ᐅᖃᓚᐅᑎᓯᐅᑏᑦ

You are here

ᓄᑖᓂᒃ ᓇᓗᓇᐃᖅᑕᐅᔪᖃᙱᑦᑐᖅ ᓄᕙᔾᔪᐊᕐᓇᖅ 19-ᓕᓐᓂᒃ ᓄᓇᕗᒻᒥ

ᓄᕕᐱᕆ 26, 2020

ᐱᕙᓪᓕᐊᔪᑦ ᑐᓴᕋᑦᓴᑦ

ᓄᑖᓂᒃ ᓇᓗᓇᐃᖅᑕᐅᔪᖃᙱᑦᑐᖅ ᓄᕙᔾᔪᐊᕐᓇᖅ 19-ᓕᓐᓂᒃ ᓄᓇᕗᒻᒥ

ᐃᖃᓗᐃᑦ, ᓄᓇᕗᑦ (ᓄᕕᐱᕆ 26, 2020) − ᐅᓪᓗᒥ, ᓄᓇᕗᒻᒥ ᓇᓗᓇᐃᖅᓯᔪᑦ ᓄᑖᓂᒃ ᓇᓗᓇᐃᖅᑕᐅᓯᒪᔪᖃᙱᒻᒪᑦ ᓄᕙᔾᔪᐊᕐᓇᖅ 19-ᑖᖅᓯᒪᔪᓂᒃ. 150 ᓄᕙᔾᔪᐊᕐᓇᖅᑐᓖᑦ ᓄᓇᕗᒻᒥ, ᐱᖓᓱᒃᑲᓐᓃᓪᓗ ᖃᓄᐃᒍᓐᓃᕐᓂᕋᖅᑕᐅᔪᑦ ᓄᕙᔾᔪᐊᕐᓇᖅᑐᖃᕆᓐᓃᖅᑐᑦ ᑲᑎᓕᒫᕐᓗᒋᑦ ᑕᓪᓕᒪᐅᓕᖅᑐᑦ. ᖃᓄᐃᒍᓐᓃᕋᑖᖅᓯᒪᔪᑦ ᑎᑭᕋᕐᔪᐊᒥ ᑲᖏᖅᖠᓂᕐᒥᓗ.

“ᐅᓪᓗᒥ, ᖃᐅᔨᕙᓪᓕᐊᑎᓪᓗᑕ ᖃᓄᐃᒍᓐᓃᖅᐸᓪᓕᐊᔪᓂᒃ, ᐱᒻᒪᕆᐅᕗᖅ ᐃᖅᑲᐃᑎᒋᐊᖃᕐᓂᕗᑦ ᓄᓇᕗᒻᒥᐅᑦ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᒪᓕᑦᑕᐅᖃᖅᑎᑕᐅᔪᑦ ᓱᓕ ᐊᑕᒻᒪᑕ ᒪᓕᑦᑕᐅᒋᐊᖃᖅᑐᑎᓪᓗ ᑭᒃᑯᓕᒫᓄᑦ,” ᐅᖃᖅᓯᒪᔪᖅ ᓘᑦᑖᖅ ᒪᐃᑯᓪ ᐸᑐᓴᓐ, ᓄᓇᕗᒻᒥ ᐋᓐᓂᐊᖃᕐᓇᖏᑦᑐᓕᕆᔨᒻᒪᕆᒃ. “ᓇᓗᓇᐃᖅᓯᕕᒋᒍᒻᒥᔭᒃᑲ ᓄᓇᕗᒻᒥᐅᑦ ᑕᐃᒃᑯᐊ ᓄᕙᔾᔪᐊᕐᓇᖅᑐᖃᓚᐅᖅᑐᑦ ᓇᓗᓇᐃᖅᑕᐅᓯᒪᓕᖅᑲᑕ ᖃᓄᐃᒍᓐᓃᕐᓂᕋᖅᑕᐅᓗᑎᒃ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐃᖅᑲᓇᐃᔭᖅᑎᓄᑦ, ᐅᓗᕆᐊᓇᖅᑐᒦᒍᓐᓃᖃᑦᑕᖅᑐᖅ ᐊᓂᒍᓐᓇᖅᓯᓗᑎᒃ ᐱᒋᐊᒃᑲᓐᓂᕐᓗᑎᓪᓗ ᖃᓄᐃᓕᐅᕈᑎᒋᕙᑦᑕᒥᓂᒃ ᒪᓖᓐᓇᕐᓗᑎᒃ ᒫᓐᓇᐅᔪᖅ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᒪᓕᑦᑕᐅᒋᐊᖃᖅᑎᑕᐅᔪᓂᒃ.”

ᓱᓕ ᓇᓗᓇᐃᖅᑕᐅᓯᒪᙱᑦᑐᖅ ᓄᓇᓕᓐᓂ ᓯᐊᕐᒪᐸᓪᓕᐊᓂᖓᓂᒃ ᑲᖏᖅᖠᓂᕐᒥ ᑎᑭᕋᕐᔪᐊᒥᓗ. ᐃᓘᓐᓇᑎᒃ ᓄᕙᔾᔪᐊᕐᓇᖅ 19-ᑖᖅᓯᒪᔪᑦ ᖃᐅᔨᒋᐊᖅᑕᐅᖏᓐᓇᖅᑐᑦ ᐊᓂᑦᑕᐃᓕᑎᓪᓗᒋᑦ ᓱᓕᓗ ᖃᓄᐃᒐᑎᒃ, ᐃᓚᖏᑦ ᖃᓄᐃᒍᑎᖃᒑᓛᑦᑐᑎᒃ. ᑲᑎᔭᒥᓂᐅᔪᓂᒃ ᖃᐅᔨᓴᖅᐸᓪᓕᐊᔪᑦ ᓱᓕ ᐃᓘᓐᓇᖏᓐᓂ ᐊᑦᑐᖅᑕᐅᓯᒪᔪᓂ ᓄᓇᓕᓐᓂ ᐋᓐᓂᐊᖃᕐᓇᖏᑦᑐᓕᕆᓂᕐᒧᓪᓗ ᐃᖅᑲᓇᐃᔭᖅᑏᑦ ᖃᐅᔨᒋᐊᕐᕕᖃᐃᓐᓇᖅᑐᑦ ᐊᑕᖏᖅᑐᒋᑦ ᐊᓂᑦᑕᐃᓕᑎᑕᐅᔪᓂᒃ.

