ᐅᖃᓚᐅᑎᓯᐅᑏᑦ

You are here

ᓄᕙᒡᔪᐊᕐᓇᖅ-19−ᓕᖕᒥᒃ ᓇᓗᓇᐃᖅᑕᐅᔪᖃᖅᐳᖅ ᑲᖏᖅᖠᓂᕐᒥᑦ

ᓯᑎᐱᕆ 09, 2021

ᐱᕙᓪᓕᐊᔪᑦ ᓴᖅᑭᑕᐅᔪᑦ

ᓄᕙᒡᔪᐊᕐᓇᖅ-19−ᓕᖕᒥᒃ ᓇᓗᓇᐃᖅᑕᐅᔪᖃᖅᐳᖅ ᑲᖏᖅᖠᓂᕐᒥᑦ

ᑲᖏᕐᖠᓂᖅ, ᓄᓇᕗᑦ (ᓯᑎᐱᕆ 8, 2021) – ᓘᒃᑖᖅ ᕉᓵᓐ ᓯᕕᐅᕐ, ᓄᓇᕗᒻᒥ ᓘᒃᑕᖅ ᐊᖓᔪᖅᑳᕆᓚᐅᑲᒃᑕᖓ ᐋᓐᓂᐊᖃᕐᓇᖏᑦᑐᓕᕆᔨᒃᑯᓐᓂ, ᓇᓗᓇᐃᖅᓯᖅᑲᐅᕗᖅ ᓄᑖᒥᒃ ᓄᕙᒡᔪᐊᕐᓇᖅ-19−ᑖᖅᑐᒥᒃ ᑲᖏᖅᖠᓂᕐᒥᑦ.

"ᓯᑎᐱᕆ 8−ᒥᑦ ᓄᕙᒡᔪᐊᖅᑐᖃᓕᕐᓂᖓᓂ ᓇᓗᓇᐃᖅᓯᓚᐅᖅᖢᑎᒃ ᑲᖏᖅᖠᓂᕐᒥ ᒫᓐᓇᓗ ᐃᓄᑐᐊᒃᑯᕕᖕᒦᓕᖅᖢᓂ," ᐅᖃᖅᑐᖅ ᓘᒃᑖᖅ. ᓯᕕᐅᕐ. "ᑕᐃᓐᓇ ᐃᓄᒃ ᑲᖏᖅᖠᓂᕐᒧᐊᓚᐅᖅᑐᖅ ᓯᑎᐱᕆ 7−ᒥᑦ ᖃᓪᓗᓈᓂᙶᖅᖢᓂ ᑲᓇᑕᒥ ᓄᓇᕗᒻᒥᓗ ᐃᖅᑲᓇᐃᔭᕆᐊᖅᓯᒪᓚᐅᖅᖢᓂ ᐋᓐᓂᐊᓕᕇᒃᑯᑎᒧᑦ ᐱᖃᑕᐅᒋᐊᙱᖦᖢᓂ. ᓄᕙᕐᔪᐊᕐᓂᕋᖅᑕᐅᓕᖅᑐᖅ ᐊᒃᑐᐊᓂᖃᙱᑉᐳᖅ ᑭᖑᓂᑦᑎᓐᓂ ᓄᕙᕐᔪᐊᕐᓂᕋᖅᑕᐅᓚᐅᖅᑐᒧᑦ ᐋᒌᓯ 29−ᖑᑎᓪᓗᒍ."

ᖃᓂᒋᓚᐅᖅᑕᕕᓂᖏᓐᓂ ᖃᐅᔨᓇᓱᐃᓐᓇᖅᑐᑦ ᒫᓐᓇᓗ ᓄᓇᓕᖕᓄᑦ ᐊᑦᑕᕐᓇᓗᐊᕋᓱᒋᔭᐅᙱᑦᑐᖅ. ᐊᓯᖏᓐᓂᒃ ᐊᓯᔾᔨᖅᑐᖃᔾᔮᙱᑦᑐᖅ ᐋᓐᓂᐊᖅᑐᓕᕆᔨᒃᑯᓐᓂ ᒪᓕᒃᑕᐅᖁᔭᐅᔪᓂᑦ ᒫᓐᓇᐅᔪᖅ.

