ᐅᖃᓚᐅᑎᓯᐅᑏᑦ

You are here

ᑭᙵᕐᓂ ᐋᓐᓂᐊᕕᒃᑖᓵᖅ ᒪᒃᐱᖅᑕᐅᓂᐊᓕᖅᑐᖅ ᐋᒡᒌᓯ 3−ᖑᓕᖅᐸᑦ

ᔪᓚᐃ 30, 2021

ᐃᓄᖕᓄᑦ ᑐᓴᒐᒃᓴᖅ ᒐᕙᒪᒃᑯᓐᓂ

ᑭᙵᕐᓂ ᐋᓐᓂᐊᕕᒃᑖᓵᖅ ᒪᒃᐱᖅᑕᐅᓂᐊᓕᖅᑐᖅ ᐋᒡᒌᓯ 3−ᖑᓕᖅᐸᑦ

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᓕᐊᓇᐃᒍᓱᒃᐳᑦ ᑐᓴᖅᑎᑦᑎᔪᓐᓇᕐᒪᑕ ᑭᙵᕐᓂ ᐋᓐᓂᐊᕕᒃᑖᓵᖅ ᒪᒃᐱᖅᑕᐅᓂᐊᓕᕐᓂᖓᓂᒃ ᐋᓐᓂᐊᕕᓕᐊᖅᑐᓪᓗ ᑐᙵᓱᒃᑎᑕᐅᑲᑕᖕᓂᐊᓕᕐᓂᖏᓐᓂᒃ ᐱᒋᐊᕐᓗᒍ ᐋᒡᒌᓯ 3-ᖑᓕᖅᐸᑦ.

ᐋᓐᓂᐊᕕᒃᑖᓵᖅ ᐱᐅᓯᕚᓪᓕᕈᑕᐅᓂᐊᖅᐳᖅ ᓄᓇᖅᑲᑎᒌᑦ ᐋᓐᓂᐊᕕᓕᐊᕈᓐᓇᖅᓯᓗᑎᒃ ᑭᙵᕐᓂ ᐃᑲᔪᖅᑐᐃᔾᔪᑎᑦᑎᐊᕙᐅᓂᖅᓴᐅᓂᐊᖅᖢᓂᓗ ᐊᔪᙱᑦᑎᐊᖅᑐᓄᑦ ᐋᓐᓂᐊᕕᖕᒥ ᐃᖅᑲᓇᐃᔭᖃᑎᒌᓄᑦ ᐊᑐᐃᓐᓇᐅᑎᑦᑎᓗᑎᒃ ᐃᓚᓕᐅᑎᓯᒪᔪᑦ ᐋᓐᓂᐊᕕᖕᒥ ᐱᔨᑦᑎᕋᐅᑎᓄᑦ.

ᐋᓐᓂᐊᕕᐊᓘᑉ ᐃᓗᐊ ᖃᐅᒪᑦᑎᐊᖅᑐᖅ, ᓂᕈᑐᓂᖅᓴᐅᓪᓗᓂᓗ ᐅᑕᖅᑭᕕᖓ ᐃᒐᓛᖅᑯᖅᑐᓪᓗᓂᓗ, ᐋᓐᓂᐊᕕᓕᐊᖅᑐᓄᑦ ᓈᒻᒪᖕᓂᖅᓴᐅᓪᓚᕆᖕᓂᐊᖅᑐᖅ. ᓄᑖᙳᕆᐊᖅᓯᒪᔪᖅ ᓂᕈᑐᓂᖓ ᓂᕈᑦᑐᕆᐊᖅᑕᐅᔪᓐᓇᓛᖅᑐᖅ ᐅᓪᓗᒃᑯᑦ ᐱᓕᕆᐊᖑᔪᒃᓴᓄᑦ ᐃᓗᐊᕐᓗᓂ ᐊᒻᒪ ᐃᓛᒃᑰᕐᕕᐅᔪᓐᓇᕐᓗᓂ ᐋᖅᑭᒃᓯᒪᓂᖓ. ᓄᑖᙳᕆᐊᖅᓯᒪᓗᑎᒃ ᐅᖄᓚᐅᑎᖏᑦ ᑐᐊᕕᕐᓇᖅᑐᖃᕐᓂᖅᐸᑦ ᑭᐅᔭᐅᔪᓐᓇᖅᓯᑦᑎᐊᕐᓗᑎᒃ ᓴᓇᓐᓇᐅᙱᓕᕌᖓᑦ.