ᓄᕕᐱᕆ 26-ᒧᓄᑦ, 181 ᖃᐅᔨᓴᖅᑕᐅᓯᒪᔪᑦ ᑲᖏᑦᖠᓂᕐᒥ ᓄᕙᔾᔪᐊᕐᓇᖅᑐᖃᙱᑦᑐᑦ. ᐊᕐᕕᐊᓂ ᖃᐅᔨᓴᖅᑕᐅᓯᒪᔪᑦ 423 ᓄᕙᔾᔪᐊᕐᓇᖅᑐᖃᙱᑦᑐᑦ. ᖃᐅᔨᓴᖅᑕᐅᓯᒪᔪᑦ ᑎᑭᕋᕐᔪᐊᒥ 68 ᓄᕙᔾᔪᐊᕐᓇᖅᑐᖃᙱᑦᑐᑦ. ᖃᐅᔨᓴᖅᑕᐅᕙᓪᓕᐊᖏᓐᓇᖅᑐᑦ ᓴᓂᑭᓗᐊᕐᒥ.

ᑭᓇᑐᐃᓐᓇᖅ ᖃᓂᒋᔭᖃᖅᑐᒥᓂᐅᓱᕆᒍᓂ ᓄᕙᔾᔪᐊᕐᓇᖅ 19-ᓕᒻᒧᑦ ᐅᖄᓚᖁᔭᐅᔪᖅ ᓄᕙᔾᔪᐊᕐᓇᐅᑉ ᒥᑦᓵᓄᑦ ᐅᖃᓚᕕᒻᒧᑦ 1-888-975-8601 ᐊᑯᓐᓂᖏᓐᓂ 10 ᐅᓪᓛᓴᒃᑯᑦ ᐊᒻᒪᓗ 6 ᐅᓐᓄᓴᒃᑯᑦ, ᖃᐅᔨᒃᑲᐃᑦᓴᐅᑎᒋᓗᑎᓪᓘᓐᓃᑦ ᓄᓇᓕᓐᓂ ᐋᓐᓂᐊᕐᕕᖓᓄᑦ, ᐊᓂᑦᑕᐃᓕᑦᓴᐅᑎᒋᓕᕐᓗᑎᓪᓗ ᐊᖏᕐᕋᒥᓐᓂᒃ ᐅᓪᓗᓂᒃ 14-ᓂᒃ. ᐅᐸᒍᑎᑦᑕᐃᓕᓗᑎᒃ ᐋᓐᓂᐊᕐᕕᒻᒧᑦ.

ᓄᑖᖑᓂᖅᐹᓂᒃ ᑐᑭᓯᒋᐊᖃᑦᑕᕈᒪᒍᕕᑦ ᐃᑲᔫᑎᑦᓴᐃᓪᓗ ᒥᑦᓵᓄᑦ ᓄᕙᔾᔪᐊᕐᓇᖅ 19 ᓄᓇᕗᒻᒥ, ᐅᕗᖓᕐᓗᑎᑦ: https://www.gov.nu.ca/health/information/covid-19-novel-coronavirus

ᓄᑖᖑᓂᖅᐹᓂᒃ ᑐᑭᓯᒋᐊᖃᑦᑕᕈᒪᒍᕕᑦ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᒪᓕᑦᑕᐅᒋᐊᓕᓐᓂᒃ, ᐅᕗᖓᕐᓗᑎᑦ: https://www.gov.nu.ca/health/information/nunavuts-path

ᑐᓴᖅᑎᑦᓯᒋᐊᓚᖓᔪᑦ ᐱᕙᓪᓕᐊᔪᓕᕆᔨᓂᒃ ᖃᐅᔨᒃᑲᐃᓕᖅᑲᑕ 11:00 ᐅᓪᓛᓴᒃᑯᑦ ᑲᓇᓐᓇᕐᒥ ᓯᕿᕐᖑᔭᖓᒍᑦ, ᑕᓪᓕᒥᕐᒥ, ᓄᕕᐱᕆ 27.

###

ᐱᕙᓪᓕᐊᔪᓕᕆᔨᓄᑦ ᖃᐅᔨᒋᐊᕐᕕᑦᓵᒃ:

ᑲᐃᑦ ᒪᒡᓚᐅᑦ
ᐱᕙᓪᓕᔪᓄᑦ ᑎᑎᕋᖅᑎ ᓯᕗᓕᖅᑎᒧᑦ ᓴᕕᑲᑖᕐᒧᑦ
867-975-5059
cmacleod@gov.nu.ca

ᑯᕆᔅ ᐴᒡᓕᐊ
ᐊᐅᓚᑦᑎᔨᐅᑲᐃᓐᓇᖅᑐᖅ, ᑐᓴᐅᒪᔪᓕᕆᓂᖕᓄᑦ
ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ ᐱᓕᕆᕝᕕᖓ
867-975-5949
cpuglia@gov.nu.ca