You are here

ᓄᕙᕐᔪᐊᕐᓇᖅ-19−ᒧᑦ ᑲᐴᑎᒃᑲᓐᓃᑦ ᐊᖏᖅᑕᐅᕗᑦ 50−ᓂᒃ ᐅᖓᑖᓂᓪᓗ ᐅᑭᐅᓕᖕᓄᑦ ᑎᒥᒥᒍᓪᓗ ᐊᓐᓇᐅᒪᔾᔪᑎᖃᑦᑎᐊᙱᑦᑐᓄᑦ ᓄᑕᖅᑲᓄᑦ

ᐄᐳᕈ 12, 2022

ᒐᕙᒪᒃᑯᓐᓂ ᐃᓄᖕᓄᑦ ᑐᓴᒐᒃᓴᑦ

ᓄᕙᕐᔪᐊᕐᓇᖅ-19−ᒧᑦ ᑲᐴᑎᒃᑲᓐᓃᑦ ᐊᖏᖅᑕᐅᕗᑦ 50−ᓂᒃ ᐅᖓᑖᓂᓪᓗ ᐅᑭᐅᓕᖕᓄᑦ ᑎᒥᒥᒍᓪᓗ ᐊᓐᓇᐅᒪᔾᔪᑎᖃᑦᑎᐊᙱᑦᑐᓄᑦ ᓄᑕᖅᑲᓄᑦ

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᓄᓇᕗᑦ ᒐᕙᒪᖓᓂ, ᐊᔪᕆᖅᓲᔾᔨᔾᔪᑕᐅᓵᓚᐅᖅᑐᖅ ᑲᓇᑕᒥ ᐅᖃᐅᔾᔪᐃᔨᑦ ᑲᑎᒪᔨᕋᓛᖏᓐᓂ ᖃᓄᐃᓕᐅᕈᑕᐅᓪᓗᓂ ᑲᐴᑎᑦ ᒥᒃᓵᓄᑦ, ᑐᒡᓕᐊᓂ ᓄᕙᕐᔪᐊᕐᓇᖅ−19−ᒧᑦ ᓴᙱᓂᖅᓴᒥᒃ ᑲᐴᑎᒥᒃ ᐊᑐᐃᓐᓇᐅᑎᑦᑎᓂᐊᓕᖅᐳᑦ (ᑎᓴᒪᒋᓕᖅᑕᖓᓂ) ᓄᓇᕗᒻᒥᐅᓕᒫᓄᑦ 50−ᓂᒃ ᐅᖓᑖᓂᓪᓗ ᐅᑭᐅᓕᖕᓄᑦ. ᑖᓐᓇ ᓴᙱᓂᖅᓴᖅ ᑲᐴᑎᒃᑲᓐᓂᖅ ᐃᓄᖕᓄᑦ 50−ᓂᒃ ᐅᖓᑖᓂᓪᓗ ᐅᑭᐅᓕᖕᓄᑦ ᐊᑐᐃᓐᓇᐅᓂᐊᖅᐳᖅ ᐱᖓᔪᖓᓂ ᑲᐱᔭᐅᓚᐅᖅᑐᓄᑦ ᑕᖅᑭᑦ ᑎᓴᒪᑦ ᓇᑉᐸᖓᓂᓪᓗ ᐊᓂᒍᖅᑐᓂᑦ.