ᑕᐃᓐᓇ ᐃᓄᒃ ᓄᓇᕗᒻᒥᐅᑕᐅᙱᓐᓂᖓᓄᑦ, ᓄᕙᒡᔪᐊᕐᓂᕋᖅᑕᐅᔪᖅ ᓄᓇᕗᒻᒥ ᓈᓴᖅᑕᐅᖃᑕᐅᔾᔮᙱᑦᑐᖅ.

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐅᖃᐅᔾᔨᒋᕗᑦ ᓄᕙᕐᔪᐊᕐᓇᖅ-19−ᖃᕐᓂᕋᖅᑕᐅᓕᓵᖅᑐᒥᒃ ᖃᓂᒃᓴᖅᑐᖃᑐᐃᓐᓇᕆᐊᖃᓚᐅᕐᓂᖓᓂ ᑲᓃᑎᐊᓐ ᐅᑭᐅᖅᑕᖅᑐᒥ 300 ᖃᖓᑕᓲᒃᑯᑦ ᐅᐃᓂᐹᒡᒥᙶᓚᐅᖅᑐᖅ ᓯᑎᐱᕆ 7−ᖑᑎᓪᓗᒍ 9:35−ᒥ ᐅᓪᓛᒃᑯᑦ ᑲᖏᖅᖠᓂᕐᒧᐊᖅᖢᓂᓗ 11:30−ᒥ ᐅᓪᓛᒃᑯᑦ ᐊᒻᒪᓗ ᑳᒻ ᐃᐅᒃᑯᑦ 232 ᑲᖏᖅᖠᓂᕐᒥᑦ ᐊᐅᓪᓚᓚᐅᖅᑐᖅ ᓇᐅᔮᓄᑦ ᐅᓪᓗᕈᒻᒥᓴᕐᓇᒃᑯᑦ ᓯᑎᐱᕆ 7−ᖑᑎᓪᓗᒍ. ᖃᖓᑕᓲᖅ ᓇᐅᔮᓄᑦ ᒥᑦᑐᓐᓇᓚᐅᙱᑦᑐᖅ ᓯᓚ ᐱᔾᔪᑎᒋᓪᓗᒍ ᑲᖏᖅᖠᓂᕐᒧᓪᓗ ᐅᑎᓚᐅᖅᖢᓂ.

ᑲᐱᔭᐅᓯᒪᙱᑦᑐᑦ ᐊᒻᒪ ᐊᑕᐅᓯᐊᖅᖢᑎᒃ ᑲᐱᔭᐅᓯᒪᔪᑦ ᐅᑯᓇᓂ ᐃᒃᓯᕚᓚᐅᖅᑐᑦ 3−ᒥᑦ 9−ᒧᑦ ᑲᓃᑎᐊᓐ ᐅᑭᐅᖅᑕᖅᑐᑉ 300 ᖃᖓᑕᓲᖓᓂ ᐅᕝᕙᓘᓐᓃᑦ ᑭᖑᓪᓖᑦ ᑎᓴᒪᖏᓐᓂ ᑳᓪᒻ ᐃᐅ 232 ᖃᖓᑕᓲᖓᓂ ᐃᒃᓯᕚᓚᐅᖅᑐᑦ ᐅᖄᓚᔭᕆᐊᖃᖅᐳᑦ ᐅᕗᖓ 1-888-975-8601 10−ᒥ ᐅᓪᓛᒃᑯᑦ ᐱᒋᐊᕐᓗᓂ 6−ᒧᐊᕋᓱᖕᓂᖓᓄᑦ ᕿᑭᖅᑖᓗᖕᒥᐅᑦ ᖃᐅᔨᓴᐅᑎᖓ ᒪᓕᒡᓗᒍ ᖃᐅᔨᓴᖅᑕᐅᕝᕕᒋᓂᐊᖅᑕᖓᓂ ᐋᖅᑭᒃᓯᓂᐊᕐᒪᑕ. ᑲᐱᔭᐅᕌᓂᒃᓯᒪᔪᑦ ᐃᓄᐃᑦ ᐅᖄᓚᔪᓐᓇᕆᕗᑦ ᖃᐅᔨᓴᖅᑕᐅᔪᒪᓗᑎᒃ ᐃᑲᕐᕋᑦ 72 ᐊᓂᒍᖅᐸᑦ ᖃᖓᑕᕝᕕᒋᓚᐅᖅᑕᖓ. ᐃᑭᒪᖃᑕᐅᓚᐅᖅᑐᓕᒫᑦ ᖃᐅᔨᓴᕆᐊᖃᖅᐳᑦ ᖃᓂᒻᒪᒃᐸᓪᓕᐊᖕᒪᖔᑦ ᐅᓪᓗᓄᑦ 14−ᓄᑦ (ᓯᑎᐱᕆ 21) ᐊᒻᒪ ᑭᓇᑐᐃᓐᓇᖅ ᖃᓂᒪᑲᑕᓕᖅᐸᑦ ᐃᓄᑑᔭᕆᐊᖃᓯᑲᐅᑎᒋᔭᕆᐊᓕᒃ ᐅᖄᓚᓗᓂᓗ ᖃᐅᔨᓴᖅᑕᐅᔪᒪᓗᓂ.

