ᐅᖃᓚᐅᑎᓯᐅᑏᑦ

You are here

ᓄᓇᖃᖅᑳᖅᑐᓄᑦ ᐊᓴᐱᒥᒃ ᐅᔾᔨᕆᔭᖃᕐᓂᕐᒧᑦ ᐱᓇᓱᐊᕈᓯᖅ 2018

ᓄᕕᐱᕆ 30, 2018

ᑭᒃᑯᑐᐃᓐᓇᓂᒃ ᐱᔨᑦᙱᕋᕐᕕᖃᖅᐸᖕᓂᕐᒧᑦ ᐅᖃᐅᓯᐅᔪᖅ

ᓄᓇᖃᖅᑳᖅᑐᓄᑦ ᐊᓴᐱᒥᒃ ᐅᔾᔨᕆᔭᖃᕐᓂᕐᒧᑦ ᐱᓇᓱᐊᕈᓯᖅ 2018

ᓄᓇᖃᖅᑳᖅᑐᓄᑦ ᐊᓴᐱᒥᒃ ᐅᔾᔨᕆᔭᖃᕐᓂᕐᒧᑦ ᐱᓇᓱᐊᕈᓯᖅ ᑎᓯᐱᕆ 1−ᒥᑦ 7−ᒧᑦ, 2017−ᒥᐅᕗᖅ. ᓄᓇᕗᒻᒥᐅᑦ, ᒫᓐᓇ ᑕᕝᕙ ᐱᕕᒃᓴᑦᑎᐊᕙᒻᒪᕆᐅᕗᖅ ᐃᑲᔪᕐᓂᐊᕐᓗᓂ ᒥᑭᒡᓕᒋᐊᖅᑎᑦᑎᓂᕐᒥᒃ ᐃᓱᒪᒥᐅᑕᕆᔭᐅᕙᒃᑐᒥᒃ ᐱᔾᔪᑎᖃᕐᓗᓂ HIV/AIDS−ᒥᒃ ᐊᓯᖏᓐᓄᓪᓗ ᑯᔭᖕᓂᒃᑯᑦ ᐊᐃᑦᑐᕐᓘᑕᐅᕙᒃᑐᓄᑦ ᐅᖃᐅᓯᖃᕐᓂᒃᑯᑦ ᑕᐃᒪᐃᑎᑦᑎᑦᑕᐃᓕᒪᕙᖕᓂᕐᒥᒃ! ᖃᐅᔨᓴᕐᕕᐅᓂᖅ ᖃᐅᔨᒪᓕᕈᒪᓗᑎᑦ ᖃᓄᐃᓕᖓᓕᕐᒪᖔᖅᐱᑦ ᐃᓕᖕᓂᒃ ᓴᐳᔾᔨᓯᒪᓇᔭᖅᐳᖅ, ᐱᖃᑎᒋᕙᒃᑕᐃᑦ(ᑕᑎᑦ), ᓄᓇᓕᔅᓯᓗ.

ᒫᓐᓇ ᓴᖅᑭᑉᐸᖕᓂᕆᔭᖏᑦ HIV/AIDS−ᖑᓂᕋᖅᑕᐅᔫᑉ ᐊᑦᑎᒃᑐᒻᒪᕆᑯᓗᖕᒦᑉᐳᑦ ᓄᓇᕗᒻᒥ. ᐊᕐᕌᒎᓵᖅᑐᑦ ᑕᑯᕝᕕᐅᓯᒪᕗᑦ ᐱᐅᔪᓂᒃ ᐊᓯᔾᔨᕐᓂᕆᔭᐅᔪᓂᒃ ᐃᓄᖕᓄᑦ ᓇᓗᓇᐃᕐᑕᐅᕝᕕᐅᓯᒪᔪᓄᑦ HIV−ᖃᕐᓂᖏᓐᓂᒃ. ᓄᑖᓂᒃ ᐃᓗᐊᖅᓴᐅᑎᓂᒃ ᐱᑕᖃᓕᖅᑎᓪᓗᒍ, ᐃᓄᐃᑦ HIV−ᖃᖅᑐᑦ ᐊᑯᓂᐅᓂᖅᓴᖅ ᐃᓅᖃᑦᑕᓕᖅᐳᑦ. ᑕᒪᒃᑯᐊ ᐃᓗᐊᖅᓴᖅᑕᐅᓃᑦ ᒥᑭᒡᓕᒋᐊᖅᑎᑦᑎᒋᕗᑦᑕᐅᖅ ᖁᐊᖅᓵᕐᓇᕈᓐᓇᖅᑐᒥᒃ ᑐᓂᓯᓇᔭᕐᓂᕐᒥᒃ HIV−ᒥᒃ ᐃᓄᖕᒧᑦ ᐊᓯᖕᓄᑦ