ᓴᙱᓂᖅᓴᑦ ᑲᐴᑎᑦ (ᐱᖓᔪᖓᓂ ᑲᐴᑦ) ᓄᑕᖅᑲᓄᑦ ᐊᑐᐃᓐᓇᐅᓂᐊᕐᒥᔪᖅ ᑕᓪᓕᒪᓂᒃ ᖁᓕᓪᓗ ᐊᑕᐅᓯᕐᒧᑦ ᑎᑭᓪᓗᒍ ᐅᑭᐅᓕᖕᓄᑦ ᑎᒥᒥᒍᑦ ᐱᓗᐊᙱᑦᑐᒥᑦ ᐱᕐᔪᐊᒥᓪᓘᓐᓃᑦ ᐊᓐᓇᐅᒪᔾᔪᑎᖃᑦᑎᐊᙱᑦᑐᓄᑦ, ᐱᓇᓱᐊᕈᓯᑦ ᑎᓴᒪᓂᑦ 8−ᓄᑦ ᑎᑭᓪᓗᒍ ᑐᒡᓕᐊᓂ ᑲᐱᔭᐅᓚᐅᖅᑐᓄᑦ. ᓴᙱᓂᖅᓴᒥᒃ ᑲᐴᑎᒃᑲᓐᓃᑦ (ᐱᖓᔪᖓᓂ ᑲᐴᑦ) ᓱᓕ ᐊᑐᐃᓐᓇᐅᓂᐊᖅᐳᑦ ᓄᓇᕗᒻᒥᐅᓕᒫᓄᑦ 12-ᒥᑦ ᐅᖓᑖᓂᓪᓗ ᐅᑭᐅᓕᖕᓄᑦ.

ᑖᒃᑯᐊ ᑲᐴᑎᒃᑲᓐᓃᑦ ᓴᐳᔾᔭᐅᔾᔪᑕᐅᒃᑲᓐᓂᕐᓂᐊᖅᐳᑦ ᓄᕙᕐᔪᐊᕐᓇᖅ-19−ᑖᖅᑕᐃᓕᒪᓂᕐᒧᑦ. ᖃᖓᑦᑎᐊᖅ ᓇᓗᓇᐃᕈᑕᐅᔪᓂᑦ ᑕᑯᓚᐅᖅᐳᑦ ᑲᐴᑎᐅᑉ ᐊᑑᑎᖃᕐᓂᖓ ᓄᕙᕐᔪᐊᕐᓇᖅ-19 ᖃᓂᒪᓐᓇᒧᑦ ᓄᖑᑉᐸᓪᓕᐊᓕᖃᑦᑕᕐᒪᑦ ᖃᑯᒍᙳᖅᖢᒍ. ᓄᕙᕐᔪᐊᕐᓇᖅ-19−ᒧᑦ ᑲᐱᔭᐅᔪᒪᔪᑦ ᐃᓂᒃᓴᓕᐅᕈᓐᓇᖅᐳᑦ ᐋᓐᓂᐊᕐᕕᖏᓐᓄᑦ ᐅᖁᒪᐃᓐᓂᕐᓂᐊᕐᕕᖕᒧᓪᓘᓐᓃᑦ ᐅᖄᓚᓗᑎᒃ.

ᓱᓕ ᒪᑐᐊᖅᓯᒪᐃᓐᓇᕆᐊᖃᖅᐳᑦ ᐋᓐᓂᐊᕐᕕᖕᓂ ᐊᑐᖅᑕᐅᔭᕆᐊᖃᖅᖢᑎᒡᓗ ᑲᐱᔭᐅᔭᖅᑐᖅᑐᓂᑦ. ᓯᕗᓪᓕᖅ ᑐᒡᓕᐊᓗ ᓄᕙᕐᔪᐊᕐᓇᖅ-19−ᒧᑦ ᑲᐴᑎ ᓱᓕ ᐊᑐᐃᓐᓇᐅᕗᖅ ᓄᓇᕗᒻᒥᐅᓕᒫᓄᑦ ᑕᓪᓕᒪᓂᒃ ᐅᖓᑖᓂᓪᓗ ᐅᑭᐅᓕᖕᓄᑦ.

###

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:

ᑖᓇᕋᐃ ᓴᒧᕕᐅᓪ
ᑐᓴᒐᒃᓴᓕᕆᔨᓄᑦ ᖃᐅᔨᒪᔨᑕᖅ
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ
867-975-5712
dsommerville1@gov.nu.ca