ᑭᓇᑐᐃᓐᓇᖅ ᖃᓂᒪᑲᑕᓕᖅᐸᑦ ᓄᕙᕐᔪᐊᕐᓇᖅ-19−ᒥᑦ ᐅᖄᓚᖁᔭᐅᕗᖅ ᓄᕙᕐᔪᐊᕐᓇᒧᑦ ᐅᖄᓚᕝᕕᖓᓄᑦ ᖃᐅᔨᓴᖅᑕᐅᕝᕕᒋᓂᐊᖅᑕᖓᓂ ᐋᖅᑭᒃᓯᓗᑎᒃ ᐅᕝᕙᓘᓐᓃᑦ ᐋᓐᓂᐊᕕᖓᓄᑦ ᑐᓴᖅᑎᑦᑎᑲᐅᑎᒋᑦᑎᐊᕐᓗᓂ. ᐋᓐᓂᐊᕕᓕᐊᖅᑕᐃᓕᒋᑦ ᓇᖕᒥᓂᖅ.

ᓱᓕ ᑲᐱᔭᐅᓐᓇᖅᐳᖅ ᓄᓇᕘᓕᒫᒥ. ᐋᓐᓂᐊᕕᓯ ᐅᖃᓗᒡᕕᒋᓗᒍ ᐃᓂᒃᓴᓕᐅᕐᓗᑎᑦ ᐃᓯᑐᐃᓐᓇᕐᓗᑎᓪᓘᓐᓃᑦ ᐃᖃᓗᐃᑦ ᐅᖁᒪᐃᓐᓂᕐᓂᐊᕐᕕᖓᓄᑦ ᐱᓇᓱᐊᕈᓯᑕᒫᑦ Moderna-ᒧᑦ (ᐅᑭᐅᓕᖕᓄᑦ 18 ᐅᖓᑖᓄᓪᓗ) ᐱᖓᔪᐊᒃᑯᓪᓗ Pfizer (ᐅᑭᐅᓕᖕᓄᑦ 12-ᓂᑦ 17-ᒧᑦ). ᐋᓐᓂᐊᓕᕇᒃᑯᑎᒧᑦ ᑲᐱᔭᐅᓯᒪᓗᓂ ᐱᐅᓂᖅᐹᖑᕗᖅ ᐃᓕᖕᓂᑦ, ᐃᓚᖕᓂᑦ ᐊᒻᒪᓗ ᓄᓇᓕᖕᓂ ᓴᐳᔾᔨᓯᒪᓇᓱᒡᓗᑎᑦ.

###

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:

ᑯᕆᔅ ᐴᒡᓕᐊ
ᐊᐅᓚᑦᑎᔨᐅᓚᐅᑲᒃᑐᖅ ᑐᓴᐅᒪᔪᓕᕆᔨᒃᑯᓐᓂ
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ
867-975-5949
cpuglia@gov.nu.ca