ᐱᖓᓱᓂᒃ ᐱᑕᖃᖅᐳᖅ ᓄᓇᕗᒻᒥᐅᑦ ᐊᑐᕈᓐᓇᖅᑕᖏᓐᓂᒃ ᓯᐊᒻᒪᒃᑎᑦᑎᑦᑕᐃᓕᒪᓂᐊᕐᓗᑎᒃ HIV−ᒥᒃ ᐊᓯᖏᓐᓂᒡᓗ ᑯᔭᖕᓂᒃᑯᑦ ᐊᐃᑦᑐᕐᓘᑕᐅᕙᒃᑐᓂᒃ ᐋᓐᓂᐊᕐᓂᕆᔭᐅᔪᓂᒃ (STI−ᓂᒃ):

  • 1) ᐅᖃᐅᓯᕆᕙᒡᓗᒍ ᓄᓕᐊᖅᐸᖕᓂᖅ, HIV/AIDS, ᑯᔭᖕᓂᒃᑯᑦ ᐋᓐᓂᐊᑖᕆᔭᐅᕙᒃᑐᖅ, ᐊᓯᖏᓐᓄᓪᓗ STI−ᖑᓂᕋᖅᑕᐅᔪᓄᑦ ᐃᑲᔪᕈᒪᓂᕐᒧᑦ ᖃᓄᖅ ᐃᓱᒪᒋᔭᐅᕙᖕᓂᖓᓂᒃ, ᑲᑉᐱᐊᒋᔭᐅᕙᖕᓂᖏᓐᓂᒃ ᑲᙳᒋᔭᐅᕙᖕᓂᖏᓐᓂᒡᓗ.
  • 2) ᐊᑐᖅᑐᖃᖅᐸᒡᓗᓂ ᐅᓲᑉ ᐴᖏᓐᓂᒃ. ᐅᓲᑉ ᐴᖏᑦ ᖃᐅᓯᓕᕈᑏᓪᓗ ᐊᑭᖃᙱᑉᐳᑦ ᐋᓐᓂᐊᕕᓕᐊᕐᕕᖕᓂ ᐊᓯᖏᓐᓂᒡᓗ ᓄᓇᓕᖕᓂ ᐃᓂᒋᔭᐅᔪᓂ ᓄᓇᕗᒻᒥ.
  • 3) ᖃᐅᔨᓴᖅᑕᐅᓗᑎᑦ HIV−ᒧᑦ, ᑯᔭᖕᓂᒃᑯᑦ ᐋᓐᓂᐊᖅᑖᕆᔭᐅᕙᒃᑐᒧᑦ, ᐊᓯᖏᓪᓗᓪᓗ STI−ᓄᑦ ᑯᔭᖃᑎᖃᓚᐅᙱᓐᓂᕐᓂ ᓄᑖᒥᒃ ᐱᖃᑎᒋᔭᕆᐅᖅᑕᕐᓂᒃ, ᐃᕝᕕᓪᓘᓐᓃᑦ ᐱᖃᑎᒋᕙᒃᑕᑎᓪᓘᓐᓃᑦ ᑯᔭᖃᑎᖃᕐᓂᖅᐸᑕ ᐊᓯᒥᓂ