ᐋᓐᓂᐊᕕᖕᒥᐅᑦ ᐃᑲᔪᖅᑐᐃᓲᖑᕗᑦ ᐱᓕᕆᕝᕕᖕᒥ ᐱᓕᕆᐊᒃᓴᖏᓐᓄᑦ ᓴᖅᑭᓐᓂᐊᕐᓗᒋᑦ ᐱᕚᓪᓕᖅᑎᓐᓂᐊᕐᓗᒋᓪᓗ ᐃᓱᒪᒥᒍᑦ ᐊᔪᕈᑎᓕᖕᓄᑦ ᐱᔨᑦᑎᕋᐅᑎᓄᑦ ᐊᒻᒪ ᐱᓕᕆᐊᖑᔪᒃᓴᓄᑦ. ᐋᖅᑭᒃᓯᒪᓂᕆᔭᖓ ᐃᓚᓕᐅᔾᔨᓯᒪᖕᒥᔪᖅ ᓇᓗᓇᐃᔭᐅᑎᓂᒃ ᐃᒡᓗᕈᓯᕐᒥᒃ ᓴᐃᓕᕝᕕᖕᒥ ᑕᐃᒃᑯᓄᖓ ᐃᓱᒪᒥᒍᑦ ᐋᓐᓂᐊᕈᑎᓕᖕᓄᑦ. ᐃᒡᓗᕈᓰᑦ ᓴᐃᓕᕖᑦ ᐊᑦᑕᕐᓇᙱᑦᑐᒥᒃ ᐊᒻᒪ ᒪᒥᓴᕐᕕᑦᑎᐊᕙᐅᓪᓗᑎᒡᓗ ᐋᓐᓂᐊᕕᓕᐊᖅᓯᒪᔪᓄᑦ ᐊᑐᖅᑕᐅᔪᓐᓇᕐᓗᓂ ᐊᒃᓱᕈᓗᐊᖅᑐᓄᑦ ᐅᕝᕙᓘᓐᓃᑦ ᐊᔪᕐᓇᖅᑐᖅᓯᐅᖅᑐᓄᑦ. ᐅᓇ ᐃᒡᓗᕈᓯᖅ ᓴᖅᑭᑦᑎᕕᐅᔪᓐᓇᖅᑐᖅ ᐱᓕᕆᐊᖑᖔᕈᓐᓇᖅᑐᒥᒃ ᓄᓇᖅᑲᑎᒌᕗᑦ ᐃᓯᕈᓐᓇᕐᓗᑎᒃ ᐃᓱᒪᒥᒍᑦ ᐊᔪᕈᑎᓕᖕᓄᑦ ᐱᔨᑦᑎᕋᐅᑎᓂᒃ ᐃᓂᖃᕐᓗᑎᒃ ᑐᙵᓇᑦᑎᐊᖅᑐᒥᒃ ᐊᒻᒪ ᐃᑲᔪᖅᑐᐃᔪᒥᒃ ᒪᒥᓴᕐᓂᕐᒥᒃ.

ᐃᓂᒃᓴᓕᐅᖅᑕᐅᔪᒪᒍᔅᓯ, ᐅᕗᖓ ᐅᖄᓚᔪᓐᓇᖅᐳᓯ 867-897-8820. ᑭᙵᕐᒥᐅᑦ ᐋᓐᓂᐊᕕᒃᑖᓵᒧᑦ ᐃᓯᖅᑐᑦ ᑕᑕᕿᓗᐊᖁᔭᐅᙱᑦᑐᑦ ᐅᕝᕙᓘᓐᓃᑦ ᐳᓛᕆᐊᖁᔭᐅᙱᑦᑐᑦ ᑕᑯᔭᖅᑐᕐᓗᑎᒃ ᑭᓱᑯᑦᑎᖏᓐᓂᒃ ᓄᑖᕋᐃᓐᓄᖕᓂ ᑕᐅᑦᑐᓕᖕᓂ. ᐃᓄᐃᑦ ᕿᒥᕐᕈᔪᒪᔪᑦ ᐋᓐᓂᐊᕕᐊᓗᒃᑖᓵᒥᒃ ᖃᑯᒍᒃᑲᓐᓂᖅ ᐱᕕᖃᖅᑎᑕᐅᓛᖅᑐᑦ.

###

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:

ᑕᓇᕋᐃ ᓴᒧᕕᐅᓪ
ᑐᓴᒐᒃᓴᓕᕆᔨᓄᑦ ᖃᐅᔨᒪᔨᑕᖅ
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ
867-975-5712
dsommerville1@gov.nu.ca