᔭᒃᓴᖅ ᐃᑲᕐᕋᓄᑦ 24-ᓄᑦ ᖃᐅᑕᒫᑦᑎᐊᖅ).
    • ᐃᓕᓴᖅᓯᕕᒃ ᐊᑭᖃᙱᑦᑐᒃᑯᑦ ᐅᖄᓚᕕᒃᓴᖅ ᓈᓴᐅᑎᓕᒃ 1-888-331-4433.
  • ᖃᓄᐃᑦᑐᖃᖅᑎᓪᓗᒍ ᐱᔨᑦᑎᕋᖅᑏᑦ ᑲᓇᑕᒥ – ᐊᑐᕐᓗᒍ ᖃᕋᓴᐅᔭᒃᑯᑦ ᐅᖃᖃᑎᒌᒍᑎ ᐅᕙᓂ (www.crisisservicescanada.ca), ᐅᖃᓗᒡᓗᑎᑦ, ᐅᕝᕙᓘᓐᓃᑦ ᑎᑎᕋᕐᕕᒋᓗᒋᑦ ᐅᖄᓚᐅᑎᕋᓛᒃᑯᑦ 1-833-456-4566−ᒧᑦ.
  • Youthspace.ca − ᖃᕋᓴᐅᔭᒃᑯᑦ ᐅᖃᓪᓚᖃᑎᖃᕈᓐᓇᖅᐳᑎᑦ, ᐅᖄᓚᓗᑎᑦ ᑎᑎᕋᕐᓗᑎᒡᓘᓐᓃᑦ ᐅᖄᓚᐅᑎᕋᓛᒃᑯᑦ ᐅᕗᙵ 1-833-456-4566−ᒧᑦ ᑎᑎᕋᕐᓗᑎᓪᓘᓐᓃᑦ ᐅᕗᖓ 778-783-0177. ᐃᕐᖐᓐᓈᖅᑕᐅᒃᑯᑦ ᐃᓅᓯᓕᕆᔭᐅᓐᓇᕐᒥᔪᖅ, ᐅᖄᓚᕝᕕᐅᑐᐃᓐᓇᕐᓗᑕ ᐅᕗᖓ 250-478-8357 ᐅᕝᕙᓘᓐᓃᑦ ᐅᖄᓚᑐᐃᓐᓇᕐᓗᓯ ᐊᑭᖃᙱᑦᑐᒧᑦ ᐅᕗᖓ 1-866-478-8357;
  • ᐃᓵᒃᓯᒪᒋᑦ ᐃᓅᓯᕐᒥ ᑲᑐᔾᔨᖃᑎᒌᒃᑯᑦ − ᐊᑭᖃᙱᑦᑐᒃᑯᑦ ᐅᖄᓚᕝᕕᒋᔭᒃᓴᑦ ᐅᕗᖓ 1-866-804-2782 ᐃᕐᖐᓐᓈᖅᑕᐅᒃᑯᓪᓘᓐᓃᑦ ᑎᑎᕋᕐᕕᐅᓗᑕ ᐅᕗᖓ embracelife@inuusiq.com ᐅᕝᕙᓘᓐᓃᑦ ᐃᑭᐊᖅᑭᕕᑦᑎᓐᓄᐊᕐᓗᑎᑦ ᐅᕗᖓ (www.inuusiq.com) ᑐᑭᓯᒋᐊᒃᑲᓐᓂᕈᒪᒍᔅᓯ ᐊᒻᒪ ᐃᑲᔪᖅᓱᖅᑕᐅᔪᒪᒍᔅᓯ;
  • ᓄᑕᖅᑲᓄᑦ ᐃᑲᔪᖅᑕᐅᕕᖕᒧᑦ ᐅᖃᓗᒡᕕᒃᓴᖅ − ᐅᖄᓚᔪᓐᓇᖅᑐᑦ ᐅᕗᖓ 1-800-668-6868, ᐅᖃᓪᓚᒃᑐᓂᒡᓗ ᓈᓚᒡᕕᒃᓴᐅᓪᓗᓂ ᐊᑐᕈᓐᓇᕐᒥᔭᓯ ᐅᕗᙵᕐᓗᓯ www.kidshelpphone.ca, ᐅᕝᕙᓘᓐᓃᑦ ᖃᕆᑕᐅᔭᒃᑯᑦ ᑎᑎᕋᕐᓗᓯ ᐅᕗᖓ 'CONNECT' ᐅᕗᖓ 686868 ᐅᖃᓪᓚᒃᑎᓪᓗᓯ ᓈᓚᒃᑕᐅᔪᒪᓯᑲᐅᑎᒋᒍᔅᓯ ᑎᑎᕋᕈᒪᒍᔅᓯᓘᓐᓃᑦ ᐅᑯᐊ ᑎᑎᕋᕐᓗᒋᑦ 'TALK' ᐅᕗᖓ 686868 ᑐᓴᒐᒃᓴᓕᐅᕐᓗᑎᑦ ᐱᓕᕆᔨᒧᑦ ᐃᓕᓐᓂᐊᖅᓯᒪᔪᒧ.

ᑐᑭᓯᒋᐊᒃᑲᓐᓂᕈᒪᒍᔅᓯ, ᖃᐅᔨᒋᐊᕈᓐᓇᖅᐳᓯ ᑲᓇᑕᒥ ᑐᖅᑲᖅᑕᕐᕕᖕᒧᑦ ᓱᕐᕋᖕᓇᖅᑐᓂᒃ ᐊᑐᖅᑎᓄᑦ ᐅᐃᕆᓯᒪᓴᔪᓄᓪᓗ ᐃᑭᐊᖅᑭᕕᖕᒧᑦ ᐅᕙᙵᕐᓗᓯ https://www.ccsa.ca/national-addictions-awareness-week.

ᐃᕝᕕᑦ ᖃᐅᔨᒪᔭᕐᓂᒡᓘᓐᓃᑦ ᐊᒃᓱᕈᓐᓇᖅᑐᖅᓯᐅᒃᐸᑦ, ᐅᖄᓚᕝᕕᒋᓗᒋᑦ ᐸᓖᓯᒃᑯᑦ, ᓄᓇᔅᓯᓐᓂᓘᓐᓃᑦ ᐋᓐᓂᐊᕕᓕᐊᕐᓗᓯ ᐋᓐᓂᐊᕕᐊᓗᓕᐊᓯᑲᐅᑎᒋᓗᓯᓘᓐᓃᑦ.

###

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:

ᑕᓇᕋᐃ ᓴᒧᕕᐅᓪ
ᑐᓴᒐᒃᓴᓕᕆᔨᓄᑦ ᖃᐅᔨᒪᔨᑕᖅ
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ
867-975-5712
dsommerville1@gov.nu.ca