ᐱᖃᑎᒋᕙᙱᑕᒥᓂᒃ, ᖃᐅᔨᔾᔪᑕᐅᔪᓐᓇᖅᑐᓂᒡᓗ ᐱᓯᒪᒍᕕᑦ (ᓲᕐᓗ ᐊᔾᔨᐅᙱᑦᑐᒃᑯᑦ ᑕᖃᓯᒪᕙᒡᓗᑎᑦ, ᐋᓐᓂᐊᙱᑦᑐᓂᒃ ᐊᒥᕐᓗᖕᓂᖃᕐᓗᑎᑦ ᒪᕿᓂᖃᕐᓗᑎᓪᓘᓐᓃᑦ ᐅᓱᖕᓂᑦ ᐅᑦᑐᖕᓂᓪᓘᓐᓃᑦ). ᖃᐅᔨᓴᖅᑕᐅᓗᑎᑦ ᐊᑐᕋᓗᐊᕐᓂᕈᕕᓪᓘᓐᓃᑦ ᐅᓲᑉ ᐴᖓᓂᒃ.

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᔾᔨᒌᙱᑦᑐᓂᒃ ᐊᑐᖅᑕᐅᔪᓐᓇᖅᑐᓂᒃ ᒪᓂᒪᑎᑦᑎᕗᑦ ᐃᑲᔪᕈᒪᓪᓗᑎᒃ ᓄᓇᕗᒻᒥᐅᓂᒃ ᐅᖃᖃᑎᖃᕐᓂᐊᖅᑎᓪᓗᒋᑦ ᐱᖃᑎᒋᕙᒃᑕᒥᓂᒃ, ᐋᓐᓂᐊᖃᕐᓇᙱᑦᑐᓕᕆᔨᓂᒃ, ᓄᑕᖅᑲᓄᓪᓗ ᖃᓄᐃᙱᑦᑐᐊᖅᑐᒃᑯᑦ ᐃᓅᖃᑎᒌᒃᐸᖕᓂᕆᔭᐅᔪᓂᒃ, ᓄᓕᐊᖅᐸᖕᓂᕆᔭᐅᔪᒥᒃ, ᖁᐊᖅᓵᕐᓇᙱᓐᓂᖅᓴᒃᑯᑦ ᑯᔭᒃᐸᖕᓂᕐᒥᒃ, ᑯᔭᖕᓂᕐᒧᑦ ᐊᖏᖅᓯᕙᖕᓂᕐᒥᒃ, ᑯᔭᖕᓂᒃᑯᓪᓗ ᐊᐃᑦᑐᕐᓘᑕᐅᕙᒃᑐᓂᒃ ᐋᓐᓂᐊᕆᔭᐅᓕᖅᐸᒃᑐᓂᒃ ᐱᑕᖃᖅᑎᑦᑎᑦᑕᐃᓕᒪᓂᕐᒧᑦ ᖃᐅᔨᓴᖅᑕᐅᓂᕐᒧᓪᓗ.

ᑐᓴᖅᑕᖃᕈᒪᔪᖃᖅᐸᑦ ᑯᔭᖕᓂᒃᑯᑦ ᖃᓄᐃᙱᑦᑐᓐᓇᕐᓂᕐᒥᒃ HIV/AIDS−ᒧᓪᓗ, ᑕᑯᔭᖅᑐᕐᓗᒍ ᐋᓐᓂᐊᕕᓕᐊᕐᕕᓯ ᐅᕗᖓᓘᓐᓃᑦ, www.irespectmyself.ca.

###

ᐱᕙᓪᓕᐊᔪᓄᑦ ᖃᐅᔨᒋᐊᕐᕕᒃ:

ᓴᐃᕌ ᐹᑐᓴᓐ
ᑐᓴᒐᒃᓴᓕᕆᔨᓄᑦ ᐊᐅᓚᑦᑎᔨᐅᓚᐅᑲᒃᑐᖅ
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ
867-975-5762
spaterson@gov.nu.ca